Jenɛɛsë 12 - Kuö Dëdrä Jenɛɛsë Rutë

Nyɔsʋa ‑gbalaa' Abramë ɔ cie 'ɔa 'blɩ ‑gälɩ

¹ Yawe nya ‑gbala Abramë: «Sɔ ‑na 'bre nyra ‑na nyüü ‑gba, sɔ ‑na tʋa ‑gbööli, 'kä ‑mö 'blɩlɩ 'nëmäa' ‑mɩ srara 'ia 'mlɩ.

² ‑Mɔ kälɩ 'nëmä ‑srörö 'mä ‑glügbö ‑kpakö 'pa. 'Nyaa ‑mɩ 'nɩ 'paa, 'kä 'nyaa ‑na 'nyrɩ 'bʋala; 'kä ‑nya 'papanɩa sɔrɔfa bä.

³ 'Nyaa nyüülü 'paa' ‑mɩ 'nɩ, 'nɩ 'paa, 'kä 'nyaa nyüülü busua' ‑mɩ, busu. ‑Mɔ 'nëmä kälɩ ‑srörö 'mä ‑tʋtʋ ‑gälɩa ‑glügbüa 'fɩɔ 'nɩ 'pa.»

⁴ 'Sɩrɩ Yawe ‑gbalaa' 'ɔɔn nɩ, Abramë nya mi, 'ɔɔ ‑bɛ 'ɔa ‑wlajʋa 'kujʋ Lɔɔtë kɔsɔ. 'Taɩn 'lɩ Abramë 'ciea' Araabätä 'ɔ kä ‑sɩa ‑glʋɩtää ‑sɩ ‑gböö.

⁵ Abramë 'mäa' mi, 'ɔ fa 'ɔa 'ŋlʋʋ Sarai, 'ɔa ‑wlajʋa 'jʋ Lɔɔtë, 'üa käkädii nyra 'jrʋpafɛnyüülü kä 'fɩɔ 'ü 'järäa' Araabätä. 'Ünya mi Kanaan a ‑tʋtʋ ‑gälɩ.

⁶ Abramë 'nyɛ 'ia ‑tʋtʋ ‑gälɩ 'nyɛnyɛ 'ɔnya 'tɔ ‑plɩɩlɩ 'ü 'daraa' Sikɛmë, ‑plɩɩlɩ Morea terebitëtuu bäa'. 'Ia 'taɩn 'lɩ, Kanaanyüü ‑ka kʋ kä 'ia ‑tʋtʋlʋa ‑gälɩ.

⁷ Yawe nya 'tɔrɔ Abramë 'klɩ, 'ɔ ‑nëma: «‑Na 'jüa 'jü 'nëmä ‑taa 'blɩlɩ ‑nyɩ.» Abramë nya 'pala ‑plɩɩlɩ ‑gbɔsatöwlö 'ɔmä 'lɩ Yawelɔ 'tɔrɔa' 'ɔɔn 'klɩ ‑pʋpʋa.

⁸ 'Ɔnya sɔ ‑plɩɩlɩ 'ɔnya mi 'dëgbëa 'pɛlɩ ‑nyɛɛ Bɛtɛlëbätä, 'jrʋa 'wʋsɔrɔfa 'wʋ. Bɛtɛlëbätä bä 'jrʋa 'pifaa 'pɛlɩ. Aibätä bä 'jrʋa 'wʋsɔrɔfaa 'pɛlɩ. 'Ɔnya 'pala ‑plɩɩlɩa ‑tɔrʋpɩɔ 'ɔa mlafua ‑tete, 'a ‑plɩɩlɩ 'ɔ 'pala 'klaa Yawea ‑gbɔsatöwlö; 'ɔnya ‑pʋpʋa Yawe.

⁹ 'I ‑sia' nɩ, Abramë nya fa 'ɔa 'nyʋfɔ, ‑bɛ 'ɔ mö Nɛgɛvëa ‑tʋtʋa 'pɛlɩ. ‑Maa ‑plɩɩlɩ ‑gbia jräa' 'ɔɔn 'ii 'ɔ 'prere.

Abramë mia' Ejiipëtë

¹⁰ ‑Jää ‑gbëkananie pala 'blɩlɩ ‑gälɩ. Abramë nya fa Ejiipëtë jrüü; 'be ‑gbëkananielɛ pala käa' ‑tʋtʋlʋa ‑gälɩ ‑sɔɔrɔ kä 'wʋ.

¹¹ 'Ümäa' Ejiipëtë pa nɩ, 'ɔnya ‑gbala 'ɔa 'ŋlʋʋ Sarai ‑maa: «Tɛlɩ, ‑naa 'mʋfasa.

¹² Ejiipëtënyüü ma 'jä ‑mɩ, 'ünya 'daa: ‹‑Jää 'ɔa 'ŋlʋʋ›, 'kä 'ünya 'mɩ 'bla. ‑Maa ‑mɔlɔ nɩ, 'ü ‑nëmä ‑mɩ ‑a 'bla, 'ünya ‑mɩ ‑wälɩ 'cɛrɛa.

¹³ 'Ii känyrɩ, 'n bibie ‑mɩ, 'daa 'na ‑wladia bä ‑bɛ 'imä 'mɩ kälɩ 'nara. ‑Ama nʋ 'imɩ nɩ, 'na 'klä nya 'lɩmlɩwʋa.»

¹⁴ Abramë 'tɔa' Ejiipëtë nɩ, Ejiipëtënyüü nya 'jä 'sɩrɩ 'ŋlʋʋlɔ 'naa' 'mʋfasa.

¹⁵ Faraɔɔn a nyüü kpakü 'jäa' 'ŋlʋʋlɔ 'ünya 'bʋala 'ɔɔn 'ünya ‑gbala 'iin Faraɔɔn. 'Ünya fa 'ɔɔn Faraɔɔn a ‑gbööli.

¹⁶ 'Ɔa ‑gʋ Faraɔɔn nya nʋ Abramë 'mʋfagbi ‑gba. 'Ɔ ‑nyɩ Abramë ‑bablëë, mlaa, bruu, 'jrʋpafɛnyüü nyra 'jrʋpafɛyerü, ‑sʋbrea nyɩberü nyra 'üa 'ŋlëgë, nyra samooɩɩ.

¹⁷ ‑Maa Abramëa 'ŋlʋʋ Saraia ‑gʋ Yawe nya ja 'kple 'ɛnya kla Faraɔɔn nyra 'ɔa ‑gböölia nyüü.

¹⁸ 'Ii känyrɩ Faraɔɔn nya we Abramë 'ɔnya 'bete 'ɔɔn: «Wii 'plɛɛ ‑ja 'mɩ ‑gba le? Dɛplɛɛ kä ‑gʋ ‑nyɩ 'mɩ ‑gbala 'sɩrɩ 'ɔ bäa' ‑na 'ŋlʋʋ le,

¹⁹ ‑bɛ ‑gbala 'mɩ ‑maa ‑na ‑wladia 'ɔ bä le? 'A 'ia ‑gʋ 'n dɔrɔ 'ɔɔn 'wʋ 'ɔmä 'na 'ŋlʋʋ bä 'la! ‑Jää ‑na 'ŋlʋʋ, dɔrɔ 'ɔɔn 'wʋ 'kä 'a sɔ ‑pɩ!»

²⁰ Faraɔɔn nya ‑nyɩ 'ɔa nyüü ‑dɔ 'ümä Abramë ‑bɛ 'ɔa 'ŋlʋʋ fala 'ümä mi, 'palɩ 'üa käkädiia 'fɩɔ.