Akëtë 15 - Kuö Dëdrä Jenɛɛsë Rutë

'Bölökʋa 'blarʋ

¹ Nyüü ‑mölöö sɔ Judeea 'bre 'ünya ji Antiɔɔsëbätä ‑bɛ 'ü 'kpɩa ‑wlajü. 'Ü nɩnɩa: «'Ama 'nyɩ 'bölö ‑a 'bölö 'sɩrɩ Moisëa ‑Dɔ ‑gbalaa' 'amɩ nɩ 'a ‑nëmä 'lɩmlɩ ‑a 'wʋ.»

² ‑Topokʋ kpaku nya blö 'üa ‑tɔrʋpɩɔ. 'Pɔɔlë nyra Banabasë 'nyɩ 'üün 'nyiere ‑a 'nyiere. 'Ünya 'balɩ 'Pɔɔlë nyra Banabasë nyra 'üa ‑tɔrʋpɩɔa nyüü ‑mölöö 'ümä Jerusalɛɛmë mi, 'ümä apotrë nyra tagbü 'jä, 'ia wiilia ‑gʋ.

³ 'Cɛcɩlɛ bäa' Antiɔɔsë nya ‑nyɩ 'üün diili kä 'fɩɔ 'ümäa' fa ‑bɛ 'ümäa' mi. 'Ünya ‑srörö Fonisii nyra Samariia ‑tʋtʋ ‑gälɩ. 'Ü ‑gbala nyüü 'sɩrɩ nyüülü 'nyɩa' juifë bä ‑nyɩa' 'üa polu Nyɔsʋa kälɩ. 'Inya bä 'cɛcɩnyüüa 'fɩɔa dɔrʋ.

⁴ 'Ü 'tɔa' Jerusalɛɛmë nɩ, 'cɛcɩnyüü nyra apotrë nyra 'cɛcɩtagbü nya 'kʋɛɛlɩ 'üün. 'Pɔɔlë nyra Banabasë nya 'saralɩ 'üün 'sɩrɩ Nyɔsʋa ‑sröröa' 'üün kälɩ ‑bɛ 'ɔ nʋa' dii 'kɔkɔmlɛ.

⁵ ‑Maa Farisinyüü ‑mölöö ü toroa' Jesu plɛ nya sɔwʋ, 'ü ‑nëma nyüülü 'nyɩa' juifë bä kä 'ümä 'bölö ‑bɛ 'ümä bɩa 'lɩ Moisëa ‑dɔ ‑träärä.

Jerusalɛɛmëa dɛtʋ kpaku

⁶ Apotrë nyra 'cɛcɩtagbü nya trara wiilia ‑gʋ.

⁷ 'Ü ‑topoa' ‑topo, Piɛɛrë nya sɔwʋ 'ɔ ‑nëma: «'Na ‑wlajü 'amɩ, 'a jre 'iin, 'i 'saa' 'klɩ dotro 'mɔɔ Nyɔsʋa 'balɩ ana ‑tɔrʋpɩɔ 'mä wii 'pa, nyüülü 'nyɩa' juifë bä 'mä 'Mʋfagogo 'wlinu, ‑bɛ 'ümä nyɔsʋaplɛ nʋ 'ümä 'lɩ 'iin 'kʋɛɛ.

⁸ ‑Bɛ Nyɔsʋa jrea' nyɔɔa plɛ nɩ, 'ɔnya 'kʋɛɛlɩ 'üün; 'ɔ srara 'iin 'taɩn 'lɩ 'ɔ ‑nyɩa' 'üün 'Nyüna ‑Susu, 'sɩrɩ 'ɔ ‑nyɩa' bɩa amɩ 'uun.

⁹ 'Ɔnyɩ amɩ ‑tɩa ‑a 'bö, 'be 'üa nyɔsʋaplɛ 'ɔ tɛklɩ 'ɔnya kpëtä 'üa polu.

¹⁰ ‑Bɛ dɛplɛɛ kä ‑gʋ 'a 'traɩn Nyɔsʋa le? 'A 'bata 'amä ‑gblɛ 'wʋnyɛrɛnyüüa ‑plɩ ‑gälɩ 'pie, wiili ana tʋɩɩ nyra amɔ 'nyɩa' 'lɩbɩa amäa' ‑gbötö!

¹¹ ‑Maa a jresaa 'Pläkänyɔɔ Jesu 'pʋɔ amɩ 'ɔa ‑gbinanakʋ 'lɩ 'sɩrɩ 'ɔ 'pʋɔa' bɩa 'üün.»

¹² Nyüülü kä 'fɩɔ trara ɩa' nya 'kpla 'më 'ümä Banabasë nyra 'Pɔɔlë 'nyaklipo. 'Ünya ‑gbala 'üün 'sɩrɩ Nyɔsʋa ‑srörö 'üün kälɩ ‑bɛ ‑saragbia tie nyra plɛklɩkalawii nröröa' nyüülü 'nyɩa' juifë bäa ‑tɔrʋpɩɔ.

¹³ 'Ü bɩaa' wii 'papakʋ nɩ, Jaakë ‑nëma: «'Na ‑wlajü 'amɩ, 'ba po 'mɩ 'nyakli o!

¹⁴ Simɔɔ 'sa ‑plɩɩ 'lɩ 'sɩrɩ 'ia 'käkolofa 'wʋ Nyɔsʋa jia' nyüülü 'nyɩa' juifë bäa ‑nyɛɛ, 'ɔmä 'lɩ 'üa ‑tɔrʋpɩɔ ‑glügbö 'döö 'ba 'ämä 'ɔa nä bä.

¹⁵ 'Ii ‑bɛ nyɔsʋaamlɩpalanyüüa wii bä dɛɛ 'dee, 'be 'i ‑jɩjra ‑maa:

¹⁶ 'Ia wiili ma ‑si nɩ, 'nyaa jia, 'kä 'nyaa Daviidëa nyukulu ‑gbloooa' 'pa; 'nyaa ‑plɩɩ 'ua böblödii 'baa, 'kä 'nyaa 'uun 'klɩgä.

¹⁷ 'Kä nyüü ‑mülü tɩɔa' 'lɩ 'mä 'Pläkänyɔɔ 'bata, 'üü ‑bɛ nyüülü kä 'fɩɔ 'nyɩa' juifë bä ü 'klaaa' 'na 'nyrɩ . ‑Jäsɩ 'Pläkänyɔɔlɔ nöa' diili ‑gbaaa',

¹⁸ ‑bɛ diili kä 'fɩɔ 'ɔ nʋa' , 'i jrerea' 'i 'a 'lɩ ‑wlɛ.

¹⁹ «'Ii känyrɩ ‑jäsɩ 'n ‑gbaa' nɩ: anyɩ ‑sie nyüülü 'nyɩa' juifë bä ‑bɛ ü toroa' Nyɔsʋa plɛ ‑sʋɩ.

²⁰ ‑Maa ‑kaa' ‑jɩjra 'üün 'wʋ amä 'üün ‑gbala ünyɩ ji mlaalü 'ü 'blaraa' ‑wäsɩa, 'ünyɩ nʋ ‑sagbili Nyɔsʋa 'nyɩ 'bataa', 'ünyɩ ji mlaalü jäa' 'ünyɩa' ‑plɛlɩbölö, 'kä 'ü 'cɛrɛ ‑toru ‑wälɩ.

²¹ 'Be sɔ ana tʋɩɩa 'taɩn 'lɩ nɩ, nyüü bä kä bätëa 'fɩɔa 'mlɩ 'ü ma 'kpɩa Moisëa ‑Dɔ, 'ü ma ‑täsä 'uun a 'doo juifëa 'sraaplanyüköli ‑fʋflʋpasrɩ 'lɩ.»

‑Pɔɔkʋlʋ 'ü faa' nyüülü 'nyɩa' juifë bä ‑bɛ ü toroa' Nyɔsʋa plɛ

²² 'Ia ‑gʋ apotrë, 'cɛcɩtagbü nyra 'cɛcɩnyüüa 'fɩɔ nya 'nönrö 'wli, 'ünya 'ba 'üa ‑tɔrʋpɩɔ nyüü ‑mölöö, 'üü ‑bɛ 'Pɔɔlë nyra Banabasë, 'ünya blɔ 'üün Antiɔɔsëbätä. 'Ünya 'balɩ Judasë 'ɔ 'ü 'daraa' bɩa Basabasë nyra Silasë. 'Üa 'sɔɔlë bä 'cɛcɩnyüü kpakü.

²³ ‑Jäsɩ 'ü ‑jɩjraa' ‑pɔɔkʋlʋ: «Amɔ Apotrë, 'cɛcɩtagbü nyra ‑wlajü ‑mölöö 'trɛɛ 'amɩ, 'amɔlɔ 'nyɩa' juifë bä ‑bɛ 'a kʋa' Antiɔɔsëbätä, Sirii nyra Silisiia ‑tʋtʋ ‑gälɩ.

²⁴ A 'nu 'sɩrɩ ana nyüü ‑mölöö sɔa' ‑tɛ ana ‑nyɛɛ ‑bɛ 'ü 'caklaa' 'ana bobowli 'lɩ: wiili bäa' ‑maa nyɔɔ kä 'ɔmä 'bölö ‑bɛ 'ɔmä 'lɩ ‑Dɔ ‑träärä. ‑Mää amɔ 'nyɩ 'üün blɔ.

²⁵ 'Ia ‑gʋ anya 'nönröwli, anya 'balɩ nyüü, 'üü ‑bɛ ana ‑wawanyüü Banabasë nyra 'Pɔɔlë, anya blɔ 'üün 'ana ‑nyɛɛ,

²⁶ 'ü ‑nyɩ 'üa 'klä ana 'Pläkänyɔɔ Jesu 'Kriisëa 'nyrɩa ‑gʋ.

²⁷ 'Ia ‑gʋ anya blɔ Judasë nyra Silasë 'ümä 'amɩ ‑gbala 'imä 'üa mlɩ ja 'ümä 'amɩ watu 'doolʋ ‑gbala.

²⁸ 'I kä 'Nyüna ‑Susu 'tʋ, 'inya kä bɩa amɩ 'tʋ a ‑pɩ 'amɩ kälɩbädii ‑gälɩ 'pa, 'ima 'nyɩ i kʋa' ‑pɩ ‑a 'doo ‑a bä 'i 'naa':

²⁹ ‑Nyɩ ji mlaalü 'ü 'blaraa' ‑wäsɩaa, ‑nyɩ ji ‑toru, nyra mlaalü jäa' 'ünyɩa' ‑plɛlɩbölö, ‑nyɩ nʋ ‑sagbili Nyɔsʋa 'nyɩ 'bataa'. 'Ama ‑träärälɩ 'iin nɩ, 'i 'na. 'A ‑plɩɩ a 'blörö.»

³⁰ 'Ü nyra ‑mülü sɔsrɔa' ‑gba nɩ, 'ünya mi Antiɔɔsëbätä. 'Ünya 'paplaa' 'cɛcɩnyüüa 'fɩɔ ‑gba nɩ, 'ünya ‑nyɩ 'üün ‑pɔɔkʋlʋ.

³¹ 'Ü bɩaa' 'uun ‑täsäkʋ nɩ, dɔrʋ nya 'blaa 'üün 'be wiili 'palaa' 'lɩ ‑nyɩ 'üün 'klü.

³² Judasë nyra Silasëa 'mʋgbɛ bä nyɔsʋaamlɩpalanyüü, 'ünya 'jrara bɩa ‑wlajülü 'klü 'lɩ ‑gböösa.

³³ 'Ü ‑sia' 'üün jrüü ‑gba nɩ, 'cɛcɩnyüü nya ‑nyɩ 'üün 'nyʋfɔ 'ümä apotrëlü blɔa' 'üün a ‑nyɛɛ dɛrɩ 'blöö.

³⁴ ‑Maa Silasë ‑nëma 'ɔnya 'lɩ tɩɔa.

³⁵ 'Pɔɔlë nyra Banabasë nya tɩɔ bɩa Antiɔɔsëbätä. 'Üü ‑bɛ nyüü 'kɔkɔmlɛ ‑mölöö 'kpɩa ‑bɛ 'ü 'saa 'Mʋfagogolä 'paa' 'Pläkänyɔɔa ‑gä.

'Pɔɔlë nyra Banabasë sɔsrɔa' ‑gba

³⁶ Jrüü jie ‑sia' nɩ, 'Pɔɔlë nya ‑gbala Banabasë: «A 'blöö, a mi bätëlë kä 'fɩɔa 'mlɩ, i a 'palaa' 'Pläkänyɔɔa wii, amä ana ‑wlajülü bäa' 'lɩ 'jä, 'sɩrɩ 'üa nyɔsʋaplɛ bäa'.»

³⁷ Banabasë 'bata 'ɔmä ɩ Jaanlɔ 'ü 'daraa' Marëkë fa bɩa,

³⁸ ‑maa 'Pɔɔlë 'nyɩ 'nyie ‑a 'nyie 'kä Marëkë 'mä 'üün fala, 'be 'ɔ 'sɔ 'üün dɛrɩ Pamëfiliia ‑tʋtʋ ‑gälɩ; 'jrʋpalä 'ü ‑fɛa' 'ɔnyɩ 'üün ‑gba ‑a ji.

³⁹ 'Ü ‑kanyɩ 'wli ‑a nönrö 'ünya sɔsrɔgba. Banabasë nya fa Marëkë, 'ünya 'jra 'mɩɩ 'lɩ 'ünya mi Siiprë.

⁴⁰ 'Pɔɔlë nya dɔrʋ Silasë 'wʋ. 'Cɛcɩnyüü bɩaa' 'üün 'Pläkänyɔɔa ‑gbinanakʋ kälɩ ‑nyɩnyɩkʋ nɩ, 'ünya mi.

⁴¹ 'Ünya ‑srörö Sirii nyra Silisiia 'bre ‑bɛ 'ü 'jrara 'cɛcɩnyüüa 'klü.