दरसनन के बातँय 3 - Bagheli Bible

सरदीस सहर के मसीही मन्डली काहीं मसीह के सँदेस

¹ सरदीस के मसीही मन्डली के दूत काहीं इआ लिखा, “जिनखे लघे परमातिमा के सातठे आत्मा, अउर सातठे तरइया हईं, ऊँ इआ कहत हें, कि हम तोंहरे कामन काहीं जानित हएन, कि तूँ जिन्दा त कहउते हया, पय हया मरे।

² जागत रहा, अउर उन चीजन काहीं जउन बाँकी रहि गई हँय, अउर जउन मिटँय बाली हईं, उनहीं मजबूत करा; काहेकि हम तोंहरे कउनव काम काहीं, अपने परमातिमा के नजर माहीं, पूर नहीं पाएन।

³ एसे सुधि करा, कि तूँ कइसन सिच्छा पाया तय, अउर सुने रहे हया, ओहिन माहीं बने रहा, अउर पस्चाताप करा, अगर तूँ जागत न रइहा, त हम चोर कि नाईं आय जाब, अउर तूँ बेलकुल न जाने पइहा, कि हम कउने घरी, तोंहरे ऊपर आय परब।

⁴ पय हाँ, सरदीस माहीं तोंहरे इहाँ कुछ अइसन मनई हें, जउन अपने-अपने ओन्हन काहीं असुद्ध नहीं किहिन, ऊँ पंचे उजर ओन्हा पहिरे हमरे साथ घुमिहँय, काहेकि ऊँ पंचे एखे काबिल हें।

⁵ जे बिजय पाई, ओही इहइमेर उजर ओन्हा पहिराबा जई, अउर हम ओखर नाम जीबन के किताब म से कउनव मेर से न काटब, पय ओखर नाम अपने पिता, अउर उनखे स्वरगदूतन के आँगे मान लेब।

⁶ जेखर सुनँय के मन होय, उआ सुन लेय, कि पबित्र आत्मा मसीही मन्डलिन से का कहत हय।”

फिलदिलफिया सहर के मसीही मन्डली काहीं मसीह के सँदेस

⁷ अउर फिलदिलफिया के मसीही मन्डली के दूत काहीं इआ लिखा, कि “जउन पबित्र अउर सच्चे हें, अउर जेखे लघे राजा दाऊद के उघन्नी हय, जेखे खोले काहीं कोऊ बन्द नहीं कइ सकय, अउर बन्द कीन काहीं कोऊ खोल नहीं सकय, ऊँ इआ कहत हें, कि

⁸ हम तोंहरे कामन काहीं जानित हएन; देखा, हम तोंहरे आँगे एकठे दुअरा खोलिके रखे हएन, जउने काहीं कोऊ बन्द नहीं कइ सकय; तोंहार सक्ती थोरिन काहीं त हय, तऊ तूँ हमरे बचन काहीं पालन किहे हया, अउर हमरे नाम काहीं इनकार नहीं किहे आह्या।

⁹ देखा, हम उन सइतान के पीछे चलँइ बालेन काहीं, तोंहरे काबू माहीं कइ देब, जउन खुद काहीं यहूदी कहत हें, पय आहीं न, बलकिन ऊँ झूँठ बोलँइ बाले आहीं, देखा, हम अइसन करब, कि ऊँ तोंहरे गोड़न गिरि हँय, अउर इआ जान लेइहँय, कि हम तोंहसे प्रेम करित हएन।

¹⁰ हम तोंहईं धीरज धरँय के खातिर कहेन तय, त तूँ धीरज धरे हया, एसे हमहूँ तोंहईं परिच्छा के उआ समय बचाइके रक्खब, जउन धरती माहीं रहँइ बालेन के जाँचय-परखँय के खातिर, सगले संसार माहीं आमँइ बाली हय।

¹¹ हम हरबिन आमँइ बाले हएन; जउन कुछू तोंहरे लघे हय, ओही थाम्हें रहा, कि जउने कोऊ तोंहार मुकुट छड़ाय न पाबय।

¹² जे बिजय पाई, ओही हम परमातिमा के मन्दिर माहीं एकठे खम्भा बनाउब; अउर उआ पुनि कबहूँ बहिरे न निकरी; अउर हम अपने परमातिमा के नाम, अउर अपने परमातिमा के सहर, अरथात नबा यरूसलेम सहर के नाम, जउन हमरे परमातिमा के लघे से, अरथात स्वरग से उतरँय बाला हय, अउर आपन नबा नाम ओखे ऊपर लिखब।

¹³ जेखर सुनँय के मन होय, उआ सुन लेय, कि पबित्र आत्मा मसीही मन्डलिन से का कहत हय।”

लौदीकिया सहर के मसीही मन्डली काहीं मसीह के सँदेस

¹⁴ अउर लौदीकिया के मसीही मन्डली के दूत काहीं इआ लिखा, कि “जउन आमीन, अउर बिसुआस के काबिल, अउर सच्चे गबाह हें, अउर परमातिमा के स्रस्टी के मूल कारन आहीं, ऊँ इआ कहत हें, कि

¹⁵ हम तोंहरे कामन काहीं जानित हएन, कि तूँ न त ठंड हया, अउर न गरम, इआ भला होत, कि तूँ ठंड इआ कि गरम होत्या।

¹⁶ एसे कि तूँ कुनकुन हया, अउर न ठंड आह्या, अउर न गरमय, हम तोहईं अपने मुँहे से उगिलँइ बाले हएन।

¹⁷ तूँ जउन इआ कहते हया, कि हम धनी हएन, अउर धनमान होइ गएन हय, अउर हमहीं कउनव चीज के कमी नहिं आय, अउर इआ नहीं जनते आह्या, कि तूँ अभागा, अउर तुच्छ, अउर कंगाल, अउर आँधर, अउर नंगा हया।

¹⁸ एहिन से हम तोंहईं इआ सलाह देइत हएन, कि आगी माहीं तपाबा सोन हमसे मोल लइ ल्या, कि धनी होइजा; अउर उजर ओन्हा लइ ल्या, कि ओही पहिरिके तोंहईं अपने नंगापन के लज्जा न होय, अउर अपने आँखिन माहीं लगामँइ के खातिर सुरमा लइ ल्या, कि तूँ देखँइ लागा।

¹⁹ अउर हम जेसे-जेसे प्रेम करित हएन, ऊँ सगलेन काहीं डाँट-फटकार लगाइत हएन, एसे उत्साही बना, अउर मन फिराबा।

²⁰ देखा, हम दुअरा माहीं ठाढ़े खट-खटाइत हएन; अगर कोऊ हमार बोल सुनिके दुअरा खोली, त हम ओखे भीतर आइके ओखे साथ खाना खाब, अउर उआ हमरे साथ।

²¹ जे बिजय पाई, ओही हम अपने साथ अपने सिंहासन माहीं बइठाउब, जइसन हमहूँ घलाय बिजय पाइके, अपने पिता के साथ उनखे सिंहासन माहीं बइठि गएन हय।

²² ‘जेखर सुनँय के मन होय, उआ सुन लेय, कि पबित्र आत्मा मसीही मन्डलिन से का कहत हय’।”