Akëtë 1 - Kuö Dëdrä Jenɛɛsë Rutë

'SƖRƖ 'KRIISË 'MÄA' DIIA 'FƖƆA ‑PƖƆA DƐRƖBÖBLÖKƲ NƲ 1.1–6.7 ‑Kätɩwii

¹ 'Na nyɔɔ Teofiilë, 'na ‑kätɩ ‑pɔɔkʋlʋa 'mlɩ nɩ, 'n 'sara 'lɩ wiili kä 'fɩɔ Jesu cɛtɛa' ‑bɛ 'ɔ 'kpɩaa' nyüü,

² 'ii 'ɔ nʋ nʋ 'ɔa cɛa 'mlɩa 'jrarajrüü nya jrälɩ. 'Ɔ ‑kaaŋlʋa cɛa 'mlɩ 'jra nɩ, 'Nyüna ‑Susu nya ‑srörö 'ɔɔn kälɩ 'ɔnya ‑gbala nyüülü 'ɔ nröröa' apotrë 'lɩ.

³ 'Ɔ sɔa' ‑sʋɩ 'lɩ nɩ, 'a 'üü 'ɔ srara 'ɔa 'lɩbäa nɔ. 'Ɔnya srara 'üün dii 'kɔkɔmlɛ 'ümä 'saa jre 'sɩrɩ 'ɔnya 'a 'kuaabre sɔ. 'Ünya 'jä 'ɔmɩ jrüüa ‑glʋɩsɔɔ, 'ɔnya 'saralɩ 'üün Nyɔsʋaa 'kamapläa ‑gä.

Jesu ‑gbalaa' 'ɔa 'wʋnyɛrɛnyüü 'Nyüna ‑Susua ‑gä

⁴ ‑Jäsɩ 'ɔ ‑gbala 'üün 'taɩn 'lɩ 'ɔ nyra 'üün bä ɩa' ‑pɩɔ 'doo 'wʋ nɩ: «'Anyɩ sɔ Jerusalɛɛmë, 'ba ‑glaaa dɛɛlɛ Tʋ 'daaa' 'ɔmäa' 'amɩ ‑nyɩ, dɛɛlɛ kä ‑gä 'n ‑gbala käa' 'amɩ.

⁵ 'Nɩ Jaan ma nö ‑bɛ 'ɔ ma 'paa nyüü 'nɩwli, ‑maa jrüü jiea 'mlɩ nɩ, Nyɔsʋa nya 'amɩ 'Nyüna ‑Susu 'wlipaa.»

⁶ ‑Bɛ apotrëa 'fɩɔ bä ɩa' ‑plɩɩ nɩ, 'ünya 'bete 'ɔmɩ: «'Pläkänyɔɔ, 'a 'ia 'taɩn 'lɩ ‑mä Israɛɛlëa 'kamakʋ ‑nyɩ?»

⁷ 'Ɔnya ‑gbala 'üün ‑maa: «'Ia 'taɩn a jejrekʋ 'nyɩ 'amɩ ‑gba ‑a kälä; Tʋa 'doo ‑tʋ 'lɩ 'taɩnlɩ.

⁸ ‑Maa 'Nyüna ‑Susu nya 'amɩ ‑gälɩ 'cerea, 'kä 'unya 'amɩ 'klü ‑nyɩ, ‑bɛ wiili käläa' 'mɩ ‑gba, i 'a 'jäa' nɩ, 'amä 'iin 'lɩsa Jerusalɛɛmë; sɔ bɩa Judee nyra Samariia ‑tʋtʋa 'fɩɔ ‑gälɩ, ‑a ‑tɔɔ ‑tʋtʋa blöröfa 'wʋ.»

Jesu 'jraaa' cɛ 'lɩ

⁹ 'Ɔ bɩaa' wii 'papakʋ nɩ, 'ü tɛ 'ɔɔn 'klɩ, 'ɔnya 'jrara cɛa 'mlɩ. Cɛ 'lɩa ‑gbru nya ‑sisie 'ɔmɩ, 'ü ‑kanyɩ 'jä 'ɔɔn 'wʋ ‑a.

¹⁰ 'Ɔ mö ‑bɛ 'ü tɛ cɛ 'lɩ tee. 'Ümä 'saa nʋkalɩ mi nɩ, nyüü 'sɔɔ 'tɔrɔ 'üa ‑gba. 'Ü pa 'tasɩrɩa 'pɔlɔ dii 'lɩ.

¹¹ 'Ünya ‑gbala nyüülü tɛ ɩa' cɛ 'lɩ: «Galileenyüü, dɛplɛɛ kä ‑gʋ 'a kʋ ‑plɩɩ ‑bɛ 'a ‑pʋpɔ cɛ 'lɩ le? Jesulɔ Nyɔsʋa 'baa' 'ana ‑tɔrʋpɩɔ ɔ mia' cɛ 'lɩ nɩ, 'sɩrɩ 'a 'jäa' 'ɔɔn ‑bɛ 'ɔ 'jraa' cɛ 'lɩ nɩ, 'asɩ 'ɔmä dɛrɩblöö.»

'Wʋnyɛrɛnyüülü 'blööa' Jerusalɛɛmë dɛrɩ

¹² 'Ünya 'cie 'dʋgbalä 'ü 'daraa' Oliivëa ‑gälɩ, 'ünya 'blöö Jerusalɛɛmë dɛrɩ. 'Dʋgbalä 'nyɩ 'lɩdɛrɩ ‑a tʋŋlɔ; 'i 'mrɛɛ i jrä kilomɛtrë 'dee.

¹³ 'Ü jia' nɩ 'ünya 'jra ‑gälɩkɔklɔnyëkaa 'klöölä kä ‑wälɩ 'ü kʋ ɩa'. ‑Jää nyüülü bä käa' 'lɩ: Piɛɛrë, Jaan, Jaakë, nyra Andree, Filipë, Tomaa, Batëlemii, Matiö, Alëfeea 'jʋ Jaakë, nyra Simɔɔlɔ 'ü 'daraa' bɩa Selɔtë, nyra Jaakëa 'jʋ Judaa.

¹⁴ 'Üa 'fɩɔ ma bibie Nyɔsʋa ‑pɩɔ 'doo 'wʋ, 'üü ‑bɛ 'ŋlëgë, nyra Jesua 'yio Marii, nyra Jesua ‑wlajü.

'Ü 'baa' 'lɩ Matiasë 'ɔmä ‑pʋ ‑bɛ 'sɔɔa nɔ apotrë bä

¹⁵ 'Ia jrüülüa 'mlɩ nɩ, nyüülü traraa' jrä nyüüa ‑glʋɩ ‑uundoo (120). Piɛɛrë nya sɔwʋ 'wʋnyɛrɛnyüüa ‑glʋɩ ‑uundoolüa ‑tɔrʋpɩɔ, 'ɔnya ‑gbala 'üün:

¹⁶ «'Na ‑wlajü 'amɩ, wiili ‑jɩjraa' nyɔsʋapɔɔkʋ 'lɩ kä ɩ 'imä nrörö: 'Nyüna ‑Susu 'tuto Daviidë 'ɔnya tɩ ‑srɩ dɛrɩ, 'ɔnya 'pa Judaa ‑gä, 'sɩrɩ ɔ sraraa' nyüü Jesua ‑pɩɔ ‑bɛ 'ü 'nyüglöa' 'ɔɔn.

¹⁷ Judaalɔ ma bä ana ‑tɔrʋpɩɔa nyɔɔ, anya ‑fɛɛɛrɛ bɩa 'jrʋpa 'wʋ.

¹⁸ Nyɔɔlɔ nɩ, möliili 'ü 'pɛɛa' 'ɔɔn 'ɔa bʋbɔgbia ‑gʋ nɩ, 'ii 'ɔ nʋ 'ɔnya ‑su putu. 'Ɔ toro 'wli ‑fli 'ɔnya blö, 'ɔa ‑gu nya ‑gaalalɩ 'ɔa 'mia 'fɩɔ nya 'cie.

¹⁹ Jerusalɛɛmëa nyüüa 'fɩɔ 'nu 'iin 'wli, 'a 'ia ‑gʋ 'ü 'dara putulu ‹Akɛlëdama›, 'ia ‑gbaaa' bä: ‹‑Toru Putu›.

²⁰ 'I ‑jɩjra 'Lɩbrɛrɛpɔɔkʋa ‑pɔɔkʋ 'lɩ: Dɛɛ 'nyɩ bä 'ɔa nyukua ‑wälɩ, nyɔɔ ‑kanyɩ kʋ 'lɩ ! ‑Bɛ 'sɔɔwʋ nɩ: Abɩa nyɔɔ ‑moloo dɔrɔ 'ɔa 'jrʋpa 'wʋ !

²¹ 'Ii känyrɩ, nyüülü falaa' amɩ 'taɩn 'lɩ kä 'fɩɔ a nyra 'Pläkänyɔɔ Jesu ‑sia' nɩ,

²² 'bala 'taɩn 'lɩ kä 'mlɩ Jaan 'paa' 'ɔɔn 'nɩwli ‑a ji jrüülü kä 'mlɩ 'ü 'baa' 'ɔɔn ana ‑tɔrʋpɩɔ, amä 'ia nyüülüa ‑tɔrʋpɩɔa 'doo 'ba 'ɔmä amɩ ‑gälɩ blö amä 'lɩsa 'sɩrɩ Jesu sɔa' 'kuaabre.»

²³ 'Ünya srara nyüü 'sɔɔ: Matiasë nyra Josɛɛfë, ɔ 'ü 'daraa' Basabasë; 'ü 'dara bɩa 'ɔɔn Jusëtusë.

²⁴ 'Ünya bibie Nyɔsʋa, 'ü ‑nëma: «'Pläkänyɔɔ, ‑mɔ jrea' nyüüa 'fɩɔa polu, srara amɩ ‑mɔlɔ ‑baaa' 'lɩ 'üa 'sɔɔa ‑tɔrʋpɩɔ,

²⁵ ɔmäa' apotrë 'jrʋpa 'wʋdɔrɔ, 'jrʋpalä Judaa tɩa' ‑plɩɩ ‑bɛ 'ɔ mia' ‑plɩɩlɩ käa' 'ɔɔn tʋ.»

²⁶ 'Ünya 'pa ‑tɔɔo, 'inya blö Matiasë ‑gälɩ. 'Ünya bɩa apotrë ‑pʋ ‑bɛ 'doolü 'wli.