दरसनन के बातँय 19 - Bagheli Bible

¹ एखे बाद हम स्वरग माहीं एकठे बड़ी भीड़ कि नाईं खुब चन्डे बोल से, इआ कहत सुनेन, “हालेलूय्याह! मुक्ती अउर महिमा अउर सामर्थ, हमरे पंचन के परमातिमय के आय।

² काहेकि उनखर निरनय सच्चे अउर न्यायपूर्न हें। अउर ऊँ उआ बड़ी बेस्या काहीं, जउन अपने ब्यभिचार से धरती काहीं भ्रस्ट करत रही हय, सजा दिहिन हीं, अउर ओसे अपने दासन के खून के बदला लिहिन हीं।”

³ पुनि ऊँ पंचे दुसराय कहिन, “हालेलूय्याह! ओखे जरँय के धुँआ जुगन-जुगन तक उठत रही।”

⁴ तब चउबीसव अँगुआ, अउर चरहूँ प्रानी, परमातिमा के गोड़न गिरें, जउन सिंहासन माहीं बइठ रहे हँय, अउर कहिन, “आमीन! हालेलूय्याह!”

मेम्ना के बिआह

⁵ अउर सिंहासन म से एकठे अबाज निकरी, “हे हमरे पंचन के परमातिमा से, डेराँइ बाले छोट-बड़े; सगले दासव, तूँ पंचे उनखर स्तुति करा।”

⁶ ओखे बाद हम बड़ी भीड़ कि नाईं, अउर खुब पानी कि नाईं, अउर गरजँय कि नाईं, बड़ी तेज अबाज सुनेन; “हालेलूय्याह! काहेकि प्रभू हमार पंचन के परमातिमा सर्बसक्तिमान राज करत हें।

⁷ आबा, हम पंचे आनन्दित अउर मगन होई, अउर उनखर स्तुति करी, काहेकि मेम्ना के बिआह के समय आय ग हय, अउर उनखर दुलहिन खुद काहीं तइआर कइ लिहिन हीं।”

⁸ अउर ओही सुद्ध अउर चमकँइ बाला मखमल पहिरँय काहीं दीन ग, (उआ सुद्ध मखमल के मतलब पबित्र लोगन के धरम के काम आहीं।)

⁹ तब स्वरगदूत हमसे कहिन, “इआ लिखा, कि ऊँ पंचे धन्य हें, जउन मेम्ना के बिआह-भोज माहीं बोलाए गे हँय।” पुनि ऊँ हमसे कहिन, “ईं बचन परमातिमा के सत्य बचन आहीं।”

¹⁰ तब हम उनखे गोड़न गिरँय के खातिर, उनखे गोड़े माहीं गिर परेन। तब ऊँ हमसे कहिन, “देखा, अइसा न करा, हमहूँ तोंहरेन कि नाईं, अउर तोंहरे भाइन कि नाईं, जउन यीसु के गबाही देंइ के खातिर स्थिर हें, मसीह के दास आहेन, तूँ पंचे परमातिमय के गोड़न गिरा; काहेकि जे कोऊ यीसु के बारे माहीं गबाही देत हें, उनहीं पंचन काहीं परमातिमा के सँदेस बतामँइ बालेन कि नाईं, परमातिमा से प्रेरना मिलत ही।”

उजर घोड़ा के सबार

¹¹ ओखे बाद हम स्वरग काहीं खुला देखेन, अउर देखित हएन, कि एकठे उजर घोड़ा हय; अउर ओमाहीं एक जने सबार हें, जउन बिसुआस के काबिल अउर सत्य कहाबत हें; अउर ऊँ धरम के साथ न्याय, अउर युद्ध करत हें।

¹² अउर उनखर आँखी आगी कि नाईं धँधकती हईं, अउर उनखे मूँड़े माहीं खुब राजमुकुट हें। अउर उनखे ऊपर एकठे नाम लिखा हय, जउने काहीं उनहीं छोंड़, अउर कोऊ नहीं जानय।

¹³ ऊँ खून छिनका ओन्हा पहिरे हें, अउर उनखर नाम परमातिमा के बचन हय।

¹⁴ स्वरग के सेना, उजर घोड़न के ऊपर सबार होइके; अउर उजर अउर सुद्ध मखमल पहिरे, उनखे पीछे-पीछे हईं।

¹⁵ अउर जाति-जाति काहीं मारँइ के खातिर उनखे मुँहे से एकठे चोंख तलबार निकरत ही, ऊँ लोहे के राजदन्ड लए, उनखे ऊपर राज करिहँय, अउर ऊँ सर्बसक्तिमान परमातिमा के, भयानक कोप के जलजलाहट के मदिरा के कुन्ड माहीं अंगूर रउँदिहँय।

¹⁶ उनखे ओन्हा अउर जाँघ के ऊपर, इआ नाम लिखा हय, “राजन के राजा अउर प्रभुअन के प्रभू।”

¹⁷ एखे बाद हम एकठे स्वरगदूत काहीं सुरिज के ऊपर ठाढ़ देखेन, ऊँ खुब चन्डे गोहराइके अकास के बीच माहीं उड़ँइ बाले पंछिन से कहिन, “आबा परमातिमा के बड़े भोज के खातिर एकट्ठा होइजा,

¹⁸ जउने तूँ पंचे राजन के माँस, अउर मुखिअन के माँस, अउर सूरबीर मंसेरुअन के माँस, अउर घोड़न के अउर उनखे सबारन के माँस, अउर का अजाद, का दास, का छोट, का बड़े, सगले जनेन के माँस खा।”

¹⁹ पुनि हम उआ खतरनाक जानबर, अउर धरती के राजन, अउर उनखे सेनन काहीं, उआ घोड़ा के सबार, अउर उनखे सेना से लड़ँइ के खातिर एकट्ठा देखेन।

²⁰ उआ खतरनाक जानबर, अउर ओखे साथ उआ लबरा नबी, पकड़ा ग, जउन उनखे आँगे अइसन चिन्ह देखाइस रहा हय, जिनखे द्वारा उआ उनहीं पंचन काहीं भरमाइस तय, जिनखे ऊपर उआ खतरनाक जानबर के छाप रही हय, अउर जउन ओखे मूरत के अराधना करत रहे हँय। ईं पंचे दोनव जने जिन्दय, उआ आगी के झील माहीं, जउन गन्धक से जरत रहत ही, डारे गें।

²¹ अउर बाँकी मनई उआ घोड़ा के सबार के तलबार से, जउन ओखे मुँहे से निकरत रही हय, मार डारे गें, अउर सगले पंछी उनखे माँस से संतुस्ट होइगें।