लूका 5 - Bagheli Bible

पहिल चेलन के बोलाबा जाब

¹ जब भीड़ के मनई परमातिमा के बचन सुनँय के खातिर यीसु के उपरय गिरे परत रहे हँय, अउर ऊँ गन्नेसरत के झील के किनारे ठाढ़ रहे हँय, तब अइसन भ,

² कि यीसु झील के किनारे दुइठे नाव लगी देखिन, अउर मछुआरा लोग उनसे उतरिके जाल धोबत रहे हँय।

³ उँइ नावन म से एकठे जउन समौन के रही हय, ओहिन माहीं यीसु चढ़िके, समौन से बिनती किहिन, कि नाव काहीं थोर क किनारे से हटाय लइ चला। तब यीसु नाव माहीं बइठिके सगले भीड़ के मनइन काहीं उपदेस देंइ लागें।

⁴ जब यीसु उपदेस दइ चुकें, तब समौन से कहिन, “नाव काहीं गहिल पानी माहीं लइ चला, अउर मछरी पकड़ँइ के खातिर आपन जाल डारा।”

⁵ समौन उनहीं जबाब दिहिन, “हे मालिक, हम पंचे सगली रात मेहनत किहेन, पय एक्कवठे मछरी नहीं पाएन, तऊ अपना के कहे से हम जाल डारब।”

⁶ जब ऊँ पंचे जाल डारिन, तब खुब मछरी जाल माहीं आय गईं, अउर उनखर जाल फाटँय लाग।

⁷ इआ देखिके, ऊँ पंचे अपने साथिन काहीं जऊँ दुसरे नाव माहीं रहे हँय, इसारा किहिन, कि आइके हमार मदत करा, अउर ऊँ पंचे आइके दोनव नावन माहीं एतनी मछरी भर लिहिन, कि नाव बूड़ँइ लागीं।

⁸ इआ देखिके समौन पतरस यीसु के गोड़न गिरिके कहिन, “हे प्रभू, अपना हमरे लघे से चले जई, काहेकि हम खुब पापी मनई हएन!”

⁹ काहेकि, एतनी मछरिन के पकड़ी जाँय के कारन, समौन अउर उनखे सगले साथिन काहीं बड़ा अचरज भ,

¹⁰ अउर उहइमेर जब्दी के लड़िका याकूब अउर यूहन्ना काहीं घलाय बड़ा अचरज भ, जउन समौन के साथ मछरी मारँइ माहीं भागीदार रहे हँय। तब यीसु समौन से कहिन, “डेरा न, अब से तूँ परमातिमा के खातिर मनइन काहीं तइआर कइके लइ आमँइ बाले बनिहा।”

¹¹ अउर ऊँ पंचे नावन काहीं किनारे माहीं लइ आएँ, अउर सब कुछ उहँय छोंड़िके, यीसु के पीछे चल दिहिन।

कोढ़ी काहीं नीक करब

¹² जब यीसु एकठे सहर माहीं रहे हँय, त उहाँ कोढ़ रोग से भरा एकठे मनई आबा; अउर उआ यीसु काहीं देखतय, उनखे गोड़न गिरिके बिनती किहिस, “हे प्रभू, अगर अपना चाही त, हमही सुद्ध कइ सकित हएन।”

¹³ यीसु आपन हाँथ बढ़ाइके ओही छुइन अउर कहिन, “हम चाहित हएन, कि तूँ सुद्ध होइजा।” अउर तुरन्तय ओखर कोढ़ के बिमारी नीक होइगे।

¹⁴ तब यीसु ओही चेतउनी दइके कहिन, कि “देखा कोहू से कुछू न कह्या, पय जाइके अपने-आप काहीं याजक क देखाबा, अउर अपने सुद्ध होंइ के बारे माहीं जउन चढ़ाबा चढ़ामँइ काहीं मूसा नबी ठहराइन हीं, उहय भेंट चढ़ाबा, कि जउने तोंहरे समाज के लोगन के खातिर गबाही ठहरय।”

¹⁵ पय यीसु के चरचा अउर फइलत गय, अउर भीड़ के भीड़ मनई उनखर उपदेस सुनँय, अउर अपने बिमारिन से नीक होंइ के खातिर एकट्ठा होइगें।

¹⁶ पय यीसु गाँव से दूरी सुनसान जघा माहीं जाइके प्राथना करा-करत रहे हँय।

लोकबा के मरीज काहीं नीक करब

¹⁷ एक दिन अइसन भ, कि यीसु उपदेस देत रहे हँय, अउर फरीसी अउर मूसा के बिधान सिखामँइ बाले उहाँ बइठ रहे हँय, जउन गलील अउर यहूदिया प्रदेस के खुब गाँमन से, अउर यरूसलेम सहर से आएँ तय। अउर बिमारन काहीं नीक करँइ के प्रभू के सामर्थ यीसु के साथ रही हय।

¹⁸ उहय समय कइअक जने एकठे लोकबा के मरीज काहीं खटिया माहीं पराइके लइ आएँ, अउर ऊँ पंचे उआ मरीज काहीं भीतर लइ जाइके यीसु के आँगे धरँइ के उपाय करँइ लागें।

¹⁹ अउर जब ऊँ पंचे भीड़ के कारन यीसु के लघे नहीं पहुँच पाएँ, तब उँ पंचे घर के छान्ही माहीं चढ़िके, खपरइल काहीं ठाठ समेत उतिनके, उआ रोगी काहीं खटिया समेत भीड़ के बीच माहीं यीसु के आँगे उतार दिहिन।

²⁰ यीसु, उनखे बिसुआस काहीं देखिके, उआ लोकबा के मरीज से कहिन, “हे बेटबा, तोंहार पाप माफ होइगें।”

²¹ तब मूसा के बिधान सिखामँइ बाले, अउर फरीसी लोग गुस्साइके आपस माहीं बातचीत करँइ लागें, “इआ को आय, जउन परमातिमा के बुराई करत हय? परमातिमा काहीं छोंड़िके, अउर को पाप माफ कइ सकत हय?”

²² यीसु उनखे मन के बात काहीं जानिके, उनसे कहिन, “तूँ पंचे अपने-अपने मनन माहीं का बाद-बिबाद करते हया?

²³ सरल का हय? का लोकबा के मरीज से इआ कहब, ‘तोंहार पाप माफ होइगें’ इआ कि इआ कहब, कि ‘आपन खटिया उठाइके चला फिरा’?

²⁴ पय जउने तूँ पंचे इआ जानिल्या, कि मनई के लड़िका काहीं धरती माहीं पाप माफ करँइ के घलाय अधिकार हय।” यीसु उआ लोकबा के मरीज से कहिन, “हम तोंहसे कहित हएन, कि उठा, आपन खटिया उठाइके अपने घर चले जा।”

²⁵ उआ हरबिन सगलेन के अँगुअय उठा, अउर जउने खटिया माहीं परा रहा हय, ओही उठाइके परमातिमा के बड़ाई करत अपने घरय चला ग।

²⁶ इआ सगला हाल देखिके, सगले जन अचरज मानिन, अउर परमातिमा के बड़ाई करँइ लागें, अउर मारे डेरन के कहँइ लागें, “आज हम पंचे अजीब बात देखेन हय!”

लेबी काहीं बोलाबा जाब

²⁷ एखे बाद यीसु घर से बहिरे चलेगें, अउर लेबी नाम के एकठे चुंगी लेंइ बाले मनई काहीं चुंगी नाका माहीं बइठे देखिन, अउर उनसे कहिन, “हमरे पीछे चले आबा।”

²⁸ तब लेबी उठिके सब कुछ उहँइ छोंड़िके, यीसु के पीछे चल दिहिन।

²⁹ अउर लेबी अपने घर माहीं यीसु के खातिर बड़ी जेउनार किहिन, जउने माहीं सगले चुंगी लेंइ बाले, अउर खुब मनइन के भीड़ यीसु के साथ खाना खाँइ बइठिगें।

³⁰ इआ सब देखिके, मूसा के बिधान सिखामँइ बाले, अउर फरीसी लोग, यीसु के चेलन से इआ कहिके बरबराँय लागें, “तूँ पंचे चुंगी लेंइ बालेन, अउर पापी लोगन के साथ काहे खाते-पीते हया?”

³¹ यीसु उनहीं जबाब दिहिन, “बैद, के जरूरत नीक-सूख मनइन के खातिर नहीं, बलकिन बिमारन के खातिर परत ही।

³² अउर जे कोऊ इआ सोचत हें, कि हम पापी नहिं आहेन उनहीं नहीं, बलकिन पापी लोगन काहीं पाप करब छोंड़िके परमातिमा के गइल माहीं चलँइ के खातिर बोलामँइ आएन हँय।”

उपासे रहँइ के बारे माहीं प्रस्न

³³ ऊँ पंचे यीसु से कहिन, “यूहन्ना के चेला लोग अउर फरीसी लोगन के चेला लोग हमेसा उपासे रहिके, प्राथना करत हें, पय अपना के चेला लोग काहे खात-पिअत हें; उपासे नहीं रहँय।”

³⁴ यीसु उनसे कहिन, “का तूँ पंचे बरातिन से, जब तक दुलहा उनखे साथ माहीं रहत हय, त उपास कराय सकते हया? नहीं।

³⁵ पय ऊँ दिन अइहँय, जउने माहीं दुलहा बरातिन से अलग कीन जई, तब ऊँ पंचे उपासे रइहँय।”

³⁶ यीसु अउर एकठे उदाहरन दइके कहिन, “कउनव मनई नबा ओन्हा म से फारिके पुरान ओन्हा माहीं पट्टी नहीं लगाबय, नहीं त नबा ओन्हव फाट जई अउर उआ पट्टी पुरान ओन्हा माहीं मेलव न खई।

³⁷ अउर कउनव मनई नबा अंगूर के रस काहीं, पुरान मसकन माहीं भरिके नहीं धरय, काहेकि नबा अंगूर के रस पुरान मसकन काहीं फारिके बहि जई, अउर मसकँय घलाय बरबाध होइ जइहँय।

³⁸ एसे नबा अंगूर के रस नई मसकन माहीं भरँइ चाही।

³⁹ कउनव मनई पुरान अंगूर के रस पिके, नबा अंगूर के रस नहीं पिअँइ चाहय, काहेकि उआ कहत हय, कि पुरानय अंगूर के रस निकहा हय।”