Jaan 12 - Kuö Dëdrä Jenɛɛsë Rutë

Mariilɔ ‑gblɔɔa' Jesua bei ‑gälɩ ‑daŋlʋɩnɩ 'kä Betanii

¹ Jrüü ‑uundoo tɩɔ 'lɩ 'ümä 'Paakë 'jä, Jesu nya 'tɔ bätälä 'ü 'daraa' Betanii, 'ii Lasaalɔ 'ɔ 'baa' 'kubre bä.

² 'Ünya prere 'ɔɔn; Marëtë 'ɔɔ ‑päää jijri. Lasaalɔ bä bɩa nyüülü nyra Jesu jöa' dɛɛ 'üa ‑tɔrʋpɩɔ.

³ Marii nya dɔrɔ 'tasɩrɩa 'naarëa ‑daŋlʋɩnɩlɩ kä 'peru 'bʋaa' 'wʋ 'ia 'kpala jɔ; 'ɔnya ‑gbäträ 'iin Jesua bei 'wʋ 'kä. 'Ɔnya nʋ 'ɔa 'ŋuei 'ɔnya wɔpɔ 'ɔa bei ‑gba. 'Ia 'nɔnʋ 'si nyüköli.

⁴ Jesua 'wʋnyɛrɛnyɔɔlɔ 'ü 'daraa' Judaa Isëkario, Simɔɔa 'jʋ, ɔmäa' Jesu 'sa ‑nëma nɩ:

⁵ «Dɛplɛɛ kä ‑gʋ anyɩ ‑daŋlʋɩnɩlɩ 'peru 'pa denie ‑glʋɩtää amä 'iin 'pʋablanyüü 'lɩ ‑päälä le?»

⁶ Wiili 'ɔ 'paaa' nɩ, ‑mää 'pʋablanyüüa ‑gʋ 'ɔnyɩ 'jä 'kasa ‑sʋɩ. 'Jejienyɔɔ 'ɔ bä: ‑bɛ 'ɔ ‑tʋʋä mölii ‑wälɩ, 'asɩ mölii paa' 'asɩ 'ɔ 'balɩ.

⁷ 'Iibäa' Jesu nɩ: «'Ba sɔ 'ŋlʋʋlɔ ‑gba. Wiili 'mäa' nrörö 'na jäjäsrɩ 'lɩ nɩ, 'ii 'ɔ tɩ ‑srɩ dɛrɩ 'ɔ nʋ.

⁸ 'Pʋablanyüü bä 'ana ‑tɔrʋpɩɔ 'plɔʋplɔʋ, ‑maa 'mɔɔlɔ nɩ, 'nyɩ 'ana ‑tɔrʋpɩɔ ‑a bä 'plɔʋplɔʋa ‑gʋ.»

⁹ Juifë 'kɔkɔmlɛ nya 'nu 'sɩrɩ Jesu bäa' Betanii; 'ünya ji 'lɩ. ‑Mää Jesua 'dooa ‑gʋ 'ünyɩ ji, ‑maa 'ü ji bɩa Lasaalɔ 'ɔ 'baa' 'kubre 'jä.

¹⁰ ‑Gbɔsapɛrɩnyüü kpakü nya 'daa 'ümä bɩa Lasaalɔ 'bla.

¹¹ 'A 'ɔa ‑gʋ juifë 'kɔkɔmlɛ ‑kanyɩ 'üün dɛrɩ ‑a bä; Jesu 'ü toroplɛ.

Jesua Jerusalɛɛmëa 'jajrakʋ

¹² 'Ia ‑srɩ ‑gbaa' 'kä nɩ, nyüü 'kɔkɔmlɛ mi Jerusalɛɛmë ‑glɩsɩglɩsɩ 'järä. 'Ünya 'nu 'sɩrɩ Jesu jöa' 'lɩ,

¹³ 'ünya 'dɔdrɔ ‑napusragbɩ 'wʋ, ‑bɛ 'ü 'jrara 'ɔɔn 'klɩ ‑bɛ 'ü nö: «Osana ! ‑Jɔrʋ pala ‑mɩ, ‑mɔ jröröa' 'Pläkänyɔɔa 'nyrɩklɩ! Abɩa Nyɔsʋa 'pa Israɛɛlëa 'kɩɩ 'nɩ !»

¹⁴ Jesu jö ɩa' 'ɔ jrä ‑plɩɩ ‑sʋbrejʋ, 'ɔnya 'jra 'ɔa ‑gälɩ 'sɩrɩ 'i ‑jɩjraa' nyɔsʋapɔɔkʋ 'lɩ:

¹⁵ Ŋalɛ 'nyɩ 'bla ‑mɩ Siɔɔnbätäa 'yria , ‑jää ‑na 'kɩɩ kʋ ‑sʋbrejʋ ‑gälɩ, ɔ jö .

¹⁶ 'Ɔa 'wʋnyɛrɛnyüü ‑kaaŋlʋ wiili kä 'fɩɔ nröröa' 'wli ‑a 'nu. ‑Maa 'ü 'jäa' Jesua 'wliklɩbʋabʋakʋ 'fɩɔwʋ, 'a ‑plɩɩ 'ü 'pa plɛ 'sɩrɩ wiili ‑jɩjraa' nyɔsʋapɔɔkʋ 'lɩ 'ɔa ‑gʋ, 'ii 'ü nö.

¹⁷ Nyüülü kä 'fɩɔ bä käa' ‑plɩɩ 'taɩn 'lɩ Jesu were käa' Lasaa ‑fälɩ ‑bɛ 'ɔ 'baa' 'ɔɔn 'kubre, ‑bɛ 'ɔ 'ciea' 'kuyua 'mlɩ nɩ, 'a 'ia nyüülü, 'ü 'paa 'ia ‑gä.

¹⁸ ‑Saragbia tielɛ 'ɔ nʋa', 'ia ‑gʋ nyüü 'kɔkɔmlɛ 'jrara 'ɔɔn 'klɩ.

¹⁹ 'Ia ‑gʋ Farisinyüüa 'kpɔ 'paa wii: «'Ii 'ana 'mʋgbɛ 'jää 'wʋ ‑o, 'anyɩ 'lɩ ‑a bɩa 'amä dɛɛ nʋ. 'Ɔɔ nyüüa 'fɩɔ bä dɛrɩ.»

Jesu 'paa 'ɔa jäjäkʋa ‑gä

²⁰ Nyüülü mia' Jerusalɛɛmë Nyɔsʋa bibie ‑glɩsɩglɩsɩa ‑srɩ 'lɩ nɩ, grɛɛkënyüü 'doorodoo bä kä 'üa ‑tɔrʋpɩɔ,

²¹ 'ünya jijrö Galileea Bɛtësaidaa nyɔɔ Filipë ‑gba. 'Ünya ‑gbala 'ɔɔn: «'Pläkänyɔɔ, a bibie ‑mɩ a 'bata amä Jesu 'jä.»

²² Filipë nya ‑gbala 'iin Andree, 'üa 'sɔɔ nya mi 'iin Jesu ‑gbala.

²³ 'Iibäa' Jesu nɩ: «'Taɩn 'a 'lɩjrä, Nyɔɔa 'Jʋ 'mä 'wliklɩbʋala.

²⁴ 'Tasɩrɩa 'cɩcasa 'n ‑gbala 'amɩ, dɛɛ bäa' 'jaji, ɛma blö ‑tʋtʋa 'mlɩ nɩ, 'ɛ ‑kaaŋlʋa' ‑fɛ nɩ, 'dee 'ɛ bä, ‑maa ɛma ‑fɛ, 'kä 'ɛ ‑gaaa, 'kä 'ɛ tʋä 'kɔkɔmlɛ.

²⁵ Nyɔɔlɔ ‑waa' 'ɔa 'klä, 'ɔnya 'ään 'mɔlɔa. ‑Maa nyɔɔlɔ 'nyɩa' 'ɔa 'klä ‑wa ‑pɩ ‑tʋtʋ ‑gälɩ nɩ, 'ɔ ‑nëmä 'ään 'mɔlɔ ‑a 'mɔlɔ; 'ɔnya 'klälä 'nyɩa' blöröfa kä 'jäa.

²⁶ Nyɔɔ ma ‑fɛ 'na 'jrʋpa, ɔ ‑mɛ 'mɩ ‑gälɩ; ‑bɛ ‑plɩɩlɩ 'n kʋa' 'na 'jrʋpafɛnyɔɔ 'mä bɩa 'lɩ kʋ. Nyɔɔ ma ‑fɛ 'na 'jrʋpa, 'na Tʋ nya 'ɔɔn 'bʋalaa.»

²⁷ «'Na plɛ ‑taaralɩ ɔ, ‑asɩ 'nyaa ‑plɩɩ ‑gba le? Tʋ! 'Ba 'mɩ ‑taa 'taɩnlɩ 'lɩ? ‑Bɛ 'a ‑taa 'taɩnlɩa ‑gʋ 'n ji.

²⁸ 'Na Tʋ, 'bʋala ‑na 'nyrɩ!» Wii nya ja cɛlɩ, 'iibä: «'Nyaa ɩ 'iin 'bʋala, 'kä 'nyaa 'iin 'bʋala 'sɔɔwʋ.»

²⁹ Nyüülü bä ɩa' ‑plɩɩ 'nua', ‑nëma: «‑Mamɛɛ bäsaa!» ‑Mölöö nɩnɩa: «'Aanjë 'pala 'ɔɔn wii ‑gba!»

³⁰ 'Ü nʋa' 'saa ‑bɛ 'ü 'paa' wii nɩ, Jesu ‑nëma: «‑Mää 'na ‑gʋ wiili 'nyɩ 'pala, ‑maa 'ana ‑gʋ 'i 'pala.

³¹ 'A 'pläa ‑gäbötaɩn ‑ka jräa' ‑ɩ 'lɩ; nyɔɔlɔ bäa' 'pläa 'wliklɩ, 'a 'ɔa ‑fälɩbetaɩn.

³² 'Mɔɔlɔ nɩ, 'taɩnlɩ 'mäa' cɛlɩ 'jrara ‑tʋtʋ ‑gälɩ nɩ, 'nyaa 'na ‑gba nyüüa 'fɩɔ 'kʋɛɛrɛa.»

³³ 'Ɔ nöa' ‑plɩɩ 'saa 'ɔ 'paaa' wii nɩ, 'a jäjäkʋlʋ 'ɔmäa' jä 'ua ‑gä 'ɔ 'paa.

³⁴ 'Iibäa' ‑jria nɩ: «‑Dɔa ‑pɔɔkʋ nɩnɩa 'Kriisë nya 'plä 'wʋ tɩɔrɔa; 'a 'ii a jre. Dɛplɛɛ kä ‑gʋ ‑nö, ‑maa: ‹Nyɔɔa 'Jʋ kä 'ɔmä cɛlɩ 'jrara› le? Ɔ bä Nyɔɔa 'Jʋlɔ le?»

³⁵ Jesu nya ‑gbala 'üün: «‑Srɩ ‑ka bä 'ana ‑tɔrʋpɩɔ jrüü jiea 'mlɩ. 'Ba 'nyɛ 'sɩrɩ 'i ‑ka bäa' 'ana ‑tɔrʋpɩɔ 'jöjrüükpü ‑pɩ 'amɩ ‑wälɩfu. Nyɔɔlɔ 'nyɛrɛa' 'jöjrüükpü 'lɩ 'nyɩ jre ‑plɩɩlɩ 'ɔ möa' ‑a.

³⁶ 'Ba toro ‑srɩ plɛ 'sɩrɩ 'i ‑ka paa', ‑bɛ 'amä ‑srɩa 'jü bä.» Jesu nʋa' 'saa, 'ɔ 'saalɩ, 'ɔnya tʋŋlɔlɩ 'üün dɛrɩ, 'ɔnya ‑sisie.

Juifë 'nyɩ toro Jesu plɛ ‑a

³⁷ ‑Saragbia tielë kä 'fɩɔ Jesu nʋa', 'ü 'jä 'iin, ‑maa 'asɩɛ 'ünyɩ toro 'ɔɔn plɛ ‑a.

³⁸ 'Asɩ wiili nyɔsʋaamlɩpalanyɔɔ Esaii 'pa käa' nrörö. 'Ɔ nɩnɩa kä: 'Pläkänyɔɔ, nyɔɔ 'plɛɛ 'dara kä ana 'papawii wii le? Ɔ 'jä ‑na 'wʋ ‑sɔɔrɔkʋ le ?

³⁹ Esaii 'doolɔ nya 'salɩ dɛɛlɛ kä ‑gʋ 'ü ‑nëmäa' Jesu plɛtoro:

⁴⁰ 'Ɔ 'nɔɔrɔ 'ümɩ; 'ɔnya 'bʋala 'üa plɛ, 'ü ‑pɩ 'nyü nʋ 'ü ‑pɩ 'käjä, 'üa plɛ ‑pɩ wii 'wli 'nu, 'ü ‑pɩ 'na 'pɛlɩ tɛ 'nyɩ ‑pɩ 'üün 'pʋɔ .

⁴¹ Esaii nö käa' 'saa 'ɔ 'paaa' wii nɩ, Jesua 'wliklɩ 'bʋabʋakʋ 'ɔ 'jä, 'aiɛ 'ɔ 'pa 'ɔa ‑gä.

⁴² 'Asɩɛ juifëa 'kamanyüü kpaküa ‑tɔrʋpɩɔa 'kɔkɔmlɛ toro Jesu plɛ. ‑Maa Farisinyüüa ŋalɛa ‑gʋ nɩ, 'ünyɩ 'lɩ ‑a bɩa ü 'pa 'saa 'iin 'ü ‑pɩ 'üün 'üa trarafë 'wʋ prɛ.

⁴³ Nyüü ma 'bʋala 'üün nɩ, 'i kä 'üün tʋ, 'kä Nyɔsʋa 'mä 'üün 'bʋala.

⁴⁴ Jesu nya dɔrɔ wii 'wʋ 'ɔnya ‑gbala 'üün: «Nyɔɔlɔ toroa' 'mɩ plɛ nɩ, ‑mää 'mɔɔ 'ɔnyɩ toroplɛ, ‑maa nyɔɔlɔ blɔa' 'mɩ, 'ɔɔ 'ɔ toroplɛ.

⁴⁵ Nyɔɔ ma 'jä 'mɩ 'ɔ 'a nyɔɔlɔ blɔa' 'mɩ 'jä.

⁴⁶ 'Sɩrɩ 'ü 'daaa' ‑srɩ, 'asɩ 'n bä 'nyaa ji 'pläa 'mlɩ 'kä nyɔɔ o nyɔɔ 'mäa' 'mɩ plɛtoro nɩ, 'ɔ ‑pɩ 'jöjrüükpü 'lɩ kʋ.

⁴⁷ Nyɔɔ ma 'nu 'na 'papawii 'wli ‑bɛ ɔma 'nyɩ toro 'iin plɛ ‑a nɩ, ‑mää 'mɔɔ 'nyɩ ‑tʋ 'ɔa ‑gä. 'Nyɩ ji ‑a ji 'mä 'pläa ‑gä ‑tʋ, ‑maa 'n ji 'mä 'lɩ 'plä mlɩ 'ba.

⁴⁸ Nyɔɔlɔ 'mäa' 'mɩ 'nyüamlɩjrara ‑bɛ 'ɔ ‑nëmäa' 'na 'papawii wii 'dara nɩ, 'ɔa ‑gätʋnyɔɔ bälɩ; 'na wiili 'n 'paa' 'ii nëmä ‑srɩɩ 'ɔɔn ‑gä ‑gälɩ 'bölö 'pläa bɩarafa 'wʋ.

⁴⁹ Wiili kä 'fɩɔ 'n 'paa', ‑mää 'na 'dooa plɛklɩa wii ‑a, ‑maa Tʋlɔ blɔa' 'mɩ, 'ɔ ‑gbala 'mɩ wiili 'mäa' 'pa.

⁵⁰ 'Mɔɔlɔ nɩ, 'n jre 'iin 'sɩrɩ 'ɔa 'papawiia 'lɩträäräkʋ ‑nyɛɛa' 'klälä 'nyɩa' blöröfa kä. 'A 'ia ‑gʋ, 'sɩrɩ Tʋ ‑gbalaa' 'mɩ, 'asɩ 'n ‑gbala 'amɩ 'iin.»