2 Piɛɛrë 2 - Kuö Dëdrä Jenɛɛsë Rutë

‑Gbagblɛ nyɔsʋaamlɩpalanyüü

¹ 'Be ‑kätɩsa nɩ, ‑gbagblɛ nyɔsʋaamlɩpalanyüü 'cie nyüüa ‑tɔrʋpɩɔ, 'asɩ ‑gbagblɛ 'kpɩkpɩanyüü 'mä bɩa 'ana ‑tɔrʋpɩɔ bä. ‑Gbagblɛwii 'ümä 'amɩ 'kpɩa, 'ümä ‑gʋ 'amɩ 'käkpa. 'Ünya 'iin nʋ nʋ 'kä 'ünya 'daa 'ünyɩ 'nɩmɩ 'cifilɔ ‑sua' 'üün ‑a jre. 'Asɩ 'ü were 'üa nyüfë ‑sʋɩ 'wʋ sɔsɔ.

² Nyüü 'kɔkɔmlɛ nya 'üün dɛrɩprɛa 'üa bʋbɔgbilia 'mlɩ, 'üa ‑gʋ 'kä nyüü ‑ka ‑nëmä 'cɩcasaa 'nyʋfɔ wii ‑a 'dara.

³ Dɛɛnyü nyra ‑gbagblɛwii 'ümä nʋ 'ümä 'amɩ ‑trɔɔrɔ. ‑Mää ‑mlatɩkä 'üa ‑gä 'nyɩ ‑träärä, 'üa ‑gbogblookʋ 'nyɩ 'nyüglö ‑a 'nyüglö.

Nyɔsʋa jre 'sɩrɩ 'ɔmäa' nyüülü bäa' 'ɔɔn dɛrɩ 'pʋɔ

⁴ 'A jre 'iin 'sɩrɩ, Nyɔsʋa 'nyɩa' 'aanjëlü nʋa' ‑balʋ 'klɩ ‑a bere, ‑maa 'ɔ be 'üün 'lɩtʋŋlɔbütügbaa 'mlɩ, 'ü 'pala 'cɩ 'jöjrüükpü 'lɩ; 'üa ‑gätʋtaɩn 'ü ‑glaaa.

⁵ Nyɔsʋa 'nyɩ bɩa ‑kätɩ 'plälä nʋa' ‑balʋa nyatɛrɩ ‑a 'jä. 'Ɔ ja 'nʋŋlʋ kpaku 'unya dara 'üün dara ‑tʋtʋa nya 'si 'nɩ 'klɩ. ‑Maa 'ɔ 'balɩ Noe mlɩ; 'cɩcasaa 'lɩsanyɔɔ, 'ɔɔ bä ‑uuntääa nyɔɔlɔ Nyɔsʋa 'baa' 'lɩmlɩ nyra 'ɔa ‑gböölia nyüü ‑uunsɔɔ ‑mölöö.

⁶ Nyɔsʋa nya ja kapu 'ɔnya nrörö Sodɔɔmëbätä nyra Gomɔɔrëbätä 'pʋpʋ 'lɩ. 'Asɩ nyüülü 'nyɩ ‑trääräa' 'lɩ Nyɔsʋaa ni 'mä bɩa bä, 'ümä wiili 'mäa' 'üün ‑gälɩjrä jre.

⁷ 'Ɔnya 'balɩ 'klɩgänyɔɔlɔ 'ü 'daraa' Lɔɔtë mlɩ; nyɔɔlɔ nɩ, bätëlëa 'mlɩa nyüüa ‑balʋgbi ma kä 'ɔɔn 'nyüsü 'wʋ.

⁸ 'Be 'üa ‑tɔrʋpɩɔ 'klɩgänyɔɔlɔ ma kʋ, ‑srɩ o ‑srɩ 'ɔ ma 'jää ‑bɛ 'ɔ ma 'nöö 'üa nʋnʋgbili 'nyɩ ‑trääräa' 'lɩ ‑dɔ; 'i ma 'yagba 'ɔa 'klɩgä ‑gälɩa ‑susu.

⁹ 'Ia 'fɩɔlʋ 'ii srara 'sɩrɩ 'Pläkänyɔɔ jrea' 'sɩrɩ 'ɔmäa' 'klɩgänyüü ‑sʋɩ 'lɩba, ‑bɛ 'sɩrɩ 'ɔmäa' nyüülü 'nyɩa' 'klɩgä ‑wälɩtʋ ‑bɛ 'üa ‑gätʋtaɩn 'mäa' 'wlijrä.

¹⁰ Nyɔsʋa nya nyüülü 'nyɛrɛa' bʋbɔdiili 'üa fugba 'bataa' 'pɔnɩa. 'Ia nyüülüa plɛ 'sosowʋ ‑frepadiia ‑gʋ, 'üa ‑gbʋʋ 'nyɩ 'kamakʋ ‑gba ‑a bä. 'Ü toro 'üa nyüfë plɛ ‑gböösa; 'ü bɔtɔ ‑tɔklʋ ‑bɛ 'ü ‑jejre 'wliklɩbʋa ‑sisili bäa' cɛa 'mlɩ.

‑Gbagblɛ 'kpɩkpɩanyüü

¹¹ ‑Bɛ 'aanjëlü käa' 'klü ü ‑sia' 'üün 'wʋ nɩ, 'ünyɩ ‑jejre 'wliklɩbʋasisi ‑a Nyɔsʋaa 'klɩ.

¹² ‑Maa nyüülü nö dii ‑beere 'klʋɛɛa mlaa, 'ünyɩ bobo bobo ‑a. 'Ü kʋ ‑plɩɩ 'kplakplakʋ nyra 'blablakʋa ‑gʋ. 'Be dɛɛlɛ 'ünyɩa' jre 'ɛɛ 'ü ‑jejre; ü kʋa' ‑plɩɩ sakakʋa ‑gʋ, nya sakaa.

¹³ ‑Balʋlʋ 'ü nʋa', 'ünya 'ua 'pɛɛ 'wʋdɔrɔa. 'I kä 'ümɩ 'tʋ 'ümä bʋbɔ wiili 'üa plɛ 'bataa' ‑srɩ 'klɩ nrörö. 'Ü bä 'ana ‑gbaa 'kpafë, 'ü pla 'amɩ ‑fre 'a nyra 'üün ma tara 'wʋ; nyüüa ‑trɔɔrɔkʋ kä 'ümɩ dɔrʋ 'wʋ.

¹⁴ Bätësaa 'dooa wii 'ü bobo, ‑balʋa nʋnʋkʋa 'doo bä 'üa plɛ 'klɩ. 'Ü 'kʋɛɛrɛ ü 'fʋmaa' 'üa nyüfë ‑gba, 'üa polu 'si dɛɛnyükäkäkʋ 'klɩ. Nyɔsʋaa busukʋ bä 'üün ‑gälɩ.

¹⁵ 'Ü sɔ 'cɩca 'nyʋfɔ 'wʋ 'ünya 'mɔlɔ. Bɔsɔrëa 'jʋlɔ 'ü 'daraa' Balaamë, 'ü 'pɛɛa' ‑balʋa nʋnʋkʋa ‑gʋ nɩ, 'ɔɔ 'ü prɛdɛrɩ.

¹⁶ ‑Maa 'ɔnya 'dara 'ɔa ‑balʋa ‑gʋ: ‑sʋbre 'nyɩ 'paa' wii nɩ, 'ɛnya 'pa nyɔɔa mlɩa wii 'ɛnya 'pala 'ɔɔn wii ‑gba; 'ɛnya ‑gbala nyɔsʋaamlɩpalanyɔɔlɔ ɔ 'nyüglö 'ɔa dɛɛgbagbili 'ɔ 'bata ɩa' 'ɔmäa' nʋ.

¹⁷ 'Üülü nɩ, ü ‑beere 'sɩrɩ 'nie maa', 'sɩrɩ ‑fʋflʋ faa' ‑gbru. Nyɔsʋa tɛrɛ 'üün kʋfa i kä 'fɩɔ 'kpöröa'; 'ii 'ümä kʋ 'plɔʋplɔʋ.

¹⁸ 'Be 'fëflɛwiia 'kpɔ 'ü 'saalɩ. Bʋbɔgbili käa' plɛ 'tʋ nyra ‑sagbili käa' 'nyüsü 'üü ‑srörö kälɩ ‑bɛ 'ü 'kʋɛɛ ‑mülü ‑ka 'wʋ ɩa' ɩ 'lɩmlɩ ü sɔa' ‑mülü 'nyɛrɛa' ‑gbagblɛ 'lɩa ‑tɔrʋpɩɔ.

¹⁹ 'Ü ‑gbala 'üün ‑maa 'ü ‑kanyɩ ‑balʋa ‑goou ‑a bä, ‑bɛ 'üa 'mʋgbɛ bä 'üa plɛklɩa wiili bʋblɔa' 'üün, 'ia ‑goou. 'Be nyɔɔ o nyɔɔ bä dɛɛlɛ 'ɔ ‑waa' ‑gböösa, 'ɛa ‑geei.

²⁰ ‑Maa ‑mülü jrea' 'Pläkänyɔɔ 'Lɩmlɩbanyɔɔ Jesu 'Kriisë nɩ, 'üma 'cɛrɛ 'pläa ‑fre ‑wälɩ, ‑bɛ üma 'cɛrɛ 'sɔɔwʋ 'ia diili ‑wälɩ 'ima kʋ 'üün ‑gälɩ nɩ, 'üa 'klä nya bʋbɔa ‑gböösa 'kä 'inya 'üa ‑kätɩdɛɛ 'wʋsi.

²¹ 'Be 'i 'na ɩ 'nɩmɩ 'kä 'ünyɩ jre 'nyʋfɔlʋ ‑gäa' 'klɩ; ‑maa jre 'uun ‑bɛ ‑a ‑sɔ 'nyünawiili ‑kpɩaa' dɛrɩ nɩ, 'i bʋbɔ.

²² ‑Maa wiili jräa' 'üün ‑gälɩ nɩ, 'a wiili 'cɩca tapönänë ‑gbaa': «‑Fɛ 'a 'ɛa ‑wɔsɔdii ‑gälɩ dɛrɩ 'blöö», ‑bɛ «'Ü bɩaa' 'ään ‑futokʋ 'nɩ, 'bösarä nya 'blöö paplua 'mlɩ dɛrɩ.»