Akëtë 23 - Kuö Dëdrä Jenɛɛsë Rutë

¹ 'Pɔɔlë nya tɛ juifëa tropina 'lɩa nyüü 'klɩ 'ɔ ‑nëma: «'Na ‑wlajü 'amɩ, Nyɔsʋaa 'nyrɩklɩa ‑gʋ 'nyɩ 'na ‑susu ‑fre ‑a pla ‑a ji 'saarɩ ‑gälɩ; 'na plɛ 'nyɩ ‑taaralɩ ‑a 'ia ‑gʋ.»

² ‑Gbɔsapɛrɩnyɔɔ kpakölɔ 'ü 'daraa' Ananiasë nya ‑gbala nyüülü bäa' 'Pɔɔlëa ‑gba ü 'pa 'ɔa 'mäklɩ 'kpa.

³ 'Iibäa' 'Pɔɔlë nɩ: «‑Mɔ Nyɔsʋa nëmä bɔtɔ, 'pɔlɔ ‑gälɩbla nyuku! ‑Mɔlɔ nɩ, ‑Dɔa 'nyrɩa ‑gʋ kʋ ‑pɩ ‑mä 'na ‑gä ‑tʋ, ‑bɛ ‑nyɩ ‑träärälɩ 'umɩ ‑a, 'kä ‑gbala nyüü ü bɔtɔ 'mɩ!»

⁴ 'Iibäa' nyüülü bä ɩa' 'Pɔɔlëa ‑gba nɩ: «Nyɔsʋaa ‑gbɔsapɛrɩnyɔɔ kpakö ‑nö 'saa ‑jree!»

⁵ 'Pɔɔlë ‑nëma nɩ: «'Na ‑wlajü 'amɩ, 'nyɩ ɩ 'iin ‑a jre 'sɩrɩ 'ɔɔ bäa' ‑gbɔsapɛrɩnyɔɔ kpakö, 'be nyɔsʋapɔɔkʋ nɩnɩa: Nyɔɔ 'nyɩ kä ‑a kä 'ɔmä 'ɔa ‑glügböa 'cifia ‑gʋ bʋbɔwii 'pa.»

⁶ 'Pɔɔlë jrea' 'saa juifëa tropina 'lɩ bä bɩa Sadusinyüü nyra Farisinyüü nɩ, 'ia ‑gʋ 'ɔnya ‑gbolomlɩ 'ɔ ‑nëma: «'Na ‑wlajü 'amɩ, Farisinyɔɔ 'n bä, Farisinyɔɔ ‑gu 'mɩ. Dɛɛlɛ kä ‑gʋ 'n jrea' 'saa jäjänyüü nya ‑srɩɩ 'kuaabre sɔa nɩ, 'ia ‑gʋ 'ü ‑träärä 'mɩ ‑gä ‑gälɩ!»

⁷ 'Ɔ ‑gbaa' 'saa nɩ, ‑yrɛ kpaki nya blö Sadusinyüü nyra Farisinyüüa ‑tɔrʋpɩɔ, ‑jria nya 'bölötɩa.

⁸ Sadusinyüü nɩnɩa jäjänyüü 'nyɩ sɔ 'kuaabre ‑a, ‑bɛ 'aanjë nyra ‑susu 'nyɩ 'plä 'wʋ ‑a bä. ‑Maa ‑mää 'sɩ 'inyɩ bä Farisinyüüa ‑nyɛɛ.

⁹ Nyüü nya 'kpölɩkä ‑gböösa. ‑Dɔkpɩanyüü 'doorodoolü bä ɩa' Farisinyüüa ‑tɔrʋpɩɔ nya sɔwʋ 'ü ‑nëma: «Wiili nyɔɔlɔ nʋa' i bʋbɔa' anyɩ 'jä 'imɩ 'wʋ ‑a; ‑bɛ ima bä ‑susu 'aiɛ 'aanjë ma 'pala 'ɔɔn wii ‑gba nɩ, a nyra Nyɔsʋa 'nyɩ totrowli 'plɔʋ.»

¹⁰ ‑Bɛ 'blarʋ fumöa' nɩ, ŋalɛ nya 'bla 'sʋgɩaa 'kamanyɔɔlɔ 'ü ‑pɩ 'Pɔɔlë 'lɩkʋɛɛ 'kʋɛɛrɛ 'ɔ ‑pɩ jä. 'Ɔnya ‑gbala 'ɔa 'sʋgɩanyüü ü mi ü 'ba 'Pɔɔlë ‑jria ‑tɔrʋpɩɔ 'kä 'ü fa 'ɔɔn 'sʋgɩaa nyuku kpaku ‑wälɩ.

¹¹ 'Ia ‑gbiara nɩ, 'Pläkänyɔɔ nya ji 'Pɔɔlëa ‑gba, 'ɔnya ‑gbala 'ɔɔn: «'Pɔɔlë, 'palɩklü ‑o; 'sɩrɩ ‑paaa' 'na ‑gä Jerusalɛɛmë, 'asɩ ‑mä bɩa 'na ‑gä 'pa Rɔmë.»

Juifënyüü toa' 'Pɔɔlë ‑gbasi

¹² ‑Srɩ paa' nɩ, juifënyüü 'doorodoo nya 'nönröwli. 'Ünya 'sɔrɩ ‑maa ü ma ‑kaaŋlʋ 'Pɔɔlë 'bla 'ü ‑nëmä dɛɛ ‑a ji, 'ü ‑nëmä bɩa 'nɩ ‑a 'mlaa.

¹³ Nyüülü nʋa' 'ia ni wiili nɩ, 'ü ‑si nyüüa ‑glʋɩsɔɔ ‑gba.

¹⁴ 'Ünya mi ‑gbɔsapɛrɩnyüü kpakü nyra tagbüa ‑nyɛɛ, 'ünya ‑gbala 'üün ‑maa: «A 'sɔrɩ, ama ‑kaaŋlʋ 'Pɔɔlë 'bla, a ‑nëmä dɛɛ 'mlɩ ‑a 'pa.

¹⁵ 'Ia ‑gʋ, 'ba 'nönröwli 'amɔ ‑bɛ tropinanyüü 'sɔɔ, 'kä 'a ‑gbala 'sʋgɩaa 'kamanyɔɔ, ɔ ja 'amɩ 'ɔɔn ‑jria 'lɩ ‑sraakäpɩ; 'ba nʋ 'sɩrɩ 'a 'bataa' 'amäa' 'ɔa wiili dɛtɛ 'mʋfasa. Amɔlɔ nɩ, anya 'ɔɔn 'blaa 'fɩɔwʋ 'kä 'ɔnya 'tɔ.»

¹⁶ 'Pɔɔlëa ‑wladiaa 'jʋ 'nua' wiili 'ü 'pala 'üa 'kpɛɛlɩ 'wli nɩ, 'ɔnya mi 'sʋgɩaa nyuku kpaku ‑wälɩ, 'ɔnya ‑gbala 'iin 'Pɔɔlë.

¹⁷ 'Pɔɔlë nya we 'sʋgɩanyüüa 'cifi 'doo, 'ɔnya ‑gbala 'ɔɔn: «Fala 'jʋlɔ kʋa' ‑pɩ 'kamanyɔɔa ‑nyɛɛ, bälɩ 'ɔmä 'ɔɔn ‑gbala.»

¹⁸ 'Ɔnya fala 'ɔɔn 'ɔa 'kamanyɔɔlɔa ‑nyɛɛ, 'ɔ ‑nëma: «‑Jienyɔɔ 'Pɔɔlë we 'mɩ, 'ɔ ‑nëma ‑a jara 'jʋlɔ kʋa' ‑pɩ ‑na ‑nyɛɛ, wii bälɩ 'ɔmä ‑mɩ 'iin ‑gbala.»

¹⁹ 'Kamanyɔɔ nya 'kpla 'jʋlɔa 'darʋ 'ɔ nyra 'ɔɔn nya bereklɩ 'ɔnya 'bete 'ɔmɩ: «Wii 'plɛɛ bälɩ le?»

²⁰ 'Iibä: «Juifë 'nönröwli 'ümä ‑mɩ ‑gbala ‑mä ‑pɩ 'üün 'Pɔɔlë ja tropina 'lɩ ‑beere 'sɩrɩ 'ümäa' 'ɔa ‑gbaa ‑gä 'lɩgbasa 'ümäa' 'ään dɛtɛ 'mʋfasa.

²¹ ‑Maa ‑nyɩ 'dara 'iin wii! Nyüüa ‑glʋɩsɔɔ bä 'üa ‑tɔrʋpɩɔ, 'ɔɔ 'ü ‑glaaa'. 'Ü 'sɔrɩ, ü ‑nëmä dɛɛ ‑a ji, 'ü ‑nëmä 'nɩ ‑a 'mla üma 'nyɩ 'ɔɔn 'bla ‑a 'bla. ‑Glaaa 'ü ‑glaaa, ‑mä 'nyie 'ia 'doo tɩɔ 'lɩ.»

²² 'Kamanyɔɔlɔ nya ‑gbala 'jʋlɔ ‑maa: «‑Nyɩ ‑gbala nyɔɔ 'sɩrɩ ‑gbaalaa' 'mɩ 'samaa wii ‑o!» 'Ɔnya 'cɛrɛ 'ɔɔn ‑wälɩ 'ɔnya mi.

²³ 'Kamanyɔɔ nya we 'ɔa 'sʋgɩaa 'kamanyüüa ‑tɔrʋpɩɔa 'cifu 'sɔɔ, 'ɔ ‑nëma: «'Ba 'papla 'sʋgɩaa ‑glʋɩpʋ (200) ‑gba nyra 'sʋgɩalë kʋäa' ‑sɩ ‑gälɩ, 'üa ‑glʋɩtää ‑bɛ ‑pʋ, nyra ‑mülü 'paaa' 'die, 'üa ‑glʋɩpʋ, 'ümä Sesareebätä mi ‑gbiaraa ‑gliiibei ‑uumlɔɔ 'lɩ.

²⁴ 'Ba ‑nyɩgla bɩa 'Pɔɔlëa ni ‑sɩ kä 'imä 'ɔɔn ‑gbötö 'sɩrɩ dɛɛ ‑pɩa' 'ɔɔn nʋ, 'amä 'ɔɔn ‑gʋmla Feliisëa ‑nyɛɛ fa.»

'Pɔɔlë 'tɔa' ‑gʋmla Feliisëa ‑nyɛɛ

²⁵ ‑Jää wiili 'kamanyɔɔlɔ ‑jɩjraa' ‑pɔɔkʋlʋa 'mlɩ:

²⁶ 'Mɔɔ Kloodë Lisasë 'mɔɔ ‑jɩjra ‑gʋmla kpakö Feliisë 'wʋ. 'N 'trɛɛ ‑mɩ!

²⁷ Nyɔɔlɔ kʋa' ‑pɩ nɩ, juifënyüü 'kpla 'ɔɔn 'ümä ɩ 'ɔɔn 'bla. 'N 'nua' 'sɩrɩ 'ɔ bäa' Rɔmënyɔɔ nɩ, 'nyaa fa 'sʋgɩa, 'nya 'balɩ 'ɔɔn mlɩ.

²⁸ Wiili ‑tɛɛ 'ü 'daaa' 'ɔ nʋa', 'ii 'n 'bata ɩ 'mä jre, 'nyaa fa 'ɔɔn juifëa tropinanyüü 'lɩ.

²⁹ 'Nyaa jresaa 'üa ‑dɔa wii 'ü 'ma 'ɔɔn ‑gälɩ 'kä. ‑Maa ‑pasawii 'nyɩ 'lɩ ‑a bä i kä ‑gʋ 'ümäa' 'ɔɔn 'bla, 'aiɛ 'ümäa' 'ɔɔn ‑jie 'lɩ 'pa.

³⁰ 'N 'nua' 'sɩrɩ juifë toa' ‑gbasi nɩ, 'a ‑plɩɩ 'n kʋ 'nyaa ja 'ɔɔn ‑na ‑nyɛɛ. 'N ‑gbala nyüülü 'nyɩ 'nyiea' 'ɔa ‑gʋ, 'ü ji ‑na ‑nyɛɛ 'ümä ‑gälɩ 'sasra. 'A 'na ‑jraarafa.

³¹ 'Sʋgɩa nya nʋ wiili 'ɔ 'daaa'. 'Ünya dɔrɔ 'Pɔɔlë 'wʋ, 'ünya fa 'ɔɔn Antipatrisëbätä ‑gbiara.

³² 'Ia ‑srɩ paa' nɩ, ‑mülü 'nyɛrɛa' bei nya 'blöö 'sʋgɩanyuku kpaku ‑wälɩ dɛrɩ, 'ünya 'cɛrɛ ‑mülü bäa' ‑sɩ ‑gälɩ ‑wälɩ, 'ü nyra 'Pɔɔlë nya mi.

³³ 'Sʋgɩa ‑mülü bäa' ‑sɩ ‑gälɩ 'tɔa' Sesareebätä nɩ, 'ünya ‑nyɩ ‑pɔɔkʋlʋ ‑gʋmla kpakölɔ, 'ünya srara 'ɔɔn 'Pɔɔlë bɩa.

³⁴ ‑Gʋmla nya ‑täsä ‑pɔɔkʋlʋ, 'ɔnya 'bete 'Pɔɔlë ‑tʋtʋ 'pɛlɛ kä ‑gälɩa nyɔɔ 'ɔ bäa'. 'Ɔ 'nua' ‑maa Silisiia 'pɛ ‑gälɩ nɩ,

³⁵ 'ɔ ‑nëmä: «Nyüülü 'nyɩ 'nyiea' ‑mɩ ma ji nɩ, 'nyaa ‑mɩ 'betea ‑mä 'lɩsa.» 'Ɔnya ‑gbala 'sʋgɩa ü ‑gäälä 'ɔɔn 'nyiöli Erɔɔdëa ‑gbööli.