Kolɔɔsënyüü 1 - Kuö Dëdrä Jenɛɛsë Rutë

'Trɔrʋ

¹ 'Mɔɔ 'Pɔɔlë, ɔ bäa' Jesu 'Kriisëa apotrëlɔ Nyɔsʋa wea' 'sɩrɩ 'ɔ ‑waa' nɩ, 'mɔɔ ‑bɛ ‑wlajʋlɔ 'ü 'daraa' Timotee,

² amɔ ‑jɩjraa' 'amɩ 'wʋ, 'amɔ Nyɔsʋaa 'nyünanyüülü kʋa' Kolɔɔsëbätä; 'amɔ 'Kriisë 'lɩa plɛgälɩpie ‑wlajü. Abɩa Nyɔsʋalɔ bäa' ana Tʋ nyra 'Pläkänyɔɔ Jesu 'Kriisëa ‑gbinanakʋ nyra plɛgälɩflɛrɛkʋ bä 'amɩ ‑gälɩ.

'Pɔɔlë bibie Kolɔɔsënyüüa 'wli 'lɩ

³ A 'trɛɛ Nyɔsʋa, ana 'Pläkänyɔɔ Jesu 'Kriisëa Tʋ ‑bɛ a bibie 'ana 'wli 'lɩ 'plɔʋplɔʋ,

⁴ 'be a 'nu 'sɩrɩ 'a toroa' 'Kriisë Jesu plɛ ‑bɛ 'a ‑waa' bɩa Nyɔsʋaa 'nyünanyüüa 'fɩɔ.

⁵ Dɛɛlɛ Nyɔsʋa tɛrɛa' 'amɩ cɛɩɩa 'mlɩ ɛ 'a ‑glaaa' nɩ, 'ɛɛ bä 'ana nyɔsʋaplɛtorokʋ. ‑Bɛ 'ia plɛgälɩpiepiekʋlʋ nɩ, 'cɩcasalä 'saraa' 'lɩ, 'ää känyrɩ 'anya jre 'Mʋfagogo.

⁶ 'A 'Mʋfagogolä 'tɔa' 'amɩ ‑gba, ‑bɛ 'ää ‑gbaala 'pläa 'fɩɔa 'mlɩ 'kä. 'Ä 'paplagälɩ ‑bɛ 'ä ‑gbagbla 'lɩ 'klɩ kä. 'Asɩ 'i bä bɩa 'ana ‑tɔrʋpɩɔ, 'bala ‑srɩlɩ kä 'mlɩ 'a 'nua' ‑bɛ 'a jrea' Nyɔsʋaa ‑gbinanakʋa 'cɩcasa 'lɩ.

⁷ 'Asɩ ana ‑wawajrʋpafɛnyɔɔ Epafarasë 'kpɩaa' 'amɩ 'iin. 'Ɔɔ bä 'Kriisëa plɛtoro 'jrʋpafɛnyɔɔ ana ‑pi 'lɩ 'ana ‑gba.

⁸ 'Ɔɔ ‑gbala amɩ 'sɩrɩ Nyɔsʋaa ‑Susu ‑tʋa' ‑wawlakʋ 'amɩ 'lɩ.

⁹ A 'nua' 'iin 'wli nɩ, 'ia ‑gʋ anyɩ 'nyüglö 'ana 'wli 'lɩa nyɔsʋabibiekʋa ‑gʋ ‑a. Bibie a bibie 'ɔɔn 'ɔmä 'amɩ wiili kä 'fɩɔ 'ɔ 'bataa' srara, ɔ ‑nyɩ 'amɩ wiijejrekʋ nyra 'lɩgaglakʋ 'ɔa ‑Susu 'lɩ.

¹⁰ 'Ia 'taɩn 'lɩ nɩ, 'a 'mrɛɛ 'amä 'Pläkänyɔɔ 'tʋkä wiia 'fɩɔa 'mlɩ; 'a 'mrɛɛ 'amä 'ɔa 'klʋɩ 'nyɛrɛ. 'Anya 'mʋfagbia 'kaɩn 'kaɩn nʋa ‑beere tuu ‑tʋa', 'kä 'ana nyɔsʋajejrekʋ nya ‑gälɩpapla.

¹¹ 'Sɩrɩ 'ɔa 'wliklɩbʋbʋakʋa 'klü bäa' 'asɩ 'ɔmä 'amɩ 'klülɩpa diia 'fɩɔa 'mlɩ, 'amä wiia 'fɩɔa ‑gbötökʋ mlɩbɩa, 'amä nyɔnyrɔ nyɔnyrɔ 'amä 'blöröfawʋ 'tɔ dɔrʋsa.

¹² ‑Bɛ 'amä Tʋ 'trɛɛ, 'ɔɔlɔ nʋa' 'iin ‑bɛ amäa' ana në 'pɛ ‑jaaa 'mlɩ 'järä, ‑jaalä 'ɔ tɛrɛa' 'nyünanyüülü bäa' 'ɔa në 'napɛ 'lɩ.

¹³ 'Ɔ 'ba amɩ 'jöjrüükpüa 'klü mlɩ, 'ɔnya fa amɩ 'ɔa ‑Wawa 'Jʋa 'Kamapläa 'mlɩ.

¹⁴ 'Ɔɔ känyrɩ anya 'wʋlɩmlɩ: 'iibä 'a 'ɔa ‑gʋ ana ‑balʋ cere.

'Kriisë bä diia 'fɩɔa 'wliklɩ

¹⁵ 'Ɔɔ bä Nyɔsʋalɔ anyɩ 'jäa' 'wʋa 'pije; 'ɔɔ bä ‑Kätɩjʋ, 'ɔɔ ‑si diili kä 'fɩɔ nröröa' 'wʋ.

¹⁶ 'Be 'ɔɔ Nyɔsʋa ‑srörö kälɩ 'ɔnya nʋ diili kä 'fɩɔ bäa' cɛa 'mlɩ nyra ‑tʋtʋ ‑gälɩ: diili a 'jäa' 'wʋ nyra ‑mɩlɩ anyɩ 'jäa' 'wʋ; 'Kɩɩɩ nyra 'üa 'kamakʋ, 'cifu nyra 'klüɩɩ. 'Ɔɔ kälɩ 'ia 'fɩɔ ‑srörö 'inya nrörö 'ɔa ‑gʋ.

¹⁷ 'Ɔɔlɔ nɩ, 'ɔ bä ‑plɩɩ 'fɩɔwʋ diia 'fɩɔ nya 'mä nrörö, 'ɔɔ 'klaa 'ia 'fɩɔlʋ kälɩ.

¹⁸ 'Ɔa 'mʋgbɛ bä 'ɔa fugbalä bäa' 'Cɛcɩa 'wli. 'Ɔɔ bä Cɛtrɛfa, 'ɔɔ ‑kätɩ 'sɔɔ 'kuaabre, 'ɔmä wiia 'fɩɔa 'wliklɩ bä.

¹⁹ 'Be 'i kä Nyɔsʋa 'tʋ 'ɔmä 'ɔɔn 'lɩ kʋ 'sɩrɩ 'ɔ bäa' ‑tɛɛ.

²⁰ 'Ɔnya ‑srörö 'ɔɔn kälɩ 'ɔmä 'ɔɔ ‑bɛ wiia 'fɩɔ 'wlinönrö. 'Ɔa 'Jʋa ‑torulu ‑gblɔɔa' 'kä krʋa ‑gälɩ 'ɔ ‑srörö kälɩ 'ɔnya ja 'üa ‑tɔrʋpɩɔ 'wlinönrökʋ, 'ɔɔ ‑bɛ diili kä 'fɩɔ bäa' cɛa 'mlɩ nyra ibäa' ‑tʋtʋ ‑gälɩ.

²¹ ‑Bɛ 'amɔlɔ nɩ, 'a ma tʋŋlɔlɩ Nyɔsʋa dɛrɩ, 'a ma bä 'ɔa 'nyüamlɩjraranyüü 'ana bobowli nyra 'ana bʋbɔgbia 'mlɩ.

²² ‑Maa 'köklesaplɩɩ ɔ nɩ, 'ɔa 'Jʋlɔ 'ɔ nröröa' nyɔɔ 'lɩ nɩ, 'ɔa jäjäkʋ 'lɩ 'ɔ ‑srörö 'ɔ nyra 'amɔ nya 'nönröwli, 'amä 'ɔa 'klʋɩ 'nyüglö 'sɩrɩ 'a bäa' nyüülü kä 'nyü 'naa' ünyɩa' bʋbɔdɛɛ ‑gba kä, ü wii ‑nëmäa' 'kpla.

²³ ‑Maa 'a kä 'amä nyɔsʋaplɛtorokʋ 'lɩ kʋ, 'ana ‑toko kä 'ämä 'käsri ‑bɛ 'amä nyɔnyrɔ 'mʋfasa. Dɛɛlɛ 'a jrea' 'saa 'Mʋfagogo tɛrɛa' 'amɩ nɩ, 'anyɩ be 'iin ‑gälɩ 'klɩ. 'A 'nu 'ään 'wli, 'ü 'sa 'ään nyüüa 'fɩɔ ‑pɩ ‑tʋtʋ ‑gälɩ, 'mɔɔ bäa' 'Pɔɔlë nya bä 'äa 'sasanyɔɔ.

'Jrʋpalä 'Pɔɔlë ‑fɛɛɛrɛa' 'cɛcʋa 'mlɩ

²⁴ ‑Sʋɛlɛ kä 'mlɩ 'n bäa' 'köklesaplɩɩ 'ana ‑gʋ nɩ, 'i kä 'mɩ dɔrʋ 'wʋ. 'Na 'jajɛa 'mlɩ 'n ‑ka 'jää ‑sʋɩlɩ tɩɔa' 'lɩ, i 'Kriisë nëmä ɩa' 'jä 'ɔa fugbalä bäa' 'Cɛcɩ, 'äa ‑gʋ.

²⁵ 'A 'Cɛcɩlɛa 'jrʋpafɛnyɔɔ 'n bä. Nyɔsʋa 'ɔɔ ‑nyɩ 'mɩ 'jrʋpalä ‑a ‑fɛ 'ämɩ 'ana ‑gʋ. 'Ɔ blɔ 'mɩ ‑a 'pa 'ɔa 'papawiia 'fɩɔ.

²⁶ 'Papawiili 'iibä wiili ‑sisre 'käa' nyüüa 'fɩɔ ‑gba kolo ‑kätɩsa 'lɩ kä, ‑maa 'ɔnya 'iin ‑mlatɩ nyüülü bäa' 'ɔa 'nyünanyüü srara.

²⁷ Nyɔsʋa 'bata 'ɔmä 'üün 'wliklɩbʋaa 'bɩɔlʋ 'ɔ ‑sisie ɩa' srara, u 'ɔ tɛrɛa' nyüülü 'nyɩa' juifë bä. ‑Jää wiili 'ɔ ‑sisie ɩa': 'Kriisë bä 'amɩ 'lɩ; 'ii 'sree plɛ 'kä 'sɩrɩ amäa' Nyɔsʋa 'wliklɩbʋabʋakʋ 'jä.

²⁸ 'A 'ɔa ‑gä a 'paa. 'Lɩglasa a 'paa nyüüa 'fɩɔ toto, 'kä a 'kpɩa nyüüa 'fɩɔ, 'üa 'fɩɔ 'mä ‑jrɛ ‑bɛ 'ümä Nyɔsʋa 'klɩtɔrɔ 'Kriisë Jesua 'nyrɩklɩ.

²⁹ 'A 'ia ‑gʋ 'n ‑fɛɛɛ 'jrʋpa 'ɔa 'klüa 'nyrɩklɩ, 'ü 'tuto 'mɩ ‑gböösa.