Akëtë 5 - Kuö Dëdrä Jenɛɛsë Rutë

Ananiasë nyra Safiraa ‑balʋ

¹ ‑Maa nyɔɔ 'doo 'ü 'daraa' Ananiasë nyra 'ɔa 'ŋlʋʋ Safira nya 'pa 'üa putu 'doo 'peru.

² 'Ɔɔ ‑bɛ 'ɔa 'ŋlʋʋ 'nönröa' 'wli nɩ, 'ɔnya 'bö möliili ‑tɩa, 'ɔnya fa ‑mɩdoo apotrë.

³ Piɛɛrë nya ‑gbala 'ɔɔn: «Ananiasë, dɛplɛɛ kä ‑gʋ ‑cɛɛrɛ Sataan ‑wälɩ ‑bɛ 'ɔ fa ‑na plɛ le? 'Nyüna ‑Susu ‑saara ‑gbagblɛ ‑nya ‑tʋ putulu ‑paaa' 'perua möliia 'pɛ 'dee ‑wälɩ.

⁴ ‑Na putu bä ɩ 'saa ‑nya 'mä 'uun 'peru 'pa. ‑Paaa 'uun 'peru nɩ, ‑mɔ kä ‑na möliili 'la; ‑ale ‑mää 'sɩ 'inyɩ bä? ‑Bɛ dɛplɛɛ kä ‑gʋ nʋ 'ia 'sama wiili le? ‑Mää nyüü ‑nyɩ ‑gbagblɛ 'sara, ‑maa Nyɔsʋa ‑sara ‑gbagblɛ.»

⁵ Ananiasë 'nua' 'iin 'wli dotro, 'ɔnya blö 'ɔnya jä. Nyüülü kä 'fɩɔ 'nua' 'iin 'wli nɩ, ŋalɛlɛ 'blaaa' 'üün ‑mää 'ɛa ‑srɩ 'nyɩ ‑pɛ.

⁶ ‑Sëgbë nya ji 'ünya ‑fifra 'ɔɔn dɔʋ 'ünya mi 'ɔɔn ‑tʋ.

⁷ ‑Gliiibei tää 'mä ‑sikalɩ mi nɩ, 'ɔa 'ŋlʋʋ 'a ji; ‑maa wiili bäa' 'lɩ 'ɔnyɩ 'iin jre ‑a jre.

⁸ Piɛɛrë nya 'bete 'ɔɔn: «'Nɩnɩa nɩ, putulu 'a 'paa' 'peru nɩ, möliili 'a 'jäa' 'ii kʋ ‑pɩ?» 'Ɔnya 'nyie: «‑Yɛɛ, 'ii bäsaa.»

⁹ Piɛɛrë ‑nëma: «Dɛplɛɛ kä ‑gʋ 'ana 'sɔɔ 'nönröwli ‑bɛ 'a ji 'Pläkänyɔɔa ‑Susu 'lɩtɛkalɩ le? ‑A ‑gbala ‑mɩ: nyüülü ‑tʋa' ‑na dʋɔ, 'ü 'a nyuku mla 'klɩ 'tɔtɔkʋ bɩa; 'ünya bɩa ‑mɩ faa!»

¹⁰ 'A ‑plɩɩ 'ɔ kʋ dotro 'ɔnya blö Piɛɛrëa bei 'wʋ, 'ɔnya jä. ‑Sëgbëlü 'mä jikalɩ mi nɩ, 'ɔa jäjäa nʋ 'ü jrä ‑plɩɩ. 'Ünya fa 'ɔɔn, 'ünya ‑träärä 'ɔɔn 'ɔa dʋɔa ‑gba.

¹¹ 'Cɛcɩnyüüa 'fɩɔ nyra nyüülü kä 'fɩɔ 'nua' 'iin 'wli nɩ, ŋalɛ 'bla 'üün ‑gböösa.

‑Saragbia tie 'kɔkɔmlɛ

¹² Apotrë nrörö nyüüa ‑tɔrʋpɩɔ ‑saragbia tie nyra plɛklɩkalawii 'kɔkɔmlɛ. 'Üa 'fɩɔ 'nönröa' 'wli nɩ, papalä 'ü 'daraa' Salomɔɔa papa, 'äa ‑wälɩ nyüü trara.

¹³ Nyɔɔ 'nyɩ nyüü ‑mülüa ‑tɔrʋpɩɔ ‑a bä 'ɔmä 'üa ‑tɔrʋpɩɔ mi; ‑maa 'ü 'paa 'üa ‑gä 'cɩcasa.

¹⁴ Nyɩberü nyra 'ŋlëgë 'kɔkɔmlɛ toro 'Pläkänyɔɔ plɛ ‑bɛ 'cɛcɩnyüü 'paplagälɩ ‑a 'doo.

¹⁵ 'Ünya jaja 'üa ‑wusublanyüü 'wʋpidii ‑gälɩ, 'ünya 'pepe 'üün 'nyʋfɔ 'mlɩ. Piɛɛrë ma ‑si nɩ, 'ü 'bata abɩa 'ɔa ‑susu ‑srörö 'üa ‑tɔrʋpɩɔa ‑mölöö ‑gälɩ.

¹⁶ Nyüü 'kɔkɔmlɛ sɔsɔ bätë ‑mülü bäa' 'lɩ ‑gbaa 'mlɩ ‑bɛ 'ü jö Jerusalɛɛmë. 'Ü ja ja ‑wusublanyüü nyra ‑mülü ‑frepasisi bäa' ‑gälɩ ‑bɛ 'üa 'fɩɔ 'pʋɔ.

'Ü fa apotrë 'klaa 'sɔɔwʋ juifëa tropina 'lɩ

¹⁷ ‑Gbɔsapɛrɩnyɔɔ kpakö nyra nyüülü kä 'fɩɔ bäa' 'ɔɔn dɛrɩ, ü 'ü 'daraa' Sadusinyüüa ‑glügbünyüü nɩ, wasä 'si 'üün 'klɩ, 'ünya sɔwʋ.

¹⁸ 'Ünya 'kpla apotrë, 'ünya 'pa 'üün ‑jie 'lɩ.

¹⁹ ‑Maa ‑gbiara nɩ, 'Pläkänyɔɔa 'aanjë nya 'sa ‑jienyukua tatia. 'Ɔ 'ciea' 'üün nɩ, 'ɔnya ‑gbala 'üün ‑maa:

²⁰ «'Ba mi Nyɔsʋaanyuku kpaku ‑wälɩ, 'ba ‑gbala nyüü 'klä dëdräa ‑gä.»

²¹ Apotrëlü 'nua' 'iin 'wli nɩ, 'jrʋfla ‑gölöa' dotro Nyɔsʋaanyuku kpaku ‑wälɩ 'ü mi, ‑bɛ 'ü 'kpɩa nyüü. ‑Gbɔsapɛrɩnyɔɔ kpakö nyra 'ɔa nyüü 'tɔa' nɩ, 'ünya we juifëa tropinanyüü nyra Israɛɛlëa ‑gätʋnyüüa 'fɩɔ. 'Pɩrɩgälɩ nɩ, 'ünya blɔ nyüü ‑jienyuku ‑wälɩ ü ja apotrëlü.

²² ‑Maa 'sʋgɩanyüü mia' nɩ, 'ünyɩ 'üün ‑jienyuku ‑wälɩ ‑a 'jrä. 'Ünya 'blöödɛrɩ, 'ünya ji 'üün ‑gogo 'sa:

²³ «A mia', ‑jienyukua tatu blörö 'mʋfasa. ‑Gälɩglaranyüü 'nyüglö ‑plɩɩ ‑fälɩ tatia 'mäklɩ. ‑Maa a 'saa' 'uun nɩ, anyɩ 'lɩ 'mlɩ nyɔɔ ‑a jrä.»

²⁴ Nyɔsʋaanyuku kpakua 'sʋgɩaa 'cifi nyra ‑gbɔsapɛrɩnyüü kpakö 'nua' 'iin 'wli nɩ, wiili 'imäa' bä 'ünyɩ 'iin jre ‑a jre; 'sɩrɩ 'i nʋa' ‑sisidɛɛ 'ii 'ü 'betre 'lɩ.

²⁵ Nyɔɔ 'doo nya ji 'üün ‑gbala: «Nyüülü 'a 'paa' ‑jie 'lɩ ‑jää 'üün bä Nyɔsʋaanyuku kapku ‑wälɩ ü 'kpɩa nyüü.»

²⁶ 'Sʋgɩanyüüa 'cifi nyra 'ɔa nyüü nya mi 'üa 'klɛɛ, ‑maa 'ünyɩ 'iin 'klüsa ‑a nʋ, 'be ŋalɛ 'blaa 'ümɩ nyüü ‑pɩ 'üün 'täkë 'kakla.

²⁷ 'Ünya ja 'üün, 'ünya 'sri 'üün juifëa tropina 'klɩ 'kä. ‑Gbɔsapɛrɩnyɔɔ kpakö nya ‑gbala 'üün,

²⁸ ‑maa: «A ‑gbala ɩ 'amɩ 'mʋfasa, 'a ‑kanyɩ 'kpɩa nyüü nyɔɔlɔa 'nyrɩklɩ! ‑Maa 'asɩɛ 'anya 'a Jerusalɛɛmë 'ana 'kpɩkpɩadiili 'sie, ‑bɛ 'a 'bata 'amä amɩ nyɔɔlɔa ‑toru 'tata!»

²⁹ Piɛɛrë nyra apotrë ‑mülü nya 'sa 'üün ‑gälɩ, 'ü ‑nëma: «Nyɔsʋa nyɔɔ kä 'ɔmä 'lɩträärä, ‑maa ‑mää nyɔɔ ‑a.

³⁰ Ana tʋɩɩa Nyɔsʋa, 'ɔɔ 'ba 'kubre Jesulɔ 'a 'blaa' 'taɩn 'lɩ 'a koloa' 'ɔɔn krʋa ‑gälɩ.

³¹ 'Ɔɔ Nyɔsʋa 'jrara, 'ɔnya nrörö 'ɔɔn 'Cifi nyra 'Lɩmlɩbanyɔɔ 'lɩ, 'ɔmä 'iin nʋ Israɛɛlë 'mä 'lɩ ‑balʋ ‑gälɩtoro, ‑bɛ 'üa ‑balʋ 'mä cere.

³² Amɔlɔ nɩ, a 'jä 'imɩ, amɔ ‑bɛ 'Nyüna ‑Susulu Nyɔsʋa ‑nyɩa' nyüülü ‑trääräa' 'lɩ 'ɔmɩ.»

³³ 'Ü 'nua' wiili 'ü 'paa' 'wli nɩ, 'crɛ 'bla 'üün. 'Ünya 'nönröwli 'ümä 'üün 'bla.

³⁴ ‑Maa Farisinyɔɔ 'doo bä ɩ juifëa tropinaa ‑tɔrʋpɩɔ, 'ɔɔ 'ü 'dara Gamaliɛɛlë. ‑Dɔkpɩanyɔɔ 'ɔ bä, ‑bɛ nyüüa 'fɩɔ ‑träärälɩ 'ɔmɩ. 'Ɔnya sɔwʋ tropina 'lɩ, 'ɔnya 'daa ü 'cere apotrëlü ‑fälɩ ‑kätɩ.

³⁵ 'Ɔnya ‑gbala nyüülü: «Israɛɛlënyüü 'amɩ, 'ba ‑tre wiili 'amäa' nyüülü kʋa' ‑pɩ ‑gba nʋ.

³⁶ 'I ‑kaaŋlʋ jrüü ‑a ‑si, nyɔɔlɔ 'ü 'daraa' Todasë nya ji, 'ɔ ‑nëma 'mʋfanyɔɔ 'ɔ bä. Nyüülü prɛa' 'ɔɔn dɛrɩ bä kä nyüüa ‑duua 'samadɛɛ (400). 'Ünya 'bla 'ɔɔn, nyüülü kä 'fɩɔ ma prɛa' 'ɔɔn dɛrɩ nya ‑gbagbakä, 'inyɩ 'lɩ ‑a tʋŋlɔ.

³⁷ 'Ii ‑sia' nɩ, 'taɩn 'lɩ 'ü ‑jɩjraa' nyüüa 'nyrɩ nɩ, Galileenyɔɔ 'doo 'ü 'daraa' Judasë, 'ɔnya 'sara nyüü 'kɔkɔmlɛ ‑gbagblɛ ü prɛ 'ɔɔn dɛrɩ. 'Ünya 'bla 'ɔɔn bɩa, nyüülü kä 'fɩɔ poa' 'ɔɔn 'nyakli nya ‑gbagbakä.

³⁸ ‑Jäsɩ 'n ‑gbalaa' 'amɩ 'saarɩ nɩ: 'anyɩ mala nyüülü kʋa' ‑pɩ 'wʋ; 'ba 'cɛrɛ 'üün ‑wälɩ. ‑Bɛ 'üa dii, 'üa 'jrʋpa, 'ima 'daa nyüüa bobowlia wii nɩ, 'i ‑nëmä 'klɔɔtrʋ ‑a mi.

³⁹ ‑Maa ima bä Nyɔsʋaa wii nɩ, 'a ‑nëmä 'iin 'nyüglö ‑a 'nyüglö. 'Ama nʋ 'iin nɩ, Nyɔsʋa 'a fa tou.»

⁴⁰ 'Ünya we apotrëlü, 'ünya ‑gbagba 'üün ‑gbalɛfu ‑gälɩ, 'ünya ‑gbala 'üün, 'ü ‑kanyɩ 'pa Jesua ‑gä, 'ünya 'cɛrɛ 'üün ‑wälɩ.

⁴¹ Apotrëlü nya 'cie juifëa tropina 'lɩ, dɔrʋ 'bla 'üün 'sɩrɩ Nyɔsʋa 'nyiea' ‑bɛ 'ü ‑jejreea' 'üün 'ɔa 'nyrɩklɩa ‑gʋ.

⁴² ‑Srɩ o ‑srɩ, ‑bakää Nyɔsʋaanyuku kpaku ‑wälɩ, ‑gbüüü 'lɩ, 'ünyɩ nyüüa 'kpɩkpɩakʋa ‑gʋ ‑a fio. 'Ü 'saa 'Mʋfagogo 'sɩrɩ Jesu bäa' 'Kriisëlɔ.