Akëtë 25 - Kuö Dëdrä Jenɛɛsë Rutë

'Kpɛɛlɛ juifë plaa' 'Pɔɔlëa ‑gʋ

¹ Fesëtusë jia' Sesareebätä, 'ɔa jrüü tääa ‑srɩ 'lɩ 'nɩ, 'ɔnya 'jra Jerusalɛɛmë.

² ‑Gbɔsapɛrɩnyüü kpakü nyra juifëa 'wliklɩanyüü nya ji 'Pɔɔlëa toto 'pa. 'Ü 'bata ɔ ji 'üün ‑gba

³ 'ɔmä 'üün dɛɛlɛ 'ü 'bataa' ‑nyɩ, 'iibä, ɔ 'daa ü fa 'Pɔɔlë Jerusalɛɛmë, 'be ‑gbasi 'ü to 'ɔɔn 'ümä 'ɔɔn 'nyʋfɔ 'wʋ 'blara.

'Pɔɔlë 'bata abɩa 'ɔa ‑gä ‑träärä Sesaa ‑nyɛɛ

⁴ Fesëtusë ‑nëma Sesareebätä 'Pɔɔlë bä ‑jie 'lɩ, 'ɔa 'mʋgbɛ jö 'lee 'ɔmä 'lɩ mi.

⁵ 'Ɔ ‑nëma: «Abɩa 'ana 'wliklɩa nyüü fala 'lɩ 'mɩ, ‑bɛ nyɔɔlɔ ma nʋ wii ima bʋbɔ nɩ, ‑mölöö ma nya 'ia toto 'pa ü ji ümä mi.»

⁶ 'Ɔnyɩ 'üün jrüü ‑uuntää 'aiɛ jrüü ‑pʋ ‑gba ‑a ‑si 'ɔnya 'blöö Sesaree dɛrɩ. 'Ia ‑srɩ paa' nɩ, 'ɔnya mi 'ɔa ‑gäträärä nyuku ‑wälɩ, 'ɔnya 'daa ü ja 'Pɔɔlë.

⁷ 'Ɔ jia' nɩ, juifënyüülü sɔa' Jerusalɛɛmë nya trara 'ɔɔn 'klʋɩ, 'ünya ‑gbala 'ɔɔn 'sɩrɩ 'Pɔɔlë nʋa' bʋbɔgbi 'kɔkɔmlɛ ‑bɛ 'sɩrɩ 'i 'bʋaa'. ‑Maa 'ünyɩ 'lɩ ‑a bɩa ü srara 'ia 'cɩcasa.

⁸ 'Pɔɔlë nya dɔrɔ wii 'wʋ 'ɔ ‑nëma: «'Nyɩ ‑balʋ ‑a nʋ: 'nyɩ juifëa ‑dɔ ‑gälɩ 'pɩ, 'nyɩ bɩa Nyɔsʋaanyuku kpaku wii ‑gba ‑a nʋ, 'nyɩ Sesaaa ‑gʋ wii ‑a 'pa.»

⁹ ‑Maa Fesëtusë 'bataa' ‑gʋ juifë 'mäa' 'ɔɔn ‑wa nɩ, 'ɔnya ‑gbala 'Pɔɔlë ‑maa: «‑Nyiie ‑mä Jerusalɛɛmë ji, ‑na ‑gä 'mä 'na 'klʋɩ ‑träärä?»

¹⁰ 'Iibäa' 'Pɔɔlë nɩ: «Sesaa tropina 'lɩ 'n 'bata. 'Ii 'na ‑gä kä 'ämä ‑träärä. 'Nyɩ juifë bʋbɔgbi ‑gba ‑a nʋ; ‑na 'mʋgbɛ ‑jre 'iin 'mʋfasa!

¹¹ 'Ii känyrɩ ama nʋ bʋbɔgbi ‑bɛ 'ia ‑gʋ ama nya jä nɩ, 'n 'nyie 'mä jä. ‑Maa wiili nyüülü kʋa' ‑pɩ 'saaa' 'lɩ, 'cɩcasa ma 'nyɩ 'lɩmlɩ ‑a bä ‑bɛ üma ‑tʋ 'mɩ ‑gbagblɛ ‑gälɩ nɩ, nyɔɔ 'nyɩ kä ‑a kä 'ɔmä 'mɩ 'üün kälɩ ‑nyɩ. Abɩa Sesaa ‑tʋ 'na ‑gä!»

¹² 'Ii känyrɩ Fesëtusë nyra 'ɔa ‑tɔɔɔpanyüü bɩaa' 'sraa 'paplakʋ nɩ, 'ɔ ‑nëma: «'Be ‑baata abɩa Sesaa ‑tʋ ‑na ‑gä, 'i känyrɩ Sesaaa ‑nyɛɛ ‑nëmä mi!»

'Pɔɔlë 'sasraa' ‑gälɩ Agliipë nyra Beniisëa 'klʋɩ

¹³ 'I käa' jrüü jie nɩ, 'kɩɩlɔ 'ü 'daraa' Agliipë nyra Beniisë mi Sesaree 'ümä Fesëtusë 'trɛɛ.

¹⁴ 'Ü ‑sia' 'lɩ jrüü jie nɩ, Fesëtusë nya ‑gbala 'Pɔɔlëa wii 'kɩɩ: «Feliisë tɩ ‑tɛ nyɔɔ 'doo ‑jie 'lɩ.

¹⁵ 'N mia' Jerusalɛɛmë nɩ, ‑gbɔsapɛrɩnyüü kpakü nyra juifëa tagbü 'pa 'mɩ 'ɔa toto, 'ü nɩnɩa ‑a 'pɔnɩ 'ɔɔn.

¹⁶ 'Nyaa ‑gbala 'üün ‑maa Rɔmënyüüa ‑nyɛɛ nɩ, nyɔɔlɔ 'ü ‑tʋa' wii ‑gälɩ nyra nyüülü ‑tʋa' 'ɔmɩ 'iin ‑gälɩ ‑kaaŋlʋa' 'nyüglö 'ümäa' ‑gälɩsasra nɩ, 'ünyɩ 'sa 'ɔmɩ ‑a.

¹⁷ 'Ii känyrɩ 'ü jia' dotro ‑tɛ nɩ, 'ia ‑srɩ paa' dotro tropina 'lɩ 'n were 'üün; 'nyaa ja 'lɩ nyɔɔlɔ.

¹⁸ 'Ɔa totopanyüü sɔa' 'wʋ nɩ, wiili 'n bobo ɩa' 'ɔ nʋa' nɩ, ‑mää 'ia dɩjɔ 'doo 'ünyɩ 'lɩsa.

¹⁹ Wiili kä ‑gʋ 'ü totoa' 'ɔɔn wii nɩ, 'üa 'mʋgbɛa 'cɛcɩwiia ‑dɔ nyra nyɔɔ 'doo 'ü 'daraa' Jesu ɔ jäa' 'ɔa wii; 'be 'Pɔɔlë nɩnɩa 'ɔ bälɩ.

²⁰ ‑Bɛ 'nyɩa' 'ia dɛtʋlɔa dɛtɛkʋ jre nɩ, 'nyaa 'bete 'ɔɔn ɔma nya 'nyie 'kä 'ɔa ‑gä 'mä Jerusalɛɛmë ‑träärä.

²¹ ‑Maa 'Pɔɔlë nɩnɩa a ‑nyɩ 'ɔa wii Sesaa kälɩ. 'Ia ‑gʋ 'n ‑tʋ ‑kätɩ 'ɔɔn ‑jie 'lɩ ‑bɛ 'mä 'ɔɔn Sesaa fa.»

²² Agliipë nya ‑gbala Fesëtusë: «'Na 'mʋgbɛ 'n 'bata 'mä 'ɔɔn 'nyaklipo.» Fesëtusë ‑nëma: «‑Woo, ‑sraakäpɩ ‑nya 'ɔmɩ 'nyaklipoa.»

'Pɔɔlë 'tɔa' Agliipë nyra Beniisëa 'klʋɩ

²³ ‑Srɩ ‑gbaa' 'kä nɩ, Agliipë nyra Beniisë nya pa tropina nyuku kpaku ‑wälɩ, 'üü ‑bɛ nyüü 'kɔkɔmlɛ: 'sʋgɩaa 'kamanyüü, nyra bätäa 'wliklɩa nyüü. Fesëtusë nya blɔ nyüü, 'ünya ja 'Pɔɔlë.

²⁴ Fesëtusë 'pawii ɔ: «'Kɩɩ Agliipë, 'ana 'fɩɔ bäa' ‑pɩ, 'a 'jää ‑taa nyɔɔlɔ kʋa' ‑pɩ 'wʋ. ‑Sɔ Jerusalɛɛmë ‑a 'tɔ ‑tɛklɩ, juifënyüüa 'fɩɔ ji 'mɩ 'ɔa toto 'pa: ‑bɛ 'ü 'kpölɩkä, 'ɔ kä 'ɔmä jä.

²⁵ 'Mɔɔlɔ nɩ, dɛɛlɛ 'ɔ nʋa' ‑bɛ 'ɔmäa' jä nɩ, 'nyɩ 'jä 'ɛmɩ 'wʋ ‑a, ‑maa 'be 'ɔ nɩnɩa nɩ, 'ɔ 'bata ‑a ‑nyɩ 'ɔa ‑gä Sesaa kälɩ, 'ii känyrɩ 'ɔɔ 'nëmä fa.

²⁶ Dɛɛlɛ bäa' wiili 'ɔ nʋa' nɩ, 'nyɩ 'järä 'ia 'mlɩ 'kä ‑a, ‑bɛ 'mä 'kɩɩ kpakö ‑pɔɔkʋ fa. 'A 'i ‑gʋ 'n ja 'ɔɔn 'ana 'klʋɩ, 'Kɩɩ Agliipë, ‑mɔ 'i kälä ‑gba ‑gböösa, 'ia 'taɩn 'lɩ ama bɩa 'ɔɔn 'betekʋ nɩ, wiili 'mäa' ‑jɩjra 'mä 'iin jre.

²⁷ 'Be nyɔɔ 'nyɩ fa 'jejienyɔɔ nyɔɔ ‑a 'kä 'ɔnyɩ 'salɩ wiili 'ɔ nʋa' ‑a, 'inyɩ nrörö nrörö ‑a.»