Akëtë 17 - Kuö Dëdrä Jenɛɛsë Rutë

'Pɔɔlë ‑bɛ Silasë mia' Tɛsalonikëbätä

¹ 'Ü möa' nɩ, 'ünya ‑srörö Amëfipoli nyra Apoloniibätä, 'ünya 'tɔ Tɛsalonikëbätä. Juifë kälä 'lɩ 'üa 'sraaplanyuku.

² 'Pɔɔlë nya pa 'üa ‑tɔrʋpɩɔ, 'sɩrɩ 'ɔ nöa' a 'doo. 'Ümä ‑fʋflʋpasrɩ 'wʋ tää 'wʋ nrörökalɩ mi nɩ, 'ɔ nyra 'üün ‑toplo nyɔsʋapɔɔkʋa 'mlɩa wii ‑gälɩ.

³ 'Ɔ ‑gbala 'üün ‑bɛ 'ɔ srara 'üün 'sɩrɩ 'Kriisëlɔ kä 'ɔmä ɩa' ‑sʋɩ 'jä ‑bɛ 'ɔmäa' jäjänyüü ‑tɔrʋpɩɔ sɔ. 'Ɔ nɩnɩa: «Jesulɔ kä ‑gä 'n ‑gbalaa' 'amɩ nɩ, 'ɔɔ bä 'Kriisë.»

⁴ 'Üa ‑tɔrʋpɩɔa ‑mölöö 'dara 'iin wii, 'ünya po 'Pɔɔlë nyra Silasë ‑gälɩ. Grɛɛkënyüü 'kɔkɔmlɛ nyra 'ŋlëgë kpakü 'kɔkɔmlɛ bä ɩ bɩa 'üa ‑tɔrʋpɩɔ ü ‑trääräa' 'lɩ Nyɔsʋa.

⁵ ‑Maa juifë 'nyɩ 'iin wii ‑a 'dara 'ünya ‑tʋ 'ia wasä. 'Ünya 'papla nyüülü ‑piea' 'nyifi mlɩ, 'ünyɩa' 'cɩcagbi kä ‑gba, 'ünya 'cakla bätä 'lɩ. 'Ünya pa Jasɔɔnëa ‑gbööli, ‑bɛ 'ü 'bata 'Pɔɔlë nyra Silasë 'ümä 'üün ‑gäa ‑jria 'lɩ ja.

⁶ 'Ünyɩa' 'lɩ 'üün jrä nɩ, 'ünya 'kpla Jasɔɔnëa 'klüa nɔ nyra ‑wlajü ‑mölöö, 'ünya fa 'üün bätäa 'wliklɩnyüü. 'Ünya 'kpölɩkä: «Nyüülü kʋa' ‑pɩ, 'üü 'caklaa' nyüüa 'fɩɔ 'lɩ, 'a 'üü ji ‑tɛ,

⁷ 'a Jasɔɔnëlɔ 'ɔɔ 'kʋɛɛlɩ 'üün! ‑Dɔlʋ Sesaa 'paa' 'lɩ, 'a ‑taa nyüülü kʋa' ‑pɩa 'fɩɔ blara 'uun 'klɩ, 'kä 'ü nö ‑maa 'kɩɩ ‑moloo bälɩ 'ɔɔ 'ü 'dara Jesu.»

⁸ Wiili pa ‑jria nyra bätäa ‑gʋmlë ‑gba.

⁹ 'Ünya ‑gbala Jasɔɔnë nyra 'cɛcɩnyüü ‑mülü nɩ, ü 'pɛɛ lamanɩ ‑bɛ 'ümä 'üün ‑wälɩ 'cɛrɛ.

'Pɔɔlë nyra Silasë mia' Bereebätä

¹⁰ ‑Gbia 'kaa' dotro nɩ, 'cɛcɩnyüü nya fa 'Pɔɔlë nyra Silasë Beree. 'Ü 'tɔa', 'ünya mi juifëa 'sraaplanyüköli.

¹¹ 'Ia nyüüa plɛ 'na 'ünya ‑si juifëlü bäa' Tɛsalonikëbätä 'wʋ, 'üa nyɔsʋaawii nya fumö ‑gböösa. ‑Srɩ o ‑srɩ 'ü tɩtrɛ nyɔsʋaapɔɔkʋa 'mlɩ 'kä 'ümä 'iin 'jä ima 'daa wiili 'ü ‑gbalaa' 'üün ma bä 'cɩcasa.

¹² 'Ii känyrɩ, 'üa ‑tɔrʋpɩɔa nyüü 'kɔkɔmlɛ nya toro Nyɔsʋa plɛ; 'palɩ grɛɛkëŋlëgë kpakü nyra nyɩberü 'kɔkɔmlɛ.

¹³ ‑Maa Tɛsalonikëa juifënyüü 'nua' ‑maa 'Pɔɔlë 'pala bɩa nyɔsʋaawii Bereea 'bre nɩ, 'ünya ji bɩa 'lɩ 'ümä nyüüa polu 'jrara.

¹⁴ 'A ‑plɩɩ 'cɛcɩnyüü kʋ dotro 'ünya fa 'Pɔɔlë 'taniea 'pɛlɩ. ‑Maa Silasë nyra Timotee tɩɔ 'lɩ.

¹⁵ Nyüülü fala ɩa' 'Pɔɔlë nɩ, 'ünya fala 'ɔɔn falaaa Atɛɛnëbätä. 'Ɔ bɩaa' 'üün wii mlɩ ‑tʋtʋkʋ, 'ü ‑gbala Silasë nyra Timotee ü ji sɔsɔ nɩ, 'ünya 'blöödɛrɩ.

Wiili ‑sröröa' Atɛɛnëbätä

¹⁶ ‑Bɛ 'Pɔɔlë ‑glaaraa' Silasë nyra Timotee Atɛɛnëbätäa 'mlɩ nɩ, 'ɔnya ‑tʋ 'iin 'nyügba 'sɩrɩ bätäläa 'mlɩ 'sia' ‑wäsɩa. 'Ia ‑gʋ 'ɔnya ‑tʋ 'crɛ.

¹⁷ 'Ɔ mö juifëa 'sraaplanyuku 'wʋ 'plɔʋplɔʋ, 'kä 'ɔɔ ‑bɛ juifënyüü nyra grɛɛkënyüülü ‑pʋpʋaa' Nyɔsʋa ‑topo; ‑kä 'makatɩ 'klɩ 'ɔɔ ‑bɛ nyüülü 'ɔ jräa' 'lɩ ‑srɩɩ ‑o ‑srɩɩ ‑topo.

¹⁸ 'Kpɩkpɩanyüülü 'ü 'daraa' Epikuriinyüü nyra Sëtoisënyüü nyra 'ɔɔn ‑topo. ‑Mölöö nö: «‑Taa ‑yrɛkänyɔɔlɔ nɩnɩa dɛɛ 'plɛɛ le?» ‑Mölöö 'jä 'ɔɔn 'ɔnya 'pa Jesua ‑gä nyra 'sɩrɩ 'ɔ sɔa' 'kuaabre, 'ia ‑gʋ 'ü nö ‑maa: «'I ‑beere ‑pasa nyɔsʋaɩɩa wiipanyɔɔ 'ɔ bä.»

¹⁹ 'Ünya 'kpla 'ɔɔn 'ünya fa 'ɔɔn ‑gäträäräfalä 'ü 'daraa' Aleopajë. 'Ünya 'bete 'ɔɔn: «'Kpɩkpɩakʋ dëdrälä ‑jaa' nɩ, ‑mrɛɛɛ ‑a ‑gbala ‑plɩɩ amɩ wiili 'iibäa'?

²⁰ 'Be wiili a ‑kaapɩɔa' 'wli 'nu 'ii ja ‑na mlɩ. A 'bata amä 'ia ‑gbaa jre.»

²¹ Atɛɛnëbätäa nyüüa 'fɩɔ nyra nyɔtugbanyüülü bäa' 'lɩ 'lee nɩ, 'ü ma dɔrɔ 'üa 'taɩn a 'fɩɔwʋ, 'ü ma 'saalɩ wadëdrë ‑bɛ 'ü ma po bɩa 'iin 'nyakli.

²² 'Pɔɔlë nya 'nyüglö Atɛɛnëa ‑gätʋnyüüa ‑tɔrʋpɩɔ 'ɔnya ‑gbala 'üün ‑maa: «Atɛɛnëanyüü 'amɩ, 'n jre 'iin 'sɩrɩ 'a ‑pʋpʋaa' 'ana nyɔsʋaɩɩ ‑gböösa.

²³ 'N ‑sröröa' 'ana bätä nɩ, 'n 'jä ‑plɩɩlɩ 'a ‑pʋpʋaa' 'ana nyɔsʋaɩɩ, 'nya 'järä ‑gbɔsatöwlö 'dööa ‑gälɩ ‑jɩjradii 'doo: ‹NYƆSƲALƆ ANYƖA' JRE.› Nyɔsʋalɔ 'a nöa' 'saa 'a ‑pʋpʋaa' nɩ, 'a 'ɔa ‑gä 'n 'paa.

²⁴ Nyɔsʋalɔ nʋa' ‑tʋtʋ nyra diili kä 'fɩɔ bäa' ‑tʋtʋ ‑gälɩ, 'a 'ɔɔ bä ‑tʋtʋ nyra cɛa 'Pläkänyɔɔ. 'Ɔnyɩ kʋ 'cɛcɩnyëkalä nyɔɔ 'paa' a ‑wälɩ ‑a.

²⁵ 'Ɔnyɩ 'bata 'bata ‑a nyɔɔ 'mä 'ɔa wiigba kälä ‑beere 'sɩrɩ dɛɛ 'makɩ ɩa' 'ɔɔn, 'be 'ɔa 'mʋgbɛ 'ɔɔ ‑nyɛɛ 'lɩbänyüüa 'fɩɔ 'klä, fiofio ‑fʋflʋ nyra diia 'fɩɔ.

²⁶ Nyɔɔ 'doo 'ɔ ‑srörö kälɩ 'ɔnya nʋ nyüüa ‑glügbüa 'fɩɔ, 'ümä ‑tʋtʋa 'fɩɔa ‑gälɩ kʋ. 'Ɔ blɛ 'üa jrüü, 'ɔnya nyaka ‑plɩɩlɩ 'ü nëmäa' kʋ ‑tʋtʋ ‑gälɩ.

²⁷ 'Ɔ nʋ 'imɩ 'kä nyüü 'mä 'Pläkänyɔɔ 'bata, 'ümä 'ɔɔn jä 'ü ma bɩbrɛ 'kä; ‑bɛ 'ɔnyɩ 'lɩ ana ‑tɔrʋpɩɔa nyɔɔ 'doo dɛrɩ ‑a tʋŋlɔ,

²⁸ 'be 'ɔɔ känyrɩ ‑bɛ a fio, ‑bɛ a sɔsɔkou ‑bɛ a bä 'plä 'wʋ. 'Asɩ 'ana 'bɩbrɩnyüü ‑mölöö ‑gba: A bä bɩa 'ɔa 'jü .

²⁹ Ama bä Nyɔsʋaa 'jü nɩ, a ‑nëmä Nyɔsʋa ‑sika ‑wäsɛ 'klɩ ‑a 'papla, a ‑nëmä 'ɔɔn 'pɔlɔsikaa ‑wäsɛ 'aiɛ 'täkä 'klɩ ‑a 'papla. Dɛɛlɛ nyɔɔa bobowli nyra 'ɔa 'srɛkäkäkʋ nʋa', a ‑nëmä 'ɛɛn Nyɔsʋa 'klɩ ‑a 'papla.

³⁰ 'I 'saa' 'klɩ nɩ, Nyɔsʋa 'cere 'ia 'fɩɔ, 'be nyüü 'nyɩ kä wiili 'ü nöa' ‑a jre. ‑Mlatɩ nɩ, 'ɔ ‑gbala ‑pɩɔa 'fɩɔa nyüüa 'fɩɔ 'ü kä 'ümä ‑balʋ 'pie,

³¹ 'be 'ɔ ‑tʋ 'lɩ jrüülü kä 'mlɩ 'ɔmäa' nyüüa 'fɩɔa ‑gä tʋ 'cɩcasa 'lɩ. Nyɔɔ 'doo 'ɔ 'baalɩ 'ɔɔ 'ɔ ‑nyɩ 'iin kälɩ. 'Taɩn 'lɩ 'ɔ 'baa' 'ɔɔn jäjänyüüa 'bre nɩ, 'ɔ srara 'ɔɔn nyüüa 'fɩɔ, 'ümä 'iin jä 'sɩrɩ 'ɔɔ Nyɔsʋa 'baalɩ.»

³² Nyüü 'nua' 'kä «jäjänyɔɔ 'mä 'kuaabre sɔ» nɩ, ‑mölöö srörö 'Pɔɔlë, ‑bɛ ‑mölöö nö ‑maa: «‑Taa wiili kʋa' ‑pɩ ‑saalɩ nɩ, anya 'sɔɔwʋ ‑mɩ 'nyaklipoa.»

³³ 'Ia ‑gʋ 'Pɔɔlë nya sɔ 'üa ‑tɔrʋpɩɔ.

³⁴ 'Asɩɛ, ‑mölöö nya blö 'ɔɔn ‑gälɩ 'ünya toro Nyɔsʋa plɛ. 'Üa ‑tɔrʋpɩɔ bä Atɛɛnëa ‑gätʋnyɔɔ 'doo 'ü 'daraa' Deniisë, nyra 'ŋlʋʋ 'doo 'ü 'daraa' Damalisë; nyüü ‑mölöö nya bälɩ bɩa.