Akëtë 13 - Kuö Dëdrä Jenɛɛsë Rutë

¹ Antiɔɔsëbätäa 'cɛcɩnyüüa ‑tɔrʋpɩɔ ma bä nyɔsʋaamlɩpalanyüü nyra 'kpɩkpɩanyüü, 'üü bä: Banabasë, Simeɔɔn 'ü 'daraa' bɩa 'Kpörönyɔɔ, Sirɛɛnënyɔɔ Lusiusë, Manaɛɛnlɔ nyra ‑gofɩanëma Erɔɔdë kɔsɔ 'bʋala ‑pɩɔ 'doo 'wʋ, nyra Sɔɔlë.

² 'Taɩn 'lɩ 'ü paa' su ‑bɛ 'ü bibiea' 'Pläkänyɔɔ nɩ, 'Nyüna ‑Susu ‑nëma: «'Ba bere Banabasë nyra Sɔɔlë 'klɩ 'ümä 'jrʋpalä kä ‑gʋ 'n wea' 'üün ‑fɛ.»

³ 'Ii känyrɩ 'ü 'wlaraa' su nyra nyɔsʋabibiekʋ nɩ, 'ünya 'pie 'üün klʋgbë ‑gälɩ 'ünya 'cɛrɛ 'üün ‑wälɩ 'ünya mi.

Banabasë nyra Sɔɔlë mia' Siiprë

⁴ 'Asɩ 'Nyüna ‑Susu nʋ 'üa bʋblɔkʋ. 'Ünya mi Selusiibätä, 'a ‑plɩɩ 'ü sɔ 'ünya dɔrɔ 'mɩɩ 'wʋ 'ünya mi dugbalä 'ü 'daraa' Siiprëa 'mlɩ.

⁵ 'Ü 'tɔa' Salaminëbätä nɩ, 'ünya 'pala nyɔsʋaawii juifëa 'sraaplanyuku ‑wälɩ. Jaan bä bɩa 'lɩ 'ɔ jö 'üün ‑gba.

⁶ 'Ü 'pɩa' dugbaläa 'fɩɔ ‑bɛ 'ü 'tɔa' Pafɔsëbätä nɩ, 'ü jrä 'lɩ juifënyɔɔ 'doo. 'Ɔ nö ‑mina ‑bɛ 'ɔ bä ‑gbagblɛ nyɔsʋaamlɩpalanyɔɔ; 'ɔɔ 'ü 'dara Barë Jesu.

⁷ 'Ɔɔ ‑bɛ dugbalä 'lɩa ‑gofɩanëma bä ɩ ‑pɩɔ 'doo 'wʋ, ɔ 'ü 'daraa' Sɛrëjisë 'Pɔɔlusë. 'Ɔ bä 'lɩglanyɔɔ. 'Ɔnya we Banabasë nyra Sɔɔlë 'ümä 'ɔɔn nyɔsʋaawii ‑gbapala.

⁸ ‑Maa ‑minanʋnyɔɔlɔ Elimasë, 'asɩ 'ɔa 'nyrɩ bä grɛɛkëwii 'lɩ, 'ɔnyɩ 'üün 'casɩ ‑a ‑nyɩ. 'Ɔ 'bata 'ɔmä ‑gofɩanëmalɔa nyɔsʋaplɛ 'nyʋfɔ 'wʋ 'ba.

⁹ ‑Bɛ Sɔɔlë, 'ɔ 'ü 'daraa' bɩa 'Pɔɔlë nɩ, 'ɔ 'si 'Nyüna ‑Susu 'klɩ ‑bɛ 'ɔ ‑pʋpɔ ‑minanʋnyɔɔlɔ tee, 'ɔ ‑nëma:

¹⁰ «‑Sii yrʋ nyra bʋbɔgbia 'fɩɔ 'klɩ, Sataan a 'jʋ, diili kä 'fɩɔ 'naa' 'ia 'nyüamlɩjraranyɔɔ ‑bä! 'Taɩn 'plɛɛ 'lɩ ‑mä 'Pläkänyɔɔa diili kä 'fɩɔ ‑gäa' 'klɩ, 'ia 'kpɩkpɩakʋa ‑gʋ fio le?

¹¹ 'Ii känyrɩ, ‑jää 'Pläkänyɔɔ nya ‑mɩ 'pʋnɩa, ‑nya 'nɔɔa; ‑ka ‑nëmä 'jrʋ ‑a 'jä 'kä 'inya jrüü kä.» 'A ‑plɩɩ ‑gbru nyra 'jöjrüükpü kʋ 'ünya blö 'ɔɔn ‑gälɩ. 'Dari 'ɔ nö ‑bɛ 'ɔ 'bata nyɔɔ 'ɔmä 'ɔɔn 'nyʋfɔ srara.

¹² ‑Gofɩanëmalɔ 'jäa' 'iin nɩ, 'ɔnya toro Nyɔsʋa plɛ. 'Kpɩkpɩakʋlʋ 'paaa' 'Pläkänyɔɔa ‑gä, nya pa 'ɔmɩ ‑gba.

'Pɔɔlë nyra Banabasë 'pala nyɔsʋaawii Pisidiia Antiɔɔsë

¹³ 'Pɔɔlë nyra 'ɔa 'wʋnyɛrɛnyüü nya dɔrɔ 'mɩɩ 'wʋ 'ünya sɔ Pafɔsë 'ünya mi Pɛge, Pamëfiliia ‑tʋtʋ ‑gälɩa bätä 'döö bäsaa. Jaan nya sɔ 'üün dɛrɩ 'ɔnya 'blöö Jerusalɛɛmë dɛrɩ.

¹⁴ 'Ü sɔa' Pɛge 'ünya mi Antiɔɔsë, Pisidiia ‑tʋtʋ ‑gälɩ. Juifëa ‑fʋflʋpasrɩ 'lɩ nɩ, 'ünya pa juifëa 'sraaplanyuku 'wʋ 'ünya kʋwälɩ.

¹⁵ 'Ü bɩaa' ‑Dɔa ‑pɔɔkɩ nyra nyɔsʋaamlɩpalanyüüa ‑pɔɔkɩ ‑täsäkʋ nɩ, juifëa 'sraaplanyukua 'cifu nya blɔ 'üa 'pɛlɩ nyüü, 'ü ‑nëma: «‑Wlajü 'amɩ, 'klülɩpawaklüü ma bä 'ana ‑nyɛɛ 'amä nyüü ‑gbala nɩ, 'ba 'pawii.»

¹⁶ 'Pɔɔlë sɔa' 'wʋ nɩ, 'ɔnya dɔrɔ 'darʋ 'wʋ, 'ɔ ‑nëma: «Israɛɛlënyüü 'amɩ, 'nyraa 'amɔlɔ ‑trääräa' 'lɩ Nyɔsʋa 'ba ponyakli!

¹⁷ Israɛɛlëa Nyɔsʋa 'balɩ ana tʋɩɩ. 'Ɔnya 'papla ‑glügbölä ‑gälɩ 'taɩnlɩ kä 'fɩɔ 'ü ‑sia' Ejiipëtëa 'bre. 'Ɔnya nʋ 'ɔa 'klüdarʋ 'ɔnya 'cie 'üün 'blɩlɩa ‑gälɩ.

¹⁸ 'Ɔ ‑gbötö 'üün ‑sɩa ‑glʋɩsɔɔ ‑aaga 'lɩ.

¹⁹ 'Pɩrɩgälɩ nɩ, 'ɔ bɩaa' Kanaan a ‑glügbü ‑uunsɔɔ ‑gbogblookʋ nɩ, 'ɔnya ‑päälä 'ään 'ɔa Israɛɛlënyüü 'lɩ 'ümä 'lɩ kä.

²⁰ 'I ‑sia' nɩ, 'ɔnya ‑tʋ 'üa 'wliklɩ ‑gätʋnyüü, ‑sɩa ‑duu ‑glʋɩsɔɔ ‑bɛ ‑pʋa 'samadɛɛ (450), ‑a ji ‑a ‑tɔɔ nyɔsʋaamlɩpalanyɔɔ Samiɛɛlëa 'taɩn 'lɩ.

²¹ 'Ünya 'daa ɔ ‑nyɩ 'üün nyɔɔ 'ɔmä 'üa 'kɩɩ bä. Nyɔsʋa nya ‑nyɩ 'üün Kiisëa 'jʋ Sɔɔlë. 'Ɔ bä Bɛnjamɛɛa ‑glügbö 'klɩa nyɔɔ. 'Ɔ ‑si 'üa 'wli 'klɩ ‑sɩa ‑glʋɩsɔɔ.

²² Nyɔsʋa 'baa' ‑plɩ 'ɔɔn nɩ, 'ɔnya nʋ 'iin Daviidë nya bä 'üa 'kɩɩ. 'Ɔnya 'pa 'ɔa ‑gä, 'ɔ ‑nëma: ‹'N 'jä Jɛseea 'jʋ Daviidë: 'ɔ kä 'na plɛ 'tʋ, wiili kä 'fɩɔ 'mäa' 'ɔɔn ‑gbala, 'ɔnya 'iin nʋa.›

²³ 'A 'ɔa ‑glügböa 'mlɩ Nyɔsʋa 'ba 'Lɩmlɩbanyɔɔ 'doo Israɛɛlëa ‑gʋ. 'Ɔ ‑gbala käa' 'iin Israɛɛlë 'i 'a 'lɩwlɛ. 'Ɔɔ bä Jesu.

²⁴ 'Ɔ ‑kaaŋlʋa' ji nɩ, Jaan ‑gbala Israɛɛlënyüüa 'fɩɔ ü toro 'lɩ ‑balʋ ‑gälɩ ‑bɛ 'ümä 'nɩwlipala.

²⁵ Jaan 'wlaraa' 'ɔa 'jrʋpa nɩ, 'ɔ ‑nëma: ‹Nyɔɔ 'plɛɛ 'a 'dara 'mɩ le? ‑Mää 'mɔɔ 'nyɩ nyɔɔlɔ 'a ‑glaaa' bä. ‑Maa 'ɔɔ nëmä 'mɩ 'klɩtroro; 'nyɩ 'nɩmɩ 'lɩ ‑a bɩa 'mä 'ɔa 'siia pɩa ‑jie.›

²⁶ «'Na ‑wlajü 'amɩ, 'amɔ bäa' Abraamëa 'jü nyra 'amɔ ‑trääräa' 'lɩ Nyɔsʋa: 'amɔ Nyɔsʋa ja 'papawiili 'baaa' 'lɩ nyüü mlɩ.

²⁷ Jerusalɛɛmëa nyüü nyra 'üa 'cifu 'nyɩ 'ɔɔn 'lɩ ‑a 'kʋɛɛ. Nyɔsʋaamlɩpalanyüüa ‑pɔɔkɩ 'lɩ 'ü ‑täsäa' ‑fʋflʋpasrɩlɩa 'doo 'ünyɩ 'iin 'wli ‑a 'nu. Wiili 'i 'paa' 'ii 'ü nʋ: 'ü 'pɔnɩ Jesu 'ɔmä jä.

²⁸ ‑Bɛ wiili kä ‑gʋ 'ümäa' 'ɔɔn 'pɔnɩ 'inyɩ 'lɩ ‑a bä, ‑maa 'asɩɛ 'ünya ‑gbala Pilatë 'ɔ 'sa 'ɔɔn 'ümä 'ɔɔn 'bla.

²⁹ 'Ü bɩaa' wiili kä 'fɩɔ käläa' 'ɔɔn ‑gba i ‑jɩjraa' nyɔsʋapɔɔkɩ 'lɩ nʋnʋkʋ nɩ, 'ünya 'cie 'ɔɔn tuu 'wli, 'ünya ‑tʋ 'ɔɔn 'kuyu 'lɩ.

³⁰ ‑Maa Nyɔsʋa nya 'ba 'ɔɔn jäjänyüüa ‑tɔrʋpɩɔ.

³¹ Nyüülü 'ɔ nyra 'üün ma 'nyɛrɛ 'wʋ ‑sɔ Galileea ‑tʋtʋ ‑gälɩ ‑a 'tɔ Jerusalɛɛmë nɩ, 'ɔnya srara 'üün 'ɔa nyufa jrüü 'kɔkɔmlɛa 'mlɩ. 'A 'üülü 'üü ‑gbala nyüü 'ɔa ‑gä, 'be 'ü 'jä 'imɩ.

³² «Ana 'mʋgbɛ a 'sara 'lɩ 'amɩ 'ia 'Mʋfagogolä Nyɔsʋa ‑gbalaa' ana tʋɩɩ 'sɩrɩ 'i nröröa'.

³³ Nyɔsʋa nya nʋ wiili 'ɔ ‑gbaa', amɔ bäa' 'üa 'jü, ana ‑gʋ. 'Ɔnya nʋ 'imɩ 'taɩn 'lɩ 'ɔ 'baa' Jesu jäjänyüüa ‑tɔrʋpɩɔ, 'sɩrɩ 'i ‑jɩjraa' Nyɔsʋaa 'Lɩbrɛrɛpɔɔkɔa 'sɔɔa nu 'dʋa 'mlɩ: ‑Mɔ bä 'na 'Jʋ, 'bala 'saarɩ ‑gälɩ, 'mɔɔ bä ‑na tʋ .»

³⁴ Nyɔsʋa nya 'ba 'ɔɔn jäjänyüüa ‑tɔrʋpɩɔ, 'ɔ ‑pɩ ‑fɛ. 'A wiili 'ɔ 'pa käa' ‑bɛ 'ɔ 'daaa' ‑maa: 'Nyaa 'amɩ 'papanɩlɩ 'n 'daa käa' 'mäa' Daviidë ‑nyɩ ‑nyɩa, 'cɩca 'papanɩ .

³⁵ 'I ‑jɩjra bɩa 'Lɩbrɛrɛpɔɔkʋ ‑mɩdooa 'mlɩ: ‑Nyɩ 'nyie ‑na 'Klɩgänyɔɔ 'nyɩ ‑fɛ .

³⁶ ‑Bɛ Daviidëlɔ nɩ, 'ɔa 'taɩn 'lɩ, 'ɔ bɩaa' 'jrʋpa Nyɔsʋa ‑nyɩa' ‑fɛfɛkʋ nɩ, 'ɔ jä. 'Ünya ‑träärä 'ɔɔn 'ɔa tʋɩɩ ‑gba, 'ɔnya ‑fɛ.

³⁷ ‑Maa ‑mɔlɔ Nyɔsʋa 'baa' jäjänyüüa ‑tɔrʋpɩɔ nɩ, 'ɔnyɩ ‑fɛ ‑a ‑fɛ.

³⁸ «'Ii känyrɩ, 'na ‑wlajü 'amɩ, 'ba jre 'imɩ: 'a 'ɔa ‑gʋ a ‑gbala 'amɩ ‑maa Nyɔsʋa cere nyüü 'üa ‑balʋ.

³⁹ 'Ɔɔ nyɔɔ ‑o nyɔɔ toroa' 'ɔɔn plɛ ma ‑srörö kälɩ nɩ, 'kä Nyɔsʋa nya 'daa 'ia nyɔɔlɔ ‑gäklɩ. ‑Maa Moisëa ‑Dɔ 'nyɩ 'lɩ ‑a bɩa u ‑gä nyɔɔ 'klɩ Nyɔsʋaa 'klʋɩ ‑gälɩ.

⁴⁰ 'Ii känyrɩ, 'ba ‑tre 'ana nyüfë wiili ‑jɩjra nyɔsʋaamlɩpalanyüüa ‑pɔɔkʋ 'lɩ 'i ‑pɩ 'amɩ ‑gälɩjrä:

⁴¹ 'Ba ‑pʋpɔ, nyüüsrörönyüü 'amɩ, abɩa 'ana plɛklɩkala 'kä 'a saka! 'Nyaa 'ana ‑srɩa 'mlɩ 'jrʋpa ‑fɛɛɛrɛa, ‑bɛ 'jrʋpalä 'nëmäa' ‑fɛ nɩ, nyɔɔ ma ‑gbala 'amɩ nɩ, 'a ‑nëmä 'nɩmɩ 'iin wii 'wʋ ‑a 'ba !»

⁴² 'Ü 'ciea' juifëa 'sraaplanyuku ‑wälɩ nɩ, nyüülü 'nyɩa' juifë bä nya bibie 'üün ü 'saralɩ 'lɩ 'üün 'ia 'sama wii ‑fʋflʋpasrɩ ‑mɩlɩ 'mäa' ji 'ia 'mlɩ.

⁴³ 'Ü ‑gbagbaa' 'kä nɩ, juifë 'kɔkɔmlɛ nyra 'ü nʋa' juifë nɩ, 'ünya fala 'Pɔɔlë nyra Banabasë. 'Pɔɔlë nyra Banabasë nya 'pa 'üün ‑tɔɔ 'lɩ, ‑bɛ 'ü 'jrara 'üa 'klü, ü toro Nyɔsʋaa ‑gbinanakʋ plɛ.

⁴⁴ ‑Fʋflʋpasrɩlɩ jräa' 'lɩ nɩ, bätäa 'fɩɔ nya trara 'ümä Nyɔsʋaa wii 'nyaklipo.

⁴⁵ Juifënyüü 'jäa' nyüü 'kɔkɔmlɛ jia' nɩ, wasä nya 'si 'üün 'klɩ! 'Pɔɔlë ma pa wii nɩ, 'ü 'baa ‑plɩɩ 'iin, ‑bɛ 'ü ‑jejre 'ɔɔn.

⁴⁶ 'Pɔɔlë nyra Banabasë nya 'pa plɛ 'klü 'lɩ, 'ünya ‑gbala 'üün ‑maa: «Nyɔsʋaa wii kä 'imä 'amɩ ‑gba 'pala ‑kätɩ. ‑Maa 'be 'anyɩ 'bata 'iin ‑a, ‑bɛ 'ama 'jä 'ana nyüfë nɩ, 'anyɩ 'klälä 'nyɩa' blöröfa kä 'klɩ ‑a 'wʋ. 'I känyrɩ nɩ, nyüülü 'nyɩa' juifë bä 'üa 'pɛlɩ a mö.

⁴⁷ 'Asɩ 'Pläkänyɔɔ ‑gbala amɩ: 'N ‑tʋ 'lɩ ‑mɩ ‑beere 'napɛ nyüülü 'nyɩa' juifë bä 'üa ‑gʋ, ‑bɛ 'sɩrɩ Nyɔsʋa 'baalɩ nyüü mlɩ nɩ, ‑mä 'iin ‑tʋtʋa 'fɩɔ ‑gälɩ fa .

⁴⁸ «Nyüülü 'nyɩa' juifë bä 'nua' 'iin 'wli nɩ, dɔrʋ 'bla 'üün, 'ünya 'bʋala 'Pläkänyɔɔa 'papawii. Nyüülü kä 'fɩɔ Nyɔsʋa 'baa' 'lɩ 'ümäa' 'klälä 'nyɩa' blöröfa kä 'jä nɩ, 'ü toro 'iin plɛ.»

⁴⁹ 'Pläkänyɔɔa 'papawii nya ‑gbaala 'ia ‑tʋtʋlʋa 'fɩɔ ‑gälɩ.

⁵⁰ ‑Maa juifë nya 'tuto 'üa 'cɛcɩa 'mlɩa 'ŋlëgë kpakülü bäa' 'lɩ nyra bätäa 'wliklɩa nyüü 'ümä 'Pɔɔlë nyra Banabasë 'crɛ ‑gba ‑träärä, 'ünya prɛ 'üün 'üa ‑tʋtʋ ‑gälɩ.

⁵¹ 'Üülü nɩ, 'ünya ‑gbɔplɔ 'lɩ 'üa bei ‑gbaa ‑tʋtʋ, 'ünya mi Ikoniɔɔbätä.

⁵² ‑Maa 'wʋnyɛrɛnyüülü nɩ, 'Nyüna ‑Susu nyra dɔrʋ nya 'si 'üün 'klɩ.