लूका 10 - Bagheli Bible

सत्तर चेलन काहीं पठबा जाब

¹ ईं बातन के बाद प्रभू सत्तर मनइन काहीं अउर चुनिके नियुक्त किहिन, अउर यीसु जउने-जउने सहरन अउर जघन माहीं जाँइ बाले रहे हँय, उहाँ-उहाँ उनहीं दुइ-दुइ कइके अपने जाँइ से पहिले पठइन।

² अउर यीसु अपने चेलन से कहिन, “पके खेत त खुब हें, पय मजूर थोरिन हें। एसे खेत के मालिक परमातिमा से बिनती करा, कि ऊँ आपन खेत काटँय के खातिर मजूर पठय देंय।”

³ जा; देखा, हम तोंहईं पंचन काहीं गड़रन कि नाईं डगरन के बीच माहीं पठइत हएन।

⁴ एसे गइल के खातिर कुछू न लिहा, न त पइसा, न त झोरिया, न त पनहिन लिहा; अउर गइल माहीं कोहू से नबस्कार न किहा।

⁵ जब कोहू के घर माहीं जया, त भीतर जाँइ से पहिले कह्या, “इआ घर माहीं रहँइ बालेन के कल्यान होय।”

⁶ अगर उआ घर माहीं कोऊ कल्यान के काबिल होई, त तोंहार दीन कल्यान ओही मिल जई, अगर कल्यान के काबिल कोऊ न होई, त तोंहरे लघे लउटि अई।

⁷ जउने घर माहीं जया, उहय घर माहीं रह्या, अउर जउन कुछू उआ घर के मनई खबामँय, उहय खया-पिया, काहेकि मजूर काहीं आपन मजूरी जरूर मिलँय चाही; खाँय के खातिर घर-घर न जया।

⁸ जउने सहरन अउर गाँमन माहीं जया, अउर उहाँ के मनई अपने घर माहीं स्वागत-सत्कार करँइ, त जउन कुछू तोहईं खाँइ काहीं देंय उहय खया।

⁹ अउर उहाँ के बिमारन काहीं नीक कइके उनसे कह्या, “परमातिमा के राज तोंहरे लघेन आइगा हय।”

¹⁰ पय जउने सहर इआ कि गाँव माहीं जया, अउर अगर उहाँ के मनई तोंहईं पंचन काहीं सोइकार न करँय, त उनखे बजारन माहीं जाइके कह्या,

¹¹ “हम तोंहरे सहर के धूधुर तक जउन हमरे गोड़ेन माहीं लगी ही, तोंहरेन आँगे झारे देइत हएन; तऊ इआ जानिल्या, कि परमातिमा के राज तोंहरे लघेन आइगा हय।”

¹² हम तोंहसे कहित हएन, कि जब परमातिमा न्याय करिहँय, उआ दिन, उआ सहर के दुरदसा, सदोम सहर से जादा होई।

बिसुआस न करँइ बाले सहरन के मनइन काहीं धिक्कार

¹³ “खुराजीन सहर, बैतसैदा सहर; तोंहईं धिक्कार हय; काहेकि जउन सामर्थ के काम तोंहरे बीच माहीं कीन गें तय, अगर ऊँ सूर अउर सैदा प्रदेसन माहीं कीन जातें, त उहाँ के मनई टाट ओढ़िके अउर राख माहीं बइठिके, पहिलेन अपने पापन काहीं मानिके, पाप करब छोंड़ि देतें।

¹⁴ पय जब परमातिमा न्याय करिहँय, उआ दिन तोंहार दुरदसा, सूर अउर सैदा प्रदेसन से जादा होई।

¹⁵ अउर हे कफरनहूम सहर के मनइव, तूँ पंचे जउन सोचते हया, कि हमहीं परमातिमा अकास तक ऊँच करिहँय? बेलकुल नहीं, परमातिमा तोंहईं पताल तक नीच करिहँय।”

¹⁶ अउर यीसु पुनि चेलन से कहिन, “जउन मनई तोंहरे बात काहीं सुनिहँय, ऊँ हमरे बात के सुनँय के बराबर होइहँय; अउर जउन मनई तोंहईं तुच्छ मनि हँय; ऊँ पंचे हमहूँ काहीं तुच्छ मनि हँय; अउर जे हमहीं तुच्छ मानत हय, उआ हमहीं पठमँइ बाले परमातिमा काहीं तुच्छ मानत हय।”

सत्तर चेलन के लउटब

¹⁷ यीसु जउने सत्तर चेलन काहीं पठइन तय, ऊँ पंचे आनन्द मनाबत लउटि आएँ, अउर कहँइ लागें, “हे प्रभू, अपना के नाम से बुरी आत्मा हमार कहा मनती हईं।”

¹⁸ तब यीसु उनसे कहिन, “हम सइतान काहीं बिजुली कि नाईं अकास से गिरत देखेन हय।

¹⁹ एहिन से देखा, हम तोंहईं साँप अउर बीछिन काहीं गोड़ेन से रउदँइ के अधिकार दिहेन हय, अउर तोंहरे बइरी सइतान के सगली सामर्थ काहीं हरामँइ के अधिकार दिहेन हय; अउर कउनव चीज से तोंहार कुछू हानि न होई।

²⁰ तऊ तूँ पंचे एसे आनन्दित न होया, कि आत्मा तोंहरे बस माहीं हईं, बलकिन एसे आनन्दित होया, कि स्वरग माहीं तोंहार नाम लिखे हँय।”

यीसु के आनन्दित होब

²¹ उहय समय यीसु पबित्र आत्मा से भरिके खुब आनन्दित होइगें, अउर कहिन, “हे पिता परमातिमा स्वरग अउर धरती के प्रभू, हम अपना काहीं धन्यबाद देइत हएन, कि अपना ईं बातन काहीं ग्यानिन अउर अपने काहीं समझदार मानँइ बालेन काहीं नहीं बताएन, बलकिन छोट लड़िकन कि नाईं अपना के बचन के ऊपर बिसुआस करँइ बालेन काहीं बतायन हय। हाँ, हे पिता परमातिमा काहेकि अपना काहीं इहय नीक लाग हय।

²² हमार पिता परमातिमा सब कुछ हमहीं सँउप दिहिन हीं; अउर कोऊ नहीं जानँय कि लड़िका को आहीं, केबल पिता जानत हें, अउर पिता को आहीं इहव कोऊ नहीं जानँय, केबल लड़िका जानत हय, अउर लड़िका जेही बतामँइ चाही उहय जानी।”

²³ यीसु एकान्त माहीं पहुँचिके चेलन कइती फिरिके कहिन, “धन्य हें, ऊँ पंचे, जउने बातन काहीं तूँ पंचे देखते हया, ऊँ पंचे देखत हें।

²⁴ काहेकि हम तोंहसे कहित हएन, कि बहुत से परमातिमा के सँदेस बतामँइ बाले अउर बहुत से राजा लोग, इआ चाहत रहे हँय, कि जउन बातँय तूँ पंचे देखते हया देखी, पय नहीं देखे पाइन, अउर जउन बातँय तूँ पंचे सुनते हया, सुनी, पय नहीं सुने पाइन।”

सामरी जाति के एकठे दयालू मनई के उदाहरन

²⁵ एक दिन मूसा के बिधान सिखामँइ बाला एक जने यीसु के लघे आबा, अउर इआ कहिके उनखर परिच्छा करँइ लाग, “हे गुरू, अनन्त जीबन के बारिसदार होंइ के खातिर हम का करी?”

²⁶ यीसु ओसे कहिन, “मूसा नबी के बिधान माहीं का लिखा हय? तूँ ध्यान से नहीं पढ्या?”

²⁷ उआ यीसु काहीं जबाब दिहिस, “पबित्र सास्त्र माहीं लिखा हय, तूँ अपने प्रभू परमातिमा से अपने पूरे मन से, अउर अपने पूरे प्रान से, अउर अपनी पूरी सक्ती से, अउर अपनी पूरी बुद्धी से प्रेम रखा; अउर अपने परोसी से अपने के नाईं प्रेम करा।”

²⁸ तब यीसु ओसे कहिन, “तूँ बेलकुल सही जबाब दिहा हय, इहइमेर तुहूँ करा तबहिनय अनन्त जीबन मिली।”

²⁹ पय उआ यहूदी नेम सिखामँइ बाला अपने काहीं धरमी देखामँइ के खातिर, यीसु से पूँछिस, “त अपना बताई हमार परोसी को आय?”

³⁰ तब यीसु ओही जबाब दिहिन, “एकठे मनई यरूसलेम सहर से यरीहो सहर काहीं जात रहा हय, तबहिनय गइल माहीं कुछ डाँकू आइके, ओखर सगला रुपिआ-पइसा लूटि लिहिन, इहाँ तक कि ओखर ओन्हा तक उतार लिहिन, अउर ओही मार पीटके अधमरा कइके उहँइ छोंड़िके चलेगें।

³¹ अउर संजोग से उहय गइल से एकठे याजक जात रहा हय, पय उआ, ओही देखिके कइतिआइके चला ग।

³² अउर इहइमेर से उहय गइल से एकठे लेबी मनई निकरा, अउर उहव ओही देखिके कइतिआइके चला ग।

³³ पय उहय गली से एकठे सामरी जाति के मनई निकरा, अउर उआ मनई काहीं देखिके ओही दया आइगे।

³⁴ अउर उआ, ओखे लघे जाइके तेल अउर अंगूर के रस लगाइके पट्टी बाँधिस, अउर अपने गदहा माहीं चढ़ाइके सराय माहीं लइ जाइके सेबा किहिस,

³⁵ दुसरे दिन जब उआ सामरी मनई सराय से जाँइ लाग, तब उआ सराय के मालिक काहीं दुइठे चाँदी के सिक्का निकारिके दिहिस, अउर कहिस, ‘इआ मनई के निकहा से सेबा किहा, अउर जउन तोंहार खरचा लागी, उआ हम लउटिके तोंहईं दइ देब।’

³⁶ तब यीसु मूसा के बिधान सिखामँइ बाले उआ मनई से पूँछिन, अब इआ बताबा कि तोंहरे समझ माहीं, उआ मनई के जउन डँकुअन से लुटरिगा रहा हय, ईं तीनव म से कउन परोसी कहाबा?”

³⁷ उआ यीसु से कहिस, “उहय जउन ओखे ऊपर दया किहिस।” यीसु ओसे कहिन, “जा, तुहूँ अइसय करा।”

मारथा अउर मरियम के घर माहीं यीसु

³⁸ जब यीसु अपने चेलन समेत जात रहे हँय, तब एकठे गाँव माहीं पहुँचिगें, उहाँ मारथा नाम के एकठे मेहेरिआ उनहीं अपने घर माहीं लइ जाइके रोंकिस।

³⁹ मारथा के मरियम नाम के एकठे बहिनी रही हय, उआ प्रभू के गोड़े के लघे बइठिके उनखर बचन सुनत रही हय।

⁴⁰ पय मारथा सेबा करत-करत थकिगे, अउर यीसु के लघे आइके कहँइ लाग। “हे प्रभू, का अपना काहीं हमरे ऊपर दया नहीं आबय, हमार बहिनी हमहीं काम करँइ के खातिर अकेले छोंड़ दिहिस ही? एसे ओही अपना कही, कि काम करँइ माही हमार मदत करय।”

⁴¹ प्रभू मारथा काहीं जबाब दिहिन, “मारथा, हे मारथा; तूँ खुब बातन के खातिर चिन्ता करती अउर घबराती हया।

⁴² पय एकठे बात खुब जरूरी हय, अउर उआ उत्तम भाग काहीं मरियम चुनि लिहिन हीं, जउन उनसे कोऊ छड़ाय नहीं सकय।”