Akëtë 8 - Kuö Dëdrä Jenɛɛsë Rutë

¹ Sɔɔlë po nyüülü 'blaa' Etiɛɛnë ‑gälɩ. 'A 'ia ‑srɩlɩa 'mlɩ nyüü 'bala Jerusalɛɛmëa 'cɛcɩnyüüa ‑gbigbanʋnʋkʋ ‑gböösa. Nyüüa 'fɩɔ nya ‑gbaala Judee nyra Samariia ‑tʋtʋ ‑gälɩ 'kä. Apotrëa 'doo 'üü 'nyɩ 'kousɔ.

Sɔɔlë nö 'cɛcɩnyüü ‑gbigba

² 'Cɛcɩa 'cɛcɩnyüülü pɩɛa' Nyɔsʋa nya ‑tʋ Etiɛɛnë, 'ünya 'wuö 'ɔmɩ ‑gböösa.

³ ‑Maa Sɔɔlëlɔ nɩ, 'ɔ 'bata ɔ bɩa 'cɛcɩnyüüa 'fɩɔ; 'ɔ papa nyëka ‑wälɩ, 'ɔ 'babalɩ nyɩberü nyra 'ŋlëgë 'klüsa 'kä 'ɔ ma 'papa 'üün ‑jie 'lɩ.

Filipë 'sara 'mʋfagogo Samarii

⁴ 'I känyrɩ 'cɛcɩnyüülü ‑gbagba ɩa' 'kä nya mi ‑pɩɔa 'fɩɔ nyɔsʋaawii 'pala.

⁵ Filipë nya mi Samariia bätä 'dööa 'mlɩ ‑bɛ 'ɔ 'sara 'lɩ 'ia nyüü 'Kriisëa ‑gä.

⁶ Nyüü 'kɔkɔmlɛ ma po wiili 'ɔma 'saaa' 'lɩ 'nyakli, ‑bɛ 'ü ma 'jäa' ‑saragbia tielë 'ɔ ma nöa' nɩ, 'ü po 'ɔɔn 'nyakli 'mʋfasa.

⁷ ‑Frepasisi ma 'kpöö ‑gböösa ‑bɛ 'i ma 'cecie nyüü 'kɔkɔmlɛ 'lɩ. Nyüülü kä ‑gbaa dii jäa' nyra bɔʋlɩnyɛrɛnyüü 'kɔkɔmlɛ 'pʋɔ.

⁸ Dɔrʋ 'kɔkɔmlɛ nya 'si bätäläa 'mlɩ.

⁹ ‑Minanʋnyɔɔ 'doo bä kä bätäläa 'mlɩ, 'ɔɔ 'ü 'dara kä Simɔɔ. 'Ii 'ɔ ma nö ‑bɛ 'ɔ ma kala Samariia nyüü plɛ 'klɩ 'plɔʋplɔʋ. 'Ɔ 'dara 'ɔa nyufa nyɔɔ kpakö.

¹⁰ Sɔ 'jüplö ‑gälɩ ‑a ‑tɔɔ tagbö ‑gälɩ, nyüüa 'fɩɔ ma po 'ɔɔn 'nyakli, ‑bɛ 'ü ma nö: «Nyɔɔlɔ kʋa' ‑pɩ, Nyɔsʋaa 'klü 'ɔ bä, 'klülü 'ü 'daraa' 'Klü Kpakü.»

¹¹ Simɔɔ kätɛ 'ɔnya nʋ ‑mina 'ɔnya kala nyüü plɛklɩ, 'ia ‑gʋ 'ü po 'ɔɔn 'nyakli ‑gböösa.

¹² ‑Maa Filipë jia' 'üün 'mʋfagogolä 'paaa' Nyɔsʋaa 'kamaplä nyra Jesu 'Kriisëa 'nyrɩa ‑gä ‑gbala nɩ, 'ü 'dara 'iin wii; 'ünya 'pala 'nɩ 'wli, 'palɩ nyɩberü ‑a ‑paalɩ 'ŋlëgë.

¹³ Simɔɔa 'mʋgbɛ nya 'dara 'iin wii. 'Ɔ 'palaa' 'nɩ 'wli nɩ, Filipë 'ɔ prɛdɛrɩ. 'Ɔ 'jää ‑saragbia tie nyra plɛklɩkalawiili nröröa' 'i kala 'ɔɔn plɛ 'klɩ.

¹⁴ Apotrëlü bäa' Jerusalɛɛmë 'nua' ‑maa Samariia nyüü 'a nyɔsʋaawii 'klɩnyiere nɩ, 'ünya blɔ 'lɩ Piɛɛrë nyra Jaan.

¹⁵ 'Ü 'tɔa' nɩ, 'ünya bibie nyüülüa 'wli 'lɩ Nyɔsʋa, 'ɔmä 'üün 'Nyüna ‑Susu ‑nyɩ,

¹⁶ 'be 'u ‑kaaŋlʋ ɩ 'üa ‑tɔrʋpɩɔa nyɔɔ ‑gälɩ 'cere; 'nɩ 'wlia 'doo 'ü 'pala 'Pläkänyɔɔ Jesua 'nyrɩklɩ.

¹⁷ 'I känyrɩ Piɛɛrë nyra Jaan nya 'pepe 'üün klʋgbë ‑gälɩ, 'Nyüna ‑Susu nya 'cere 'üün ‑gälɩ.

¹⁸ Simɔɔ jrea' 'saa 'Nyüna ‑Susu 'cere 'üün 'lɩ 'taɩn 'lɩ apotrëlü 'pepea' 'üün klʋgbë ‑gälɩ nɩ, 'ɔnya ja mölii 'ɔmä 'üün ‑nyɩ,

¹⁹ 'ɔ ‑nëma: «'Ba ‑nyɩ bɩa 'mɩ 'klülü, ‑bɛ nyɔɔ ‑o nyɔɔ 'mäa' klʋgba ‑gälɩ 'pie nɩ, 'Nyüna ‑Susu 'mä 'ɔɔn 'lɩ 'cere.»

²⁰ 'Iibäa' Piɛɛrë nɩ: «Jä, ‑nyra ‑na mölii 'sɔ! ‑Na plɛ nɩnɩa dɛɛlɛ Nyɔsʋa ‑nyɛɛa' nyɔɔ 'flɛɛlɩ nɩ, ‑mrɛɛɛ ‑a nʋ mölii ‑a ‑su 'ɛ ‑mɩ!

²¹ ‑Nyɩ ‑taa wiilia 'mlɩ dɛɛ ‑a kälä; ‑nyɩ kä ‑a kä ‑mä 'nɩmɩ 'lɩ dɛɛ kälä, 'be ‑na plɛ 'nyɩ 'klɩ ‑a ‑gä Nyɔsʋaa 'klɔɔtrʋ.

²² 'I känyrɩ 'pie 'ia plɛbʋbɔkʋlʋ, 'kä bibie Nyɔsʋa 'ɔmä ‑mɩ wiili ‑na plɛ boboa' cere, ima 'wʋ 'iin 'klɩ.

²³ 'N jre 'iin 'sɩrɩ dɛɛnyü 'sia ‑mɩ 'klɩ, ‑bɛ ‑kpasraa' ‑balʋ ‑gba.»

²⁴ 'Iibäa' Simɔɔ nɩ: «'Ana 'mʋgbɛ 'ba bibie 'Pläkänyɔɔ 'na ‑gʋ, dɛɛ ‑pɩ 'mɩ nʋ, wiili 'a 'paa' ‑plɩɩ 'ia ‑gʋ.»

²⁵ Piɛɛrë nyra Jaan bɩaa' wiili bäa' Nyɔsʋa nyra 'Pläkänyɔɔa wiia 'papakʋ nɩ, 'ünya 'blöö Jerusalɛɛmë dɛrɩ ‑bɛ 'ü 'sa 'Mʋfagogo Samariinyüüa bätë 'kɔkɔmlɛa 'mlɩ.

Etiopiia 'jrʋpafɛnyɔɔ kpakölɔ 'nyierea' Nyɔsʋaawii 'klɩ

²⁶ 'Pläkänyɔɔa 'aanjë nya ‑gbala Filipë: «Sɔwʋ ‑a mi 'jrʋa 'wʋsɔrɔfaa 'dupa 'pɛlɩ, fa 'nyʋfɔlʋ möa' Jerusalɛɛmë nyra Gasabätäa mlɩ.» 'Nyʋfɔlʋ 'nyɩ ‑sisia.

²⁷ Filipë nya sɔwʋ 'ɔnya mi. 'A 'nyʋfɔ mlɩ 'ɔ jrä Etiopiinyɔɔ 'doo, 'ü wa 'ɔɔn. Nyɔɔlɔ bä nyɔɔ kpakö Etiopiia 'bre. 'Kɩɩŋlʋʋlɔ 'ü 'daraa' Kadaasë, 'ɔ ‑nyɩ 'ɔɔn 'ɔa 'bɩɔa 'fɩɔa 'nyiöligääläkʋ kälɩ. Jerusalɛɛmë nyɔɔlɔ ji ɩ 'ɔmä Nyɔsʋa bibie.

²⁸ 'A 'ɔa ‑nyɛɛ 'ɔ 'blöö ɩ dɛrɩ 'ɔa jakasɩa 'mlɩ ‑bɛ 'ɔ ‑täsä ɩ ‑pɔɔkʋlʋ nyɔsʋaamlɩpalanyɔɔ Esaii ‑jɩjraa'.

²⁹ ‑Susu nya ‑gbala Filipë: «Mumlö jakasɩlɛ kʋa' ‑plɩɩa ‑gba.»

³⁰ 'Ɔnya fɔ 'ɔnya mi 'lɩ, 'ɔ 'tɔa' 'lɩ ‑gba nɩ, 'ɔ po nyɔɔlɔ 'nyakli ‑bɛ 'ɔ ‑täsä nyɔsʋaamlɩpalanyɔɔ Esaiia ‑pɔɔkʋ, 'ɔnya 'bete 'ɔɔn: «‑Nöö wiili ‑täsäa' 'wli?»

³¹ 'Iibäa' nyɔɔlɔ nɩ: «Nyɔɔ ma 'nyɩ 'mɩ plɛ 'lɩ ‑a 'sasra, ‑asɩ 'nyaa 'iin 'wli 'nu le?» 'Ɔnya ‑gbala Filipë ɔ 'jra 'ɔmä 'ɔa ‑gba kʋ.

³² ‑Jää wiili 'ɔ ‑täsä ɩa' nyɔsʋapɔɔkʋa 'mlɩ: 'Ü fa 'ɔɔn ‑beere ‑bablɛɛ 'ü fa ‑plɛlɩbökalɩ; ‑beere nyɔɔ 'böbö ‑bablëëjʋa ‑gbaa 'ŋuei ‑bɛ 'ɔnyɩ cɛ mɛ. 'Ɔnyɩ mɛ ‑a cɛ.

³³ 'Ü 'bö 'ɔɔn 'klɩ, 'ünyɩ 'ɔɔn 'casɩ ‑a ‑nyɩ 'ɔmä wiili 'ɔ 'bataa' nʋ. Nyɔɔ 'plɛɛ 'mä 'ɔa 'jüa ‑gä 'pa le? 'Ü 'ba 'ɔɔn 'ɔa 'klä kälɩ ‑pɩ ‑tʋtʋ ‑gälɩ .

³⁴ Nyɔɔlɔ 'ü waa' nya 'bete Filipë: «'N bibie ‑mɩ, nyɔɔ 'plɛɛ kä ‑gä nyɔsʋaamlɩpalanyɔɔlɔ 'paa le? 'Ɔa 'mʋgbɛ? ‑Maa nyɔɔ ‑moloo?»

³⁵ Filipë nya dɔrɔ wii 'wʋ, 'a ‑plɩɩlɩ 'ɔ ‑täsäa' nɩ, 'a ‑plɩɩ 'ɔ 'bala 'ɔnya 'pala 'ɔɔn 'Mʋfagogolä 'paaa' Jesu ‑a ‑gä ‑gba.

³⁶ 'Ü möa' a 'doo nɩ, 'ünya 'tɔ 'nie 'dee ‑gba. Nyɔɔlɔ ‑nëma: «‑Jää 'nie, 'nyɩ 'lɩ ‑a bɩa ‑a 'pala 'nɩwli?»

³⁷ 'Iibäa' Filipë nɩ: «‑Ama nʋ ‑na plɛa 'fɩɔ, ‑ama toro 'iin plɛ nɩ, 'i 'mrɛɛ i nrörö.» 'Iibäa' nyɔɔlɔ nɩ: «'N jre 'iin 'sɩrɩ Jesu 'Kriisë bäa' Nyɔsʋaa 'Jʋ.»

³⁸ Nyɔɔlɔ nya ‑gbala jakasɩtierenyɔɔlɔ ɔ 'nyüglö; 'ɔ nyra Filipë nya 'cie, 'üa 'sɔɔ nya mi 'nielɛa 'mlɩ, Filipë nya 'pa 'ɔɔn 'nɩwli.

³⁹ 'Ü 'ciea' 'nie 'lɩ dotro 'Pläkänyɔɔa ‑Susu nya fupo Filipë 'unya fa 'ɔɔn. Nyɔɔlɔ ‑kanyɩ 'jä 'ɔɔn ‑a, ‑maa 'asɩɛ 'ɔnya fa 'ɔa 'nyʋfɔ 'ɔnya mi; dɔrʋ 'si 'ɔɔn 'klɩ.

⁴⁰ Filipëlɔ nɩ, 'ɔnya 'tɔrɔ bätälä 'ü 'daraa' Asotë. 'A ‑nyɛɛ 'ɔ fa 'ɔ mö ‑bɛ 'ɔ 'saa 'Mʋfagogo bätëa 'mlɩ. 'Asɩ 'ɔ nʋ nʋ 'ɔnya 'tɔ bätälä 'ü 'daraa' Sesaree.