Galaatënyüü 4 - Kuö Dëdrä Jenɛɛsë Rutë

¹ 'Nɩnɩa nɩ, 'jʋ nëmäa' 'ɔa tʋa ‑jaaa ji nɩ, ɔma ‑ka bä nyʋklɔ nɩ, 'ɔ ‑beere ‑geei. ‑Bɛ 'ɔɔ nëmä ‑srɩɩ diia 'fɩɔ kä.

² ‑Maa nyüülü ‑tʋʋäa' 'ɔɔ ‑bɛ 'ɔa käkädii 'nyügba nɩ, 'ɔ kä 'ɔmä 'lɩ 'üün ‑träärä ‑träärä 'kä 'taɩnlɩ 'ɔa tʋ ‑tʋa' 'lɩ nya 'lɩjrä.

³ 'Asɩ ana 'mʋgbɛ bä kä: a bä käa' nyükuea 'saa nɩ, 'plälä kʋa' ‑pɩ, 'äa ‑dɔa ‑goou a ma bä.

⁴ ‑Maa jrüülü Nyɔsʋa ‑tʋa' 'lɩ jräa' 'lɩ nɩ, 'ɔnya jara 'ɔa 'Jʋ 'ŋlʋʋ kälɩ 'ɔnya ‑gu 'ɔmɩ. Moisëa ‑dɔ ‑wälɩ 'ɔ ‑glooro,

⁵ 'ɔmä nyüülü bäa' ‑dɔ ‑wälɩ ‑dɔ ‑wälɩ 'ba, ‑bɛ amä Nyɔsʋaa 'sɔrɔjü bä.

⁶ 'Be 'anya 'a 'ɔa 'jü bä, 'ia ‑gʋ Nyɔsʋa ja 'ana plɛ ‑gälɩ 'ɔa 'Jʋa ‑Susu. 'A ‑susulu bä 'amɩ 'lɩ 'ia ‑gʋ 'a nö: «Aba, 'na Tʋ».

⁷ 'A 'ia ‑gʋ, ‑kanyɩ ‑geei ‑a bä, ‑maa 'ɔa 'jʋ ‑bä; ‑bäa' 'ɔa 'jʋ nɩ, Nyɔsʋaa ‑jaajinyɔɔ 'Kriisë 'lɩ ‑bä.

'Pɔɔlëa plɛ ‑taaralɩ Galaatënyüüa ‑gʋ

⁸ 'Anyɩ käa' Nyɔsʋa jre nɩ, diili 'nyɩ käa' 'tasɩrɩ nyɔsʋaɩɩ bä nɩ, 'ia ‑geei 'a ma bä.

⁹ ‑Maa ‑plɩɩlɩ 'anya 'a Nyɔsʋa jre, 'aiɛ Nyɔsʋa jrea' 'amɩ nɩ, ‑asɩ 'a nö ‑bɛ 'a ‑ka ‑träärälɩ 'pläa ‑dɔlʋ 'nyɩa' 'klü nyra ‑gbaa ‑a kä le? 'A ‑ka 'bata 'amä ‑goou bä?

¹⁰ 'A kä jrüü, 'a kä ‑söplü, 'a kä 'taɩn nyra ‑sɩ ‑mɩdoo 'ii 'a 'pie plɛ ‑gälɩ.

¹¹ Ŋalɛ 'blaa 'mɩ 'ana në ‑gʋ, 'jrʋpalä 'n ‑fɛa', 'ä ‑pɩ 'fëflɛjrʋpa bä.

¹² 'Na ‑wlajü 'amɩ, 'n bibie 'amɩ, 'ba nʋ 'na 'saa, 'be 'nyaa 'ana 'sa bä. 'Anyɩ kä 'mɩ 'nyüa 'mlɩ ‑a jrara.

¹³ 'N 'sa käa' 'klɩ 'n jia' 'ana ‑nyɛɛ nɩ, 'a jre 'imɩ 'sɩrɩ ‑wusu 'blaa' 'mɩ, 'ia ‑gʋ 'n 'saara kä 'lɩ 'amɩ 'Mʋfagogo.

¹⁴ 'Na 'jajɛ 'nyɩ kä 'ia 'sa ‑a bä, ‑maa 'anyɩ 'mɩ 'lɩ ‑a 'srara. 'Nyɩ 'amɩ plɛklɩ ‑a 'böbö, ‑maa 'lɩ 'a 'kʋɛɛ 'mɩ ‑beere Nyɔsʋaa 'aanjë, 'i ‑beere 'mɔɔ bä Jesu 'Kriisëa 'mʋgbɛ.

¹⁵ 'Ana dɔrʋplɛlɛ 'a ma käa' ‑a 'plɛɛ 'ɛ bä ‑mlatɩ le? 'Cɩcasa 'n ‑gbala 'amɩ, 'a ma 'mrɛɛ kä 'amä 'lɩ 'ana 'nyü 'ba 'amä 'üün 'mɩ ‑nyɩ nɩ, 'anya kä 'mɩ 'üün ‑nyɩa.

¹⁶ ‑Ii! Dɛɛlɛ kä ‑gʋ 'n ‑gbalaa' 'amɩ 'cɩcasa nɩ, 'ia ‑gʋ 'n bä 'ana ‑gbakäklɛnyɔɔ?

¹⁷ Nyüülü fumöa' 'ana ‑gʋ nɩ, mlüü 'lɩ 'ü 'paa' 'amɩ. Wiili bäa' 'üa 'wlia 'mlɩ nɩ, 'inyɩ 'na ‑a 'na. 'Ü 'bata 'amä 'mɩ dɛrɩ sɔ ‑bɛ 'amä fumö 'üa në ‑gʋ.

¹⁸ Wiili 'naa' nɩ, 'iibä 'ba fumö 'taɩn a 'fɩɔ 'lɩ 'mʋfawiia ‑gʋ. ‑Maa 'anyɩ ‑glaaa' 'mä 'ana ‑tɔrʋpɩɔ bä 'fɩɔwʋ ‑bɛ 'amä fumö!

¹⁹ 'Na 'jü 'amɩ, 'ana ‑gʋ 'n ‑ka 'jää mɩmɩakʋ, ‑beere 'ŋlʋʋ nëmä ‑gu. 'Ia mɩmɩakʋlʋ nya 'lɩbä bä 'kä 'anya 'Kriisëa 'sa bä.

²⁰ 'Na plɛɛ ‑a bä ‑plɩɩ 'ana ‑tɔrʋpɩɔ 'mä 'amɩ ‑gbala plɛblösa; 'na plɛ 'caklalɩ 'ana ‑gʋ.

'Pɔɔlë 'papla Agaa nyra Sara 'klɩ ‑beere kuöa 'drü 'sɔɔ

²¹ 'Ba ‑gbala 'mɩ ‑a 'jä, 'a 'nöö ‑plɩɩ ‑dɔ 'wli 'amɔ 'bataa' ‑dɔa 'lɩträäräkʋ?

²² 'Be 'i ‑jɩjra nyɔsʋapɔɔkʋa 'mlɩ, 'sɩrɩ Abraamë kä käa' nyɩbɛjü 'sɔɔ: ‑geeiŋlʋʋa nyɩbɛjʋ 'doo nyra ‑mɔlɔ 'nyɩa' ‑geei bä, 'ɔa nyɩbɛjʋ.

²³ ‑Maa 'sɩrɩ nyüüa 'fɩɔ ‑glooroa' nɩ, 'asɩ ‑geeiŋlʋʋlɔa nyɩbɛjʋ ‑glooro. ‑Bɛ 'ŋlʋʋ ‑mɔlɔ 'nyɩa' ‑geei bä, 'ɔa nyɩbɛjʋlɔ nɩ, wiili Nyɔsʋa ‑gbala käa' Abraamë nɩ, 'ii 'lɩ 'ɔ ‑glooro.

²⁴ 'Iili nɩ, 'i kä ‑gbaa: 'ŋlëgë 'sɔɔlë ‑beere kuöa 'drü 'sɔɔ. ‑Kätɩa nälä nɩ, Sinaiia 'dʋgba 'lɩ 'ä sɔ. 'Ää ‑guuö ‑goou; 'ää 'ü 'dara Agaa.

²⁵ 'Be Agaa, 'ɔɔ bä Sinaiia 'dʋgba Araabëa 'blɩ ‑gälɩ. 'Ɔnya ‑beere 'saarɩa Jerusalɛɛmë, ä ‑bɛ 'äa 'jü bäa' ‑geeidɛɛ 'lɩ.

²⁶ ‑Maa Jerusalɛɛmëlä bäa' cɛlɩ 'nyɩ ‑geei ‑a bä, 'ää bä ana 'fɩɔa 'yio.

²⁷ 'Be nyɔsʋapɔɔkʋ nɩnɩa: Abɩa dɔrʋ 'bla ‑mɩ ‑mɔ ‑gbɔa' ɔnyɩ ‑gua 'plɔʋ! 'Kpö dɔrʋsa, ‑mɔ 'nyɩa' ‑gugukʋa mɩmɩakʋ 'jä! 'Be 'ŋlʋʋlɔ dʋɔ ‑kanyɩ tɛa' 'klɩ nɩ, 'ɔa 'jü nya ‑sümlöa, 'kä 'ünya ‑mɔlɔ 'tia', 'ɔa nü 'wʋsi .

²⁸ Amɔlɔ nɩ, 'na ‑wlajü 'amɩ, 'sɩrɩ Isaakë bäa' nɩ, 'asɩ a bä 'jülü kä ‑gä Nyɔsʋa ‑gbala käa' Abraamë.

²⁹ ‑Maa 'ia 'taɩn 'lɩ nɩ, 'jʋlɔ ‑glooroa' nyüüa 'fɩɔa 'sa nɩ, 'ɔ ma nö ‑mɔlɔ ‑glooroa' Nyɔsʋaa ‑Susu 'lɩ ‑gbigba. 'A dɛɛ 'dee 'saarɩ.

³⁰ ‑Asɩ nyɔsʋapɔɔkʋ ‑gba le? «Prɛ ‑geeiŋlʋʋ nyra 'ɔa nyɩbɛjʋ, 'be ‑geeijʋ nyra 'ŋlʋʋlɔ 'nyɩa' ‑geei bä, 'ɔa nyɩbɛjʋ ‑nëmä ‑jaaaa' 'wʋ ‑a jrörö 'plɔʋ.»

³¹ 'A 'ia ‑gʋ 'na ‑wlajü 'amɩ, anyɩ ‑geeiŋlʋʋa 'jü ‑a bä, ‑maa 'ŋlʋʋlɔ 'nyɩa' ‑geei bä 'ɔa 'jü a bä.