1 Jaan 4 - Kuö Dëdrä Jenɛɛsë Rutë

'Cɩcasusu nyra ‑gbagblɛsusu

¹ 'Na ‑wawanyüü 'amɩ, 'a 'nɩ 'pie ‑sisia 'fɩɔ plɛ ‑gälɩ; ‑maa 'ba tɛlɩ 'iin 'amä 'iin 'jä ima bä Nyɔsʋaa ‑susu. ‑Gbagblɛnyüülü 'daraa' 'üa nyüfë nyɔsʋaamlɩpalanyüü, ü jia' 'plälä kʋa' ‑pɩa 'mlɩ, 'ü ‑sümlö.

² ‑Jää 'sɩ 'amäa' Nyɔsʋaa ‑Susu jre: ‑Susulu jrea' 'sa Jesu 'Kriisë ‑srörö nyɔɔ 'lɩ, 'uu bä Nyɔsʋaa ‑Susu.

³ ‑Susulu 'nyɩ 'salɩ 'sɩrɩ Jesu 'Kriisë ‑srörö nyɔɔ 'lɩ nɩ, ‑mää Nyɔsʋaa ‑nyɛɛ 'unyɩ sɔ. ‑Gbagblɛ 'kriisëa ‑susulu kä jijigä 'a 'nua' 'wli ‑bɛ unyaa' 'pläa 'mlɩ ji nɩ, 'uu bäsaa.

⁴ 'Amɔlɔ nɩ, 'na 'jüjie 'amɩ, Nyɔsʋaa nü 'a bä; 'anya 'a ‑gbagblɛnyüülü du, 'be ‑susulu bäa' 'amɩ 'lɩ 'u 'bʋa 'unya ‑si ‑mulu bäa' 'pläa 'mlɩ 'wʋ.

⁵ 'Üülü nɩ, 'pläa nyüü 'ü bä. 'A 'ia ‑gʋ 'ü 'paa 'pläa ‑gä, ‑bɛ 'pläa nyüü po 'üün 'nyakli.

⁶ Amɔlɔ nɩ, Nyɔsʋaa nü a bä. Nyɔɔlɔ jrea' Nyɔsʋa nɩ, 'ɔ po amɩ 'nyakli. Nyɔɔlɔ 'nyɩa' Nyɔsʋaa nɔ bä nɩ, 'ɔnyɩ po amɩ 'nyakli ‑a. 'A ‑plɩɩ a jrere 'cɩcasusu nyra ‑gbagblɛsusu.

Nyɔsʋa srara amɩ ‑wawlakʋ

⁷ 'Na nyüü 'amɩ, a ‑wawla 'be Nyɔsʋa 'ɔɔ ja ‑wawakʋ. Nyɔɔ o nyɔɔ ‑waaa' 'ɔa ‑wlajʋ nɩ, Nyɔsʋaa 'jʋ 'ɔ bä, 'ɔ jre Nyɔsʋa.

⁸ Nyɔɔlɔ 'nyɩ ‑waa' 'ɔa ‑wlajʋ nɩ, 'ɔnyɩ Nyɔsʋa ‑a jre, 'be Nyɔsʋa bä ‑wawakʋ.

⁹ ‑Jää 'sɩ Nyɔsʋa sraraa' amɩ 'sɩrɩ 'ɔ ‑waa' amɩ: 'ɔ ja 'ɔa 'Jʋ 'doo 'doo 'pläa 'mlɩ, amä 'ɔɔn kälɩ ‑srörö amä 'klä 'jä.

¹⁰ ‑Jää dɛɛlɛ bäa' ‑wawakʋ: ‑mää amɔ 'nyɩ Nyɔsʋa ‑wa, ‑maa 'ɔɔ ‑wa amɩ. Ana ‑wawakʋa ‑gʋ nɩ, 'ɔnya 'sa 'ɔa 'Jʋ ana ‑balʋa ‑gʋ ‑bɛ 'ɔa 'crɛ 'mä 'wʋcie.

¹¹ 'Na nyüü 'amɩ, Nyɔsʋa ma nʋ 'saa ɔma ‑wa amɩ nɩ, ana 'mʋgbɛ kä amä 'saa ‑wawla.

¹² Nyɔɔ ‑kaapɩɔ Nyɔsʋa 'jä; ‑maa ama ‑wawla nɩ, Nyɔsʋa bä amɩ 'lɩ, ‑bɛ amɔ 'lɩ 'ɔa ‑wawakʋ jräräwli 'cɩcasa.

¹³ ‑Jää dɛɛlɛ ‑gbalaa' amɩ 'sɩrɩ a bäa' 'ɔɔn 'lɩ ‑bɛ 'ɔ bäa' amɩ 'lɩ: 'ɔ ‑nyɩ amɩ 'ɔa ‑Susu.

¹⁴ Ana 'mʋgbɛlɔ nɩ, anya 'jä 'iin, 'ii a 'saalɩ: Tʋ blɔ 'ɔa 'Jʋ, 'pläa 'lɩmlɩbanyɔɔ.

¹⁵ Nyɔɔlɔ 'saaa' 'lɩ ‑maa: «Jesu bä Nyɔsʋaa 'Jʋ» nɩ, Nyɔsʋa bä 'ɔɔn 'lɩ, 'ɔnya bä Nyɔsʋa 'lɩ.

¹⁶ Amɔlɔ nɩ, a jre ‑wawakʋlʋ Nyɔsʋa ‑waa' amɩ, anya toro 'uun plɛ. Nyɔsʋa bä ‑wawakʋ. Nyɔɔlɔ kʋäa' ‑wawakʋ 'lɩ nɩ, Nyɔsʋa 'lɩ 'ɔ kʋ, ‑bɛ Nyɔsʋa kʋ 'ɔɔn 'lɩ.

¹⁷ 'Ii ‑gbala amɩ 'sɩrɩ amɔ 'lɩ 'ɔa ‑wawakʋ jräräwli, 'be 'sɩrɩ 'ɔ bäa' 'asɩ a bä ‑pɩ ‑tʋtʋ ‑gälɩ, ana plɛ 'mä nyɔnyrɔ ‑gätʋsrɩ 'lɩ.

¹⁸ Ŋalɛ 'nyɩ ‑wawakʋ 'lɩ ‑a bä, ‑maa ‑wawakʋlʋ jräa' 'wli nɩ, 'u prɛ ŋalɛ. Nyɔɔ 'ümäa' 'pɔnɩ, 'ɔɔ ŋalɛ 'blaa'. 'Ii känyrɩ, nyɔɔlɔ ŋalɛ 'blaaa' nɩ, 'ɔa ‑wawakʋ 'nyɩ 'wli ‑a jrä.

¹⁹ Amɔlɔ nɩ, a ‑wa 'ɔɔn, 'be 'ɔɔ ‑kätɩ ‑wa amɩ.

²⁰ Nyɔɔ ma 'daa 'ɔ ‑wa Nyɔsʋa ‑bɛ ɔma jrara 'ɔa ‑wlajʋ 'nyüa 'mlɩ nɩ, ‑gbagblɛnyɔɔ 'ɔ bä. Nyɔɔ 'nyɩa' 'ɔa ‑wlajʋlɔ 'ɔ 'jääa' 'wʋ ‑wa nɩ, ‑asɩ 'ɔnya Nyɔsʋalɔ 'ɔnyɩ 'jääa' 'wʋ ‑wa le?

²¹ ‑Jää 'ɔa ‑dɔlʋ 'ɔ ‑nyɩa' amɩ: nyɔɔlɔ ‑waa' Nyɔsʋa nɩ, 'ɔ kä 'ɔmä bɩa 'ɔa ‑wlajʋ ‑wa.