1 Piɛɛrë 2 - Kuö Dëdrä Jenɛɛsë Rutë

¹ 'Ii känyrɩ, 'ba cɛrɛ plɛbʋbɔkʋ nyra yrʋa 'fɩɔ ‑wälɩ, ‑gbagblɛ, ‑glagälɩsrörökʋ, dɛɛnyükäkäkʋ nyra nyüüsrörökʋ.

² Nyɔsʋaawii 'iibä 'cɩca nyɩtɩnɩ, 'ba 'bata 'iin ‑beere 'sɩrɩ 'jüplü 'bataa' nyɩtɩnɩ 'amä 'bʋa ‑bɛ 'amä 'lɩmlɩwʋ,

³ 'be 'anya 'Pläkänyɔɔa 'nanakʋ 'jä.

⁴ 'Ba jijrö 'Pläkänyɔɔ ‑gba 'ɔɔ bä 'lɩbä 'täkälä nyüü bea' 'klʋɛɛ. ‑Maa Nyɔsʋa 'ba 'ɔɔn 'lɩ 'ɔnya kä 'peru Nyɔsʋaa 'klɔɔtrʋ.

⁵ 'Ana 'mʋgbɛ 'ba ‑beere 'lɩbä 'täkë. 'Ba 'cɛrɛ Nyɔsʋa ‑wälɩ 'ɔmä 'amɩ nʋ 'ɔmä 'Nyüna ‑Susua nyuku 'pa. ‑Gbɔsapɛrɛnyüülü 'ü berea' 'klɩ Nyɔsʋaa 'jrʋpaa ‑gʋ, 'üü 'a nëmä bä, 'kä 'anya ‑gbɔɩɩlɩ Nyɔsʋaa ‑Susu 'bataa' 'sa; 'be Nyɔsʋa nya 'iin 'lɩ 'kʋɛɛ Jesu 'Kriisëa ‑gʋ.

⁶ 'A 'ia ‑gʋ 'i ‑jɩjra nyɔsʋapɔɔkʋ 'lɩ: 'Amɔ 'n ‑gbala! 'N 'sri Siɔɔnbätä nyukua ‑tokoa 'täkä 'kä, 'täkälä 'n 'baa' 'lɩ ‑bɛ ä käa' 'peru kpaku. 'Nyüsü ‑nëmä nyɔɔlɔ toroa' 'ään plɛ ‑a 'bla .

⁷ 'Amɔlɔ toroa' Nyɔsʋa plɛ nɩ, 'täkälä kä 'peru kpaku 'ana 'nyü ‑gälɩ; ‑maa ‑mülü 'nyɩa' plɛtorokʋ kä nɩ; 'Täkälä nyëkapanyüü be käa' 'klʋɛɛ, 'ää nʋ 'tasɩrɩ nyukua ‑gɔmʋʋ .

⁸ 'Änya bä: Nyüükäkpatäkä, 'änya bä 'täkä kpakölä 'kpakpaa' nyüü 'kä . 'Ünyɩ 'lɩ nyɔsʋaawii ‑a ‑träärä 'a 'ia ‑gʋ 'ü böblö; Nyɔsʋa 'ɔɔ ‑tʋ 'lɩ 'imɩ.

⁹ ‑Maa 'amɔlɔ nɩ, Nyɔsʋaa 'lɩba ‑glügbö 'a bä. 'Kɩɩa 'pɛrɩnyüü 'a bä, ‑tʋtʋ ‑gälɩa ‑glügbölä kä 'nyü 'naa', nyüülü bäa' Nyɔsʋaa nyüü. 'Ɔ 'balɩ 'amɩ 'mʋfa diili 'ɔ nʋa' nɩ, 'amä 'ia ‑gogo 'sa. 'Ɔɔ 'ba 'amɩ 'jöjrüükpü 'lɩ 'ɔnya were 'amɩ 'ɔa 'cɩca 'napɛ 'lɩ.

¹⁰ 'A ma 'nyɩ kä Nyɔsʋaa nyüü ‑a bä, ‑maa 'anya 'a 'saarɩ Nyɔsʋaa nyüü nʋ. Nyɔsʋa ma 'nyɩ 'ana nyatɛrɩ ‑a kä, ‑maa 'ɔ kä 'saarɩ 'ana nyatɛrɩ.

Nyɔsʋa nyra 'kamanyüüa 'lɩträäräkʋ

¹¹ 'Na ‑wawanyüü 'amɩ, 'amɔ bäa' nyɔtugbanyüü ‑taa ‑tʋtʋlʋa ‑gälɩ jrüü jiea ‑gʋ, 'n bibie 'amɩ, 'ba 'cɛrɛ bʋbɔgbili 'a 'bataa' ‑wälɩ; 'ii nyra 'ana ‑susu ‑fuuö tou.

¹² 'Ba kä 'cɩcagbi nyüülü 'nyɩa' Nyɔsʋa jrea ‑tɔrʋpɩɔ. 'Ama nʋ 'saa nɩ, ‑gbʋgblʋʋkänyüüa 'nyrɩ 'lɩ 'ümäa' 'amɩ ‑gälɩ ‑tʋ, üma 'jä 'ana 'cɩcagbi nɩ, 'ünya Nyɔsʋaa 'nyrɩ 'bʋalaa ‑srɩlɩ kä 'mlɩ 'ɔmäa' 'üa 'kläa 'mlɩ ji.

¹³ 'Ba ‑träärälɩ wiili kä 'fɩɔ bätänyɔɔ ‑tʋa' 'lɩ, 'Pläkänyɔɔa ‑gʋ: 'ba ‑träärälɩ 'kɩɩlɔ 'kamaa' 'ana 'fɩɔ,

¹⁴ ‑bakää 'inyɩ bä 'kamanyüülü 'kɩɩ blɔa', ü jia' ‑balʋnyüü 'pɔnɩ, ‑bɛ 'ümäa' ‑mülü nöa' 'cɩcagbi 'kɔlɔ nɩ, 'ba ‑träärälɩ 'üün.

¹⁵ 'Be wiili Nyɔsʋa 'bataa' nɩ, 'iibä 'ba nʋ 'cɩcagbi 'amä mlüünyüülü 'nyɩa' dɛɛ jrea 'më kala.

¹⁶ 'Ba 'nyɛ 'sɩrɩ 'anyɩa' dɛɛa ‑geei bä, ‑maa 'anyɩ ‑srörö 'iin kälɩ ‑bɛ 'anyɩ ‑sisie 'ana bʋbɔgbi 'a nöa', ‑maa abɩa 'ana nʋnʋgbi srara 'sɩrɩ 'a bäa' Nyɔsʋaa 'jrʋpafɛnyüü.

¹⁷ 'Ba ‑träärälɩ bätënyüüa 'fɩɔ, 'ba ‑wa 'ana ‑wlajülü toroa' Nyɔsʋa plɛ, 'ba pɩ Nyɔsʋa, 'kä 'a 'bʋala 'kɩɩ.

¹⁸ ‑Goou 'amɩ, 'ba ‑träärälɩ 'ana 'kamanyüü. 'Ba pɩ 'üün ‑gböösa; ‑mää ‑mülü kä ‑gbi 'naa' ‑bɛ 'ünyɩ 'paawiia 'doo 'a ‑nëmä 'lɩträärä, a kä 'amä bɩa 'lɩ ü 'klaa' 'lɩträärä.

¹⁹ 'Be nyɔɔ ma 'jä ‑gbagblɛsa ‑sʋɩ, ‑bɛ 'ɔma ‑gbötö 'ɛmɩ Nyɔsʋaa 'lɩträäräkʋa ‑gʋ nɩ, 'inyɩ bʋbɔ ‑a bʋbɔ.

²⁰ 'Ama nʋ ‑balʋ, ‑bɛ üma ‑gba 'amɩ dii ‑gälɩ nɩ, 'bʋalakʋ 'plɛɛ bä 'ia 'mlɩ le? ‑Maa üma 'järä 'amɩ ‑sʋɩ 'lɩ 'ana 'cɩcagbia ‑gʋ nɩ, 'i 'na Nyɔsʋaa 'klɩ.

²¹ 'A 'ii 'lɩ Nyɔsʋa were 'amɩ, 'be 'Kriisëa 'mʋgbɛ 'jä ‑sʋɩ ana ‑gʋ, 'klɩpaplawii 'ɔ srara 'amɩ, 'amä 'ɔa 'sa nʋ.

²² 'Ɔnyɩ ‑balʋa dɩjɔ 'doo ‑a nʋ, ‑gbagblɛ ‑kaapɩɔ 'ɔa mlɩ 'cie .

²³ 'Ɔɔ 'ü ‑jejreea', 'ɔnyɩ nyɔɔ ‑a ‑jre; 'ɔ 'jääa' ‑sʋɩ nɩ, 'ɔnyɩ nyɔɔ 'crɛ ‑gba ‑a ‑träärä, ‑maa Nyɔsʋalɔ ‑tʋʋäa' ‑gä 'klɩgäsa nɩ, 'ɔɔ ‑nyɩ 'iin kälɩ.

²⁴ 'Ɔa 'mʋgbɛ dɔrɔ ana ‑balʋ 'wʋ 'ɔnya ‑gbötö 'uun 'ɔa 'jajɛ 'lɩ krʋa ‑gälɩ, 'kä ‑balʋa ‑gʋ nɩ, amä ‑beere jäjänyüü, ‑bɛ 'klɩgägäkʋa ‑gʋ nɩ, amä 'lɩbänyüü bä. 'A 'ɔa ‑gbaa 'lɩgaglakʋ 'lɩ 'a 'pʋɔlɔ.

²⁵ 'Be 'a ma ‑beere ‑bablëëjü, ‑piiea' 'lɩklɩ, ‑maa 'köklesaplɩɩ ɔ nɩ 'anya 'a ‑bablëëgbanyɛrɛnyɔɔa ‑nyɛɛ dɛrɩ 'blöö, 'ɔɔ ‑glaara 'ana ‑gälɩa ‑sisi ‑gälɩ.