Jenɛɛsë 15 - Kuö Dëdrä Jenɛɛsë Rutë

Kuölä Nyɔsʋa nyra Abramë 'paa'

¹ 'I ‑sia' nɩ, Yawea 'papawii nya 'tɔrɔ Abramë 'nyü ‑gälɩ, 'ɔ ‑nëma: «Abramë, ŋalɛ 'nyɩ 'bla ‑mɩ! 'Mɔɔ bä ‑na tafudɛɛlɛ kakaa' dii 'klɩ. 'Mɔɔ bä ‑na 'pɛpɛɛdɛɛlɛ sia' 'wʋ!»

² 'Iibäa' Abramë: «'Pläkänyɔɔ Yawe, dɛplɛɛ ‑nëmä 'mɩ ‑nyɩ le? 'Be 'nyɩ 'jʋ ‑a kä, 'a Damasëa Eliesɛɛ, nëmä 'na ‑jaaa ji.

³ Abramë ‑nëma 'sɔɔwʋ: ‑Nyɩ 'mɩ 'jʋ 'doo ‑a ‑nyɩ; 'ii känyrɩ, 'na ‑gböölia 'jrʋpafɛnyɔɔ nëmä 'na ‑jaaa ji.»

⁴ Yawe ‑nëma: «‑Wooo, ‑mää 'ɔɔ ‑nëmä ‑na ‑jaa ji! ‑Maa ‑mɔlɔ ‑na 'mʋgbɛ 'mäa' ‑gu 'ɔɔ nëmä ‑na ‑jaaa ji.»

⁵ Nyɔsʋa faa' 'ɔɔn ‑fälɩ nɩ, 'ɔnya ‑gbala 'ɔɔn: «Tɛ cɛlɩ, ‑ama 'mrɛɛ, ‑täsä särëlü bäa' 'lɩ!» 'Ɔ ‑nëma 'sɔɔwʋ: «'Asɩ ‑na 'jüa 'jüa 'jü 'mä ‑srɩɩ ‑sümlö.»

⁶ Abramë nya toro Yawe plɛ, 'ia ‑gʋ Yawe 'daa 'ɔ ‑gäklɩ.

⁷ 'Ɔnya ‑gbala 'ɔɔn ‑maa: «Yawe 'n bä. 'Mɔɔ 'ba ‑mɩ Urëbätä, Kalëdeenyüüa 'bre, 'nyaa ‑nyɩ ‑mɩ 'plälä kä ‑gälɩ kʋa' 'ään ‑mä 'ää kä.»

⁸ Abramë nya 'bete 'ɔɔn: «'Pläkänyɔɔ Yawe, ‑asɩ 'nyaa 'saa jre 'sɩrɩ 'mɔɔ käa' 'ämɩ le?»

⁹ Yawe nya ‑gbala 'ɔɔn ‑maa: «Ja 'mɩ bruuŋlʋʋ käa' ‑sɩ tää, wlugɔ käa' ‑sɩ tää, ‑bablʋa käa' ‑sɩ tää, 'klʋɛɛa ‑sögö nyra ‑sögö jɔ.»

¹⁰ Abramë nya ja 'ɔɔn 'ia mlaalüa 'fɩɔ, 'ɔnya 'böbö 'üün 'klüü 'sɔɔrɔ 'sɔɔ 'lɩ, 'ɔnya tɛtrɛ 'üa 'klüülü 'klɩ. ‑Maa 'ɔnyɩ nyisielɩ ‑tɩa ‑a 'böblö.

¹¹ ‑Kɔkëpanë nya 'cere mlaalü ‑gälɩ, ‑maa Abramë prɛ 'üün.

¹² 'Jrʋa 'pipitaɩn 'lɩ nɩ, 'mʋmʋ kpaku nya 'bla Abramë, 'jöjrüükpü bäa' ŋalɛ 'wʋ nya 'cere 'ɔɔn ‑gälɩ.

¹³ Yawe nya ‑gbala Abramë: «Jre 'iin 'sɩrɩ ‑na 'jüa 'jü 'mäa' nyɔtugbanyüü bä, 'blɩlɩ 'nyɩa' 'üa 'blɩ bä 'ia ‑gälɩ. 'Ünya ‑goou bäa, 'kä nyüü nya 'üün ‑gbi ‑gba nʋ ‑sɩa ‑duu (400).

¹⁴ ‑Maa 'nyaa 'ia 'blɩlɩ 'pɔnɩa, 'kä 'ünya 'lɩ 'ia 'bɩɔ 'kɔkɔmlɛ 'ba, 'kä 'ünya 'lɩ 'cie.

¹⁵ ‑Mɔlɔ nɩ, ‑na plɛ ‑gälɩa 'fɩɔ nya ‑pioo bäa, 'kä ‑nya ‑na tʋɩɩa ‑nyɛɛ mi, ‑na 'wli nya 'pɔlɔa ‑gböösa 'kä ‑nya ‑träärä dɔrʋsa ‑na 'klɩbɩabɩakʋ 'lɩ nya ‑träärä.

¹⁶ ‑Na 'jüa 'jü ma ‑si ‑sɩa ‑duu nɩ (400), 'ünya ‑tɛ dɛrɩblööa; 'be Amɔritënyüüa ‑balʋ ‑kaaŋlʋ 'ua 'tɔfa 'wʋ 'tɔ.»

¹⁷ 'Jrʋ mia' ‑bɛ 'jöjrüükpü paa' nɩ, kapu nyra nyrʋgbɔlʋ nya 'tɔ 'inya ‑srörö mlaa 'klüülü tɛtrɛa' 'klɩ, 'üa ‑tɔrʋpɩɔ.

¹⁸ 'A 'ia jrüülüa 'mlɩ Yawe nyra Abramë nya 'pa kuö. 'Ɔnya ‑gbala Abramë ‑maa: «‑Na 'jüa 'jü 'n ‑nyɩ ‑taa 'blɩlɩ: sɔ Ejiipëtëa 'nie ‑gba ‑a ‑mi 'nie kpakilɛ 'ü 'daraa' Eflatë 'ɛa ‑gba.

¹⁹ 'Blɩlɩ bäa' Keninyüü, Kenisitënyüü, Kademɔniinyüü,

²⁰ Itinyüü, Perisiitënyüü, Lefaimënyüü,

²¹ Amɔritënyüü, Kanaanyüü, Gegasitënyüü, nyra Jebusitënyüü.»