Akëtë 22 - Kuö Dëdrä Jenɛɛsë Rutë

¹ «'Na ‑wlajü 'amɩ, 'na tʋɩɩ 'amɩ, 'ba po 'mɩ 'nyakli 'mä 'amɩ ‑gbala.»

² 'Ü jrea' 'saa Ebrööwii 'lɩ 'ɔ pala 'üün wii ‑gba nɩ, 'ünya bä 'wʋ ‑tuuan. 'Pɔɔlë ‑nëma:

³ «Juifënyɔɔ 'n bä, Tarësëbätä 'ü ‑glooro 'mɩ, Silisiia ‑tʋtʋ ‑gälɩ. ‑Maa ‑pɩ Jerusalɛɛmë 'n 'bʋala. Gamaliɛɛlë 'ɔɔ bä kä 'na ‑sukumasɛ. 'Ɔ 'kpɩa 'mɩ 'sɩrɩ ana tʋɩɩa ‑dɔ bäa'. 'Maa fumö Nyɔsʋaa ‑gʋ, 'sɩrɩ 'ana 'fɩɔ bäa' ‑plɩ 'saarɩ.

⁴ 'N nʋ nyüülü kä 'fɩɔ ma prɛa' 'Pläkänyɔɔa 'Nyʋfɔ ‑gbi ‑gba, 'nyaa 'bla ‑mölöö. 'Maa kpasa 'ŋlëgë nyra nyɩberü 'kä 'maa 'paa 'üün ‑jie 'lɩ.

⁵ ‑Gbɔsapɛrɩnyɔɔ kpakö nyra tagbü jre 'iin 'sɩrɩ 'i bäa' 'cɩcasa. 'A 'üü ‑nyɩ 'mɩ ‑pɔɔkɩ 'mä 'iin juifëa ‑wlajülü bäa' Damasëbätä fa 'mä 'cɛcɩnyüü 'kplakpla 'mä 'üün Jerusalɛɛmë ja 'ümä 'üün 'pɔnɩ.

'Pɔɔlë ‑gbala nyüü 'sɩrɩ 'ɔ toroa' Jesu plɛ

⁶ «‑Srɩ 'mä 'lɩ 'mɩmrɛkalɩ mi nɩ, 'n ‑kanyɩ 'lɩ Damasëbätä dɛrɩ ‑a tʋŋlɔ, fɩɩɩn, 'napɛ kä ‑tarʋ ‑sɔɔrɔa' 'wʋ nya sɔ cɛlɩ 'ɛnya ŋʋala 'mɩ ‑gälɩ.

⁷ 'Nyaa blö, ‑bɛ 'n nö 'papawii 'doo 'wli, ‑bɛ 'i nö: ‹Sɔɔlë, Sɔɔlë, dɛplɛɛ kä ‑gʋ ‑nö 'mɩ ‑gbigba le?›

⁸ 'Nëma: ‹Ɔ bälɩ le, ‑mɔ 'Pläkänyɔɔ?› 'Iibäa' 'ɔɔn: ‹Nasarɛɛtënyɔɔ Jesu 'n bä, nyɔɔlɔ ‑nöa' ‑gbigba.›

⁹ Nyüülü falaa' 'mɩ 'jä 'napɛlɛ, ŋalɛ nya 'bla 'üün, ‑maa 'ünyɩ 'nu 'papawiili 'wli ‑a.

¹⁰ 'Nëma nɩ: ‹'Pläkänyɔɔ, ‑asɩ 'nyaa nʋ le?› 'Pläkänyɔɔ nya ‑gbala 'mɩ: ‹Sɔwʋ ‑a mi Damasë! ‑Nya 'lɩ nyɔɔ jräa 'ɔnya ‑mɩ wiili kä 'fɩɔ ‑käa' ‑mäa' nʋ ‑gbalaa.›

¹¹ ‑Bɛ 'nyɩ 'jäa' 'kä 'napɛlɛa ŋʋaŋʋakʋa ‑gʋ nɩ, 'na ‑mölöö nya 'kpla 'na 'darʋ, 'nyaa 'mä Damasë 'tɔ.

¹² «Nyɔɔ 'doo bä kä 'lɩ, 'ɔɔ 'ü 'daraa' Ananiasë. 'Ɔ ‑träärälɩ Moisëa ‑Dɔ, juifëlü kä 'fɩɔ bäa' 'lɩ 'lee 'paa 'ɔa 'cɩca 'nyrɩ.

¹³ 'Ɔnya ji 'na ‑gba, 'ɔnya ‑gbala 'mɩ: ‹'Na ‑wlajʋ Sɔɔlë, abɩa ‑na 'nyü 'jäkä!› 'A ‑plɩɩ 'n kʋ dotro 'nyaa 'jäkä, 'nyaa 'jä 'ɔmɩ.

¹⁴ 'Ɔ ‑nëma nɩ: ‹Ana tʋɩɩa Nyɔsʋa 'a kä 'lɩ ‑mɩ 'ba, ‑mä wiili 'ɔ 'bataa' jre, ‑mä 'Klɩgänyɔɔ 'jä, ‑bɛ ‑mä 'ɔa mlɩa wii 'wlinu,

¹⁵ 'be wiili kä 'fɩɔ ‑nëmäa' 'jä ‑bɛ wiili kä 'fɩɔ ‑nëmäa' 'wlinu nɩ, ‑kä ‑mä 'iin nyüüa 'fɩɔ ‑gbala.

¹⁶ Dɛplɛɛ ‑ka ‑glaaa le? Sɔwʋ, we 'Pläkänyɔɔa 'nyrɩ 'kä ‑paa 'nɩwli, 'kä nö 'imɩ ‑na ‑balʋ 'mä kpëträ.›

¹⁷ «'Nyaa 'blöö Jerusalɛɛmë dɛrɩ, 'taɩn 'lɩ 'n bibiea' Nyɔsʋa Nyɔsʋaanyuku kpaku ‑wälɩ nɩ, wii nya ji 'mɩ 'nyü ‑gälɩ.

¹⁸ 'Nyaa 'jä 'Pläkänyɔɔ, 'ɔnya ‑gbala 'mɩ: ‹'Sosowʋ ‑a 'cie Jerusalɛɛmë, 'be wiili ‑nëmäa' nyüü ‑gbala 'na ‑gʋ nɩ, 'ü ‑nëmä 'iin wii ‑a 'dara.›

¹⁹ 'Nëma: ‹'Pläkänyɔɔ, 'üa 'mʋgbɛ jre 'iin 'sɩrɩ 'maa ‑piiea' 'üa 'sraaplanyëka ‑wälɩ ‑bɛ 'maa 'kplaaa' nyüülü toroa' ‑mɩ plɛ, 'maa 'paaa' 'üün ‑jie 'lɩ, ‑bɛ 'maa ‑gbaaa' 'üün ‑gbalɛfu ‑gälɩ.

²⁰ ‑Bɛ 'taɩn 'lɩ 'ü ‑gblɔɔa' ‑na 'lɩsanyɔɔ Etiɛɛnëa ‑toru 'kä nɩ, 'na 'mʋgbɛ 'nyüglö kä ‑plɩɩ. 'Ü 'blaaa' 'ɔɔn nɩ, 'i kä kä 'mɩ 'tʋ, 'mɔɔ blö kä 'nɩmɩ nyüülü 'blaaa' 'ɔɔn, 'üa 'koti kälɩ.›

²¹ 'Ɔ ‑nëma nɩ: ‹Mi! Kpaun 'n blɔ ‑mɩ nyüülü 'nyɩa' juifë bä, 'üa ‑nyɛɛ.› »

'Pɔɔlë 'daaa' Rɔmënyɔɔ 'ɔ bä

²² Nyüü po wiili 'Pɔɔlë 'paa' 'nyaklipo po, ‑maa 'ɔ 'tɔa' ‑taa ni wiili ‑gälɩ nɩ, 'ünya ‑gbolomlɩ, 'ü ‑nëma: «A 'ba 'samaa nyɔɔlɔ ‑tʋtʋ ‑gälɩ! 'Ɔnyɩ ‑fälɩkʋsa ‑a bä!»

²³ 'Ünya 'kpö, 'ü be be 'üa 'koti cɛlɩ 'ü 'jrara 'mlʋ cɛlɩ.

²⁴ 'Sʋgɩanyüüa 'kamanyɔɔ nya 'daa ü pla 'ɔɔn 'sʋgɩaa nyuku kpakua ‑wälɩ, ü ‑gbagba 'ɔɔn ‑gbalɛfu ‑gälɩ 'ɔmä 'lɩsa dɛɛlɛ kä ‑gʋ nyüü nöa' 'saa ‑bɛ 'ü ‑gboloa' 'ɔɔn ‑gälɩ.

²⁵ 'Ü kpasaa' 'ɔɔn nɩ, 'Pɔɔlë nya 'bete 'sʋgɩanyɔɔlɔ kʋa' 'ɔa ‑gba: «Nyɔɔ bäa' Rɔmënyɔɔ ü ma ‑kaaŋlʋ 'ɔa ‑gä ‑a ‑tʋ nɩ, ‑dɔ nɩnɩa ü 'mrɛɛ 'ü bɔtrɔ 'ɔɔn ‑gbalɛfu?»

²⁶ 'Sʋgɩanyɔɔlɔ 'nua' 'iin 'wli nɩ, 'ɔnya mi 'ɔnya ‑gbala 'ɔa 'kamanyɔɔ ‑maa: «'Nn! ‑Tre ‑na nyufa, ‑maa nyɔɔlɔ kʋa' ‑pɩ, Rɔmënyɔɔ 'ɔ bä!»

²⁷ 'Sʋgɩaa 'kamanyɔɔlɔ nya jijrö 'Pɔɔlë ‑gba 'ɔnya 'bete 'ɔɔn: «‑Gbala 'mɩ ‑a 'jä, Rɔmënyɔɔ bä?» 'Ɔ ‑nëma: «‑Yɛɛ!»

²⁸ 'Kamanyɔɔ nya ‑gbala 'ɔɔn ‑maa: «'Mɔɔlɔ nɩ, mölii 'kɔkɔmlɛ 'n 'sa 'fɩɔwʋ 'nyaa 'mä Rɔmënyɔɔ bä.» 'Iibäa' 'Pɔɔlë: «‑Bɛ 'mɔɔlɔ nɩ, 'n ‑glooroa' dotro 'ia nyɔɔ 'n bä!»

²⁹ 'Köklesaplɩɩ, nyüülü kä 'fɩɔ bä ɩa' 'ɔa ‑gba 'ümä ɩa' 'ɔɔn ‑gbalɛfu bɔtrɔ nya 'nyɛnyrɛgälɩ. 'Sʋgɩaa 'kamanyɔɔlɔ jrea' 'saa Rɔmënyɔɔ 'Pɔɔlë bä ‑bɛ 'ɔ kpasa ɩ 'ɔɔn nɩ, ŋalɛ nya 'blaa 'ɔmɩ.

'Pɔɔlë mia' ‑gätʋnyüü kpaküa ‑nyɛɛ

³⁰ 'Sʋgɩaa 'kamanyɔɔ 'bataa' 'ɔmä wiili kä ‑gʋ juifë 'nyɩ 'nyiea' 'Pɔɔlë, 'ia 'cɩcasa 'jä nɩ, 'ia ‑gʋ ‑srɩ ‑gbaa' 'kä nɩ, 'ɔnya 'daa ü ‑jejie 'Pɔɔlë. 'Ɔnya we ‑gbɔsapɛrɩnyüü kpakü nyra 'üa tropina 'lɩa nyüüa 'fɩɔ. 'Ɔnya 'daa ü ja 'Pɔɔlë, 'ɔnya ‑tʋ 'ɔɔn ‑saplɛ 'lɩ.