Jenɛɛsë 17 - Kuö Dëdrä Jenɛɛsë Rutë

Nyɔsʋa 'cicia' Abramëa 'nyrɩ Abraamë 'lɩ

¹ Abramë kä käa' ‑sɩa ‑glʋɩmlɔɔ ‑sɩ ‑pʋ ‑sɩ ‑uunmlɔɔ nɩ, Yawe 'tɔrɔ kä 'ɔɔn 'nyü ‑gälɩ 'ɔnya ‑gbala 'ɔɔn: «'Mɔɔ bä Ɛlë Sadaii. 'Nyɛrɛ 'na 'papawiia 'mlɩ, ‑nyɔɔ 'nyɩ 'kplara ‑mɩ wii 'plɔʋ!

² 'Nyaa ‑mɔ ‑bɛ 'mɔɔa ‑tɔrʋpɩɔ kuö 'paa, 'kä 'nyaa 'iin nʋ ‑na 'jüa 'jü 'mä ‑sümlö 'kasa.»

³ Abramë nya blö ‑tʋtʋ ‑gälɩ 'ɔnya ‑gbri 'wli 'kä; Nyɔsʋa ‑nëma:

⁴ «‑Jää 'na kuö 'nyraa ‑mɔ 'paa': ‑nya 'plä 'kɔkɔmlɛa tʋ bäa.

⁵ ‑Na 'nyrɩ ‑ka ‑nëmä Abramë ‑a bä, ‑maa Abraamë ‑nëmä ‑mlatɩ bä; 'be 'nyaa ‑mɩ 'plä 'kɔkɔmlɛa tʋ 'lɩ nrörö.

⁶ 'Nyaa 'ia 'sa nʋa ‑na 'jüa 'jü 'mä ‑sümlö ‑gböösa. 'Nyaa 'üün 'plä 'kɔkɔmlɛ 'lɩnröröa 'kä ‑nya 'kɩɩɩ ‑gu.

⁷ 'Nyaa ‑mɔ ‑bɛ 'mɔɔa ‑tɔrʋpɩɔ 'na kuö ‑tʋa, nyra ‑na 'jüa 'jü, nyra 'üa 'jüa 'jü, 'plɔʋ ‑plɔʋa ‑gʋ. 'Asɩ 'n bäa' ‑na Nyɔsʋa, 'asɩ 'n bä bɩa ‑na 'jülü ‑gua' nyra ‑mülü nëmäa' ‑mɩ dɛrɩ ‑glooro, 'üa Nyɔsʋa.

⁸ ‑Tʋtʋlʋ kʋa' ‑pɩ, u kä ‑gälɩ bäa' nyɔtugbanyɔɔ nɩ, Kanaan a ‑taa ‑tʋtʋlʋa 'fɩɔ 'nyaa ‑mɩ 'uun ‑nyɩa ‑mɔ ‑bɛ ‑na 'jüa 'jüa 'jü. 'Ünya 'uun käa 'plɔʋ ‑plɔʋa ‑gʋ, 'kä 'nyaa 'üa Nyɔsʋa bä.»

⁹ Nyɔsʋa nya ‑gbala 'sɔɔwʋ Abraamë: «‑Mɔlɔ nɩ, ‑nyra ‑na 'jüa 'jü nyra 'üa 'jüa 'jü kä 'amä 'lɩ 'na kuö ‑träärä.

¹⁰ ‑Jää 'na kuölä 'amäa' 'lɩträärä: nyɩbɛjülü kä 'fɩɔ bäa' 'ana ‑tɔrʋpɩɔ kä 'ümä 'bölö.

¹¹ 'A kä 'amä 'bölö, 'a 'bölökʋlʋ 'uu bä kuöa tie ana ‑tɔrʋpɩɔ.

¹² 'Asɩ 'imä 'lɩpɛprɛ 'plɔʋplɔʋ 'ana 'lɩgoglokʋ. Nyɩbɛjʋ 'kä 'ɔmä 'bölö 'ɔa jrüü ‑uuntääa ‑srɩ 'lɩ. 'I kä 'imä ‑na nyuköli nrörö: nyɔtugbanyɔɔ ‑sua' ɔnyɩa' ‑na nyɔɔ bä, ‑bɛ 'ɔ bäa' ‑na nyükölia ‑geei kä bɩa 'ɔmä 'bölö.

¹³ ‑Geei 'ü ‑glooroa' ‑na ‑nyɛɛ nyra ‑geeilɛ ‑sua', 'ü kä 'ümä bɩa 'bölö. 'Asɩ 'na kuö 'mä 'ana 'jajɛ 'lɩ bä ‑beere 'plɔʋplɔʋa kuö.

¹⁴ Nyɩbɛrʋlɔ ‑nëmäa' 'bölö, 'ü kä 'ümä 'ɔɔn ‑gbööli prɛ, 'be 'ɔnyɩ 'lɩ 'na kuö ‑a ‑träärä.»

¹⁵ Nyɔsʋa nya ‑gbala 'sɔɔwʋ Abraamë: «‑Ka ‑nëmä ‑na 'ŋlʋʋ Sarai ‑a were; 'ɔɔ bä mlatɩ Sara.

¹⁶ 'Nyaa 'ɔɔn 'nɩ 'paa, 'kä 'nyaa 'ɔɔn kälɩ ‑srörö 'kä 'nyaa ‑mɩ nyɩbɛjʋ ‑nyɩ. 'Nyaa 'ɔɔn 'nɩ 'paa 'kä 'ɔnya 'plä ‑gu, 'ɔa ‑guguö 'lɩ 'blɩ 'kɔkɔmlɛa 'kɩɩɩ 'mä sɔrɔ.»

¹⁷ Abraamë nya blö ‑tʋtʋ ‑gälɩ 'ɔnya ‑gbri 'wli 'kä 'ɔnya si. 'Ɔnya 'pala plɛklɩ wii 'ɔ ‑nëma: «Nyɔɔ nyaa' ‑sɩa ‑glʋɩgböö (100) ‑si nɩ, 'jʋ 'plɛɛ 'ɔ ‑ka 'mrɛɛ 'ɔmä ‑gu le? Sara nya kä ‑sɩa ‑glʋɩmlɔɔ ‑bɛ ‑pʋ, 'jʋ 'plɛɛ 'ɔ ‑ka 'mrɛɛ 'ɔmä ‑gu le?»

¹⁸ 'Ɔnya ‑gbala Nyɔsʋa ‑maa: «'N bibie ‑mɩ, ‑gäälä Isëmaɛɛlë 'nyiöli!»

¹⁹ 'Iibäa' Nyɔsʋa nɩ: «‑Mä 'sɩ 'i 'nyɩ bä, ‑na 'ŋlʋʋ Sara nya ‑mɩ nyɩbɛjʋ ‑nyɩa, 'kä ‑nya 'ɔɔn Isaakë 'dara. 'Ɔɔ nyra 'mɔɔ 'mä 'na kuö 'pa; kuölä 'mäa' 'lɩwlɛ 'plɔʋplɔʋa ‑gʋ nyra 'ɔa 'jüa 'jüa ‑gʋ.

²⁰ Dɛɛlɛ bäa' Isëmaɛɛlë nɩ, 'n 'nu ‑na bibiekʋ 'wli. 'Nyaa 'ɔɔn 'nɩ 'paa 'kä 'nyaa 'ɔɔn 'jü 'kɔkɔmlɛ ‑nyɩ. 'Nyaa 'ɔa 'lɩgoglokʋ ‑gälɩ 'paplaa ‑gböösa. 'Ɔnya 'cifu ‑pʋ ‑bɛ 'sɔɔ ‑gua. 'Nyaa 'ɔɔn 'plä kpaköa tʋ 'lɩnröröa.

²¹ ‑Maa Isaakë, 'nyraa 'ɔɔn 'mä 'na kuö 'pa, 'jʋlɔ Sara nëmäa' ‑mɩ ‑nyɩ ‑sʋlʋ jöa' 'ia 'samaa 'taɩn 'doolʋa 'mlɩ.»

²² 'Ɔ bɩaa' Abraamë wii ‑gbapalakʋ nɩ, Nyɔsʋa nya tɩ ‑plɩɩ 'ɔɔn 'ɔnya 'jra.

²³ 'Ia ‑srɩ 'doolʋa 'mlɩ nɩ, Abraamë nya dɔrɔ 'ɔa 'jʋ Isëmaɛɛlë 'wʋ, nyra nyüülü kä 'fɩɔ 'ü ‑glooroa' 'ɔa ‑nyɛɛ, ü kä 'fɩɔ 'ɔ ‑sua', ü kä 'fɩɔ bäa' nyɩberü, 'ɔnya 'bö 'ümɩ 'sɩrɩ Nyɔsʋa 'daaa' ɔ nʋa'.

²⁴ Abraamë kä kä ‑sɩa ‑glʋɩmlɔɔ ‑bɛ ‑pʋ ‑sɩ ‑uunmlɔɔ 'ünya 'bö 'ɔmɩ.

²⁵ 'Ɔa 'jʋ Isëmaɛɛlë kä kä ‑sɩ ‑pʋ ‑bɛ tää 'ünya 'bö 'ɔmɩ.

²⁶ 'A ‑srɩ 'doolʋa 'mlɩ 'ü 'bö Abraamë nyra 'ɔa nyɩbɛjʋ Isëmaɛɛlë.

²⁷ Nyüberülü kä 'fɩɔ bäa' 'ɔa ‑nyɛɛ, 'palɩ ü 'ü ‑glooroa' 'ɔa ‑nyɛɛ nyra ‑mülü 'ɔ ‑srooroa' nyɔtugbabre, 'ü 'bö 'üa 'fɩɔ, 'ü nyra 'ɔɔn 'sɔ.