Jaakë 2 - Kuö Dëdrä Jenɛɛsë Rutë

Nyüüa 'lɩgbasakʋ

¹ 'Na ‑wlajü 'amɩ, 'amɔ toroa' 'Pläkänyɔɔ Jesu 'Kriisëlɔ 'bʋaa' 'wliklɩ plɛ nɩ, 'anyɩ ‑glɛ nyüü.

² Ü 'daa ‑plɩɩ 'bɩɔjinyɔɔ 'sroo 'mʋfakoti 'ɔa wlu 'lɩa ‑sikakpatrawuu 'ɔnya pa 'ana ‑tɔrʋpɩɔ, 'kä 'pʋablanyɔɔ nyra 'ɔa ‑frepakoti 'sɔ pa bɩa.

³ 'Ama tɛ ‑mɔlɔ paa' 'mʋfakoti 'lɩ, ‑bɛ 'ama ‑gbala 'ɔɔn ‑maa: «Ji ‑tɛ 'cɩca nyüüa kʋfa 'wʋ ‑mä ‑wälɩkʋ!» ‑Bɛ 'ama ‑gbala 'pʋablanyɔɔ ‑maa: «‑Mɔ, ‑jää ‑pɩ ‑a ‑nyüüglö!» 'Aiɛ: «'Wla ‑pɩ 'na bei ‑wälɩ 'kä» nɩ,

⁴ 'a nöa' 'saa nɩ, ‑mää 'ana nyüfë 'anyɩ ‑gbasalɩ? ‑Mää 'ana bʋbɔ bobowli 'nyɩ nʋ 'sa 'amɩ?

⁵ 'Ba ponyakli 'na plɛ ‑gälɩa ‑wlajü 'amɩ: ‑mää nyüülü 'plä 'daraa' 'pʋablanyüü nɩ, ‑mää 'üün Nyɔsʋa 'nyɩ 'lɩba 'kä 'üa 'bɩɔ 'mä nyɔsʋaplɛtorokʋ bä, ‑bɛ 'ɔa 'plälä 'ɔ tɛrɛa' nyüülü ‑waa' 'ɔɔn, 'ümä 'äa ‑jaaa ji?

⁶ ‑Maa 'amɔlɔ nɩ, 'anyɩ 'dara 'pʋablanyɔɔ nyɔɔ ‑a! ‑Mää 'bɩɔjinyüü 'nyɩ ‑siie 'amɩ ‑sʋɩ 'plɔʋplɔʋ? ‑Mää 'üün 'nyɩ 'kʋɛɛrɛ 'amɩ ‑gʋmlanyüköli 'lɩ?

⁷ ‑Mää 'üün 'nyɩ bʋblɔ 'ana 'mʋfanyrɩ 'lɩ Nyɔsʋa ‑nyɩa' 'amɩ?

⁸ 'Ama ‑träärälɩ Nyɔsʋalɔ bäa' 'kɩɩ 'ɔa ‑dɔlʋ 'daaa' ‑maa: «'Sɩrɩ ‑waa' ‑na nyufa, ‑wa 'saa ‑na ‑moloo» nɩ, 'ii 'na.

⁹ ‑Maa 'ama ‑glɛ nyüü nɩ, ‑balʋ 'a nö, ‑dɔ 'pɔnɩ 'amɩ ‑beere nyüülü 'nyɩ ‑trääräa' 'lɩ ‑dɔ.

¹⁰ 'Ba jresaa: nyɔɔ ‑trääräa' 'lɩ ‑dɔa 'fɩɔ, ‑bɛ 'ɔ walaa' 'doo nɩ, 'ɔ 'a ‑dɔa 'fɩɔ wala.

¹¹ 'Be nyɔɔlɔ 'daaa': «‑Nyɩ 'pa bätësa» nɩ, 'ɔɔ 'daa bɩa: «‑Nyɩ 'bla nyɔɔ.» ‑Ama 'pa bätësa ‑bɛ ‑ama 'bla nyɔɔ nɩ, ‑dɔ ‑gälɩpɩnyɔɔ ‑bä.

¹² 'A 'ia ‑gʋ 'ama 'pawii, 'ama nʋ dɛɛ, 'ba jresaa ‑dɔlʋ 'pʋɔa', 'uu Nyɔsʋa 'mä ‑gälɩ tɛ 'ɔmä 'ana ‑gä ‑tʋ.

¹³ Nyɔɔlɔ 'nyɩa' nyatɛplɛ kä, Nyɔsʋaa ‑gä ‑nëmä bɩa 'ɔa nyatɛrɩ ‑a 'jä. Nyatɛplɛ ‑si ‑gäa ‑tʋtʋkʋ 'wʋ.

Nyɔsʋaplɛtorokʋa ‑gbi

¹⁴ 'Na ‑wlajü 'amɩ, nyɔɔ ma 'daa 'ɔ toro Nyɔsʋa plɛ, ‑bɛ ɔma 'nyɩ 'ia ‑gbia ‑a kä nɩ, 'ɔa nyɔsʋaplɛtorokʋ 'nyɩ ‑gbaa ‑a kä! 'Ia nyɔsʋaplɛtorokʋlʋ 'mrɛɛ i 'pʋɔ 'ɔmɩ?

¹⁵ 'Ana ‑wlajʋ 'aiɛ 'ana ‑wladia 'nyɩ 'lɩpadii ‑a kä, 'aiɛ 'ünyɩ 'jä ‑srɩa 'mlɩa jijrɛ ‑a,

¹⁶ 'kä 'ana ‑tɔrʋpɩɔa nyɔɔ 'doo 'nyɩ ‑nyɩ 'üün dɩjɔ 'doo, ‑bɛ ɔ ‑gbala 'üün ‑maa: «Abɩa 'ana fugba 'lɩ flɛrɛ, 'ba 'jä 'koti 'amä sɩɔ 'klɩ ka, 'ba 'jä ‑srɩa 'mlɩa jijrɛ 'ba jidɛɛ 'kä 'a dö!» ‑Gbaa 'plɛɛ 'ii kä le?

¹⁷ 'Asɩ nyɔsʋaplɛtorokʋ bä: ɛma 'nyɩ nʋ nyüüa 'klʋɩ 'cɩcagbi ‑a nɩ, ‑na nyɔsʋaplɛtorokʋ 'nyɩ 'lɩ ‑a bä, 'ɛ jä.

¹⁸ ‑Maa ‑moloo nya 'daa: «‑Mɔ toro Nyɔsʋa plɛ, ‑bɛ 'mɔɔ kä 'ɛa ‑gbi. Srara 'mɩ ‑na nyɔsʋaplɛtorokʋa 'kpɔ, ‑bɛ 'mɔɔlɔ nɩ, 'mä ‑mɩ 'na nyɔsʋaplɛtorokʋ srara nʋnʋgbi 'lɩ.»

¹⁹ 'Sɩrɩ Nyɔsʋa bäa' 'doo ‑daara 'iin wii; 'i 'na. Domüüa 'mʋgbɛ 'dara 'iin wii, ‑bɛ 'asɩɛ 'ü tɩtrɛ ŋalɛa ‑gʋ.

²⁰ Nyatɛnyɔɔ! ‑A ‑gbala ‑mɩ nyɔɔ ma 'daa ‑maa 'ɔ toro Nyɔsʋa plɛ, ‑bɛ ɔma 'nyɩ nʋ 'ɛa ‑gbi ‑a nɩ, 'ia nyɔsʋaplɛtorokʋlʋ 'a jä?

²¹ ‑Mää 'taɩn 'lɩ ana tʋ kpakö Abraamë faa' 'ɔa 'jʋ Isaakë 'ɔmäa' 'ɔɔn nʋ, 'ɔmäa' Nyɔsʋa ‑gbɔ 'sa ‑gbɔsatöwlö ‑gälɩ nɩ, ‑mää 'ɔa nʋnʋgbia ‑gʋ Nyɔsʋa 'nyɩ 'daa 'ɔ ‑gäklɩ?

²² ‑Jää 'iin 'sɩrɩ 'ɔa nʋnʋgbi nyra 'ɔa nyɔsʋaplɛtorokʋ mlöröa' 'wʋ. 'A 'ɔa nʋnʋgbi srara 'ɔa nyɔsʋaplɛtorokʋa ‑jrɛjrɛkʋ.

²³ 'A wiili nyɔsʋapɔɔkʋ 'pa käa', 'ii jrälɩ: «Abraamë toro Nyɔsʋa plɛ, Nyɔsʋa nya 'daa 'ɔ ‑gäklɩ,» Nyɔsʋa nya 'dara 'ɔɔn 'ɔa ‑bei.

²⁴ 'Anya 'iin 'jää; nyɔɔa nʋnʋgbia ‑gʋ Nyɔsʋa nö 'ɔ ‑gäklɩ, ‑mää 'ɔa nyɔsʋaplɛtorokʋa 'dooa ‑gʋ ‑a.

²⁵ 'A 'ii jrä bɩa 'tutuŋlʋʋ Raabë ‑gälɩ. 'Ɔa nyɔsʋaplɛtorokʋa nʋnʋgbia ‑gʋ Nyɔsʋa 'daa 'ɔ ‑gäklɩ. 'Ɔɔ 'kʋɛɛ kä 'lɩ juifënyüülü 'ü blɔ käa', 'ɔnya srara 'üün ‑pasa 'nyʋfɔ, 'ümä 'lɩmlɩwʋ.

²⁶ 'Sɩrɩ ‑susu ma 'nyɩa' nyɔɔ ‑gälɩ bä ‑bɛ 'ɔ jäa' nɩ, 'asɩ nyɔɔa nyɔsʋaplɛtorokʋ bä bɩa ɛma 'nyɩ 'ɛa ‑gbi ‑a kä nɩ, 'ia nyɔsʋaplɛtorokʋlʋ jä.