1 Jaan 5 - Kuö Dëdrä Jenɛɛsë Rutë

Jesua plɛtorokʋ

¹ Nyɔɔ o nyɔɔ jrea' 'saa Jesu bä 'Kriisë nɩ, Nyɔsʋaa 'jʋ 'ɔ bä. Nyɔɔ o nyɔɔ ‑waaa' Tʋ nɩ, 'ɔ ‑waaa' bɩa 'ɔa 'Jʋ.

² Ama ‑wa Nyɔsʋa, ‑bɛ ama ‑träärälɩ 'ɔa ‑dɔ nɩ, a jresaa a ‑wa Nyɔsʋaa 'jü.

³ 'Be Nyɔsʋaa ‑wawakʋ bä 'ɔa ‑dɔa 'lɩträäräkʋ. ‑Bɛ 'ɔa ‑dɔ 'nyɩ 'kʋɛɛ ‑a bä.

⁴ Nyɔsʋaa 'jüa 'fɩɔ duö 'plä. ‑Bɛ dɛɛlɛ nöa' 'iin ‑bɛ a duöa' 'plä, 'ɛɛ bä ana nyɔsʋaplɛ.

⁵ Ima 'nyɩ nyɔɔlɔ jrea' 'saa Jesu bä Nyɔsʋaa 'Jʋ ‑a bä, nyɔɔ 'plɛɛ duö 'plä le?

⁶ 'A Jesu 'doolɔ bäa' 'Kriisë, 'ɔɔ jara 'nɩ nyra ‑toru 'lɩ; ‑mää 'nɩa 'doo ‑a, ‑maa 'nɩ nyra ‑toru. Nyɔsʋaa ‑Susu 'uu 'salɩ 'imɩ, ‑bɛ 'u bä 'cɩcasa.

⁷ 'Be 'ü bä tää 'üü 'paa 'ia ‑gä cɛlɩ: Tʋ, Nyɔsʋaa 'Papawii nyra 'Nyüna ‑Susu. 'Üa tää bä 'doo.

⁸ ‑Bɛ tää bä ‑tʋtʋ ‑gälɩ, 'ü 'paa bɩa 'imɩ. 'Üü bä: ‑Susu, 'nɩ, nyra ‑toru, 'üa tää nya bä 'doo.

⁹ A 'dara nyüüamlɩawii wii, ‑maa Nyɔsʋaa wiili 'ɔ 'saaa' 'lɩ i ‑sia' 'wʋ nɩ, 'ii a ‑nëmä wii 'dara? Wiili 'ɔ 'saalɩ: 'ɔa 'Jʋa ‑gä 'ɔ 'salɩ.

¹⁰ Nyɔɔlɔ toroa' Nyɔsʋaa 'Jʋ plɛ nɩ, 'ɔ jre 'iin 'ɔa plɛklɩ 'sɩrɩ 'i bäa' 'cɩcasa. Nyɔɔlɔ 'nyɩ toroa' Nyɔsʋa plɛ nɩ, ‑gbagblɛkänyɔɔ 'ɔ 'dara 'ɔɔn, 'be wiili Nyɔsʋa 'saa' 'lɩ 'ɔa 'Jʋa ‑gʋ, 'ɔnyɩ 'dara 'iin wii ‑a.

¹¹ ‑Jää wiili Nyɔsʋa 'saa' 'lɩ: 'Ɔ ‑nyɩ amɩ 'klälä 'nyɩa' blöröfa kä, ‑bɛ 'klälä nɩ, 'ɔa 'Jʋ 'lɩ 'ä bä.

¹² Nyɔɔlɔ bäa' 'Jʋ 'lɩ, 'ɔ 'klaa 'klä. Nyɔɔlɔ 'nyɩa' Nyɔsʋaa 'jʋ 'lɩbä nɩ, 'ɔnyɩ 'klä ‑a 'klaa.

‑Pɔɔkʋa ‑jraarafa

¹³ 'Amɔlɔ toroa' Nyɔsʋaa 'Jʋa 'nyrɩ plɛ 'amä 'iin jre 'sɩrɩ 'a 'klaaa' 'klälä 'nyɩa' blöröfa kä ‑bɛ 'amä Nyɔsʋaa 'Jʋa 'nyrɩ plɛtoro, 'ia ‑gʋ 'n ‑jɩjra 'amɩ 'wʋ.

¹⁴ Ama ‑sɛ 'ɔmɩ dɛɛ 'sɩrɩ 'ɔ 'bataa' nɩ, 'ɔ po amɩ 'nyakli, ‑jää wiili kä ‑gʋ ana plɛ 'nyɩ ‑taaraa' 'lɩ Nyɔsʋaa 'klɩ.

¹⁵ Ama jresaa dɛɛ a 'betea' 'ɔ po amɩ 'nyakli nɩ, a jre bɩa 'saa dɛɛlɛ a 'betrea' 'ɔmɩ 'lɩ nɩ, a 'klaa 'ɛɛn.

¹⁶ Nyɔɔ ma 'jä 'ɔa ‑wlajʋ ɔma nʋ ‑balʋlʋ ‑nëmäa' 'ɔɔn 'bla nɩ, ɔ bibie 'ɔa 'wlili, ‑bɛ Nyɔsʋa 'mä 'ɔɔn 'klä ‑nyɩ. Nyüülü 'nyɩ nʋa' ‑balʋlʋ 'blaaa', 'üü 'n 'daa. ‑Balʋ 'doo bälɩ, 'u 'blaa, ‑mää 'ua 'wlili 'nyɩ 'daa 'ba bibie.

¹⁷ Nʋnʋgbili kä 'fɩɔ 'nyɩ ‑trääräa' 'lɩ Nyɔsʋa nɩ, 'ia 'fɩɔ bä ‑balʋ. ‑Maa ‑balʋ ‑moloo 'nyɩ 'bla nyɔɔ ‑a.

¹⁸ A jre 'iin, nyɔɔ o nyɔɔ bäa' Nyɔsʋaa 'jʋ nɩ, 'ɔnyɩ nʋ ‑balʋ ‑a, 'be nyɔɔlɔ bäa' Nyɔsʋaa 'jʋ nɩ, 'ɔa nyufa 'ɔ ‑gäälänyiöli Plɛbʋbɔsusu ‑pɩ 'ɔa ‑gbanʋdɛɛ kä.

¹⁹ A jre 'iin 'sɩrɩ a bäa' Nyɔsʋaa 'jü, ‑bɛ a jre bɩa 'iin 'sɩrɩ 'pläa 'fɩɔ bäa' Plɛbʋbɔsusu kälɩ.

²⁰ A jre bɩa 'iin 'sɩrɩ Nyɔsʋaa 'Jʋ jia', 'sɩrɩ 'ɔ ‑nyɩa' amɩ 'lɩgaglakʋ, amä 'cɩca Nyɔsʋa jre. 'Ɔa 'Jʋ Jesu 'Kriisë 'lɩ a bä; 'a 'ia ‑gʋ a bä 'cɩca Nyɔsʋa 'lɩ. 'Ɔɔ bä 'cɩca Nyɔsʋa nyra 'klälä 'nyɩa' blöröfa kä.

²¹ 'Na 'jü amɩ, 'anyɩ toro ‑gbagblɛ nyɔsʋaɩɩ plɛ! 'Asɩ i bä.