Jenɛɛsë 1 - Kuö Dëdrä Jenɛɛsë Rutë

NYƆSƲA NƲ 'PLÄ, ‑MAA NYƆƆ NYA FA NYƆSƲA TOU 1.1–11.26 NYƆSƲA NƲA' CƐ NYRA ‑TƲTƲ 1.1–4.26

¹ Diia 'fɩɔa cɛtrɛfawʋ nɩ, cɛɩɩ nyra ‑tʋtʋ ‑kätɩ Nyɔsʋa nʋ.

² ‑Tʋtʋlʋ 'cakla kä 'lɩ, dɛɛ 'nyɩ 'lɩ ‑gälɩ ‑a bä, ‑bɛ 'jöjrüükpü ma bä 'nie kpakü ‑gälɩ; Nyɔsʋaa ‑susu ma ‑piie 'nieɩɩa 'klɩ.

³ Nyɔsʋa nya 'daa: «Abɩa 'napɛ bälɩ!» 'Napɛ nya bälɩ.

⁴ Nyɔsʋa nya 'jä 'sɩrɩ 'napɛ bäa' 'cɩcadɛɛ, 'ɔnya 'sasra 'napɛ nyra 'jöjrüükpü ‑gba.

⁵ Nyɔsʋa nya 'dara 'napɛ «‑Srɩ.» 'Ɔnya 'dara 'jöjrüükpü «‑Gbia.» 'Asɩ 'i nʋ ‑gbiajrʋ nyra ‑suwla nya bälɩ: 'ii bä 'klɩsa jrüü.

⁶ Nyɔsʋa nya 'daa: «Abɩa ‑gbasasradɛɛ bä 'niea ‑tɔrʋpɩɔ, 'ɛmä ‑tʋtʋ ‑gälɩa 'nie nyra cɛlɩa 'nie ‑gbasasra.»

⁷ Nyɔsʋa nya nʋ ‑gbasasradɛɛ, 'ɔnya 'sasra 'nielɛ bäa' ‑gbasasradɛɛ ‑wälɩ nyra ɛ bäa' 'ɛa ‑gälɩ ‑gba. 'Asɩ 'i nrörö.

⁸ Nyɔsʋa nya 'dara ‑gbasasradɛɛlɛ «Cɛ.» ‑Gbia nya ka, ‑srɩ nya pa: 'Ii bä 'sɔɔa nü jrüü.

⁹ Nyɔsʋa nya 'daa: «Abɩa 'nielɛ kä 'fɩɔ bäa' cɛa ‑wälɩ trara ‑pɩɔ 'doo 'wʋ 'ɛmä 'dee bä, 'kä mamatʋtʋ 'tɔ.» 'Asɩ 'i nrörö.

¹⁰ Nyɔsʋa nya 'dara 'uun «‑Tʋtʋ», 'ɔnya 'dara 'nielɩ kä 'fɩɔ traraa' ‑pɩɔ 'doo 'wʋ «'Tanie.» Nyɔsʋa nya 'jä 'sɩrɩ 'i bäa' 'cɩcadɛɛ.

¹¹ Nyɔsʋa nya 'daa: «Abɩa 'sipi nyra tii ‑gaala ‑tʋtʋ ‑gälɩ; abɩa 'sipi nyra tii tʋ. Abɩa tii tʋ 'bü, ü kä 'mlɩ 'ua 'jaju bäa', ‑mɛ ma bälɩ ɛ tʋ 'ɛa 'mʋgbɛa 'jaju ‑tʋtʋ ‑gälɩ.» 'Asɩ 'i nrörö.

¹² 'Sipi nyra tii nya ‑gaala ‑tʋtʋ ‑gälɩ, 'sɩrɩ 'sipi ‑mɩdoo bäa' 'a 'ia 'jaju 'i tʋä, ‑bɛ tii tʋä 'bü, 'üa 'mlɩa 'jaju 'sɩrɩ tuu ‑molo bäa'. Nyɔsʋa nya 'jä 'sɩrɩ 'i bäa' 'cɩcadɛɛ.

¹³ ‑Gbia nya ka, ‑srɩ nya pa: 'Ii bä tääa nü jrüü.

¹⁴ Nyɔsʋa nya 'daa: «Abɩa 'napu bä cɛ 'lɩ, 'umä ‑srɩ nyra ‑gbia ‑gbasasra; 'ia 'taɩn 'lɩ, dɔrʋsrɩ, jrüü nyra ‑sɩ 'mä jrere;

¹⁵ 'kä 'u bä cɛɩɩlɩa 'napu, 'umä ‑tʋtʋ ‑gälɩ ŋʋala.» 'Asɩ 'i nrörö.

¹⁶ Nyɔsʋa nya nʋ 'napu kpaku 'sɔɔ: kpakia nɛ 'mä ‑srɩ 'klügälɩkälä, ‑bɛ blaadɩɔ 'mä ‑gbia 'klügälɩkälä. 'Ɔnya nʋ bɩa ‑särë.

¹⁷ Nyɔsʋa nya ‑tʋ 'uun cɛlɩ, 'umä ‑tʋtʋ ‑gälɩ ŋʋala,

¹⁸ 'umä ‑srɩ nyra ‑gbia 'klügälɩkälä, 'umä 'napɛ nyra 'jöjrüükpü ‑gbasasra. Nyɔsʋa nya 'jä 'sɩrɩ 'i bäa' 'cɩcadɛɛ.

¹⁹ ‑Gbia nya ka, ‑srɩ nya pa: 'Ii bä mlɔɔa nü jrüü.

²⁰ Nyɔsʋa nya 'daa: «Abɩa 'nie 'si mlaa 'klɩ, 'kä nyisie ‑preere cɛa 'mlɩ.»

²¹ Nyɔsʋa nʋ 'tanie 'lɩa mlaa kpakü, nyra 'dɩdiili kä 'fɩɔ kʋa' 'nie 'lɩ, nyra nyisiea 'kaɩnkaɩn a 'fɩɔ. Nyɔsʋa nya 'jä 'sɩrɩ 'i bäa' 'cɩcadii.

²² Nyɔsʋa nya 'pa 'üün 'nɩ, 'ɔ ‑nëma: «'Ba ‑gu! 'Ba ‑sümlö! 'Ba 'si 'tanieɩa 'mlɩ. 'Kä nyisie ‑goglolɩ ‑tʋtʋ ‑gälɩ!»

²³ ‑Gbia nya ka, ‑srɩ nya pa: 'Ii bä ‑gbööa nü jrüü.

²⁴ Nyɔsʋa nya 'daa: «Abɩa 'dɩdiia 'kaɩnkaɩn 'tɔrɔ ‑tʋtʋ ‑gälɩ, bätëmlaa, ‑pɛrɛdii nyra 'klʋɛɛa mlaa; 'ia 'fɩɔa 'kaɩnkaɩn.» 'Asɩ 'i nrörö.

²⁵ Nyɔsʋa nʋ 'klʋɛɛa mlaa 'kaɩnkaɩn, bätëmlaa 'kaɩnkaɩn nyra ‑tʋtʋ ‑gälɩa ‑pɛrɛdiia 'kaɩnkaɩn. Nyɔsʋa nya 'jä 'sɩrɩ 'i bäa' 'cɩcadii.

²⁶ Nyɔsʋa nya 'daa: «A nʋ nyɔɔ ana 'sa, 'sɩrɩ a bäa', 'ɔmä 'tanie 'lɩa ‑srü 'klügälɩkälä, 'ɔmä cɛlɩa nyisie 'klügälɩkälä, 'palɩ bätëmlaa, ‑tʋtʋa 'fɩɔa ‑gälɩ nyra diili kä 'fɩɔ ‑pɛrɛa' ‑tʋtʋ ‑gälɩ.»

²⁷ Nyɔsʋa nya nʋ nyɔɔ 'ɔa 'sa, 'sɩrɩ 'ɔ bäa', 'asɩ 'ɔ nʋ nyɔɔ. 'Ɔnya nʋ nyɩbɛrʋ nyra 'ŋlʋʋ.

²⁸ Nyɔsʋa nya 'pa 'üün 'nɩ, 'ɔnya ‑gbala 'üün: «'Ba ‑gu, 'ba 'paplagälɩ, 'ba 'si ‑tʋtʋ 'klɩ, 'kä 'a kälä 'uun 'klügälɩ, 'ba kälä 'tanie 'lɩa ‑srü 'klügälɩ, 'palɩ cɛlɩa nyisie nyra mrɛɛ o mrɛɛ 'nyɛrɛa' ‑tʋtʋ ‑gälɩ!»

²⁹ Nyɔsʋa ‑nëma: «‑Jää, 'n ‑nyɩ 'amɩ 'sipia 'fɩɔ nyra diili kä 'fɩɔ ‑gaalaa' ‑tʋtʋ ‑gälɩ, i käa' 'jaju, nyra tiili kä 'fɩɔ kä 'jaju bäa' 'ua ‑tʋtʋbüa 'mlɩ. 'Ii 'mä 'ana jijri bä.

³⁰ ‑Bɛ ‑tʋtʋ ‑gälɩa mlaa 'fɩɔ, cɛlɩa nyisiea 'fɩɔ nyra ‑pɛrɛdiia 'fɩɔ ‑pɛrɛa' ‑tʋtʋ ‑gälɩ, diili kä 'fɩɔ fioa', 'sipili kä 'fɩɔ 'klaa' napɩjɩjarɛnyü bä 'üa jijri.» 'Asɩ 'i nrörö.

³¹ Nyɔsʋa nya 'jä 'sɩrɩ diili kä 'fɩɔ 'ɔ nʋa' bäa' 'cɩcadii 'mʋfasa. ‑Gbia nya ka, ‑srɩ nya pa: 'Ii bä ‑uundooa nü jrüü.