Ebröönyüü 6 - Kuö Dëdrä Jenɛɛsë Rutë

¹ 'A 'ia ‑gʋ a 'kpɩa nyüükpaküa dii; a ‑si cɛtɛ 'kpɩkpɩakʋlʋ 'paaa' 'Kriisëa ‑gä ‑gba. A ‑kanyɩ 'blöö wiili ‑tuaraa' 'lɩa 'mlɩ dɛrɩ, ibäa': 'fëflɛnʋnʋgbia 'lɩgälɩtorokʋa 'kpɩkpɩadii, 'inyɩ ‑gbaa ‑a kä i fala nyüü jäjä mlɩ, nyra Nyɔsʋaa nyɔsʋaplɛtorokʋa 'kpɩkpɩadii.

² 'Aiɛ ‑frea ‑futokʋa 'kpɩkpɩadii, klʋgbë ‑gälɩ 'piepiekʋa wiili 'a 'kpɩaa' nyra jäjänyüüa 'kuaabresɔsɔkʋ nyra nyüüa ‑gätʋtʋkʋlʋ 'nyɩa' blöröfa kä.

³ Nyɔsʋa ma 'nyie, 'ii amä nʋ.

⁴ 'Be dɛɛlɛ bäa' ‑mülü nya käa' Nyɔsʋaa 'napɛ 'klɩtɔrɔ, ‑bɛ 'ü cɛ ‑nyɩa' 'srɛ, ‑bɛ 'Nyüna ‑Susu 'cerea' 'lɩ nɩ,

⁵ ü 'jäa' Nyɔsʋaa 'mʋfawiia 'nanakʋ mlɩ, ‑bɛ ü jrea' 'pläa 'klülü jöa' 'lee nɩ,

⁶ ‑bɛ ü 'cɛrɛa' nyɔsʋaplɛtorokʋ ‑wälɩ. 'Üülü nɩ, a ‑kanyɩ 'lɩ ‑a bɩa amä 'üün ‑balʋa ‑gälɩ 'klɩberekʋ 'lɩ ja. 'Ü nöa' 'saa nɩ, 'i ‑beere 'sɩrɩ 'ü koloa' 'sɔɔwʋ Nyɔsʋaa 'Jʋ krʋa ‑gälɩ, 'ümä 'ɔɔn 'nyüsü 'blara ‑jria 'klɩ.

⁷ 'Nʋŋlʋ 'a 'jääa' 'wʋ, uma dara ‑tʋtʋ ‑gälɩ nɩ, 'üa papladii 'mä tʋ, Nyɔsʋa 'ɔɔ 'paa 'uun 'nɩ.

⁸ ‑Maa 'ua 'mlɩ ma 'cie bʋbɔsipi nyra 'bütü nɩ, 'u ‑nëmä ‑gbanʋdɛɛ ‑a kä; 'unya busrua, 'kä 'unya 'pütrö.

⁹ ‑Maa, ‑wawawlajü 'amɩ, 'amɔlɔ nɩ, ‑yɛɛ ‑bakää a 'pa 'saa wii nɩ, a jre 'iin 'sɩrɩ 'a bäa' 'cɩca 'pɛ ‑gälɩ, 'lɩmlɩwʋwʋkʋa 'pɛ.

¹⁰ 'Be Nyɔsʋa ‑gäklɩ, 'ɔ ‑nëmä wiili 'a nʋa' ‑a ‑trɔ. 'Ɔ ‑nëmä bɩa 'jrʋpalä 'a nʋa' 'ana ‑wawaplɛ ‑bɛ 'a ‑fɛa' 'ɔa 'nyrɩa ‑gʋ nɩ, 'ɔ ‑nëmä bɩa 'äa ‑gä ‑a ‑trɔ. 'A ji 'cɛcɩnyüü ‑gba, ‑bɛ 'a ‑ka nö 'imɩ.

¹¹ ‑Maa a 'bata ‑mɔ ma bälɩ ɔ nʋ 'saa 'doo 'ɔ fumöa 'doo kä ‑gälɩ 'blörö jrüü jrälɩ, 'kä wiili kä 'fɩɔ 'a 'bataa' nrörö.

¹² Anyɩ 'bata 'bata ‑a 'amä ‑fɛ. ‑Maa nyüülü Nyɔsʋa 'daaa' 'ɔmäa' ‑jaaa ‑nyɩ 'üa nyɔsʋaplɛtorokʋ nyra 'üa 'mlɩkpʋkplɔkʋa ‑gʋ nɩ, 'ba nʋ 'üa 'sa.

¹³ Nyɔsʋa ‑gbala käa' Abraamë ‑maa 'nyaa 'saa nʋa ‑na ‑gʋ nɩ, 'ɔɔ bäa' Nyɔsʋa nɩ, 'ɔa 'mʋgbɛa 'nyrɩklɩ 'ɔ 'sɔrɩ kä, 'be nyɔɔ ‑moloo 'nyɩ 'lɩ ‑a bä 'ɔmä 'ɔɔn 'wʋsi.

¹⁴ 'Ɔ ‑gbala 'ɔɔn ‑maa: 'Tasɩrɩ 'nyaa ‑mɩ 'nɩ 'paa, 'kä 'nyaa ‑na 'jü ‑gälɩ 'papla ‑gböösa .

¹⁵ Abraamë nya kpʋkplɔmlɩ 'ɔnya ‑glaaa. 'Asɩ 'ɔ nʋ 'ɔnya 'jä dɛɛlɛ Nyɔsʋa 'daaa' 'ɔmäa' 'ɔa ‑gʋ nʋ.

¹⁶ Nyüü ma 'sɔrɩ nɩ, nyɔɔlɔ ‑sia' 'üün 'wʋa 'nyrɩklɩ 'ü 'sɔrɩ. Nyɔɔ ma nyaa' 'iin nʋ nɩ, 'ii srara 'sɩrɩ 'i bäa' 'cɩcasa.

¹⁷ Nyɔsʋaa 'mʋgbɛ nʋ 'imɩ bɩa. 'Ɔ nʋ 'imɩ 'ɔmä 'üün ‑gbala 'sɩrɩ 'ɔmäa' 'tasɩrɩ wiili 'ɔ 'daaa' 'ɔmäa' nʋ 'ɔa nyüüa ‑gʋ nɩ, 'inyɩ ‑gbagblɛ ‑a bä; 'a 'ia ‑gʋ 'ɔ 'sɔrɩ.

¹⁸ 'A 'ia dii 'sɔɔlüa ‑gʋ, i kä 'mlɩ Nyɔsʋa 'nyɩa' 'lɩbɩa 'ɔmäa' ‑gbagblɛ kä nɩ, ama 'jä 'iin 'i 'jrara ana 'klü ‑gböösa, amɔlɔ fɔlɔa' plɛgälɩpiepiekʋlʋ 'ɔ ‑tʋa' ana 'klɔɔtrʋ dɛrɩ.

¹⁹ 'Ia plɛgälɩpiepiekʋlʋ ‑beere dɛɛlɛ 'nyɩ ‑täfläa' 'lɩ, 'u 'suru 'unya ‑sɔɔrɔwʋ. 'Ia plɛgälɩpiepiekʋlʋ ‑gööö pösödɔʋlʋ bäa' cɛlɩa Nyɔsʋaanyuku kpaku ‑wälɩ 'lɩ, 'kä 'ɛ 'tɔɔ Nyɔsʋaanyuku kpaku ‑wälɩa ‑plɩɩlɩ 'nyɩa' ‑fre pa.

²⁰ 'A ‑nyɛɛ Jesu pa ana ‑gʋ, 'ɔ ‑ta amɩ 'nyʋfɔ 'klɔɔtrʋ. 'Ɔnya nʋ ‑gbɔsapɛrɩnyɔɔ kpakö 'plɔʋplɔʋa ‑gʋ ‑beere Mɛlëkesedɛkëa ‑gböööa 'klɩtotrokʋ.