Ɛfɛsënyüü 2 - Kuö Dëdrä Jenɛɛsë Rutë'Anya 'a 'kuaabre sɔ 1 ‑Kätɩsa nɩ, jäjänyüü 'a ma bä, 'ana bʋbɔgbi nyra 'ana ‑balʋa ‑gʋ. 2 'Ana nʋnʋgbi nyra ‑taa 'plälä kʋa' ‑pɩa nyüü ma bäa' dɛɛ 'dee, ‑bɛ 'a ma prɛ cɛ nyra ‑tʋtʋa ‑tɔrʋpɩɔa 'klüa 'cifi dɛrɩ; 'a 'ia ‑susulu 'uu ‑fɛɛɛrɛ nyüülü 'nyɩ ‑trääräa' 'lɩ Nyɔsʋaa 'kläa 'mlɩ 'jrʋpa. 3 ‑Kätɩsa nɩ, ana 'mʋgbɛ ma bä 'ia nyüülüa ‑tɔrʋpɩɔ. Bʋbɔgbili ma käa' ana plɛ 'tʋ 'ii a ma nö, ‑bɛ wiili ana 'jajɛ nyra ana bobowli 'bataa' 'ii a ma nö. Nyɔsʋaa 'crɛ ‑nyrɔ bä ɩ amɩ ‑gälɩ ‑beere ‑mülü. 4 ‑Maa ana nyatɛrɩ 'si Nyɔsʋa 'klɩ, 'ɔnya ‑wa amɩ ‑gböösa, 5 a bä käa' 'nɩmɩ jäjänyüü ana ‑balʋa ‑gʋ nɩ, 'ɔ nʋ 'iin a nyra 'Kriisë nya bä 'sɔɔwʋ 'lɩ. Nyɔsʋaa ‑gbinanakʋa ‑gʋ 'a 'wʋlɩmlɩ. 6 A nyra 'Kriisë Jesu 'sɔ 'ɔ tɛrɛ kä jäjänyüüa ‑tɔrʋpɩɔ, 'ɔnya ‑nyɩ amɩ kʋfa a nyra 'ɔɔn 'sɔ cɛɩɩa 'mlɩ. 7 'Ɔ nʋa' 'imɩ nɩ, 'ɔmä ‑sraakäpɩa nyüü 'ɔa ‑gbinanakʋlʋ 'ɔnyɩ nyakaa' srara, 'a ‑gbinanakʋlʋ 'ɔ srörö 'Kriisë Jesu kälɩ 'ɔ srara amɩ. 8 'Be Nyɔsʋaa ‑gbinanakʋa ‑gʋ 'a 'wʋlɩmlɩ, nyɔsʋaplɛtorokʋ kälɩ 'a ‑srörö 'kä 'a 'jä 'umɩ. ‑Mää 'ana 'mʋgbɛa plɛklɩa wii ‑a, Nyɔsʋa 'ɔɔ ‑nyɛɛ 'iin 'flɛɛlɩ; 9 ‑mää nyɔɔa 'jrʋpaa ‑gʋ ‑a, nyɔɔ ‑pɩ 'ia ‑gʋ 'lɩgba. 10 'Be Nyɔsʋa 'ɔɔ nʋ amɩ; a nyra 'Kriisë Jesua nyüü 'dooa bäbäkʋ kälɩ Nyɔsʋa ‑srörö 'ɔnya nʋ amɩ amä 'cɩcagbi nʋ. 'Cɩcagbili nɩ, 'ɔ 'a kä 'iin ‑ëlere amä 'iin nʋ. Juifë nyra nyüülü 'nyɩa' juifë bä, bä nyüü 'doo 'Kriisë 'lɩ 11 'Ba 'pa ‑taa wiili kʋa' ‑pɩ plɛ: 'amɔ 'nyɩ käa' juifënyüü bä 'ana fugba 'lɩ, ‑bɛ nyüülü nyüüa 'böbötie bäa' ‑gälɩ 'daraa' «nyüülü 'nyɩa' 'bölö» 'be tielɛ 'nyɩ 'amɩ ‑gälɩ ‑a bä. 12 'Ba 'pa plɛ, 'ia 'taɩn 'lɩ nɩ, 'a ma tʋŋlʋlɩ 'Kriisë dɛrɩ; a ma 'nyɩ kä ‑a kä 'amä Israɛɛlëa ‑glügböa 'mlɩa nyüü bä, 'a ma 'nyɩ kuöa 'mlɩ ‑a bä, kuölä Nyɔsʋa 'paa' 'lɩ, 'kä wiili 'ɔ 'daaa' 'ɔmäa' nʋ, 'ia 'surukʋa ‑gʋ. 'A ma 'nyɩ plɛgälɩpiedɛɛ ‑a kä, 'a ma 'nyɩ Nyɔsʋa ‑a jre 'pläa 'mlɩ. 13 ‑Maa 'köklesaplɩɩ ɔ nɩ, 'amɔ ma tʋŋlɔa' 'lɩ Nyɔsʋa dɛrɩ nɩ, 'Kriisë Jesu 'lɩa bäbäkʋa ‑gʋ nɩ, 'a ‑kanyɩ 'lɩ 'ɔɔn dɛrɩ ‑a tʋŋlɔ, 'Kriisëa ‑torua ‑gʋ. 14 'Ɔɔ bä ana 'wlinönrökʋ, 'ɔɔ nrörö 'üa ‑glügbü 'sɔɔlë ‑glügbö 'döö 'lɩ. 'Ɔɔ ‑gblooo dɛɛlɛ 'sasra ɩa' 'üün ‑gba; 'ɛɛ bä 'mʋgbʋgbʋɛ 15 'ɔa fugbaa 'mlɩ. 'Ɔ 'balɩ Moisëa ‑Dɔ nyra 'ua 'kamakʋ nyra 'ua ‑dɔ, 'kä 'ɔmä 'iia 'sɔɔlʋ ‑bɛ 'ɔɔn nyɔɔ dëdrë 'lɩnrörö, 'asɩ 'ɔ nʋ fugbalɩa flɛrɛkʋ; 16 'ɔmä ‑glügbü 'sɔɔlë 'wlinönrö, 'üü ‑bɛ Nyɔsʋa 'mä 'doo bä. Krʋa ‑gälɩa järäkʋ 'lɩ 'ɔ ‑srörö 'ɔnya 'bala 'lɩ dɛɛlɛ nröröa' 'üün 'nyüamlɩjraranyüü 'lɩ. 17 'Ɔ ja 'amɩ fugbalɩflɛrɛkʋ 'amɔ tʋŋlɔ ɩa' 'lɩ Nyɔsʋa dɛrɩ nyra 'ü maa' bɩa 'lɩgbakä. 18 'Be 'abɩa 'Kriisë ana 'fɩɔ ma ‑srörö kälɩ nɩ, ‑bakää ‑bä juifë 'aiɛ ‑nyɩ juifë bä, 'a ‑plɩɩ a 'mrɛɛ amä ana Tʋ Nyɔsʋa ‑gbajijrö ‑Susu 'doolʋa 'nyrɩklɩ. 19 'A 'ia ‑gʋ, 'a ‑kanyɩ nyɔtugbanyüü 'aiɛ ‑sisinyüü ‑a bä. Nyɔsʋaa 'nyünanyüüa ‑tɔrʋpɩɔa nyüü 'a bä, 'anya 'a Nyɔsʋaa nyuku ‑wälɩa nyüü bä. 20 'A ‑beere nyukulu kä 'käsri ‑tokoa 'täkë bäa' apotrë, nyɔsʋaamlɩpalanyüü, ‑bɛ Jesu 'Kriisëa 'mʋgbɛ bäa' nyukulua ‑wälɩtoŋlotäkä. 21 'Ɔɔ ‑gälɩ nyukua 'fɩɔ 'pala 'ümä 'nyünanyuku kpaku bä 'Pläkänyɔɔ 'lɩ. 22 ‑Bɛ 'a nyra 'Kriisë bäa' 'doo nɩ, 'ana 'mʋgbɛ nya bä kʋfa, i Nyɔsʋaa ‑Susu kʋa'. |
© Wycliffe Bible Translators, Inc.
Wycliffe Bible Translators, Inc.