Akëtë 16 - Kuö Dëdrä Jenɛɛsë Rutë

Timotee falaa' 'Pɔɔlë nyra Silasë

¹ 'Ünya 'tɔ bätälä 'ü 'daraa' Dɛbee, 'ünya mi bɩa Lisëtrë. Nyɔsʋaplɛtoronyɔɔ 'doo bä ɩ 'lɩ, 'ɔɔ 'ü 'dara Timotee. 'Ɔa 'yio bä juifëyria 'ɔnya nʋ nyɔsʋaplɛtoroŋlʋʋ, ‑maa 'ɔa tʋ bä grɛɛkënyɔɔ.

² ‑Wlajülü bäa' Lisëtrë nyra 'üü bäa' Ikoniɔɔ 'paa 'ɔa 'cɩca 'nyrɩ.

³ 'Pɔɔlë nya 'daa 'ɔ nyra 'ɔɔn 'mä mi. 'Ii känyrɩ 'ɔnya 'bö 'ɔɔn juifëlü kʋ käa' 'ia ‑tʋtʋlʋa ‑gälɩa ‑gʋ, 'be nyüüa 'fɩɔ jre 'iin 'sɩrɩ 'ɔa tʋ bäa' grɛɛkënyɔɔ.

⁴ 'Asɩ 'ü ‑sröröa' bätäa 'mlɩ nɩ, 'ü ‑gbala 'cɛcɩnyüü ü ‑träärälɩ 'kpɩkpɩakʋlʋ apotrë nyra Jerusalɛɛmëa 'cɛcɩtagbü ‑tʋa' 'lɩ.

⁵ ‑Bɛ 'cɛcɩnyüüa nyɔsʋaplɛ ‑sɔɔrɔwʋa 'doo, jrüü o jrüü nyüü 'paplagälɩa 'doo.

'CƐCƖNYÜÜA NYƆSƲAPLƐTOROKƲ NYRA NYÜÜLÜ 'NYƖA' NYƆSƲAANYÜÜ BÄ 16.6–19.20 Nyɔsʋa ja wii 'Pɔɔlë 'nyü ‑gälɩ Troasëbätä

⁶ 'Nyüna ‑Susu 'nyɩa' 'üün 'nyie 'ümäa' nyɔsʋaawii Asiia 'bre 'pala nɩ, 'ünya ‑srörö Filigi nyra Galaatënyüüa ‑tʋtʋ ‑gälɩ 'ünya mi.

⁷ 'Ü jijröa' Misiia ‑tʋtʋ ‑gälɩ nɩ, 'ünya 'bata 'ümä Biteniia 'bre pala, ‑maa Jesua ‑susu 'nyɩ 'üün 'nyʋfɔ ‑a ‑nyɩ.

⁸ 'Ünya ‑srörö Misiia 'bre 'ünya 'tɔrɔ Troasëbätä.

⁹ ‑Gbiara nɩ, Nyɔsʋa nya ja wii 'Pɔɔlëa 'nyü ‑gälɩ: 'ɔnya 'jä Masedoanëa 'brea nyɔɔ 'doo, 'ɔ 'nyüglö ‑bɛ 'ɔ bibie 'ɔɔn ‑maa: «Ji Masedoanëa 'bre ‑mä amɩ ‑gbaji!»

¹⁰ 'I ‑sia' dotro nɩ, anya 'bata amä Masedoanëa 'bre mi. A jre 'iin 'Pläkänyɔɔ were 'lɩ amɩ amä 'üün Nyɔsʋaa 'Mʋfagogo 'sa.

Lidii 'palaa' 'nɩwli Filipëbätä

¹¹ Troasëbätä a 'jra 'mɩɩ 'lɩ anya mi Samotrasëa dugba 'lɩ. ‑Srɩ paa' anya 'tɔ Neapolisëbätä.

¹² A sɔa' 'lɩ anya mi Filipëbätä; 'ä ‑kätɩ ‑tɔɔrɔklɩ 'kä 'jra Masedoanëa ‑tʋtʋ ‑gälɩ. Rɔmënyüü dɔrɔ kä 'ään 'wʋ bɩa. A ‑si 'lɩ jrüü 'kɔkɔmlɛ.

¹³ ‑Fʋflʋpasrɩ jräa' 'lɩ nɩ, anya 'cie bätä anya mi 'nie ‑gba ‑plɩɩlɩ nyüü bibriea' Nyɔsʋaa 'doo. A jrä 'lɩ 'ŋlëgë ‑mölöö, 'ü trara. A nyra 'üün nya kʋwälɩ, anya dɛtrɛ 'üün.

¹⁴ 'Dooa 'nyrɩ bä Lidii, Tiratiirëbätä 'ɔ sɔ. 'Ɔ 'paa ‑fɔflɔɔ deili kä 'peru 'bʋaa 'peru. 'Ɔ ‑träärälɩ Nyɔsʋa. 'Nyakli 'ɔ po ɩ, 'Pläkänyɔɔ nya jie 'ɔa bobowli 'klɩ 'ɔmä wiili 'Pɔɔlë 'saalɩ 'nyaklipo 'cɩcasa.

¹⁵ 'Ɔɔ ‑bɛ 'ɔa ‑gbööö 'palaa' 'nɩwli nɩ, 'ɔnya bibie amɩ: «'Be 'a jre 'iin 'sɩrɩ 'n ‑trääräa' 'lɩ 'Pläkänyɔɔa wii, 'ba ji 'na ‑nyɛɛ 'amä 'lɩ 'prere.» 'Ɔ kʋ amɩ 'klɩ anya 'nyie.

'Ü 'paa' 'Pɔɔlë nyra Silasë ‑jie 'lɩ Filipëbätä

¹⁶ Jrüü 'doo 'lɩ nɩ, a mö ɩ nyɔsʋabibiefa 'wʋ, 'ŋlëkayria 'doo ‑fɛɛɛrɛa' nyɔɔa ‑nyɛɛ 'jrʋpa nya 'jrara amɩ 'klɩ. ‑Gbrea ‑susua 'srü bä 'ɔɔn 'lɩ. 'A 'ɔa 'jrʋpalä 'ɔ käa' ‑bɛ 'ɔ 'jäa' mölii 'kɔkɔmlɛ 'ɔa 'kamanyüüa ‑gʋ.

¹⁷ 'Ɔ prɛ amɩ dɛrɩ, amɔ ‑bɛ 'Pɔɔlë, ‑bɛ 'ɔ 'kpöö: «‑Taa nyüülü kʋa' ‑pɩ, 'Wʋsi Nyɔsʋaa 'jrʋpafɛnyüü 'ü bä! 'Ünya ji 'ümä amɩ 'nyʋfɔlʋ 'amäa' fa ‑bɛ 'amäa' 'lɩmlɩwʋ srara!»

¹⁸ 'Asɩ 'ɔ nöa' 'doo. 'Pɔɔlë sɩaa' 'ia ‑gʋ nɩ, 'ɔnya ‑sie 'ɔa 'pɛlɩ kälɩ 'ɔnya ‑gbala ‑balʋsusulu: «Jesu 'Kriisëa 'nyrɩklɩ, 'cie 'ŋlʋʋlɔ 'lɩ!» 'Köklesaplɩɩ 'unya 'cie.

¹⁹ 'Ŋlëkayrialɔa 'kamanyüü jrea' 'saa 'üa möliiplaŋlʋʋ nëmä mi nɩ, 'ünya 'kpla 'Pɔɔlë nyra Silasë 'ünya 'kʋɛrɛ 'üün 'kä 'ünya fa 'üün ‑jria 'lɩ ‑gätʋnyüü ‑nyɛɛ.

²⁰ 'Ünya ‑nyɩ 'üün ‑gʋmla kälɩ, 'ü ‑nëma: «Ana bätäa nyüüa polu ‑taa juifënyüülü kʋa' ‑pɩ 'jrara.

²¹ Wiili 'nyɩa' amɔ Rɔmënyüüa ‑dɔ bä, i anyɩ nʋa' nɩ, 'ii 'ü 'kpɩa nyüü!»

²² 'Ia ‑gʋ ‑jria nya ‑träärä 'Pɔɔlë nyra Silasë 'crɛ ‑gba. ‑Gʋmlë nya ‑gbala nyüü 'ü 'balɩ 'üa 'koti 'kä 'ü 'sɛpɛ 'üün.

²³ 'Ü bɩaa' 'üün bɔtɔkʋ nɩ, 'ünya 'be 'üün ‑jienyuku ‑wälɩ. 'Ünya ‑gbala ‑jie ‑gböööa ‑gälɩglaaranyɔɔ 'ɔ ‑tʋ 'üün 'nyügba 'cɩcasa.

²⁴ 'Ü ‑gbalaa' 'saa 'ɔmɩ nɩ, 'ɔnya pla 'üün klöö ‑mälä bäa' 'lɩ 'mlɩ 'leea 'mlɩ, 'ɔnya 'pa 'üa bei 'lɩ kpö.

Nyɔɔlɔ ‑glaraa' ‑jie ‑gbööö ‑gba nyra 'ɔa ‑gbööö toro Nyɔsʋa plɛ

²⁵ ‑Gbia 'mä 'lɩmɩmrɛkalɩ mi nɩ, 'Pɔɔlë nyra Silasë bibie Nyɔsʋa ‑bɛ 'ü brɛ. ‑Jienyüü ‑mülü 'nöö.

²⁶ Fɩɩɩn, ‑tʋtʋ nya tɩtrɛ ‑gböösa, 'unya ‑fɛ ‑jienyukua ‑fli ‑gba. 'A ‑plɩɩ tatia 'fɩɔ kʋ 'inya 'sara, ‑jienyüüa 'fɩɔa 'cɩ nya ‑jejro.

²⁷ ‑Jienyuku ‑gbaglaranyɔɔlɔ nya tɛkä; 'ɔ jrea' 'saa ‑jienyukua tatiaa 'fɩɔ 'a 'sara nɩ, 'ɔnya 'balɩ 'ɔa ‑jɛrɛ 'ɔmä 'ɔa nyufa 'bla, 'ɔa plɛɛ ‑jienyüü 'a fɔ.

²⁸ ‑Maa 'Pɔɔlë nya 'kpö ‑gböösa: «‑Nyɩ nʋ ‑na nyufa dɛɛ ‑gba! Ana 'fɩɔ bä ‑plɩɩ!»

²⁹ ‑Jienyuku ‑gbaglaranyɔɔ nya ‑sɛ 'napɛ, 'ɔnya fa ‑jiji 'ɔnya pa, 'ɔa 'fɩɔ tɩtrɛ, 'ɔnya blö 'Pɔɔlë nyra Silasëa bei 'wʋ.

³⁰ 'Ɔnya 'cie 'üün, 'ɔnya 'bete 'üün: «'Na nyüü 'amɩ, dɛplɛɛ 'nëmä nʋ ‑bɛ 'mä 'lɩmlɩwʋ le?»

³¹ 'Ü ‑nëma: «Toro 'Pläkänyɔɔ Jesu 'Kriisë plɛ, ‑mɔ ‑bɛ ‑na ‑gbööö 'mä 'lɩmlɩwʋ.»

³² 'Ünya 'pala 'ɔɔn 'Pläkänyɔɔa wii ‑gba, 'ɔɔ ‑bɛ nyüülü kä 'fɩɔ bäa' 'ɔa nyuku ‑wälɩ.

³³ 'Ia ‑gbia 'dööläa 'taɩn 'doolɔa 'mlɩ nɩ, ‑jienyuku ‑gbaglaranyɔɔ nya fa 'üün, 'ɔnya 'kʋɛrɛ 'üa ‑fë. 'A ‑plɩɩ 'ü kʋ dotro 'ünya 'pa 'ɔɔn 'nɩwli, 'ɔɔ ‑bɛ 'ɔa nyüüa 'fɩɔ.

³⁴ 'Ɔnya fa 'üün nyüköli, 'ɔnya ‑nyɩ 'üün jijrɛ. Dɔrʋ nya 'bla 'ɔɔn, 'ɔɔ ‑bɛ 'ɔa ‑gböööa 'fɩɔ, 'be 'ɔ toro Nyɔsʋa plɛ.

‑Gʋmlanyüü 'baa' 'Pɔɔlë nyra Silasë ‑jie 'lɩ

³⁵ ‑Srɩ paa' nɩ, ‑gʋmlë nya blɔ 'sʋgɩa 'ü ‑gbala 'ɔɔn: «'Cɛrɛ nyüülü ‑wälɩ!»

³⁶ ‑Jienyuku ‑gbaglaranyɔɔ nya ji 'ɔnya ‑gbala 'Pɔɔlë ‑maa: «‑Gʋmlëlë nɩnɩa ‑a 'cɛrɛ 'amɩ ‑wälɩ 'amä mi. 'A 'mrɛɛ 'amä 'cie, amä mi ‑pio.»

³⁷ ‑Maa 'Pɔɔlë nya ‑gbala 'sʋgɩanyüülü: «'Ünyɩ ana ‑gä ‑a ‑tʋ 'ünya bɔtrɔ amɩ ‑jria 'lɩ, ‑bɛ Rɔmënyüü a bä. 'Ünya 'pa amɩ ‑jie 'lɩ, 'a 'ii 'lɩ nɩ, 'ümä amɩ ‑sisie 'ümä amɩ ‑wälɩcɛrɛ nɩ, 'i ‑nëmä 'saa ‑a bä! Abɩa 'üa 'mʋgbɛ ji 'ümä amɩ 'cie!»

³⁸ 'Sʋgɩa nya mi 'iin ‑gʋmlë ‑gbala. 'Ü 'nua' 'sɩrɩ 'ü bäa' Rɔmënyüü nɩ, ŋalɛ 'bla 'üün.

³⁹ 'Ünya ji, 'ünya 'cie 'üün ‑jie 'lɩ, 'ünya bibie 'üün ü 'cie bätä.

⁴⁰ 'Ü 'ciea' ‑jie 'lɩ nɩ, 'ünya mi Lidiia ‑nyɛɛ. 'Ünya 'jä 'cɛcɩnyüü, 'ünya 'jrara 'üa 'klü 'ünya mi.