दरसनन के बातँय 18 - Bagheli Bible

बेबीलोन सहर के बिनास

¹ एखे बाद हम एकठे अउर स्वरगदूत काहीं, स्वरग से उतरत देखेन, जिनहीं बड़ा अधिकार मिला रहा हय; अउर धरती उनखे तेज से चमक उठी।

² ऊँ खुब चन्डे गोहराइके कहिन, “गिरिगा, बड़ा बेबीलोन सहर गिरिगा हय, बुरी आत्मन के निबास, अउर हरेक असुद्ध आत्मन के अड्डा, अउर हरेक असुद्ध अउर घिनहे पंछिन के अड्डा होइगा हय।

³ काहेकि ओखे ब्यभिचार के भयानक मदिरा के कारन, सगली जाति गिर गई हँय, अउर धरती के सगले राजा ओखे साथ ब्यभिचार किहिन हीं, अउर धरती के बइपारी ओखे सुख-बिलास के बहुतायत के कारन धनमान भे हँय।”

⁴ एखे बाद हम स्वरग से एकठे अउर बोल सुनेन, “हे हमार चुने मनइव, ओमा से निकर आबा, कि जउने तूँ पंचे ओखे पापन माहीं भागीदार न बना, अउर ओखे बिपत्तिन म से, कउनव तोंहरे ऊपर न आय परय।

⁵ काहेकि ओखे पापन के ढेर, स्वरग तक पहुँचिगा हय, अउर ओखर अधरम परमातिमा काहीं याद आइगे हँय।

⁶ अउर जइसा उआ किहिस ही, तुहूँ पंचे ओखे साथ उहयमेर बरताव करा, अउर ओखे कुकर्मन के बदला चुकाबा; अउर जइसन खोरबा उआ दुसरेन के खातिर भरिस रहा हय, ओमाहीं ओखे खातिर दुगुना भर द्या।

⁷ जेतनी उआ आपन बड़ाई किहिस ही, अउर सुख-बिलास किहिस ही, ओतनय ओही कस्ट अउर दुख द्या; काहेकि उआ अपने मन माहीं कहत ही, ‘हम रानी बनिके बइठ हएन, बिधबा नहीं, अउर हम सोक माहीं कबहूँ न परब।’

⁸ इआ कारन से एकय दिन माहीं ओखे ऊपर खुब बिपत्ती आय परिहँय, अरथात मउत, अउर सोक, अउर अकाल; अउर उआ आगी माहीं भसम कइ दीन जई, काहेकि ओखर न्याय करँइ बाले प्रभू परमातिमा सर्बसक्तिमान हें।

⁹ अउर धरती के राजा जउन ओखे साथ ब्यभिचार, अउर सुख-बिलास किहिन हीं, जब ओखे जरँय के धुँआ देखिहँय, त ओखे खातिर रोइहँय, अउर छाती पिटिहँय।

¹⁰ ओखे पीरा के डेरन के मारे ऊँ पंचे खुब दूरी ठाढ़ होइके कइहँय, ‘हे बड़े सहर, बेबीलोन! हे सक्तिसाली सहर, हाय! हाय! घरी भर माहीं तोही सजा मिलिगे ही’।

¹¹ अउर धरती के बइपारी ओखे खातिर रोइहँय, अउर कल्पिहँय, काहेकि अब कोऊ उनखर माल न खरीदी;

¹² अरथात सोन-चाँदी, रतन, मोती, अउर मखमल, अउर बैगनी, रेसमी, अउर लाल रंग के ओन्हा, अउर हरेकमेर के महकँइ बाली लकड़ी, अउर हाँथी के दाँत से बनी हरेकमेर के चीजँय, अउर खुब कीमती लकड़ी, अउर पीतल, अउर लोहे, अउर संगमरमर के हरेकमेर के चीजँय,

¹³ अउर दालचीनी, मसाला, धूप, अँतर, लोभान, मदिरा, जयतून के तेल, मइदा, गोहूँ, गइआ-बरधा, गाड़र-बोकरी, घोड़, रथ, अउर दास, अउर मनइन के प्रान।

¹⁴ अब तोरे मन काहीं लोभामँय बाले फल, तोरे लघे से जाय रहे हँय, अउर स्वादिस्ट अउर भड़कीली चीजँय तोसे दूर होइ गई हँय, अउर ऊँ पुनि कबहूँ न मिलिहँय।

¹⁵ ईं चीजन के बइपारी जउन बेबीलोन सहर के धन-सम्पत से धनी होइगें तय, ओखे पीरा के डेरन के मारे दूरी ठाढ़ होइहँय, अउर रोबत अउर कलपत कइहँय,

¹⁶ हाय! हाय! इआ बड़ा सहर जउन मखमल अउर बैगनी अउर लाल रंग के ओन्हा पहिरे रहा हय, अउर सोन अउर रतनन अउर मोतिअन से सजा रहा हय;

¹⁷ घरी भर माहीं ओखर अइसन भारी धन नास होइगा। हरेक माझी अउर यात्री, अउर मल्लाह, अउर जेतने समुद्र से कमात रहे हँय, सगले दूरी ठाढ़े,

¹⁸ ओखे जरँय के धुँआ देखत गोहराइके कइहँय, ‘कउन सहर इआ बड़े सहर कि नाईं हय?’

¹⁹ अउर अपने-अपने मूँड़ेन के ऊपर धूधुर डरिहँय, अउर रोबत अउर कलपत, चिल्लाय-चिल्लाइके कइहँय, ‘हाय! हाय! इआ बड़ा सहर, जेखे धन-सम्पत्ती के द्वारा समुंद्र के सगले जिहाज बाले धनी होइगे रहे हँय, घरी भर माहीं उजरिगा।’

²⁰ हे स्वरग, अउर हे सगले पबित्र मनइव, अउर यीसु के खास चेलव, अउर परमातिमा के सँदेस बतामँइ बालेव, ओखे ऊपर आनन्द करा, काहेकि परमातिमा न्याय कइके, ओसे तोंहार पंचन के बदला लिहिन हीं।”

²¹ ओखे बाद एकठे बलमान स्वरगदूत बड़ी चक्की के जतबा कि नाईं एकठे पथरा उठाइन, अउर इआ कहिके समुंद्र माहीं फेंक दिहिन, “बड़ा सहर बेबीलोन इहइमेर बड़े बल से गिराबा जई, अउर पुनि ओखर कबहूँ पता न चली।

²² अउर बीना बजामँइ बालेन, अउर गायकन, अउर बंसी बजामँइ बालेन, अउर तुरही फूँकँइ बालेन के बोल, पुनि कबहूँ तोरे भीतर सुनाई न देई; अउर कउनव चीजन के कारीगर घलाय पुनि कबहूँ तोरे भीतर न मिली; अउर चक्की के चलँइ के अबाज पुनि कबहूँ तोरे भीतर सुनाई न देई।

²³ अउर दिया के उँजिआर पुनि कबहूँ तोरे भीतर न चमकी, अउर दुलहा अउर दुलहिन के बोल पुनि कबहूँ तोरे भीतर सुनाई न देई; काहेकि तोर बइपारी धरती के प्रधान रहे हँय, अउर तोरे जादू से सगली जाति भरमाई गईं तय।

²⁴ अउर परमातिमा के सँदेस बतामँइ बालेन, अउर पबित्र मनइन, अउर धरती के ऊपर सगले कतल कीन गें, मनइन के खून बेबीलोन माहीं पाबा ग।”