Jaakë 4 - Kuö Dëdrä Jenɛɛsë Rutë

Nyɔɔa nyufaa 'wʋcieciekʋ

¹ ‑A 'plɛɛ tou nyra 'blarʋ sɔrɔ 'klɩ ‑bɛ 'u bä 'ana ‑tɔrʋpɩɔ le? ‑Mää bʋbɔwiili 'a ‑waaa' 'saa, ‑mää 'iin 'nyɩ ja 'imɩ ‑bɛ 'ana plɛ 'nyɩ 'kʋkrʋɛɛlɩ?

² 'A ‑wa käkädii, ‑maa dɛɛlɛ 'a 'bataa' 'anyɩ 'jä 'ɛmɩ ‑a. 'A kä dɛɛnyü ‑bɛ 'a 'blaa, ‑maa dɛɛlɛ 'a 'bataa' 'anyɩ 'lɩ ‑a bɩa 'amä 'ɛmɩ 'jä. 'A 'blara ‑bɛ 'a ‑fuuö, ‑maa 'anyɩ 'jä dɛɛlɛ 'a 'bataa' ‑a, 'be 'anyɩ ‑sɛ ‑sɛ ‑a.

³ 'A ‑sɛɛɛ, ‑maa 'anyɩ 'jä 'ɛmɩ ‑a, 'be ‑mää 'cɩcagbia ‑gʋ 'anyɩ ‑sɛ: dɛɛlɛ 'a ‑sɛɛa' nɩ, 'amä 'ana plɛklɩa bʋbɔgbi nʋ.

⁴ Bätësaa nyüü! 'Anyɩ 'saa ‑a jre 'sɩrɩ 'pläa ‑wawakʋ bäa' Nyɔsʋaa jrarakʋ? Nyɔɔ ma bä 'pläa ‑bei nɩ, Nyɔsʋaa 'nyüamlɩjraranyɔɔ 'ɔ bä.

⁵ ‑Ale 'ana plɛ nɩnɩa 'fëflɛsa nyɔsʋapɔɔkʋ 'daa: «‑Susulu Nyɔsʋa ‑tʋa' amɩ 'lɩ nɩ, 'u bɩara wasäa 'pɛlɩ.»

⁶ ‑Maa Nyɔsʋaa ‑gbinanakʋlʋ 'ɔ sraraa' amɩ ‑siwʋ. 'A 'ia ‑gʋ nyɔsʋapɔɔkʋ nö: «Nyɔsʋa 'nyɩ 'nyiere nyüülü ‑gbaaa' 'lɩ ‑gälɩ ‑a, ‑maa 'ɔ 'paa ‑mülü 'ciea' 'üa nyüfë 'wʋ 'nɩ .»

⁷ 'Ii känyrɩ, 'ba ‑träärälɩ Nyɔsʋa. 'A 'nɩ ‑nyɩ Sataan 'casɩ, 'ɔmä 'amɩ 'klɩfɔlɔ.

⁸ 'Ba jijrö Nyɔsʋa ‑gba, ‑bɛ 'ɔmä 'amɩ ‑gbajijrö. ‑Balʋnyüü 'amɩ, 'ba 'wʋ ‑fre 'lɩ; 'ba kpëtä 'ana polu, 'amɔ käa' polu 'sɔɔ!

⁹ 'Ba 'kpɔɔ; 'ba bä 'dugu 'lɩ ‑bɛ 'ba 'wu! Abɩa 'ana ‑glasu ‑srörö 'dugu 'lɩ, 'kä 'ana dɔrʋ ‑srörö 'kpɔkpɔlʋ 'lɩ.

¹⁰ 'Ba 'ciewʋ Nyɔsʋa 'klɩ, ‑bɛ 'ɔmä 'amɩ 'jrara.

¹¹ 'Na ‑wlajü 'amɩ, ‑moloo 'nyɩ 'pa 'ɔa ‑molooa ‑gʋ bʋbɔwii. Nyɔɔ ma 'pa 'ɔa ‑molooa ‑gʋ bʋbɔwii nɩ, 'aiɛ ɔma ‑srɛ 'ɔa ‑moloo nɩ, ‑dɔ 'ɔ ‑srɛɛɛ. ‑Bɛ ‑ama ‑srɛ ‑dɔ nɩ, ‑kanyɩ 'ua 'lɩträäränyɔɔ ‑a bä, ‑maa ‑gätʋnyɔɔ bä.

¹² ‑Bɛ Nyɔsʋaa 'doo 'ɔɔ ‑tʋʋälɩ ‑dɔ. 'Ɔa 'doo 'ɔɔ 'mrɛɛ 'sɔɔwʋ ɔ 'pʋɔ nyɔɔ 'aiɛ 'ɔ 'bla 'ɔɔn. ‑Mɔɔlɔ nɩ, nyɔɔ 'plɛɛ ‑bä ‑bɛ ‑srɛɛɛ ‑na ‑mölöö le?

Nyüülü nöa' 'nyaa 'saa nʋa

¹³ 'Ba ponyakli 'amɔlɔ nöa': «Anya 'salɩ 'aiɛ ‑sraakäpɩ ‑taa bätäläa 'mlɩ mia, 'kä anya 'lɩ ‑sʋ ‑si, 'kä anya 'lɩ 'peru 'pala amä mölii 'jä!»

¹⁴ 'Amɔlɔ 'nyɩa' wiili nëmäa' ‑pɩ 'lɩjrä jre! 'Ana 'klä 'wʋ dɛɛ 'klɩ? 'Ä ‑beere ‑gbru; 'u 'jraa, ‑maa fɩɩɩn 'u 'a saka.

¹⁵ ‑Jäsɩ 'a nëmäa' ‑gba: «Nyɔsʋa ma 'nyie ama bä 'plä 'wʋ, anya mia 'kä anya 'saa nʋ.»

¹⁶ ‑Maa 'amɔlɔ nɩ, wiili 'a boboa' 'ii 'lɩ 'a 'bʋala 'ana nyüfë. 'I bʋbɔ kä ‑mä 'saa nʋ.

¹⁷ 'A 'ia ‑gʋ nyɔɔlɔ jrea' 'cɩcagbili 'ɔmäa' nʋ, ‑bɛ 'ɔnyɩ nʋa' 'imɩ nɩ, ‑balʋ 'ɔ nʋ.