Akëtë 26 - Kuö Dëdrä Jenɛɛsë Rutë

¹ Agliipë nya ‑gbala 'Pɔɔlë: «‑Mrɛɛ ‑a ‑saasra ‑gälɩ.» 'Pɔɔlë nya dɔrɔ 'darʋ 'wʋ, ‑bɛ 'ɔ 'sasra ‑gälɩ ɔ:

² «'Kɩɩ Agliipë ‑o, 'i kä 'mɩ 'tʋ 'mä 'saarɩ ‑na 'klʋɩ 'nyüglö 'mä ‑mɩ plɛlɩsasra, wiili kä 'fɩɔ kä ‑gʋ juifë ‑tʋa' 'mɩ wii ‑gälɩ.

³ Wiili käa' 'mɩ dɔrʋ 'wʋ ‑gböösa nɩ, 'iibä ‑jre juifë ‑dɔ ‑gböösa, nyra dɛɛlɛ bäa' 'üa ‑topokʋ. 'Ii känyrɩ 'n bibie ‑mɩ blöplɛ ‑a ‑po 'mɩ 'nyakli 'mʋfasa.

⁴ «Juifëa 'fɩɔ jre 'mɩ 'ü 'jä 'na nyɔkɔdɛɛ Jerusalɛɛmë, 'sɩrɩ 'maa bäa' 'na nyüüa ‑tɔrʋpɩɔ.

⁵ 'Ü jrea' 'mɩ ‑mää 'saarɩ ‑a, üma ‑wa 'ünya ‑mɩ ‑gbalaa 'sɩrɩ 'n bäa' 'lɩklacɛcɩlɛ 'üü 'daraa' Farisinyüü, 'üa ‑tɔrʋpɩɔa nyɔɔ 'n bä.

⁶ 'Köklesaplɩɩ ɔ nɩ, wiili Nyɔsʋa ‑gbalaa' ana tʋɩɩ nɩ, 'ii 'n 'pie plɛ ‑gälɩ, 'a 'ia ‑gʋ 'ü ja 'mɩ ‑gä 'lɩ.

⁷ ‑Glügbü ‑pʋ ‑bɛ 'sɔɔa jresaa 'sɩrɩ Nyɔsʋa 'mä wiili 'ɔ 'daaa' nʋ, Nyɔsʋa 'ü bibie ‑gböösa ‑srɩ ‑bɛ ‑gbia. 'Kɩɩ Agliipë ‑o, ‑jää wiili 'n 'piea' plɛ ‑gälɩ i kä ‑gʋ juifë ‑tʋa' 'mɩ wii ‑gälɩ!

⁸ Dɛplɛɛ kä ‑gʋ 'i klalɩ 'ana ‑tɔrʋpɩɔ 'kä 'amä 'saa jre 'sɩrɩ Nyɔsʋa tɛrɛa' jäjänyüü 'kä le?

⁹ 'Na 'mʋgbɛ boboa' ‑kätɩ, 'nɩnɩa 'n 'mrɛɛ ɩ ‑a nʋ Nasarɛɛtënyɔɔ Jesua 'nyrɩ bʋbɔgbi 'kɔkɔmlɛ ‑gba.

¹⁰ 'A 'i 'n nʋ Jerusalɛɛmë. ‑Gbɔsapɛrɩnyüü kpakü nya ‑nyɩ 'mɩ 'nyʋfɔ, 'nyaa 'pa 'cɛcɩnyüü 'kɔkɔmlɛ ‑jie 'lɩ. Üma 'daa kä 'ümä 'üün 'bla nɩ, 'maa 'nyie.

¹¹ 'Maa ‑srörö juifëa 'sraaplanyëkaa 'fɩɔ 'lɩ. 'N 'pɔnɩ nyüü 'nyaa kpɛrɛ 'üün 'ü ‑kanyɩ toro 'ɔɔn plɛ. 'Na 'crɛa 'mlɩ nɩ, 'maa jrä 'üün nyɔtugbabre 'kä 'maa nö 'üün ‑gbigba.

¹² «'A 'i 'maa nö, nya dɔrɔ Damasëa 'nyʋfɔ 'wʋ. ‑Gbɔsapɛrɩnyüü kpakü ‑nyɩ 'mɩ ‑pɔɔkʋ 'ünya blɔ 'mɩ.

¹³ 'Kɩɩ ‑o, 'jrʋplösopu, 'a 'nyʋfɔ 'wʋ 'n bä ‑bɛ 'n 'jä pöplö 'napɛ jaa' cɛlɩ, 'ɛ ‑si 'jrʋ 'wʋ. 'Ɛnya plörö 'mɔɔ ‑bɛ nyüülü falaa' 'mɩ ‑gälɩ.

¹⁴ Ana 'fɩɔ nya böblö, 'nyaa 'nu nyɔɔa 'papawii 'wli Ebrööwii 'lɩ, 'ɔ ‑nëma: ‹Sɔɔlë, Sɔɔlë, dɛplɛɛ kä ‑gʋ ‑nö 'mɩ ‑gbigba le? 'Inya 'lɩklaa ‑mää ‑papatuu 'klɩ 'nyüglö.›

¹⁵ 'Nëma: ‹Nyɔɔ 'plɛɛ bä le? 'Pläkänyɔɔ?› 'Iibäa' 'ɔɔn nɩ: ‹Jesu 'n bä, ɔ ‑nöa' ‑gbi ‑gba.

¹⁶ ‑Maa sɔwʋ, 'nyüglö ‑na bei ‑gälɩ! 'N 'tɔrɔa' ‑mɩ 'klɩ nɩ, 'lɩ 'n 'ba ‑mɩ ‑mä 'na 'jrʋpafɛnyɔɔ bä, ‑mä wiili ‑jääa' nyra wiili 'nëmäa' ‑srɩɩ ‑mɩ srarakalɩ ji, ‑mä 'ia ‑gä 'pa.

¹⁷ 'Nyaa ‑mɩ juifënyüü nyra nyüülü 'nyɩa' juifë bä 'mlɩ 'baa, nyüülü 'nyɩa' juifë bä, 'üa ‑nyɛɛ 'n blɔ ‑mɩ.

¹⁸ 'N blɔ ‑mɩ ‑mä 'üa 'nyü ‑jie, ‑bɛ ‑mä 'üün 'jöjrüükpü 'lɩ 'ba ‑mä 'üün ‑srɩ 'klɩ ja; ‑mä 'üün Sataan a 'klü mlɩ 'ba ‑mä 'üün Nyɔsʋa ja. Üma toro 'mɩ plɛ nɩ, 'üa ‑balʋ 'mä 'üün cere ‑bɛ 'ümä ‑jaaa nyüülü Nyɔsʋa berea' 'klɩa ‑tɔrʋpɩɔ kälä.›

¹⁹ «'Ii känyrɩ, 'Kɩɩ Agliipë, wiili sɔa' cɛ 'lɩ 'n 'jäa' nɩ, 'nyɩ blara ‑a blara 'mä 'iin nʋ.

²⁰ Damasëbätäa nyüü ‑kätɩ nyra Jerusalɛɛmëa nyüü 'n 'pala nyɔsʋaawii ‑gba, ‑a mi Judeea ‑tʋtʋ ‑gälɩa 'fɩɔ nyra nyüülü 'nyɩa' juifë bä, 'n ‑gbala 'üün ü toro 'lɩ ‑balʋ ‑gälɩ, ü ‑sie Nyɔsʋaa 'pɛlɩ kälɩ, ü nʋ 'cɩcagbili sraraa' nyüü 'sɩrɩ 'ünya 'a ‑balʋ 'pie.

²¹ 'A 'ia ‑gʋ juifë 'kplara 'mɩ Nyɔsʋaanyuku kpaku ‑wälɩ ‑bɛ 'ü 'bata 'na 'bablakʋ.

²² ‑Maa Nyɔsʋa ‑gääläa' 'mɩ 'nyiöli nɩ, 'ia ‑gʋ wiili 'n jäa', 'jüplü nyra tagbüa 'klɩ 'n ‑ka 'paa 'saarɩ 'ia ‑gä. 'Nyɩ 'pa ‑pasawii ‑a ima 'nyɩ wiili nyɔsʋaamlɩpalanyüü nyra Moisë 'daaa' imäa' nrörö ‑a bä:

²³ 'ü nɩnɩa 'Kriisë nya ‑sʋɩ 'jäa, 'ɔɔ ‑kätɩ nëmä 'kuaabre sɔ, 'kä 'ɔnya ana nyüü nyra nyüülü 'nyɩa' juifë bä ‑gbala 'sɩrɩ 'napɛ nya 'a ji.»

'Pɔɔlë ‑gbala Agliipë ɔ toro Nyɔsʋa plɛ

²⁴ 'Ɔ ‑ka 'sasra ɩ ‑gälɩ ‑bɛ Fesëtusë 'kpölɩkä, 'ɔ ‑nëma: «'Pɔɔlë, sa kla ‑mɩ! ‑Na ‑pɔɔkʋjejrekʋ 'pa ‑mɩ sa!»

²⁵ 'Iibäa' 'Pɔɔlë nɩ: «'Na nyɔɔ kpakö Fesëtusë, sa 'nyɩ 'mɩ ‑a kla. Wiili 'n 'saalɩ nɩ, 'i bä 'cɩcasa 'inya kälä 'lɩ.

²⁶ 'Kɩɩ jre 'ia 'fɩɔ 'mʋfasa, ŋalɛ 'nyɩ 'bla 'mɩ ‑a ‑bɛ 'n 'pala 'ɔɔn wii ‑gba, 'be 'n jre 'iin 'ia wapɛ 'dee 'nyɩ ‑sisie a ‑sisie 'ɔa ‑nyɛɛ. ‑Mää 'sraa 'lɩ 'inyɩ nrörö, ‑maa nyüüa 'fɩɔa 'klɩ.

²⁷ 'Kɩɩ Agliipë, toro ‑plɩɩ wiili nyɔsʋaamlɩpalanyüü 'saalɩ plɛ? 'N jre 'iin 'sɩrɩ toroa' 'iin plɛ.»

²⁸ Agliipë nya ‑gbala 'Pɔɔlë: «'Mɔɔ ‑sosowʋ 'mä 'Kriisënyɔɔ bä!»

²⁹ 'Iibäa' 'Pɔɔlë nɩ: «‑Bakää 'i bä 'köklesa 'aiɛ ‑srɩɩ nɩ, 'n bibie Nyɔsʋa ‑mää ‑na 'dooa ‑gʋ ‑a ‑maa nyüülü kä 'fɩɔ poa' 'mɩ 'nyakli 'saarɩ, 'üa ‑gʋ bɩa 'amä 'na 'sa bä; ‑mää 'sɩrɩ 'n kpasraa' ‑a!»

³⁰ 'Pɔɔlë nʋa' ‑plɩɩ 'sa, 'ɔ bɩaa' 'lɩsasakʋ nɩ, 'palɩ 'kɩɩlɔ, ‑gʋmla, Beniisë nyra nyüülü bä ɩa' 'ɔa ‑gba nɩ, 'ünya sɔwʋ.

³¹ 'Ü 'ciea' nɩ, 'üa 'kpɔa ‑tɔrʋpɩɔ 'ü ‑nëma: «Nyɔɔlɔ kʋa' ‑pɩ 'nyɩ dɛɛ ‑a nʋ i kä ‑gʋ amäa' 'ɔɔn 'bla 'aiɛ 'ɔmäa' ‑jie pa.»

³² Agliipë nya ‑gbala Fesëtusë: «'Ɔma 'nyɩ ɩ 'daa ‑a ‑nyɩ 'ɔa ‑gä Sesaa kälɩ nɩ, anya ɩ 'ɔɔn ‑wälɩ 'cɛrɛa.»