दरसनन के बातँय 21 - Bagheli Bible

नबा अकास अउर नई धरती

¹ ओखे बाद हम नबा अकास अउर नई धरती काहीं देखेन, काहेकि पहिल अकास अउर पहिल धरती खतम होइगे तँय, अउर समुंद्र घलाय नहीं रहिगा तय।

² ओखे बाद हम पबित्र सहर, नबा यरूसलेम काहीं स्वरग से परमातिमा के लघे से उतरत देखेन, जउन उआ दुलहिन कि नाईं रहा हय, जउन अपने मंसेरुआ के खातिर सिंगार कए होय।

³ अउर हम सिंहासन म से, कोहू काहीं खुब चन्डे इआ कहत सुनेन, “देखा, परमातिमा के डेरा, मनइन के बीच माहीं हय, ऊँ उनखे साथ निबास करिहँय, अउर ऊँ पंचे उनखर लोग होइहँय, अउर परमातिमा खुद उनखे बीच माहीं रइहँय, अउर उनखर परमातिमा होइहँय।

⁴ ऊँ उनखे आँखिन से सगले आँसू पोंछि डरिहँय; अउर एखे बाद मउत न रही, अउर न सोक, अउर न बिलाप, न पीरा रही; पहिल बातँय खतम होइ जइहँय।”

⁵ जउन सिंहासन के ऊपर बइठ रहे हँय, ऊँ कहिन, “देखा, हम सब कुछ नबा कए देइत हएन।” ओखे बाद ऊँ पुनि कहिन, “लिख ल्या, काहेकि ईं बचन बिसुआस के काबिल अउर सत्य हें।”

⁶ अउर पुनि ऊँ हमसे कहिन, “ईं बातँय पूर होइ गई हँय। हम अल्फा अउर ओमेगा, आदि अउर अन्त आहेन। हम पिआसे काहीं, जीबन के पानी के झिन्ना म से सेंत-मेंत माहीं पिआउब।

⁷ जे बिजय पाई, उहय ईं चीजन के बारिसदार होई, अउर हम ओखर परमातिमा होब, अउर उआ हमार लड़िका होई।

⁸ पय डरपोकन, अउर अबिसुआसी लोगन, अउर बुरे काम करँइ बालेन, अउर कतलिन, अउर ब्यभिचारिन, अउर टोना मारँइ बालेन, अउर मूरतिन के पूजा करँइ बालेन, अउर सब लबरन के भाग, उआ झील माहीं मिली, जउन आगी अउर गन्धक से जलत रहत ही, इआ दूसर मउत आय।”

नबा यरूसलेम

⁹ ओखे बाद जिन सातठे स्वरगदूतन के लघे, सातठे अन्तिम बिपत्तिन से भरे खोरबा रहे हँय, उनमा से एक जने हमरे लघे आएँ, अउर हमसे बातँय कइके कहँइ लागें, “एँकई आबा, हम तोंहईं दुलहिन, अरथात मेम्ना के मेहेरिआ देखाउब।”

¹⁰ तब ऊँ हमहीं पबित्र आत्मा माहीं, एकठे बड़े अउर ऊँच पहार के ऊपर लइगें, अउर पबित्र सहर यरूसलेम काहीं, स्वरग से परमातिमा के लघे से उतरत देखाइन।

¹¹ परमातिमा के महिमा ओमाहीं रही हय, अउर ओखर जोति, यसब नाम के खुब कीमती निरमल रतन कि नाईं चमकत रही हय।

¹² ओखर सहरपनाह खुब ऊँच रही हय, अउर ओमाहीं बारा फाटक रहे हँय, अउर हरेक फाटकन माहीं एक-एकठे स्वरगदूत रहे हँय; अउर ऊँ फाटकन के ऊपर इजराइलिअन के बरहूँ कुलन के नाम लिखे रहे हँय।

¹³ पूरुब कइती तीनठे फाटक, उत्तर कइती तीनठे फाटक, दक्खिन कइती तीनठे फाटक, अउर पच्छिम कइती तीनठे फाटक रहे हँय।

¹⁴ सहर के सहरपनाह के बाराठे नेव रही हँय, अउर उनखे ऊपर मेम्ना के बरहूँ खास चेलन के बरहूँ नाम लिखे रहे हँय।

¹⁵ जउन हमसे बात करत रहे हँय, उनखे लघे सहर अउर ओखे फाटकन, अउर ओखे सहरपनाह काहीं नापँय के खातिर, एकठे सोने के गज रहा हय।

¹⁶ उआ सहर बरगाकार बसा रहा हय, अउर ओखर लम्बाई- चउँड़ाई बराबर रही हय; अउर ऊँ, उआ गज से सहर काहीं नापिन, त उआ साढ़े सात सव कोस निकरा। ओखर लम्बाई, चउँड़ाई अउर उँचाई बराबर रही हय।

¹⁷ अउर स्वरगदूत ओखे सहरपनाह काहीं नापिन, त मनइन माहीं जउन नापँय के तरीका रहा हय, ओहिन के मुताबिक नापिन, त एक सव चवालिस हाँथ निकरी।

¹⁸ ओखर सहरपनाह यसब के बनी रही हय, अउर सहर अइसन सुद्ध सोने के रहा हय, जइसन स्वच्छ सीसा कि नाईं होय।

¹⁹ उआ सहर के नेव हरेकमेर के खुब कीमती पथरन से बनी रही हय; पहिल नेव यसब के, दूसर नीलमनि के, तीसर लालड़ी के, चउथ मरकत के,

²⁰ पचमी गोमेदक के, छठमी मानिक्य के, सतमी पीतमनि के, अठमी पेरोज के, नवमी पुखराज के, दसमी लहसुनिया के, गेरहमी धूम्रकान्त के, अउर बरहमी याकूत के रही हय।

²¹ अउर बरहूँ फाटक बारा मोतिन के रहे हँय; एक-एक फाटक एक-एक मोती के बना रहा हय। सहर के सड़क स्वच्छ सीसा कि नाईं सुद्ध सोने के रही हय।

²² हम ओमाहीं कउनव मन्दिर नहीं देखेन, काहेकि सर्बसक्तिमान प्रभू परमातिमा, अउर मेम्ना ओखर मन्दिर आहीं।

²³ उआ सहर माहीं सुरिज अउर जोंधइआ के उँजिआर के जरूरत नहिं आय, काहेकि परमातिमा के तेज से, ओमाहीं उँजिआर होइ रहा हय, अउर मेम्ना ओखर दीपक आहीं।

²⁴ जाति-जाति के मनई उनखे जोति माहीं चलिहँय-फिरिहँय, अउर धरती के राजा आपन-आपन धन-सम्पत ओमाहीं लइ अइहँय।

²⁵ ओखर फाटक दिन माहीं कबहूँ बन्द न होइहँय, अउर रात उहाँ न होई।

²⁶ अउर जाति-जाति के मनई धन-सम्पत, अउर महिमा ओमाहीं लइ अइहँय।

²⁷ पय ओमाहीं कउनव अपबित्र चीजँय, इआ कि बुरे काम करँइ बाले, इआ कि लबरी बोलँइ बाले, कउनव मेर से न जाए पइहँय, पय केबल उँइन पंचे जइहँय, जिनखर नाम मेम्ना के जीबन के किताब माहीं लिखे हँय।