Akëtë 11 - Kuö Dëdrä Jenɛɛsë Rutë

Piɛɛrë 'saa Jerusalɛɛmëa 'cɛcɩnyüü ‑gogo

¹ Apotrë nyra ‑wlajülü bäa' Judeea ‑tʋtʋ ‑gälɩ nya 'nu 'sɩrɩ nyüülü 'nyɩa' juifë bä 'nyierea' bɩa Nyɔsʋaa wii 'klɩ.

² Piɛɛrë mia' Jerusalɛɛmë nɩ, nyüülü 'bölöa' nyra 'ɔɔn kɔsɔ nya ‑topo:

³ «Nyüülü 'nyɩa' 'bölö 'üa ‑nyɛɛ ‑pa ‑nyra 'üün nya tara 'wʋ!»

⁴ Piɛɛrë nya blöplɛ 'ɔnya 'sasra 'üün plɛ 'lɩ 'ɔ ‑nëma:

⁵ «'N bä käa' Jopeebätä nɩ, Nyɔsʋa 'n bibie ɩ Nyɔsʋa nya ja 'mɩ wii 'nyü ‑gälɩ. 'Nyaa 'järä dɛɛ 'dee cɛa 'mlɩ 'ɛ ‑beere dɔʋ kpaku 'u kʋ cɛ nyra ‑tʋtʋa ‑tɔrʋpɩɔ. 'Ua kotü mlɔɔ kpasra, 'unya 'cere 'na ‑gba.

⁶ 'N ‑pʋpɔ 'uun tee, 'nyaa 'järä 'ua 'mlɩ 'klʋɛɛa mlaa: mlaalü 'nyɛrɛa' bei mlɔɔ, 'palɩ ‑pɛrɛdii nyra nyisie.

⁷ 'Nyaa 'nu 'papawii 'wli ‑bɛ 'i ‑gbala 'mɩ: ‹Piɛɛrë, sɔwʋ; 'bla ‑a jidɛɛ!›

⁸ 'Nëma: ‹'Büa! 'Pläkänyɔɔ 'n ‑kaapɩɔ dɛɛlɛ ‑siea' nyra dɛɛlɛ plaa' nyɔɔ ‑fre 'na mlɩ pla.›

⁹ ‑Maa wiili jaa' cɛ 'lɩ ‑nëma 'sɔɔwʋ: ‹Dɛɛlɛ kpëträa' Nyɔsʋaa 'nyü ‑gälɩ nɩ, ‑nyɩ 'daa 'ɛ pa ‑fre!›

¹⁰ «'I ka tää 'inya jrälɩ 'ia 'fɩɔ nya 'blöö cɛa 'mlɩ dɛrɩ.

¹¹ Nyüü tää nya 'tɔrɔ dotro ‑gbööölä kä 'mlɩ 'n bä ɩa' a 'mlɩ. 'Ü sɔ Sesareebätä; 'na ‑nyɛɛ 'ü blɔ 'üün.

¹² Nyɔsʋaa ‑Susu nya ‑gbala 'mɩ 'na plɛ 'nyɩ ‑taaralɩ ‑a fala 'üün. ‑Wlajülü ‑uundoolü kʋa' ‑pɩ nya fala 'mɩ nyɔɔlɔ blɔa' 'üün 'ɔa ‑nyɛɛ, anya pa 'ɔa nyüköli.

¹³ Nyɔɔlɔ nya ‑gbala amɩ 'sɩrɩ 'ɔ 'jääa' 'aanjë 'ɔa nyüköli, 'aanjëlɔ nya ‑gbalaa' 'ɔɔn: ‹Blɔ nyüü Jopeebätä ü mi Simɔɔa 'klɛɛ ɔ 'ü 'daraa' Piɛɛrë.

¹⁴ 'Ɔnya ‑mɩ 'papawiili 'mäa' 'amɩ 'pʋɔ ‑gbalaa, ‑mɔ ‑bɛ ‑na ‑gböööa 'fɩɔ.›

¹⁵ 'N ‑ka 'paa ɩ wii 'Nyüna ‑Susu nya 'cere 'üün ‑gälɩ 'sɩrɩ 'u 'cerea' bɩa amɩ ‑gälɩ 'käkolofa 'wʋ.

¹⁶ 'Nyaa 'pa wiili 'Pläkänyɔɔ ‑gba käa' plɛ. 'Ɔ nɩnɩa kä: ‹'Nɩ Jaan nʋ 'ɔnya 'pa nyüü 'nɩwli ‑maa 'amɔlɔ nɩ, 'Nyüna ‑Susu nëmä 'amɩ 'wli 'pala.›

¹⁷ 'Nyaa 'jä 'iin 'sɩrɩ dɛɛlɛ Nyɔsʋa ‑nyɩa' amɩ 'taɩn 'lɩ a toroa' 'Pläkänyɔɔ Jesu 'Kriisë plɛ nɩ, 'a 'ia dɛɛ 'deelɛ 'ɔ ‑nyɩ bɩa 'üün. ‑Bɛ nyɔɔ 'plɛɛ 'n bä ‑bɛ 'n 'baa ‑plɩɩ Nyɔsʋaa ni le?»

¹⁸ 'Ü 'nua' wiili Piɛɛrë 'paa' 'wli nɩ, 'ünya trarakä. 'Ünya 'bʋala Nyɔsʋa; 'ü ‑nëma: «‑Ii! Nyɔsʋa ‑nyɩ bɩa nyüülü 'nyɩa' juifë bä 'nyʋfɔ 'ümä 'lɩ 'üa ‑balʋ ‑gälɩtoro ‑bɛ 'ümä 'cɩca 'klä 'jä!»

Antiɔɔsëbätäa 'cɛcɩ

¹⁹ 'Ü 'blaa' Etiɛɛnë nɩ, nyüü nʋ 'üün ‑gbigba nʋ nʋ 'ünya ‑gbaala ‑pɩɔa 'fɩɔ 'kä. 'Ü ‑srörö Fonisii nyra Siiprëa ‑tʋtʋ ‑gälɩ nyra Antiɔɔsëbätä. 'Ü ‑sröröa' 'lɩ nɩ, 'ü 'pala 'lɩ nyɔsʋaawii, ‑maa juifëa 'doo 'ü 'pala 'iin ‑gba.

²⁰ ‑Mölöö bä 'üa ‑tɔrʋpɩɔ 'ü bä Siiprënyüü nyra Sirɛɛnënyüü; 'ü jia' Antiɔɔsëbätä nɩ, 'ü 'pala juifënyüülü 'paaa' grɛɛkëwii 'Mʋfagogolä 'paaa' 'Pläkänyɔɔ Jesua ‑gä ‑gba.

²¹ ‑Bɛ 'Pläkänyɔɔa 'klü bä 'üün ‑gälɩ, nyüü 'kɔkɔmlɛ nya 'dara 'iin wii 'ünya toro 'Pläkänyɔɔ plɛ.

²² 'Ia nyüülüa wii nya blö Jerusalɛɛmëa 'cɛcɩnyüüa 'nyakli 'lɩ. 'Ünya blɔ Banabasë Antiɔɔsë.

²³ 'Ɔ 'tɔa' ‑bɛ 'ɔ 'järäa' Nyɔsʋaa ‑gbinanakʋ 'üa ‑tɔrʋpɩɔ nɩ, dɔrʋ 'bla 'ɔɔn, 'ɔnya 'jrara 'üa 'fɩɔa 'klü 'ɔnya ‑gbala 'üün ü nʋ 'üa plɛa 'fɩɔ ü toro 'Pläkänyɔɔ plɛ.

²⁴ Banabasë bä 'cɩcanyɔɔ, 'Nyüna ‑Susu nyra nyɔsʋaplɛtorokʋ 'si 'ɔɔn 'lɩ ‑bɛ nyüü 'kɔkɔmlɛ 'nyiere 'Pläkänyɔɔ 'klɩ.

²⁵ Banabasë nya ‑si 'ɔnya mi Tarësëbätä Sɔɔlë 'batrakalɩ.

²⁶ 'Ɔ 'jäa' 'ɔɔn nɩ, 'ɔnya fa 'ɔɔn Antiɔɔsë. ‑Sʋ 'mʋgbɛ 'ü trara 'cɛcɩnyüköli ‑bɛ 'ü 'kpɩa nyüü 'kɔkɔmlɛ. 'Abɩa Antiɔɔsë ‑kätɩ 'ü ‑nyɛɛrɛ 'wʋnyɛrɛnyüü 'Kriisënyüüa 'nyrɩ.

Antiɔɔsëa 'cɛcɩ 'crɛrɛ Jerusalɛɛmëa 'cɛcɩ

²⁷ 'A 'ia jrüülüa mlɩ nyɔsʋaamlɩpalanyüü sɔ Jerusalɛɛmë 'ünya mi Antiɔɔsë.

²⁸ 'Üa ‑tɔrʋpɩɔa 'doolɔ bäa' 'lɩ 'ü 'daraa' Agabusë, 'ɔnya sɔwʋ, 'Nyüna ‑Susu nya ‑srörö 'ɔɔn kälɩ 'unya ‑gbala nyüü ‑maa ‑gbëkananie nya ‑tʋtʋa 'fɩɔ ‑gälɩ palaa. 'I nrörö kä Sesaa Kloodëa 'taɩn 'lɩ.

²⁹ 'Wʋnyɛrɛnyüülü nya 'nönröwli 'ümä 'üa ‑wlajülü kʋa' Judeea ‑tʋtʋ ‑gälɩ ‑gbaji; dɛɛlɛ ‑moloo 'bataa'.

³⁰ 'Ünya nʋ 'imɩ. 'Ünya ‑nyɩ 'iin Banabasë nyra Sɔɔlë ü fa 'iin 'cɛcɩtagbü.