Jenɛɛsë 13 - Kuö Dëdrä Jenɛɛsë Rutë

¹ Abramë nya sɔ Ejiipëtë 'ɔnya mi Nɛgɛvëa ‑tʋtʋ ‑gälɩ. 'Ɔ fa 'ɔa 'ŋlʋʋ, 'ɔa käkädiia 'fɩɔ nyra Lɔɔtë.

Abramë nyra Lɔɔtë

² Abramë ji kä 'bɩɔ ‑gböösa. 'Ɔ ma kä mlaa, nyra ‑sika.

³ 'Ɔma 'nyɛnyɛ 'kä 'ɔ 'prere ‑plɩɩlɩ ‑gbia jräa' 'ɔɔn. Nɛgɛvë 'ɔ sɔ 'ɔnya 'tɔ Betɛɛlëa ‑plɩɩlɩ ‑kätɩ 'ɔ pala käa' 'ɔa mlafia ‑tete. Bɛtɛlë nyra Aibätäa ‑tɔrʋpɩɔ,

⁴ 'ii 'ɔ 'pala kä ‑gbɔsatöwlö. 'A ‑plɩɩ 'ɔ 'nyüglö 'ɔnya ‑pʋpʋa Yawe.

⁵ Lɔɔtëlɔ kä 'mʋgbɛ falaa' Abramë, ma kä kä bɩa mlaa, bruu nyra ‑tetu.

⁶ 'Üa käkädiia ‑sümlökʋa ‑gʋ nɩ, 'ünyɩ 'mrɛɛ ‑a 'mrɛɛ 'ü kʋ ‑pɩɔ 'doo 'wʋ 'be ‑tʋtʋlʋa ‑gälɩa 'sipi 'nyɩa' ‑sümlö.

⁷ 'Ia ‑gʋ, ‑yrɛ nya blö Abramëa mlaagbanyɛrɛnyüü nyra Lɔɔtëa mlaagbanyɛrɛnyüüa ‑tɔrʋpɩɔ. ‑Bɛ 'ia 'taɩn 'lɩ Kanaanyüü nyra Perisiitënyüü kʋ bɩa ‑tʋtʋlʋa ‑gälɩ.

⁸ 'Ii känyrɩ Abramë nya ‑gbala Lɔɔtë ‑maa: «‑Yrɛ 'nyɩ bä 'na mlaagbanyɛrɛnyüü nyra ‑na nüa ‑tɔrʋpɩɔ, 'be ‑wlajü a bä.

⁹ ‑Jää, 'blɩa 'fɩɔ bä ‑na 'klɩ. 'N bibie ‑mɩ fa ‑na ‑pɩɔ! ‑Ama fa kʋmla 'lɩ, 'nyaa 'dupa 'lɩ faa; ‑ama fa 'dupa 'lɩ nyaa kʋmla 'lɩ faa.»

¹⁰ Lɔɔtë nya dɔrɔ 'ɔa 'wli 'wʋ, 'ɔnya 'jä ‑tʋtʋlʋ bäa' Jurëdɛɛn a 'niea 'pɛlɩ. 'Nɩ bä 'ia ‑tʋtʋpɛlɛ ‑gälɩ, ‑a ‑tɔɔ Soarë. 'I ‑beere Yawea putu. 'Ia 'taɩn 'lɩ Yawe ‑kaaŋlʋ Sodɔɔmë nyra Gomɔɔrë ‑gbloo; 'i ‑beere kä bɩa ‑tʋtʋlʋ bäa' Ejiipëtëa 'nie ‑gba.

¹¹ Lɔɔtë nya dɔrɔ ‑tʋtʋpɛlɛ kä 'fɩɔ 'troroa' Jurëdɛɛn 'klɩ, 'ɔnya fa 'jrʋa 'wʋsɔrɔfaa 'pɛlɩ 'klɩ. 'Asɩ 'ü nʋ 'ünya sɔsrɔgba.

¹² Abramë 'tɩɔ Kanaan a 'bre, ‑maa Lɔɔtëlɔ nɩ, 'ɔnya mi bätëlë bäa' 'nielɛ bäa' Jurëdɛɛn a 'pɛlɩa ‑tʋtʋ ‑gälɩ. 'Ɔnya 'pa 'ɔa ‑tetu papaa 'ɔnya 'tɔ Sodɔɔmë ‑gba.

¹³ ‑Bɛ Sodɔɔmëa nyüüa nʋnʋgbi bʋbɔ, 'ü ma nö Yawe ‑balʋ kpaku ‑gba.

¹⁴ Lɔɔtë sɔa' Abramë ‑gba nɩ, Yawe nya ‑gbala Abramë: «'Nyüglö ‑plɩɩlɩ ‑bäa', dɔrɔ 'wli 'wʋ, tɛ 'jrʋa 'wʋsɔrɔfaa kʋmla 'pɛlɩ, ‑a mi 'ua 'wʋsɔrɔfaa 'dupa 'pɛlɩ, nyra 'jrʋa 'wʋsɔrɔfa 'wʋ, ‑a mi 'ua 'prerefa 'wʋ.

¹⁵ 'Plälä kä 'fɩɔ ‑jääa' 'wʋ, 'n ‑nyɩ ‑mɩ 'ään, 'n ‑nyɩ 'ään ‑na 'jüa jüa 'jü 'plɔʋplɔʋa ‑gʋ.

¹⁶ ‑Na 'jüüa 'jüü, nya ‑sümlöa ‑beere ‑tʋtʋa 'mlʋ. Nyɔɔ ma 'mrɛɛ 'ɔmä ‑tʋtʋa 'mlʋ ‑täsä nɩ, jresaa ‑na 'lɩgoglokʋ nya bɩa ‑täsräa.

¹⁷ Sɔ 'wʋ, ‑pi ‑a ‑jää 'blɩa tʋŋlɔdɛɛ nyra 'ia 'wʋflɛrɛdɛɛ, 'be 'nyaa ‑mɩ 'ään ‑nyɩa.»

¹⁸ Abramë nya 'sa 'ɔa ‑tetu 'kou, 'ɔnya kʋ Eblɔɔn bätä, Mamirea tiili 'ü 'daraa' terebitëtii, 'ia ‑gba. 'A ‑plɩɩ 'ɔ 'pala ‑gbɔsatöwlö Yawea ‑gʋ.