लूका 2 - Bagheli Bible

यीसु के जनम (मत्ती 1:18-25)

¹ उँइन दिनन माहीं रोम देस के महाराजा अवगुस्तुस इआ हुकुम दिहिन, कि सगले रोम राज के मनइन के गिनती कीन जाय।

² इआ पहिल गिनती उआ समय माहीं भे रही हय, जब क्विरिनियुस रोमी राज के सीरिया प्रदेस के राजपाल रहा हय।

³ सगले जन आपन नाम लिखामँय के खातिर अपने-अपने सहरन माहीं गें।

⁴ एसे कि यूसुफ राजा दाऊद के कुल के आहीं, गलील प्रदेस के नासरत गाँव से यहूदिया प्रदेस माहीं, राजा दाऊद के सहर बैतलहम माहीं गें,

⁵ कि अपने मंगेतर मरियम क साथ लइके जिनखे पेटे माहीं बच्चा रहा हय, नाम लिखामँय।

⁶ जब ऊँ पंचे उहँइ रहे हँय, तबहिनय मरियम के लड़िका पइदा होंइ के समय पूर होइगा।

⁷ अउर मरियम के पहिलउठा लड़िका पइदा भ, अउर लड़िका काहीं ओन्हा माहीं लपेटिके अबाह माहीं पराय दिहिन; काहेकि सराय माहीं उनखे खातिर एक्कव जघा नहीं रही।

स्वरगदूतन के व्दारा चरबाहन काहीं सँदेस

⁸ अउर उहाँ खुब गड़रिया रहे हँय, जउन रातके मइदान माहीं अपने गड़रन के पहरा देत रहे हँय।

⁹ तबहिनय प्रभू के एकठे दूत उनखे लघे आइके ठाढ़ होइगा, अउर प्रभू के खुब तेज उँजिआर उनखे चारिव कइती चमकँइ लाग, अउर ऊँ सगले जने खुब डेराइगें।

¹⁰ तब स्वरगदूत उनसे कहिन, “डेरा न; काहेकि देखा, हम तोंहईं बड़े आनन्द के खुसी के खबर बताइत हएन, जउन सगले मनइन के खातिर होई,

¹¹ काहेकि आज दाऊद के सहर माहीं तोंहरे खातिर मुक्ती देंइ बाले जनम लिहिन हीं, अउर ईंन मसीह प्रभू आहीं।

¹² अउर तोंहरे खातिर इआ चिन्हारी होई, कि तूँ पंचे एकठे लड़िका काहीं ओन्हा माहीं लपेटा अउर अबाह माहीं पराबा पइहा।”

¹³ तब अचानक उआ स्वरगदूत के साथ स्वरगदूतन के झुन्ड परमातिमा के स्तुति करत अउर इआ कहत देखाई दिहिन।

¹⁴ “स्वरग माहीं परमातिमा के महिमा, अउर धरती माहीं उँइ मनइन काहीं जउनेन से ऊँ प्रसन्न हें, सान्ती मिलय।”

¹⁵ जब स्वरगदूत उनखे लघे से स्वरग माहीं चलेगें, तब गड़रिया आपस माहीं कहँइ लागें, “आबा हम पंचे बैतलहम माहीं जाइके इआ बात जऊँ भे ही, अउर प्रभू जउन बात स्वरगदूतन से हमहीं बताइन हीं, चला देखी।”

¹⁶ अउर ऊँ पंचे हरबिन जाइके मरियम अउर यूसुफ काहीं, अउर अबाह माहीं उआ लड़िका काहीं पराबा देखिन।

¹⁷ ऊँ गड़रिया उनहीं देखिके जउन बात लड़िका के बारे माहीं उनसे बताई गे तय, हरेक जघा बतामँइ लागें,

¹⁸ अउर गड़रिअन के बातन काहीं सुनिके सगले सुनँइ बाले अचरज मानिन।

¹⁹ अउर मरियम ईं सगली बातन काहीं अपने मन माहीं रखिके, इनखे बारे माहीं बिचार करत रहि गईं।

²⁰ अउर गड़रिअन काहीं जइसन कहा ग तय, उहयमेर सब देख सुनिके ऊँ पंचे परमातिमा के बड़ाई अउर स्तुति करत लउटिगें।

यीसु के नाम धराउब

²¹ जब लड़िका काहीं पइदा भए आठ दिन पूर होइगें, तब खतना करँइ के दिन आबा, तब लड़िका के नाम यीसु धराइन, जउन नाम स्वरगदूत लड़िका के पेट माहीं आमँइ से पहिले मरियम से बताइन रहा हय।

मन्दिर म यीसु काहीं लइ जाब

²² अउर जब मूसा के बिधान के मुताबिक उनखे सुद्ध होंइ के दिन पूर होइगें, तब यूसुफ अउर मरियम लड़िका यीसु काहीं यरूसलेम मन्दिर माहीं लइगें, कि उनहीं प्रभू के सामने लइ जाँय,

²³ (जइसा प्रभू के बिधान माहीं लिखा हय, “सगले मनइन के पहिलउठा लड़िका प्रभू के खातिर समरपित कीन जाय।”)

²⁴ अउर प्रभू के बिधान के बचन के मुताबिक, “पोंड़किन के जोड़ा, इआ कि परेबा के दुइठे बच्चा।” लइआइके बलिदान करँय।

समौन के स्तुति गान

²⁵ यरूसलेम सहर माहीं समौन नाम के एकठे मनई धरमी अउर भक्त रहे हँय; अउर इजराइली लोगन काहीं सान्ती देंइ बाले के इन्तजार करत रहे हँय, अउर पबित्र आत्मा उनखे साथ माहीं रहा हय।

²⁶ अउर पबित्र आत्मा के द्वारा उनहीं मालुम भ रहा हय, कि जब तक ऊँ प्रभू के पठए मसीह काहीं देख न लेइहँय, तब तक न मरिहँय।

²⁷ समौन पबित्र आत्मा के बताए के मुताबिक मन्दिर माहीं आएँ; अउर जब यूसुफ अउर मरियम लड़िका यीसु काहीं भीतर लइ आएँ, कि उनखे खातिर मूसा के बिधान के रीति के मुताबिक करँइ,

²⁸ तब समौन यीसु काहीं अपने कनिआ माहीं लइके परमातिमा के धन्यबाद कइके कहिन।

²⁹ “हे स्वामी, अब अपना अपने दास काहीं अपने बचन के मुताबिक सान्ती के साथ मरँइ देई।

³⁰ काहेकि हम अपने आँखिन से अपना के मुक्ती के योजना काहीं देख लिहेन हय।

³¹ जेही अपना सगले देसन के मनइन के खातिर तइआर किहेन हय।

³² अउर ऊँ सगली जातिअन के लोगन काहीं उँजिआर देंइ के खातिर जोति आहीं, कि अपना के चुने इजराइली लोगन के नाम के बड़ाई होय।”

³³ यीसु के महतारी-बाप ऊँ बातन से जउन यीसु के बारे माहीं कही जात रही हँय, सुनिके चउआय जात रहे हँय।

³⁴ तब समौन उनहीं आसिरबाद दइके यीसु के महतारी मरियम से कहिन, “देखा, इआ लड़िका इजराइल माहीं खुब मनइन के नास होंइ, अउर खुब मनइन के आसीस पामँइ के खातिर चुना ग हय। अउर इआ लड़िका के इआ पहिचान होई, कि खुब जने उनखे बिरोध माहीं बात करिहँय, इआमेर से खुब जनेन के जउन हिरदँय के बिचार हें, उँइ निकरिके अइहँय।

³⁵ अउर मरियम तोंहईं बहुत भारी दुख सहँइ क परी, जउन तलबार छेदरँइ के बराबर होई।”

हन्नाह के गबाही

³⁶ आसेर के कुल माहीं हन्नाह नाम के फनूएल के बिटिया, परमातिमा के सँदेस मनइन काहीं बतामँइ बाली रही हँय। ऊँ खुब बुढ़ान रही हँय, अउर ऊँ काज होए के बाद सात बरिस अपने मंसेरुआ के लघे रहि पाइन तय।

³⁷ ऊँ चउरासी बरिस से बिधबा रही हँय: अउर रोज मन्दिर जात रही हँय, अउर उपास अउर प्राथना कइके रातव-दिन परमातिमा के भक्ती करत रही हँय।

³⁸ जब मरियम अउर यूसुफ लड़िका यीसु के साथ मन्दिर माहीं रहे हँय, ओतनिनदार हन्नाह आइके प्रभू के धन्यबाद करँइ लागीं, अउर उन सगलेन से जउन यरूसलेम काहीं छोड़ामँइ बाले के इन्तजार करत रहे हँय, उनसे लड़िका यीसु के बारे माहीं बतामँइ लागीं।

नासरत गाँव काहीं लउटब

³⁹ जब यूसुफ अउर मरियम प्रभू के बिधान के मुताबिक सगली जरूरी बातन काहीं पूर कइ चुके, तब ऊँ पंचे गलील प्रदेस माहीं अपने गाँव नासरत लउटि आएँ।

⁴⁰ अउर लड़िका यीसु बाढ़त अउर बलमान होत गें, अउर बुद्धी से भरपूर होत गें; अउर परमातिमा के किरपा उनखे ऊपर रही हय।

लड़िका यीसु मन्दिर माहीं

⁴¹ यीसु, के महतारी-बाप हरेक साल फसह के तेउहार माहीं यरूसलेम मन्दिर माहीं जात रहे हँय।

⁴² जब यीसु बारा बरिस के भें, तब उँ तेउहार के रीति के मुताबिक अपने महतारी-बाप के साथ यरूसलेम सहर माहीं गें।

⁴³ जब तेउहार के दिन पूर होंइ के बाद, यूसुफ अउर मरियम अपने घर काहीं लउटँय लागें, तब लड़िका यीसु यरूसलेम माहीं रहिगें, अउर इआ बात उनखर महतारी-बाप नहीं जाने पाइन।

⁴⁴ ऊँ पंचे इआ समझिके, कि यीसु दुसरे के साथ चले गे होइहँय, एक दिन के दूरी चले के बाद लड़िका यीसु काहीं अपने परिबार बालेन, अउर जान-पहिचान बालेन माहीं ढूँढ़ँइ लागें।

⁴⁵ पय जब यीसु नहीं मिलें, तब ऊँ पंचे उनहीं ढूँढ़त-ढूँढ़त यरूसलेम मन्दिर माहीं पुनि लउटि गें,

⁴⁶ अउर तीन दिन के बाद ऊँ पंचे यीसु काहीं मन्दिर माहीं उपदेस देंइ बालेन के लघे बइठे, उनखर उपदेस सुनत अउर उनसे सबाल पूँछत पाइन।

⁴⁷ जेतने जन यीसु के बातन काहीं सुनत रहे हँय, ऊँ सगले जन यीसु के ग्यान अउर उनखे जबाब से चउआय जात रहे हँय।

⁴⁸ तब उनखर महतारी-बाप उनहीं देखिके चउआइगें, अउर उनखर महतारी उनसे कहिन, “हे बेटबा, तूँ हमरे साथ अइसा काहे किहा? देखा, तोंहार बाप अउर हम तोंहईं ढूँढ़त-ढूँढ़त परेसान अउर दुखी रहेन हय?”

⁴⁹ यीसु उनसे कहिन, “तूँ पंचे हमहीं काहे ढूँढ़त रहे हया? काहे तूँ नहीं जानत रहे आह्या, कि हमहीं अपने पिता परमातिमा के मन्दिर माहीं रहब जरूरी हय?”

⁵⁰ पय जउन बात यीसु उनसे कहिन, ऊँ पंचे नहीं समझे पाइन।

⁵¹ तब यीसु उनखे साथ नासरत गाँव माहीं चले आएँ, अउर ऊँ अपने महतारी-बाप के साथ माहीं रहँइ लागें; अउर उनखर महतारी ईं सगली बातन काहीं अपने हिरदँय माहीं रक्खिन।

⁵² यीसु बुद्धी अउर डील-डउल माहीं अउर परमातिमा अउर मनई के किरपा माहीं बाढ़त गें।