Akëtë 28 - Kuö Dëdrä Jenɛɛsë Rutë

‑Saragbili nröröa' Maalëtëa dugba 'lɩ

¹ A sɔa' 'lɩ 'mlɩ nɩ, 'a ‑plɩɩ a 'nu 'sɩrɩ 'ü 'daraa' ‑plɩɩlɩ Maalëtëa dugba.

² Nyüülü kʋ ɩa' 'ia ‑plɩɩlɩ nɩ 'ü 'kʋɛɛlɩ amɩ 'mʋfasa. 'Ünya ‑srara kapu sɩɔa ‑gʋ, 'be 'nʋŋlʋ da ɩ.

³ 'Pɔɔlë nya 'bütö ‑gbalë jie 'ɔnya 'pie kapu 'klɩ. Kapua ‑gʋ 'mëmlɛ nya 'cie, 'ɛnya ‑fifra 'ɔa 'darʋ 'ɛnya mlu 'ɔɔn.

⁴ Nyüülü 'järäa' 'ɔa 'darʋ ‑gba trɔɔ nɩ, 'ü ‑nëma: «Nyɔɔlɔ kʋa' ‑pɩ nya nyüüblaanyɔɔ bäa; 'ɔ 'a 'tanie mlɩ sɔ ‑maa ‑Gätʋnyɔsʋa ‑nëmä 'ɔɔn ‑wälɩ ‑a 'cɛrɛ.»

⁵ 'Pɔɔlë nya 'fɩ 'ɔa 'darʋ kapu 'klɩ, 'unya blö 'lɩ, dɛɛ 'nyɩ 'ɔɔn nʋ ‑a nʋ.

⁶ Nyüüa plɛɛ 'ɔnya ɩ ‑fʋflʋ 'lɩ 'jraa, 'aiɛ 'ɔnya ɩ blöa 'kä 'ɔnya jä. ‑Maa 'ü tɛa' 'ɔɔn 'klɩ tɛ tɛ, ‑bɛ dɛɛ 'nyɩ nʋa' 'ɔɔn nɩ, 'ünya 'cici 'üa bobowli 'ü ‑nëma: «Nyɔsʋa kʋ ‑pɩ!»

⁷ ‑Tʋtʋpɛ 'dee bä ɩ ‑plɩɩlɩa 'mlɩ, dugba 'lɩa 'cifilɔ 'ü 'daraa' Publiusë 'ɔɔ kä 'lɩ. 'Ɔ 'kʋɛɛlɩ amɩ 'mʋfasa. 'Ɔ 'kpla amɩ ‑wlajüsa jrüü tääa 'mlɩ.

⁸ Publiusëa tʋ 'pi ‑tʋtʋ 'wʋ, ‑tumlɩ nyra 'fʋgbalʋ 'kpla 'ɔɔn. 'Pɔɔlë nya pa 'ɔɔn dɛrɩ 'ɔnya 'pie 'ɔɔn 'dari ‑gälɩ, 'ɔnya bibie Nyɔsʋa, nyɔɔlɔ nya 'pʋ.

⁹ 'I ‑sia' nɩ, nyüü ‑mülü bä ɩa' dugbaläa 'mlɩ ‑bɛ ‑wusu 'blaa ɩa' nɩ, 'ünya jö jö 'ünya 'pʋ.

¹⁰ 'Ünya nʋ käkädii 'kɔkɔmlɛ 'ünya 'bʋala amɩ. A möa' 'mɩɩ 'lɩ 'jra nɩ, 'ünya ‑nyɩ amɩ diili anyɩa' 'klaa.

'Pɔɔlë sɔ Maalëtë 'ɔnya mi Rɔmë

¹¹ ‑Söplü tää ‑sia' nɩ, anya 'jra 'mɩɩ 'lɩ anya mi Alesandriia 'blɩ ‑gälɩ. 'Ɛ ‑si dugba 'lɩ sɩɔa 'taɩn a 'fɩɔ. 'Ü ‑jɩjra 'ɛa ‑gba: «'Pou nyɔsʋaɩɩ.»

¹² Anya 'tɔ bätälä 'ü 'daraa' Silakusë, a ‑si 'lɩ jrüü tää.

¹³ A sɔa' ‑plɩɩ anya ‑gblaara 'kɔtʋ anya mi bätälä 'ü 'daraa' Lejio. ‑Srɩ ‑gbaa' 'kä, ‑bɛ ‑fʋflʋ jaraa' 'jrʋa 'wʋsɔrɔfa 'wʋ nɩ, a ‑si jrüü 'sɔɔ anya 'mä Pusɔlebätä 'tɔ.

¹⁴ A jrä 'lɩ ‑wlajü ‑mölöö, 'ünya bibie amɩ ‑a ‑si 'üa ‑nyɛɛ jrüü ‑uunsɔɔ. 'Asɩ a nʋ anya fala Rɔmëbätäa 'pɛlɩ.

¹⁵ 'Cɛcɩnyüü ‑mülü bäa' Rɔmë 'nua' 'iin 'wli nɩ, 'ünya ji amɩ 'klɩ 'jrara ‑plɩɩlɩ 'ü 'daraa' Apiusëa 'Makatɩ nyra ‑plɩɩlɩ 'ü 'daraa' ‑Sisinyëka Tää. 'Pɔɔlë 'jäa' 'üün nɩ, 'ɔnya 'trɛɛ Nyɔsʋa, 'klü nya 'jra 'ɔɔn ‑gba.

¹⁶ A 'tɔa' Rɔmë nɩ, 'sʋgɩaa 'kamanyɔɔ nya ‑nyɩ ‑jienyüü ‑gʋmlaa ‑gböölia 'kamanyɔɔlɔ kälɩ; ‑maa 'ünya bere 'Pɔɔlë 'klɩ 'ünya ‑tʋ 'ɔɔn 'sʋgɩanyɔɔ 'doo ‑gba 'ɔmä 'ɔɔn 'nyiöli ‑gäälä.

'Pɔɔlë 'palaa' nyɔsʋaawii Rɔmë

¹⁷ Jrüü tää ‑sia' nɩ, 'Pɔɔlë nya we juifëa 'wliklɩanyüü. 'Ü jia' nɩ, 'ɔnya ‑gbala 'üün: «'Na ‑wlajü 'amɩ, 'nyɩ bʋbɔdɛɛ ‑a nʋ, 'nyɩ ana nyüüa ‑gʋ wii ‑a 'pa, 'nyɩ bɩa ana tʋɩɩa ‑dɔa bʋbɔnyrɩ ‑a 'pa, 'asɩɛ 'ü 'pa 'mɩ ‑jie 'lɩ Jerusalɛɛmë, 'ünya ‑nyɩ 'mɩ Rɔmënyüü kälɩ.

¹⁸ 'Üülü nɩ, 'ü 'betea' 'mɩ nɩ, 'ü 'bata ɩ 'na ‑wälɩcɛrɛkʋ, 'be dɛɛlɛ kä ‑gʋ 'ümä 'mɩ 'bla 'ünyɩ 'jä 'ɛmɩ 'wʋ ‑a.

¹⁹ ‑Maa juifëlü nɩ, 'üü blara, 'ii nʋ 'imɩ 'nyaa ‑gbala 'üün ü fa 'na wii Sesaa. ‑Bɛ 'nyɩ 'bata 'bata ‑a 'nyraa 'na ‑glügbö 'mä ‑gʋmlawii 'pa.

²⁰ ‑Jää wiili kä ‑gʋ 'n 'bata ɩa' 'ana 'jäjäkʋ, 'mä 'amɩ 'iin ‑gbala. Nyɔɔlɔ Israɛɛlë 'piea' plɛ ‑gälɩ, 'ɔa ‑gʋ 'ü 'pa 'mɩ 'cɩ.»

²¹ 'Ünya ‑gbala 'ɔɔn: «Amɔlɔ nɩ, ‑pɔɔkʋ 'nyɩ Judee ‑a sɔ 'umä ‑na ‑gä 'pa. Nyɔɔ ‑kaaŋlʋ bɩa ‑nyɛɛ sɔ 'ɔmä amɩ ‑na bʋbɔnyrɩ ja.

²² ‑Maa a 'bata amä ‑mɩ 'nyaklipo, wiili ‑boboa' 'ia ‑gʋ; 'be ana 'fɩɔ jre 'iin 'sɩrɩ nyüüa 'fɩɔ 'nyɩa' ‑taa nyüüglügbölä kä 'mlɩ bäa' ‑wa.»

²³ 'Ünya ‑tʋ 'lɩ jrüülü kä 'mlɩ 'üü ‑bɛ 'Pɔɔlë 'mäa' trara. 'Ia ‑srɩ jräa' 'lɩ nɩ, nyüü 'kɔkɔmlɛ ji nyukulu kä ‑wälɩ 'Pɔɔlë kʋa'. Sɔ ‑suwla ‑a ‑tɔɔ ‑gbiajrʋ 'lɩ, 'ɔ 'saralɩ 'üün wii 'kɔkɔmlɛ käläa' Nyɔsʋaa 'kamaplä ‑gba. 'Bala Moisëa ‑Dɔ ‑gälɩ, a mi nyɔsʋaamlɩpalanyüüa ‑pɔɔkɩa 'mlɩ, 'ɔnya ‑gbala 'üün 'tasɩrɩwiili bäa' 'ia 'mlɩ, i 'paaa' Jesua ‑gä, 'ümä 'iin plɛtoro.

²⁴ ‑Mölöö 'dara 'iin wii, ‑maa ‑mölöö 'nyɩ 'iin wii ‑a 'dara.

²⁵ 'Ünyɩa' 'wli 'nönrö ‑bɛ 'ü möa' nɩ, 'Pɔɔlë nya 'pawii 'doo, 'ɔ ‑nëma: «'Nyüna ‑Susu kä ‑gä 'taɩn 'lɩ 'u ‑sröröa' nyɔsʋaamlɩpalanyɔɔ Esaii kälɩ ‑bɛ 'u 'palaa' ana tʋɩɩ wii ‑gba,

²⁶ 'unya ‑gbala 'ɔɔn: Mi ‑taa ‑glügbölöa 'mlɩ 'kä ‑gbala 'üün: 'Anya 'nyaklipo po, ‑maa 'a ‑nëma ‑srɩɩ 'nu ‑a 'nu; 'anya ‑pʋpɔ ‑pʋpɔ, ‑maa 'a ‑nëmä ‑srɩɩ dɛɛ 'wʋ ‑a 'jä.

²⁷ 'Be ‑taa ‑glügböläa plɛ 'a 'bʋa, 'üa 'nunukʋ 'a 'lɩkla; 'ü 'mʋmɔ 'üa 'nyü 'ü ‑pɩ 'nyü nʋ 'ü ‑pɩ 'käjä; 'ü ‑pɩ 'nyakli nʋ 'ü ‑pɩ 'nyaklipo; 'üa plɛ ‑pɩ wii 'wlinu, 'ü ‑pɩ 'na 'pɛlɩ kälɩsie 'nyɩ ‑pɩ 'üün 'pʋɔ .

²⁸ 'Ii känyrɩ, 'ba jresaa Nyɔsʋaa 'lɩmlɩwʋwʋkʋlʋ nɩ, nyüülü 'nyɩa' juifë bä 'üü 'ɔ ‑nyɩ 'ɔa ‑gogo; 'üülü nɩ, 'ünya 'ɔɔn 'nyaklipoa.»

²⁹ 'Ɔ bɩaa' wiipapakʋ nɩ, juifë nya mi ‑bɛ 'ü ‑topo ‑gböösa 'üa 'kpɔa ‑tɔrʋpɩɔ.

³⁰ 'Pɔɔlë nya ‑si 'ɔa nyukulu kä 'wlili 'ɔ ma 'pɛɛa' ‑sɩ 'sɔɔ. 'Ɔ ma 'kʋɛɛlɩ 'mʋfasa nyüülü kä 'fɩɔ ma jöa' 'ɔɔn 'jä.

³¹ 'Ɔ 'saralɩ nyüü Nyɔsʋaa 'kamapläa ‑gä ‑bɛ 'ɔ 'kpɩa nyüü wiili 'paa' 'Pläkänyɔɔ Jesu 'Kriisëa ‑gä. 'Inyɩ 'nɩmɩ 'ɔɔn ŋalɛ 'wʋ ‑a kä, dɛɛ 'nyɩ ka 'ɔɔn 'nyʋfɔ ‑a.