रोमियन 7 - Bagheli Bible

बिबाहित जीबन के उदाहरन

¹ हे बिसुआसी भाई-बहिनिव, का तूँ पंचे इआ नहीं जनते आह्या, कि हम मूसा के बिधान काहीं जानँइ बालेन से कहित हएन, कि जब तक कउनव मनई जिअत रहत हय, तब तक ओखे ऊपर मूसा के बिधान के अधिकार रहत हय?

² उदाहरन के खातिर जब कउनव मेहेरिआ के काज होइ जात हय, त ओखे बाद उआ अपने मंसेरुआ के साथ मूसा के बिधान के मुताबिक तब तक बन्धन माहीं रहत ही, जब तक उआ जिअत हय, पय जब ओखर मंसेरुआ मर जात हय, त उआ काजे के नेमन के बन्धन से मुक्त होइ जात ही।

³ पय अगर उआ अपने मंसेरुआ के जिन्दय दुसरे मंसेरुआ के रहि जाय, त उआ दुसरे मंसेरुआ से ब्यभिचार करँइ बाली कहाई, पय अगर ओखर मंसेरुआ मर जात हय, त उआ काजे के नेमन के बन्धन से मुक्त होइ जात ही, इहाँ तक कि अगर उआ कउनव दुसरे मंसेरुआ के रहि जात ही, तऊ उआ दुसरे मंसेरुआ के साथ ब्यभिचार करँइ बाली न कहाई।

⁴ एसे हे हमार भाई-बहिनिव, इहइमेर मसीह के देंह के द्वारा मूसा के बिधान काहीं पालन करँइ से तुहूँ पंचे घलाय मुक्त होइ चुके हया, जउने अब तुहूँ पंचे दुसरे से सम्बन्ध जोड़ सका, अरथात उनसे जउन मरेन म से जि उठे हँय, जउने हम पंचे परमातिमा के खातिर फर देंइ बाला जीबन जी सकी।

⁵ काहेकि जब हम पंचे, मन के बुरी इच्छन के मुताबिक जिअत रहे हएन, त पाप करँइ के बुरी इच्छा, जउन मूसा के बिधान के कारन आई रही हँय, जिनखर अन्त मउत हय, ऊँ हमरे पंचन के देंह के अंगन काहीं अपने काबू माहीं कए रही हँय।

⁶ पय अब हमहीं पंचन काहीं मूसा के बिधान के बन्धन से छुटकारा मिल ग हय, काहेकि जउने मूसा के बिधान के अधीनता माहीं हमही पंचन काहीं बंदी बनाबा ग रहा हय, हम पंचे ओखे सम्बन्ध से पूरी तरह से मुक्त होइ चुके हएन। जउने अब हम पंचे मूसा के लिखे पुरान बिधान से नहीं, बलकिन पबित्र आत्मा के नए बिधान के मुताबिक अपने परमातिमा के सेबा करी।

मूसा के बिधान के द्वारा पाप के पहिचान

⁷ त पुनि हम पंचे का कही? का मूसा के बिधान पाप आय? नहीं, बेलकुल नहीं! अगर मूसा के बिधान न होत, त हम पाप काहीं न जाने पाइत, अगर मूसा के बिधान न बताबत कि लालच न करा, त हम लालच काहीं न जानित।

⁸ पय पाप मोका पउतय हुकुम के द्वारा, हमरे जीबन माहीं हरेकमेर के लालच पइदा कइ दिहिस, काहेकि अगर मूसा के बिधान न होत त पाप मरे कि नाईं होत।

⁹ एक समय हम बिना मूसा के बिधान के जिअत रहे हएन, पय जब मूसा के बिधान के हुकुम आइगा, त पाप जि आबा, अउर हम मर गएन।

¹⁰ अउर उहय मूसा के बिधान के हुकुम जउन अनन्त जीबन देंइ के खातिर रहा हय, हमरे खातिर मउत लइ आबा।

¹¹ काहेकि पाप काहीं मोका मिलिगा, अउर उआ उहय मूसा के बिधान के हुकुम के द्वारा हमहीं बहकाय दिहिस, अउर उहय हुकुम के द्वारा हमहीं मारिव डारिस।

¹² इआमेर से मूसा के बिधान पबित्र हय, अउर उआ हुकुम घलाय पबित्र, सही, अउर परमातिमा के नजर माहीं निकहा हय।

¹³ त पुनि का एखर मतलब इआ हय, कि उआ जउन निकहा हय, उहय हमरे मउत के कारन बनिगा? नहीं, बेलकुल नहीं, बलकिन पाप उआ निकहे के द्वारा हमरे खातिर मउत के कारन एसे बना, कि पाप काहीं पहिचाना जाय सकय, अउर मूसा के बिधान के हुकुम के द्वारा ओखे भयानक पापमय दसा काहीं देखाबा जाय सकय।

मनई के मन अउर आत्मा के लड़ाई

¹⁴ काहेकि हम पंचे त जनतय हएन, कि मूसा के बिधान त आत्मिक हय, पय हम त हाड़ा अउर माँस के बने मनई आहेन, जउन बुरे कामन काहीं कइके पाप के हाँथ माहीं बिके हएन।

¹⁵ अउर हम नहीं जानी कि हम का करित हएन, काहेकि हम जउन काम करँइ चाहित हएन, उआ काम नहीं करी, बलकिन हमहीं उहय काम करँइ परत हय, जउने काम से हम नफरत करित हएन।

¹⁶ अउर अगर हम उहय काम करित हएन, जउन काम हम नहीं करँइ चाही, त हम माने लेइत हएन, कि मूसा के बिधान निकहा हय।

¹⁷ पय वास्तव माहीं उआ हम न होहेंन, जउन इआ सगला काम कइ रहा हय, बलकिन इआ सगला काम करँइ बाला हमरे भीतर बइठ पाप आय।

¹⁸ काहेकि, हम इआ जानित हएन, कि हमरे भीतर अरथात हमरे देंह माहीं कउनव निकही चीज निबास नहीं करय, एसे कि हम निकहा काम करँइ त चाहित हएन, पय करे नहीं पाई।

¹⁹ काहेकि जउन निकहा काम हम करँइ चाहित हएन, उआ काम हम नहीं करी, बलकिन हम जउन काम नहीं करँइ चाही, उहय बुरा काम हम करा करित हएन।

²⁰ अउर अगर हम उहय काम करित हएन, जउने काहीं नहीं करँइ चाही, त इआ सगला काम करँइ बाले हम न होंहेन, बलकिन हमरे भीतर बइठ पाप आय।

²¹ एसे हम अपने देंह माहीं इआ बिधान पाइत हएन, कि हम जब निकहा काम करँइ चाहित हएन, त हमसे बुरा काम होइ जात हय।

²² काहेकि हम त परमातिमा के बिधान से अपने पूरे मन से खुसी रहित हएन।

²³ पय हम अपने अंगन माहीं, दूसर मेर के बिधान काहीं काम करत देखित हएन, जउन हमरे सोच-बिचार करँइ बाली बुद्धी से लड़ाई करत हय, अउर हमहीं पाप के बन्धन माहीं डारत हय, अउर इहय बिधान अबहिनव हमरे अंगन माहीं काम करत हय।

²⁴ हमार किस्मत केतनी खराब ही! हमहीं इआ नास होंइ बाली देंह से को मुक्ती देई?

²⁵ अउर हम परमातिमा के धन्यबाद करित हएन, जउन हमरे पंचन के प्रभू यीसु मसीह के द्वारा हमरे भीतर बसे पाप के बन्धन से मुक्त किहिन हीं। एसे हम अपने मन से त परमातिमा के बिधान के पालन करित हएन, पय अपने सरीर से पाप के बिधान के पालन करित हएन।