दरसनन के बातँय 17 - Bagheli Bible

बड़ी बेस्या

¹ अउर जउने सातठे स्वरगदूतन के लघे ऊँ सातठे खोरबा रहे हँय, उनमा से एक जने आइके हमसे इआ कहिन, “इहाँ आबा, हम तोंहईं उआ बड़ी बेस्या के सजा देखाई, जउन खुब पानी माहीं बइठ ही,

² जेखे साथ धरती के राजा लोग ब्यभिचार किहिन; अउर धरती के रहँइ बाले ओखे ब्यभिचार के मदिरा से मतबार होइगे रहे हँय।”

³ त ऊँ हमहीं पबित्र आत्मा माहीं, सुनसान जघा माहीं लइगें, अउर हम लाल रंग के खतरनाक जानबर के ऊपर, जउन परमातिमा के बुराई के सब्दन से भरा रहा हय, अउर जेखे सातठे मूँड़ अउर दसठे सींग रही हँय, एकठे मेहेरिआ काहीं बइठे देखेन।

⁴ उआ मेहेरिआ बैगनी अउर लाल रंग के ओन्हा पहिरे रही हय, अउर सोने अउर खुब कीमती रतनन, अउर मोतिअन से सजी रही हय, अउर ओखे हाँथे माहीं एकठे सोने के खोरबा रहा हय, जउन घिनही चीजन से, अउर ओखे ब्यभिचार के असुद्ध चीजन से भरा रहा हय।

⁵ अउर ओखे लिलारे माहीं इआ नाम लिखा रहा हय, “भेद-बड़ा बेबीलोन, धरती के बेस्यन, अउर घिनही चीजन के महतारी।”

⁶ अउर हम उआ मेहेरिआ काहीं, पबित्र लोगन के खून, अउर यीसु के गबाहन के खून पिए से मतबार देखेन; अउर ओही देखिके हम चउआय गएन।

⁷ तब ऊँ स्वरगदूत हमसे कहिन, “तूँ काहे चउआन हया? हम इआ मेहेरिआ, अउर उआ खतरनाक जानबर के, जेखे ऊपर उआ बइठ ही, अउर जेखे सातठे मूँड़ अउर दसठे सींग हईं, तोंहईं ओखर भेद बताइत हएन।

⁸ जउने खतरनाक जानबर काहीं तूँ देखे हया, उआ पहिले त रहा हय, पय अब नहिं आय, अउर उआ अथाह कुन्ड से निकरिके बिनास माहीं परी; अउर धरती के रहँइ बाले, जिनखर नाम, संसार के सुरुआत से जीबन के किताब माहीं नहीं लिखे गें, इआ खतरनाक जानबर के इआ दसा काहीं देखिके, कि पहिले रहा हय, अब नहिं आय, अउर पुनि आय जई, अचरज मनि हँय।

⁹ इआ समझँइ के खातिर बड़ी बुद्धी के जरूरत ही, ऊँ सतहूँ मूँड़ सातठे पहार आहीं, जउनेन के ऊपर उआ मेहेरिआ बइठ ही।

¹⁰ ऊँ सातठे राजा घलाय आहीं, उनमा से पाँच जनेन के बिनास होइ चुका हय, अउर एकठे अबे हय, अउर एकठे अबे तक आबा नहीं, अउर जब अई त कुछ समय तक ओखर रहब घलाय जरूरी हय।

¹¹ जउन खतरनाक जानबर पहिले रहा हय, अउर अब नहिं आय, उआ खुदय अठमाँ आय, अउर उआ ऊँ सतहूँ म से पइदा भ हय, अउर बिनास माहीं परी।

¹² अउर जउन दसठे सींग तूँ देखे हया, ऊँ दसठे राजा आहीं, जउन अबे तक राज नहीं पाइन, पय उआ खतरनाक जानबर के साथ, एक घन्टा के खातिर राजन कि नाईं अधिकार पइहँय।

¹³ ईं पंचे सब एकय मन होइहँय, अउर ऊँ पंचे आपन-आपन सक्ती अउर अधिकार उआ खतरनाक जानबर काहीं देइहँय।

¹⁴ अउर ऊँ पंचे मेम्ना से लड़िहँय, अउर मेम्ना उनखे ऊपर बिजय पइहँय, काहेकि ऊँ प्रभुअन के प्रभू, अउर राजन के राजा आहीं, अउर जउन बोलाए अउर चुने अउर बिसुआसी हें, ऊँ पंचे उनखे साथ रइहँय; अउर ऊँ पंचे घलाय बिजय पइहँय।”

¹⁵ पुनि ऊँ स्वरगदूत हमसे कहिन, “जउन पानी तूँ देखे हया, जेखे ऊपर बेस्या बइठ ही, ऊँ पंचे त मनई, अउर भीड़, अउर सगली जाति, अउर सगली भाँसा आहीं।

¹⁶ जउन दसठे सींग तूँ देखे हया, ऊँ पंचे, अउर खतरनाक जानबर, उआ बेस्या से दुसमनी रखिहँय, अउर ओही लाचार अउर नंगी कइ देइहँय, अउर ओखर माँस खाय जइहँय, अउर ओही आगी माहीं जराय देइहँय।

¹⁷ काहेकि परमातिमा, उनखे मन माहीं इआ बिचार डरिहँय, कि ऊँ पंचे उनखे मरजी काहीं पूर करँय, अउर जब तक परमातिमा के बचन पूर न होइ जाय, तब तक एक मन होइके आपन-आपन राज, उआ खतरनाक जानबर काहीं दइ देंय।

¹⁸ उआ मेहेरिआ, जउने काहीं तूँ देखे हया, उआ बड़ा सहर आय, जउन धरती के राजन के ऊपर राज करत हय।”