1 Timotee 6 - Kuö Dëdrä Jenɛɛsë Rutë

‑Goou

¹ Nyüülü kä 'fɩɔ bäa' ‑goou kä 'ümä 'lɩ 'üa 'kamanyüü ‑träärä ‑gböösa, nyɔɔ ‑pɩ Nyɔsʋaa 'nyrɩ nyra ana 'kpɩkpɩakʋa ‑gʋ bʋbɔwii 'pa.

² ‑Bɛ ‑mülü kä 'kamanyüü toroa' nyɔsʋaplɛ nɩ, 'ünyɩ 'daa 'be ‑wlajü 'ü bä nɩ, 'ii känyrɩ 'ü ‑nëmä 'saa 'üün nyɔɔ 'wʋ ‑a 'ba. 'Üü 'ü nëmä ɩ nyɔɔ 'wʋ 'ba ‑gböösa, 'be nyɔsʋaplɛtoronyüü nyra Nyɔsʋaa ‑wawanyüü 'ü bä, ‑bɛ 'ana 'kamanyüülü nɩ, 'ü 'järä ‑gooua 'jrʋpalä 'ü ‑fɛɛɛa' a 'mlɩ. ‑Jää wiili ‑käa' ‑mäa' 'kpɩa ‑bɛ ‑mäa' nyüü ‑gbala ü nʋa':

'Bɩɔ kpaku bä Nyɔsʋaa 'lɩträäräkʋ

³ Nyɔɔ ma 'kpɩa nyüü ‑pasawii, ɔma tɩ ‑plɩɩ ana 'Pläkänyɔɔ Jesu 'Kriisëa 'cɩcawii, ‑bɛ wiili 'ɔ 'kpɩaa' nyra Nyɔsʋaa 'lɩträäräkʋ ma 'nyɩ dɛɛ 'dee ‑a bä nɩ,

⁴ 'ɔnyɩ dɛɛ ‑a jre, 'lɩ 'ɔ ‑gbaaa. Waklüüa ‑gälɩ ‑toplokʋa ‑wusu 'blaa 'ɔmɩ. 'A 'i ja diia 'tʋ, 'blarʋ, ‑jejrekʋ nyra nyɔɔ ‑molooa bʋbɔwiia bobokʋ,

⁵ nyra nyüülü kä bobowli toroa' 'lɩgälɩ, ü ‑topoa' 'fëflɛsa. 'Ü ‑kanyɩ 'cɩcasa ‑a jre, 'ü 'jää nyɔsʋaplɛtorokʋ ‑beere dɛɛ 'ümäa' kälɩ ‑srörö 'ümäa' 'bɩɔ ji, ‑nyra 'ia nyüülü 'nɩ 'nyɛ.

⁶ 'Kasa, Nyɔsʋaa 'lɩträäräkʋ bä 'bɩɔ kpaku nyɔɔa ‑gʋ, 'ɔma mala dɛɛlɛ 'ɔ 'klaaa' 'wʋ.

⁷ 'Be anyɩ dɛɛ 'plä 'wʋ ‑a ja, ‑bɛ 'kasa a ‑nëma dɛɛ ‑a fa.

⁸ ‑Maa ama ‑ka 'klaa jijri nyra 'koti nɩ, i bɩa amɩ mlɩ.

⁹ Nyüülü 'bataa' 'bɩɔjijikʋ 'nyɩ 'lɩ ‑balʋ dɛrɩ ‑a tʋŋlɔ, 'ü böblö ‑gbasu mlɩ: mlüüdii 'kɔkɔmlɛ nyra bʋbɔdiia 'tʋ 'tutro nyüü bʋblɔkʋ nyra 'mɔlɔkʋ 'lɩ.

¹⁰ 'Be möliia ‑wawakʋ, 'iibä mɩmɩakʋa 'kaɩn 'kaɩn a 'käkolofa. 'Ia ‑gʋ ‑mölöö 'cɛrɛ 'üa nyɔsʋaplɛtorokʋ ‑wälɩ, ‑sʋɩ 'kɔkɔmlɛ nya jrä 'üün ‑gälɩ.

‑Gälɩblörö ‑tɔɔɔ

¹¹ ‑Maa ‑mɔ bäa' Nyɔsʋaa nyɔɔ nɩ, fɔlɔ 'ia 'fɩɔlʋ 'klɩ. 'Bata ‑gböösa 'klɩgägäkʋ, Nyɔsʋaa 'lɩträäräkʋ, nyɔsʋaplɛtorokʋ, ‑wawakʋ, plɛböblökʋ nyra plɛpɩpɛ.

¹² ‑Fu 'cɩca ‑golulu bäa' nyɔsʋaplɛtorokʋ; 'kpla ‑gböösa 'klälä 'nyɩa' blöröfa kä. 'A 'kläläa ‑gʋ 'ɔ we ‑mɩ. ‑Nya 'nyiere kä Jesu 'klɩ nyüü 'kɔkɔmlɛa 'klʋɩ.

¹³ ‑Mɔ 'n ‑gbala Nyɔsʋaa 'klɩ, Nyɔsʋalɔ bäa' diia 'fɩɔa ‑fʋflʋa 'käkolofa, nyra Jesu 'Kriisëa 'klɩ, Jesulɔ 'palaa' Pɔɔsë Pilatëa 'klɩ 'cɩcasa.

¹⁴ ‑Träärälɩ wiili Nyɔsʋa ‑gbalaa' ‑mɩ. ‑Nyɩ blö ‑fre 'lɩ, nyɔɔ 'nyɩ 'kplara ‑mɩ wii 'kä ana 'Pläkänyɔɔ Jesu 'Kriisë jö.

¹⁵ Nyɔsʋa nya 'ɔɔn jaa 'ɔa jrüülü 'ɔ ‑tʋa' 'lɩ ma jrälɩ. 'Ɔɔ bä 'tasɩrɩa dɔrʋ, 'ɔa 'doo 'ɔɔ bä 'Bɩɔ, 'ɔɔ bä 'Kɩɩɩa 'kɩɩ, 'Pläkänyüüa 'Pläkänyɔɔ.

¹⁶ 'Ɔa 'doo 'ɔɔ 'nyɩ jä. Anyɩ 'lɩ ‑a bɩa amä 'napɛlɛ kä 'mlɩ 'ɔ kʋa' ‑gbajijrö. Nyɔɔ ‑kaapɩɔ 'ɔɔn 'jä, nyɔɔ 'nyɩ 'lɩ ‑a bɩa ɔ 'jä 'ɔɔn. 'Ɔɔ kä 'bʋalakʋ nyra 'klü 'plɔʋplɔʋa ‑gʋ! 'Asɩ i bä.

¹⁷ ‑Gbala 'bɩɔjinyüülü bäa' ‑taa 'plälä kʋa' ‑pɩa 'mlɩ nɩ, 'ünyɩ ‑gbalɩ; 'ünyɩ 'pie 'üa plɛ ‑taa 'bɩɔlʋ kʋa' ‑pɩ unyɩ ‑wlɛa' 'lɩ ‑gälɩ. ‑Gbala 'üün ü 'pie 'üa plɛ 'Lɩbä Nyɔsʋa ‑gälɩ, 'ɔɔ ‑nyɛɛ amɩ diia 'fɩɔ, 'kä 'ɔ ‑sööö 'lɩ ‑gba dɔrʋ 'mä amɩ 'bla.

¹⁸ ‑Gbala 'üün ü nʋ 'mʋfagbi, ü kä 'cɩcagbi 'kɔkɔmlɛ, abɩa 'üa ‑gbi 'na, 'kä 'ü jö ‑mölöö ‑gba.

¹⁹ Üma nʋ 'imɩ nɩ, 'ünya 'cɩca 'bɩɔ ‑gbapaplaa, u 'surua' ‑sraakäpɩa ‑gʋ ‑bɛ 'ümä 'klälä 'nyɩa' blöröfa kä 'jä.

'Täpa 'trɔrʋ

²⁰ ‑Wlajʋ Timotee, 'kpla 'mʋfasa wiili a ‑nyɩa' ‑mɩ kälɩ. ‑Gaalalɩ dɛtʋlʋ 'nyɩa' 'wli nyra ‑toko kä ‑gälɩ, 'kä ‑gaalalɩ ‑gbagblɛ ‑srɛsrɛkʋlʋ 'nyɩa' ‑gbaakä ‑gälɩ.

²¹ ‑Mölöö nɩnɩa 'ü jre ‑taa wiili, 'ünya 'wʋ nyɔsʋaanyʋfɔ 'wʋ. 'Abɩa Nyɔsʋaa ‑gbinanakʋ bä ‑mɩ ‑gälɩ. 'Asɩ i bä.