1 Jaan 3 - Kuö Dëdrä Jenɛɛsë Rutë

¹ 'Ba 'jä 'sɩrɩ Tʋ ‑waa' amɩ: 'ɔ 'dara 'nɩmɩ amɩ 'ɔa 'jü, ‑bɛ 'üü a bä 'kasa! 'A 'ia ‑gʋ 'plä 'nyɩ amɩ jre, 'be 'änyɩ 'ɔɔn jre ‑a jre.

² 'Na ‑wawanyüü 'amɩ, Nyɔsʋaa 'jü a bä ‑mlatɩ, ‑bɛ 'sɩrɩ amäa' ‑srɩɩ bä nɩ, Nyɔsʋa ‑kaaŋlʋ amɩ 'iin srara. ‑Maa wiili a jrea' nɩ, 'taɩn 'lɩ 'ɔmäa' ‑srɩɩ 'ɔa nyufa srara nɩ anya 'ɔa 'sa bäa, 'be 'sɩrɩ 'ɔ bäa', 'asɩ amä 'ɔɔn 'jä.

³ Nyɔɔ o nyɔɔ 'piea' 'iin plɛ ‑gälɩ nɩ, 'ɔa nyufa 'ɔ kpëtä 'sɩrɩ 'Kriisëa 'mʋgbɛa 'nyü 'naa'.

⁴ Nyɔɔ o nyɔɔ nöa' ‑balʋ nɩ, Nyɔsʋaa ‑dɔ 'ɔ 'pɩɛ ‑gälɩ. 'Be ‑balʋa nʋnʋkʋ bä ‑dɔa ‑gälɩpɩpɩkʋ.

⁵ 'A jre 'imɩ 'sɩrɩ Jesu jia' 'lɩ ana ‑balʋ 'ba, ‑bɛ ‑balʋ 'nyɩa' 'ɔɔn 'lɩ bä 'plɔʋ.

⁶ 'Ii känyrɩ, nyɔɔ o nyɔɔ kʋa' 'ɔɔn 'lɩ 'nyɩ nʋ ‑balʋ ‑a. Nyɔɔ o nyɔɔ nöa' ‑balʋ nɩ, 'ɔnyɩ 'ɔɔn 'jä ‑a 'jä, ‑bɛ 'ɔnyɩ 'ɔɔn jre ‑a jre.

⁷ 'Na 'jü 'amɩ, nyɔɔ 'nyɩ 'pa 'amɩ mlüülɩ. Nyɔɔ o nyɔɔ nöa' wiili ‑gäa' 'klɩ nɩ, 'ɔ ‑gäklɩ 'sɩrɩ Jesua 'mʋgbɛ ‑gäa' 'klɩ.

⁸ Nyɔɔ nöa' ‑balʋ nɩ, Sataan a 'jʋ 'ɔ bä, 'be 'bala 'käkolofa 'wʋ Sataan nö ‑balʋ. ‑Bɛ Nyɔsʋaa 'Jʋ ji 'ɔmä Sataan a 'jrʋpa ‑gblooo.

⁹ Nyɔɔ o nyɔɔ bäa' Nyɔsʋaa 'jʋ nɩ, 'ɔnyɩ nʋ ‑balʋ ‑a, 'be Nyɔsʋaa 'pɛ bä 'ɔɔn 'lɩ. 'Ɔ ‑kanyɩ 'lɩ ‑a bɩa ɔ nʋ ‑balʋ, 'be Nyɔsʋaa 'jʋ 'ɔ bä.

¹⁰ ‑Jää 'sɩ 'ü jrea' Nyɔsʋaa 'jü nyra Sataan a 'jü: nyɔɔ o nyɔɔ 'nyɩa' 'klɩgä, 'aiɛ ɔnyɩa' 'ɔa ‑wlajʋ ‑wa nɩ, 'ɔnyɩ Nyɔsʋaa 'jʋ ‑a bä.

A ‑wawla

¹¹ Wiili a ‑gbalaa' 'amɩ, ‑bɛ 'a 'nua' 'wli 'käkolofa 'wʋ nɩ, 'iibä: a kä amä ‑wawla,

¹² a ‑pɩ Kaɛɛn a 'sa bä, ɔ bä käa' Plɛbʋbɔsusua 'jʋ, ‑bɛ 'ɔ 'blaa' 'ɔa ‑wlajʋ. Dɛplɛɛ kä ‑gʋ 'ɔ 'bla 'ɔɔn le? Wiili 'ɔ ma nöa' 'i bʋbɔ, ‑bɛ 'ɔa ‑wlajʋ ma kä 'klɩgägbi.

¹³ 'Na ‑wlajü 'amɩ, 'plä ma jrara 'amɩ 'nyüa 'mlɩ, 'inyɩ kala 'amɩ plɛ 'klɩ.

¹⁴ Amɔlɔ nɩ, a jresaa anya 'a jäjä 'lɩ sɔ, anya 'a 'klä 'lɩ ji, 'be a ‑wa ana ‑wlajü. Nyɔɔlɔ 'nyɩa' 'ɔa ‑wlajʋ ‑wa nɩ, jäjä 'lɩ 'ɔ ‑ka bä.

¹⁵ Nyɔɔ o nyɔɔ jraraa' 'ɔa ‑wlajʋ 'nyüa 'mlɩ nɩ, nyüüblanyɔɔ 'ɔ bä, ‑bɛ 'a jre 'iin 'sɩrɩ nyüüblanyɔɔ 'nyɩa' 'klälä 'nyɩa' blöröfa kä kä.

¹⁶ Amɔlɔ nɩ, a jre dɛɛlɛ bäa' ‑wawakʋ, 'be 'ɔ 'sa 'ɔa 'klä ana ‑gʋ. Ana 'mʋgbɛlü nɩ, a kä amä ana 'klä ‑nyɩ ana ‑wlajüa ‑gʋ.

¹⁷ Nyɔɔ ma kä dii, ‑bɛ ɔma bʋblɔ 'ɔa ‑wlajʋlɔ 'nyɩa' dɛɛ kä plɛ 'wʋ nɩ, ‑asɩ 'ɔmä Nyɔsʋa ‑wa le?

¹⁸ 'Na 'jü 'amɩ, anyɩ nʋ mlɩa wiia 'kpɔ anyɩ ‑wawla, ‑maa a nʋ 'ia 'sa 'cɩcasa 'lɩ.

¹⁹ 'A ‑plɩɩ anya 'saa jre 'sɩrɩ a bäa' 'cɩcasaa 'jü; ana plɛ ‑nëmä bɩa 'lɩ ‑a ‑taara Nyɔsʋaa 'klɩ.

²⁰ 'Be ana plɛ ma 'nyɩ ‑si ‑a ‑si nɩ, Nyɔsʋa 'bʋa 'ɔnya ‑si ana plɛ 'wʋ, 'ɔ jre wiia 'fɩɔ.

²¹ ‑Maa, 'na ‑wawanyüü 'amɩ, ana plɛ ma ‑si nɩ, 'ɛ ‑nëmä 'lɩ ‑a ‑taara Nyɔsʋaa 'klɩ.

²² ‑Bɛ dɛɛ o dɛɛ a nëmäa' 'bete nɩ, 'ɔnya amɩ 'ɛɛn ‑nyɩa, 'be a ‑träärälɩ 'ɔa ‑dɔ ‑bɛ wiili käa' 'ɔɔn 'tʋ nɩ, 'ii a nö.

²³ ‑Jää 'ɔa ‑dɔlʋ 'ɔ ‑nyɩa' amɩ: a toro 'ɔa 'Jʋ Jesu 'Kriisëa 'nyrɩ plɛ, 'kä a ‑wawla 'sɩrɩ 'ɔa ‑dɔlʋ 'ɔ ‑nyɩa' 'amɩ ‑gbaa'.

²⁴ Nyɔɔlɔ ‑trääräa' 'lɩ 'ɔa ‑dɔ nɩ, 'ɔ kʋ Nyɔsʋa 'lɩ, Nyɔsʋa nya kʋ 'ɔɔn 'lɩ. ‑Bɛ a jre 'sɩrɩ 'ɔ bäa' amɩ 'lɩ, 'be 'ɔ ‑nyɩ amɩ 'ɔa ‑Susu.