Jenɛɛsë 11 - Kuö Dëdrä Jenɛɛsë Rutë

Babɛlëa 'wlitʋŋlɔnyuku kpaku

¹ ‑Tʋtʋ ‑gälɩa nyüüa 'fɩɔ ma 'paa 'papawii 'doo.

² 'Ü sɔa' 'jrʋa 'wʋsɔrɔfa 'wʋa 'pɛlɩ nɩ, 'ünya jrä 'käblatʋtʋ ‑gälɩ, 'blɩlɩ 'ü 'daraa' Sinarëa 'a 'mlɩ. 'A 'i 'ü kʋ.

³ 'Ünya wewrelɩ: «'Ba ji! A nʋ ‑tʋtʋa ‑briikë 'kä a papla 'üün 'seri.» 'A ‑briikëlü 'üü bä 'üa 'täkë, 'kɔlëtaa nya bä 'üa ‑simiti.

⁴ 'Ü ‑nëma bɩa: «'Ba ji amä ana bätä 'pa, 'kä a 'paa 'wlitʋŋlɔnyuku, u 'mäa' cɛ ‑gbafɛ. 'Kä a ‑nyɛɛ ana nyufa 'nyrɩ, a ‑pɩ ‑tʋtʋa 'fɩɔ ‑gälɩ 'kä ‑gbaala.»

⁵ Yawe nya 'cie 'ɔnya ji bätälä 'ü 'paaa' 'jä nyra 'wlitʋŋlɔnyukulu 'ü 'paaa' 'jä.

⁶ 'Ɔ ‑nëmä: «‑Jää! 'Ü 'a ‑glügbö 'döö bä, ‑bɛ 'ü 'paa 'papawii 'doo. ‑Jää wii 'ü nöa', 'ü 'mrɛɛ ü nʋ wiili kä 'fɩɔ 'üa plɛɛ 'bataa', dɛɛ ‑nëmä 'üün 'klɩ ‑a ka!

⁷ A 'cie! A mi a 'cakla 'üa 'papawii 'lɩ, 'ü ‑ka ‑pɩ 'wlinönrö!»

⁸ Yawe nya ‑gbaala 'üün ‑tʋtʋa 'fɩɔ ‑gälɩ 'kä, 'ünya 'nyüglö bätäläa 'papakʋ.

⁹ 'A 'ia ‑gʋ nyüü ‑nyɩ bätälä Babɛlë 'nyrɩ, 'be 'a ‑plɩɩ Yawe 'cakla ‑tʋtʋ ‑gälɩa 'papawiia 'fɩɔ 'lɩ, 'ɔnya ‑gbaala nyüülüa 'fɩɔa ‑tʋtʋa 'fɩɔ ‑gälɩ 'kä.

SƐMËA WII 11.10-26

¹⁰ ‑Jäsɩ Sɛmëa 'jüa 'jüa wii nʋa' ‑sisidɛɛ. 'Nʋŋlʋkpaku 'daa', ‑bɛ 'i ‑sia' ‑sɩ 'sɔɔ nɩ, 'a ‑plɩɩ Sɛmë 'jä ‑sɩa ‑glʋɩgböö (100) 'ɔnya ‑gu Arëpasadë.

¹¹ Sɛmë ‑gua' Arëpasadë nɩ, 'ɔ ‑si ‑sɩa ‑duu ‑glʋɩgböö (500), 'ɔ ‑gu bɩa nyɩbɛjü nyra 'ŋlëkayerü.

¹² Arëpasadë kä ‑sɩ ‑glʋ ‑sɩ ‑pʋ ‑sɩ ‑gböö 'ɔnya ‑gu Sala.

¹³ 'Ɔ ‑gua' Sala nɩ, 'ɔ ‑si ‑sɩa ‑duu ‑sɩ tää (403), 'ɔ ‑gu nyɩbɛjü nyra 'ŋlëkayerü bɩa.

¹⁴ Sala kä ‑sɩ ‑glʋ ‑bɛ ‑pʋ 'ɔnya ‑gu Ebɛɛrë.

¹⁵ 'Ɔ ‑gua' Ebɛɛrë nɩ, 'ɔ ‑si ‑sɩa ‑duu ‑sɩ tää (403), 'ɔ ‑gu nyɩbɛjü nyra 'ŋlëkayerü bɩa.

¹⁶ Ebɛɛrë kä ‑sɩ ‑glʋ ‑sɩ ‑pʋ ‑sɩ mlɔɔ 'ɔnya ‑gu Pɛlɛgë.

¹⁷ 'Ɔ ‑gua' Pɛlɛgë nɩ, 'ɔ ‑si ‑sɩa ‑duu ‑sɩ ‑glʋ ‑bɛ ‑pʋ (430), 'ɔ ‑gu nyɩbɛjü nyra 'ŋlëkayerü bɩa.

¹⁸ Pɛlɛgë kä ‑sɩ ‑glʋ ‑bɛ ‑pʋ 'ɔnya ‑gu Reu.

¹⁹ 'Ɔ ‑gua' Reu nɩ, 'ɔ ‑si ‑sɩa ‑glʋɩ pʋ ‑sɩ ‑uunmlɔɔ (209). 'Ɔ ‑gu nyɩbɛjü nyra 'ŋlëkayerü bɩa.

²⁰ Reu kä ‑sɩ ‑glʋ ‑sɩ ‑pʋ ‑sɩ 'sɔɔ 'ɔnya ‑gu Salukë.

²¹ 'Ɔ ‑gua' Salukë nɩ, 'ɔ ‑si ‑sɩa ‑glʋɩpʋ ‑sɩ ‑uunsɔɔ (207). 'Ɔ ‑gu nyɩbɛjü nyra 'ŋlëkayerü bɩa.

²² Salukë kä ‑sɩ ‑glʋ ‑sɩ ‑pʋ 'ɔnya ‑gu Nakɔɔrë.

²³ 'Ɔ gua' Nakɔɔrë nɩ, 'ɔ ‑si ‑sɩa ‑glʋɩpʋ (200). 'Ɔ ‑gu nyɩbɛjü nyra 'ŋlëkayerü bɩa.

²⁴ Nakɔɔrë kä ‑sɩ ‑glʋ ‑bɛ ‑uunmlɔɔ 'ɔnya ‑gu Tɛra.

²⁵ 'Ɔ ‑gua' Tɛra nɩ, 'ɔ ‑si ‑sɩa ‑glʋɩgböö ‑sɩ ‑pʋ ‑sɩ ‑uunmlɔɔ (119). 'Ɔ ‑gu nyɩbɛjü nyra 'ŋlëkayerü bɩa.

²⁶ Tɛra kä ‑sɩa ‑glʋɩtää ‑bɛ ‑pʋ, 'ɔnya ‑gu Abramë, Nakɔɔrë nyra Araan.

NYƆSƲA NYRA ABRAMË 'PALƖ KUÖ 'ƆMÄ 'ƆƆN KÄLƖ ‑SRÖRÖ 'ƆMÄ ‑GLÜGBÜA 'FƖƆ 'NƖPA 11.27–50.26 TƐRAA 'JÜA 'JÜA WII 11.27–25.11

²⁷ ‑Jäsɩ Tɛraa 'jüa 'jüa wii nʋa' ‑sisidɛɛ: Tɛra ‑gu Abramë, Nakɔɔrë, nyra Araan. Araan ‑gu Lɔɔtë.

²⁸ Araan tɩ 'ɔa tʋ Tɛra, 'ɔnya jä. Urëbätä 'ɔ 'järä, ‑nyɛɛ Kalëdeenyüüa 'bre, ‑tɛlɩ 'ɔ ‑glooroa'.

²⁹ Abramë nyra Nakɔɔrë nya kä 'ŋlëgë. Abramëa 'ŋlʋʋa 'nyrɩ bä Sarai, ‑bɛ Nakɔɔrëa nɔa 'nyrɩ bä Milika. Milika bä Araan a 'ŋlëkayria. Araan ‑gu bɩa Isëka.

³⁰ Sarailɔ nɩ, 'ɔ ‑gbɔ; 'ɔnyɩ 'jʋ ‑a kä.

³¹ Tɛra nya dɔrɔ 'ɔa 'jʋ Abramë nyra 'ɔa 'ŋlʋʋ Sarai 'wʋ, nyra 'ɔa 'jʋ Araan a 'jʋ Lɔɔtë 'ɔ nyra 'üün sɔ Urëbätälä bäa' Kalëdeenyüüa 'bre, 'ünya mi Kanaanyüüa 'bre. 'Ü 'tɔa' Araabätä, 'a ‑nyɛɛ 'ü kʋ.

³² Tɛra kä kä ‑sɩa ‑glʋɩpʋ ‑sɩ ‑gböö (205), 'ɔnya järä Araabätä.