Akëtë 20 - Kuö Dëdrä Jenɛɛsë Rutë

'Pɔɔlë mia' Masedoanë nyra Grɛɛsëa 'blɩ ‑gälɩ

¹ 'Ia ‑yrɛlɛ ‑sia' nɩ, 'Pɔɔlë nya we 'cɛcɩnyüü, 'ɔnya 'jrara 'üa 'klü. 'Ɔ cɛrɛa' 'üün nɩ, 'ɔnya mi Masedoanëa 'blɩ ‑gälɩ.

² 'Ɔnya ‑srörö 'ia 'blɩlɩa 'mlɩ ‑bɛ 'ɔ 'jrara 'ia nyüüa 'klü. 'I ‑sia' nɩ, 'ɔnya 'tɔ Grɛɛsëa 'blɩ ‑gälɩ.

³ 'Ɔ ‑si 'lɩ ‑söplü tää. 'Ɔ 'bataa' 'ɔmäa' 'mɩɩ fa 'ɔmä Sirii mi nɩ, 'ɔ 'nu 'sɩrɩ juifë plaa' 'ɔa 'kpɛɛ, 'ɔ ‑gölöa' Masedoanë 'ɔ fa 'ɔnya 'blöödɛrɩ.

⁴ Nyüülü fala 'ɔɔn falaa 'ünya 'tɔ Asiia ‑tʋtʋ ‑gälɩ, 'üü bä: Sopatë Piluua 'jʋ, bätälä 'ü 'daraa' Beree 'äa nyɔɔ 'ɔ bä; Alisëtaakë nyra Sekundo 'ü sɔ Tɛsalonikë; Gaiusë 'ɔ bä Dɛbeenyɔɔ; Timotee, Tikiikë nyra Trofimë bä Asiia ‑tʋtʋ ‑gälɩa nyüü.

⁵ 'Üü ‑ta 'nyʋfɔ, 'ünya ‑glaara amɩ bätälä 'ü 'daraa' Troasë.

⁶ 'Flɔɔlʋ kä 'mlɩ 'nyɩa' levurë bä 'ua ‑glɩsɩglɩsɩa jrüü ‑sia' nɩ, anya 'cie Filipëbätä, 'mɩɩ a fa. Jrüü ‑gböööa ‑srɩ 'lɩ a 'tɔ Troasë, anya ‑si 'lɩ jrüü ‑uunsɔɔ.

'Pɔɔlëa dɛrɩ 'täpa mimikʋlʋ 'ɔ mia' Troasëbätä

⁷ 'Sɔrɛa 'klɩsa jrüü 'lɩ ɔ nɩ, 'cɛcɩnyüü nya trara 'ümä 'Pläkänyɔɔa jijrɛ ji. 'Pɔɔlë nya 'pala 'üün nyɔsʋaawii ‑gba, 'be 'ia ‑srɩ ma pa 'ɔ ‑ka nya mi. 'Ɔ 'pa 'iin 'pa 'pa ‑gbia nya 'mɩmrɛlɩ.

⁸ 'Napu 'kɔkɔmlɛ bä 'wlitraranyëka klöölä kä ‑wälɩ a trara ɩa'.

⁹ ‑Sëgbajʋ 'doo bälɩ 'ɔɔ 'ü 'daraa' Yutikë 'ɔ kʋ ɩ ‑pumëmla 'mäklɩ. 'Pɔɔlë 'paa ɩ nyɔsʋaawii, ‑bɛ 'mʋmʋ 'bla 'ɔɔn ‑gböösa; 'mʋmʋ 'ba 'ɔɔn ‑nyɛɛ cɛlɩ, ‑tääa nu nyëkaklööa ‑pumëmla 'wli 'ɔnya blö ‑tʋtʋ 'wʋ. 'Ü 'mä 'ɔɔn 'wʋdɔrɔkalɩ mi, 'ɔ 'a jä.

¹⁰ 'Pɔɔlë nya 'cere ‑fälɩ, 'ɔnya po 'ɔa plɛ 'nyakli. 'Ɔnya dɔrɔ 'ɔɔn 'wʋ, 'ɔnya ‑gbala nyüülü: «'Ana polu 'nyɩ ‑taaralɩ! 'Ɔ ‑ka bälɩ!»

¹¹ 'Ɔnya 'jra 'ɔnya mi nyuku ‑wälɩ, 'ɔnya ‑pä 'flɔɔ 'ünya jidɛɛ. 'Ɔ 'pawii 'pa 'pa ‑srɩ nya pa. 'Ɔ 'wlaraa' 'ɔnya mi.

¹² 'Ünya ja 'ɔɔn ‑sëgbanyʋklɔlɔ, 'ɔ bälɩ 'mʋfasa, 'inya 'pa 'üün 'klü 'lɩ.

'Pɔɔlë Sɔ Troasë 'ɔnya mi Militëbätä

¹³ Amɔlɔ nɩ, amɔ ‑kätɩ ‑ta 'nyʋfɔ anya 'jra 'mɩɩ 'lɩ anya mi Asosëbätä. 'Ii amä ɩ 'Pɔɔlë 'wʋdɔrɔ 'nie ‑gba. 'Ɔnya ja bei 'ɔnya jrä 'lɩ amɩ.

¹⁴ 'Ɔ jräa' amɩ Asosë nɩ, anya dɔrɔ 'ɔɔn 'wʋ anya mi Mitilɛɛnëbätä.

¹⁵ A 'ciea' 'lɩ anya fa 'nie anya mi. ‑Srɩ paa' anya 'tɔ Kiɔsɔa palafa 'wʋ. 'Ia ‑srɩ paa' anya mi Samosëbätä. Anya 'nyüglö Trogiliɔɔnbätä. ‑Srɩ paa' anya 'tɔ Militëbätä.

¹⁶ 'Pɔɔlë 'nyɩ 'bata Ɛfɛsëbätäa ‑srörökʋ ‑a, 'ɔ ‑pɩ Asii ‑wlɛ; 'be 'ɔ 'bata 'ɔ 'tɔ Jerusalɛɛmë 'ɔmä 'lɩ Patekɔɔtëa ‑glɩsɩglɩsɩ 'järä.

'Pɔɔlë 'palaa' Ɛfɛsëa 'cɛcɩtagbü wii ‑gba

¹⁷ 'Ɔ ka bä Militëbätä, 'ɔnya we Ɛfɛsë 'cɛcɩtagbü ü ji.

¹⁸ 'Ü jia' nɩ, 'ɔnya ‑gbala 'üün ‑maa: «'Bala ‑srɩlɩ kä 'mlɩ 'n 'tɔ käa' Asiia 'bre 'a 'jä 'na nʋnʋgbi, 'sɩrɩ 'nyraa 'amɔ nʋa' ‑wälɩkʋdɛɛ.

¹⁹ 'N 'cie 'na nyufa 'wʋ 'nyaa ‑fɛ 'Pläkänyɔɔa 'jrʋpa; 'n ‑fɛɛɛ 'ämɩ ‑bɛ 'n 'wuö. ‑Sʋɩlɩ kä 'fɩɔ juifë tɛrɛa' 'mɩ 'ia ‑gʋ, 'n ‑srörö 'ia 'mlɩ.

²⁰ 'A jre 'iin, wiili 'naa', i nëmäa' 'amɩ 'känyɩgla, 'nyɩ 'amɩ 'iin ‑gba ‑a ‑sisre: 'n ‑gbala 'amɩ 'iin, 'nyaa 'kpɩara 'amɩ ‑jria 'lɩ nyra 'ana nyëka ‑wälɩ.

²¹ 'N ‑gbala juifë nyra grɛɛkë ü 'pie 'üa ‑balʋ 'ümä Nyɔsʋa 'lɩträärä, 'ümä ana 'Pläkänyɔɔ Jesu 'Kriisë plɛtoro.

²² 'Amɔ 'n ‑gbala, 'Nyüna ‑Susu nɩnɩa 'kpɔɔ ‑a mi Jerusalɛɛmë. Wiili nëmäa' ‑nyɛɛ 'mɩ ‑gälɩjrä 'nyɩ 'iin jre ‑a jre.

²³ Wiili kä 'doo 'n jrea' nɩ, bätä o bätä 'nëmäa' ‑srörö nɩ, 'Nyüna ‑Susu ‑gbala 'mɩ 'sɩrɩ ‑jie nyra ‑sʋɩ ‑glaraa' 'lɩ 'mɩ.

²⁴ 'Na 'klä 'nyɩ 'na 'nyü ‑gälɩ ‑gbaa ‑a kälä. I käa' ‑gbaa nɩ, 'iibä ‑a 'wlara dɔrʋ 'lɩ 'jrʋpalä bäa' 'na 'klʋɩ ä 'Pläkänyɔɔ Jesu ‑nyɩa' 'mɩ kälɩ: ‑a 'salɩ 'Mʋfagogolä 'paa' Nyɔsʋaa ‑gbinanakʋa ‑gä.

²⁵ «‑Bɛ 'n jre 'iin ɔ, 'amɔlɔ kä 'fɩɔ 'n ‑pia' ‑gälɩ ‑bɛ 'n 'saa Nyɔsʋaa 'kamapläa ‑gäa ‑gogo nɩ, 'a ‑ka ‑nëmä 'na 'klʋɩ ‑a 'jä.

²⁶ 'Ii känyrɩ, 'saarɩa ‑srɩɩ 'lɩ 'n ‑gbala 'amɩ: 'ana ‑toru 'nyɩ 'na kälɩ ‑a bä.

²⁷ 'Be 'nyɩ 'amɩ wii ‑gba ‑a ‑sisre; 'n srara 'amɩ wiili kä 'fɩɔ Nyɔsʋaa 'bataa'.

²⁸ 'Ii känyrɩ 'ba ‑tre 'ana nyüfë, 'ba ‑gäälä nyüülü kä 'fɩɔ 'Nyüna ‑Susu ‑nyɩa' 'amɩ kälɩ 'nyü ‑gba, 'sɩrɩ nyɔɔ ‑glaara ‑bablëëjü ‑gälɩ. 'Ba bä Nyɔsʋaa 'cɛcɩa 'nyiöligälänyüü; 'ɔa 'Jʋa 'mʋgbɛa ‑toru 'ɔ nʋ 'ɔnya ‑su 'üün.

²⁹ 'N jre 'iin 'sɩrɩ ama toroa' 'lɩ ‑gälɩ klaklamlaa 'mäa' 'ana ‑tɔrʋpɩɔ pala, 'ü ‑nëmä ‑bablëëjüa nyatɛrɩ ‑a 'jä.

³⁰ 'Ana 'mʋgbɛa ‑tɔrʋpɩɔ nyüü nya 'wʋsɔa 'kä 'ünya 'lɩ ‑gbagblɛ ‑gä 'sa, 'ümä 'cɛcɩnyüü 'nyʋfɔ 'wʋ 'ba.

³¹ 'Ii känyrɩ 'ba tɛkä 'cɩcasa, 'ba jre 'sa 'n ‑si ‑sɩ tää ‑srɩ ‑bɛ ‑gbia 'nyɩ 'nyüglö ‑a 'nyüglö, 'n 'wuö ‑bɛ 'n ‑gbala 'amɩ wiili Nyɔsʋa 'bataa'.

³² «'Na ‑wlajü 'amɩ, 'köklesaplɩɩ ɔ nɩ, 'n tɩɛ 'amɩ Nyɔsʋa nyra wiili 'paa' 'ɔa ‑gbinanakʋa ‑gä kälɩ. 'A wiili nëmä 'amɩ 'klü ‑nyɩ, 'ii 'mä bɩa 'amɩ ‑jaaa ‑nyɩ nyüülü kä 'fɩɔ 'ɔ ‑gäa' 'klɩa 'mlɩ.

³³ Nyɔɔa mölii, nyɔɔa ‑sika, nyɔɔa 'kotu, 'inyɩ 'na plɛ ‑a fa.

³⁴ 'Ana 'fɩɔ jre 'iin, 'na wlu 'uu ‑fɛɛɛ 'jrʋpa ‑bɛ 'n 'paa 'mɔɔ ‑bɛ nyüülü 'nyraa 'üün 'nyɛɛa' a ‑gä.

³⁵ 'Ia 'fɩɔlʋ nɩ, srara 'n sara 'amɩ 'sɩrɩ a käa' amäa' 'sa 'jrʋpa ‑fɛ ‑gböösa, amä ‑mülü 'nyɩa' dɛɛ kä ‑gbaji, ‑bɛ 'n 'paa 'amɩ plɛ wiili 'Pläkänyɔɔ Jesu 'pa käa': ‹‑Ama ‑nyɩ, 'ia ‑jɔrʋ ‑sümlö 'unya ‑si 'kä 'ümä ‑mɩ ‑nyɩ 'wʋ.› »

³⁶ 'Pɔɔlë bɩaa' wii 'papakʋ nɩ, 'ɔnya 'pakotifli 'ɔ nyra 'üün nya bibie Nyɔsʋa.

³⁷ 'Üa 'fɩɔa 'dugu 'ünya jijrö 'ɔɔn ‑gba ‑bɛ 'ü ‑gbere 'ɔɔn.

³⁸ Wiili paa' 'üün ‑gba ‑gböösa nɩ, 'iibä: «'A ‑ka ‑nëmä 'mɩ ‑a 'jä.» 'Ünya fala 'ɔɔn falaa, 'ünya 'tɔ 'mɩɩ ‑gba.