यूहन्ना 8 - Bagheli Bible

ब्यभिचार करँइ बाली मेहेरिआ काहीं माफी

¹ जब सगले मनई अपने-अपने घर चलेगें, तब यीसु जैतून नाम के पहार माहीं चलेगें।

² अउर यीसु बड़े सकारे पुनि मन्दिर माहीं आएँ, तब सगले मनई उनखे लघे आइगें; अउर यीसु बइठिके उनहीं उपदेस देंइ लागें।

³ उहय समय मूसा के बिधान सिखामँइ बाले अउर फरीसी लोग एकठे मेहेरिआ काहीं, यीसु के लघे लइ आएँ, जउन ब्यभिचार करत पकड़ी गे रही हय, ओही बीच माहीं ठाढ़ कइके यीसु से कहिन।

⁴ “हे गुरू, इआ मेहेरिआ ब्यभिचार करत पकड़ी गे ही।

⁵ बिधान माहीं, मूसा नबी हमहीं इआ हुकुम दिहिन हीं, कि अइसन मेहेरिअन काहीं पथरा मारँइ चाही: पय अपना इआ मेहेरिआ के बारे माहीं का कहित हएन?”

⁶ ऊँ पंचे यीसु काहीं फसामँइ के खातिर इआ बात कहिन तय, जउने उनखे ऊपर दोस लगामँइ के खातिर कउनव बात पामँय, पय यीसु नीचे काहीं मूँड़ कए भुँइ माहीं अँगुरी से लिखँइ लागें।

⁷ काहेकि जब ऊँ पंचे यीसु से पुँछतय रहिगें, तब यीसु सीध ठाढ़ होइके, उनसे कहिन, “तोंहरे पंचन म से जे कोऊ कबहूँ पाप न किहिस होय, उहय पहिले इआ मेहेरिआ काहीं पथरा मारय।”

⁸ अउर पुनि यीसु नीचे काहीं मूँड़ कए भुँइ माहीं अँगुरी से लिखँय लागें।

⁹ पय ऊँ पंचे इआ बात काहीं सुनिके, बड़े से लइके छोट तक एक-एक कइके सगले जन चलेगें, अउर उहाँ यीसु अकेले बचे, अउर उआ मेहेरिआ उहँय बीच माहीं ठाढ़ रहिगे।

¹⁰ तब यीसु सीध ठाढ़ होइके उआ मेहेरिआ से कहिन, “हे बहिनी, ऊँ पंचे सगले जन कहाँ चलेगें? का कोऊ तोंहईं सजा देंइ के हुकुम नहीं दिहिन?”

¹¹ उआ मेहेरिआ कहिस, “हे प्रभू, कोऊ नहीं”: तब यीसु कहिन, “हमहूँ तोंहरे ऊपर सजा के हुकुम नहीं देई; जा, चले जा, अउर पुनि पाप न किहा।”

यीसु संसार के जोति आहीं

¹² तब यीसु पुनि मनइन से कहिन, “संसार के जोति हमहिन आहेन; जे हमरे पीछे चली उआ अँधिआर माहीं न चली, पय जीबन देंइ बाली जोति पाई।”

¹³ इआ सुनिके फरीसी लोग उनसे कहिन; “अपना आपन गबाही खुदय देइत हएन; अपना के गबाही ठीक नहिं आय।”

¹⁴ यीसु उनहीं जबाब दिहिन; “अगर हम आपन गबाही खुदय देइत हएन, तऊ हमार गबाही ठीक ही, काहेकि हम जानित हएन, कि हम कहाँ से आएन हय, अउर कहाँ जाब? पय तूँ पंचे नहीं जनते आह्या, कि हम कहाँ से आएन हय, अउर कहाँ जाब।

¹⁵ तूँ पंचे त मनइन के बनाए नेम के मुताबिक न्याय करते हया; पय हम कोहू के न्याय नहीं करी।

¹⁶ अउर अगर हम न्याय करबव करी, तऊ हमार न्याय सच्चा होई; काहेकि हम अकेले नहीं, बलकिन हम हएन, अउर हमरे साथ पिता परमातिमा हें, जे हमहीं पठइन हीं।

¹⁷ अउर मूसा नबी व्दारा दीन तोंहरे बिधान माहीं घलाय लिखा हय, कि दुइ जनेन के गबाही मिलिके ठीक होत ही।

¹⁸ एक त हम खुदय आपन गबाही देइत हएन, अउर दूसर पिता परमातिमा हमरे बारे माहीं गबाही देत हें, जे हमहीं पठइन हीं।”

¹⁹ तब ऊँ पंचे यीसु से कहिन, “तोंहार पिता कहाँ हें?” यीसु उनहीं जबाब दिहिन, कि “न त तूँ पंचे हमहिन काहीं जनते आह्या, अउर न हमरे पिता काहीं, अगर तूँ पंचे हमहीं जन त्या, त हमरे पिता काहीं घलाय जन त्या।”

²⁰ ईं बातन काहीं यीसु मन्दिर माहीं उपदेस देत समय भन्डार घर माहीं कहिन तय, अउर कोऊ उनहीं पकड़ नहीं सकें; काहेकि पकड़े जाँइ, अउर मारे जाँइ के उनखर समय अबे नहीं आबा रहा आय।

अपने बारे माहीं यीसु के बताउब

²¹ यीसु पुनि उनसे कहिन, कि “हम जइत हएन, अउर तूँ पंचे हमहीं ढ़ुँढ़िहा, अउर अपने पापन के माफी पाए बिना मरिहा: जहाँ हम जइत हएन, उहाँ तूँ पंचे नहीं आय सकते आह्या।”

²² इआ सुनिके यहूदी धारमिक अँगुआ लोग कहिन, “का ऊँ अपने-आप काहीं खतम कइ लेइहँय, एसे इआमेर कहत हें; कि जहाँ हम जइत हएन, उहाँ तूँ पंचे नहीं आय सकते आह्या?”

²³ तब यीसु उनसे कहिन, “तूँ पंचे इआ धरती के आह्या, अउर हम स्वरग के आहेन, तूँ पंचे इआ संसार के आह्या, हम इआ संसार के न होंहेन।

²⁴ एसे हम तोंहसे इआ कहेन हय, कि तूँ पंचे अपने पापन के माफी पाए बिना मरिहा; काहेकि अगर तूँ पंचे बिसुआस न करिहा, कि हम उहय आहेन, त अपने पापन के माफी पाए बिना मरिहा।”

²⁵ तब ऊँ पंचे यीसु से कहिन, “अपना को आहेन?” यीसु उनसे कहिन, “हम उहय आहेन जउन सुरुआतय से तोंहसे कहत आएन हँय।

²⁶ तोंहरे बारे माहीं हमहीं बहुत कुछ कहँय क हय, अउर निरनय करँइ क हय, पय हमहीं पठमँइ बाले सच्चे हँय; अउर जउन कुछू हम उनसे सुनेन हय, उहय संसार के मनइन से कहित हएन।”

²⁷ ऊँ पंचे इआ नहीं समझे पाइन, कि हमसे यीसु पिता परमातिमा के बारे माहीं कहत हें।

²⁸ तब यीसु उनसे कहिन, “जब तूँ पंचे मनई के लड़िका काहीं क्रूस के खम्भा माहीं चढ़इहा, तब जान जइहा, कि हम उहय आहेन, अउर हम अपने-आप से कुछू नहीं करी, पय जइसन हमार पिता परमातिमा हमहीं सिखाइन हीं, उहयमेर ईं बातन काहीं कहित हएन।

²⁹ अउर जे हमहीं पठइन हीं, ऊँ हमरे साथ हें; ऊँ हमहीं अकेले नहीं छोंड़िन; काहेकि हम हमेसा उहय काम करित हएन; जउने काम से ऊँ प्रसन्न होत हें।”

³⁰ यीसु जब ईं बातन काहीं कहतय रहे हँय, कि तबहिन खुब जने उनखे ऊपर बिसुआस किहिन।

सत्य तोहईं पंचन काहीं अजाद करी

³¹ तब यीसु ऊँ यहूदी लोगन म से जउन उनखे ऊपर बिसुआस किहिन तय, उनसे कहिन, “अगर तूँ पंचे हमरे बचन के पालन करत रइहा, त वास्तव माहीं हमार चेला ठहरिहा।

³² अउर तूँ पंचे सत्य काहीं जनिहा, अउर उहय सत्य तोंहईं अजाद करी।”

³³ ऊँ पंचे यीसु काहीं जबाब दिहिन; कि “हम पंचे त अब्राहम के बंस के आहेन, अउर कबहूँ कोहू के दास नहीं भएन; पुनि अपना काहे कहित हएन, कि तूँ पंचे अजाद होइ जइहा?”

³⁴ तब यीसु उनहीं जबाब दिहिन; “हम तोंहसे सही-सही कहित हएन; कि जे कोऊ पाप करत हय, उआ पाप के दास आय।

³⁵ अउर दास हमेसा घर माहीं नहीं रहय; पय लड़िका हमेसा घर माहीं रहत हय।

³⁶ एसे अगर लड़िका तोहईं अजाद करी, त वास्तव माहीं, तूँ पंचे अजाद होइ जइहा।

³⁷ हम जानित हएन, कि तूँ पंचे अब्राहम के बंस के आह्या; तऊ हमरे बचन काहीं हिरदँय से नहीं अपनउते आह्या, एहिन से तूँ पंचे हमहीं मारि डारँय चहते हया।

³⁸ हम उहय कहित हएन, जउन अपने पिता के इहाँ देखेन हँय; अउर तूँ पंचे उहय करते हया, जउन अपने पिता से सुने हया।”

³⁹ जब ऊँ पंचे यीसु काहीं जबाब दिहिन, “कि हमार पंचन के कुल पिता त अब्राहम आहीं”: तब यीसु उनहीं जबाब दिहिन; “अगर तूँ पंचे अब्राहम के सन्तान होत्या, त अब्राहम कि नाईं काम कर त्या।

⁴⁰ जउन सत्य बचन हम परमातिमा से सुनेन हय, उहय तोंहसे बतायन हय, पय तूँ पंचे हमहीं मारि डारँइ चहते हया। अइसन त अब्राहम कबहूँ नहीं किहिन तय।

⁴¹ तूँ पंचे अपने पिता कि नाईं काम करते हया”: तब ऊँ पंचे यीसु से कहिन, “हम पंचे ब्यभिचार से नहीं पइदा भएन; हमार पंचन के एकयठे पिता हें, अउर ऊँ आहीं परमातिमा।”

⁴² इआ सुनिके यीसु उनसे कहिन, “अगर वास्तव माहीं परमातिमा तोंहार पिता होतें, त तूँ पंचे हमसे प्रेम रख त्या; काहेकि हम परमातिमय से निकरिके आएन हँय; हम अपने से नहीं आएन, बलकिन उँइन हमहीं पठइन हीं।

⁴³ हम जउन कहित हएन, उआ बात काहीं तूँ पंचे काहे नहीं समझे पउते आह्या? एखर कारन इआ हय, कि तूँ पंचे हमरे बातन काहीं सुनते नहिं आह्या।

⁴⁴ काहेकि तूँ पंचे अपने पिता सइतान के सन्तान आह्या। अउर तूँ पंचे अपने पिता के मरजी काहीं पूर करँइ चहते हया। उआ त संसार के सुरुआतय से कतली आय, अउर उआ सत्य के पच्छ कबहूँ नहीं लिहिस। काहेकि ओखे जीबन माहीं सत्य हइअय नहिं आय: अउर झूँठ बोलब ओखर सुभाबय आय; काहेकि उआ हमेसा झूँठ बोलँइ बाला आय, बलकिन झूँठ बोलँइ के सुरुआतय करँइ बाला आय।

⁴⁵ तूँ पंचे हमरे बात के बिसुआस एसे नहीं मनते आह्या, काहेकि हम सही बोलित हएन।

⁴⁶ अउर तोंहरे पंचन म से को हमहीं पापी ठहराय सकत हय? अगर नहीं, त पुनि जब हम सही बात कहित हएन, त हमरे बात के बिसुआस काहे नहीं मनते आह्या?

⁴⁷ जे परमातिमा के जन होत हय, उआ परमातिमा के बातन काहीं सुनिके मानत हय; अउर तूँ पंचे परमातिमा के बचन काहीं एसे नहीं सुनते आह्या, काहेकि तूँ पंचे परमातिमा के जन न होह्या।”

यीसु अउर अब्राहम

⁴⁸ इआ सुनिके यहूदी लोग यीसु से कहिन; “एहिन से हम पंचे तोंहईं ठीकय आय कहित हएन, कि तूँ सामरी आह्या, अउर तोंहरे भीतर बुरी आत्मा हय।”

⁴⁹ तब यीसु उनहीं जबाब दिहिन, कि “हमरे भीतर बुरी आत्मा नहिं आय; बलकिन हम त अपने पिता के आदर करित हएन, अउर तूँ पंचे हमार निरादर करते हया।

⁵⁰ हम आपन बड़ाई नहीं चाही, पय हाँ, एक जने अइसा हें, जे आपन बड़ाई चाहत हें, अउर उँइन न्याय करत हें।

⁵¹ हम तोंहसे सही-सही कहित हएन, अगर कउनव मनई हमरे बचन के मुताबिक चली, त उआ अनन्तकाल तक न मरी।”

⁵² तब यहूदी लोग यीसु से कहिन, “अब हम पंचे जान लिहेन हँय, कि तोंहरे भीतर बुरी आत्मा हय: अब्राहम मरिगें अउर परमातिमा के सँदेस बतामँइ बाले घलाय मरिगें, अउर तूँ कहते हया, कि अगर कोऊ हमरे बचन के मुताबिक चली, त उआ अनन्तकाल तक न मरी।

⁵³ हमार पंचन के कुल पिता अब्राहम त मरिगें, का तूँ उनसे बड़े हया? अउर परमातिमा के सँदेस बतामँइ बाले घलाय मरिगें, तूँ खुद काहीं का ठहरामँइ चहते हया।”

⁵⁴ तब यीसु उनहीं जबाब दिहिन; “अगर हम खुदय आपन बड़ाई करी, त हमार बड़ाई कुछू न होय, पय हमार बड़ाई करँइ बाले हमार पिता परमातिमा हें, जिनहीं तूँ पंचे कहते हया, कि ऊँ हमार परमातिमा आहीं।

⁵⁵ तूँ पंचे उनहीं नहीं जनते आह्या, पय हम उनहीं जानित हएन; अउर अगर हम कही, कि हम उनहीं नहीं जानी, त हम तोंहरे कि नाईं लबरी बोलँइ बाले ठहरब; काहेकि हम उनहीं जानित हएन, अउर उनखे बचन के मुताबिक चलित हएन।

⁵⁶ तोंहार पंचन के पूरबज अब्राहम, धरती माहीं हमरे आमँइ के दिन देखँइ के आसा माहीं खुब आनन्दित रहे हँय; अउर ऊँ देखिन, अउर आनन्दित भें।”

⁵⁷ यहूदी लोग यीसु से कहिन, “अबे तूँ पचासव बरिस के नहीं भया; तऊ तूँ कहते हया, कि हम अब्राहम काहीं देखेन हँय?”

⁵⁸ तब यीसु उनसे कहिन, “हम तोंहसे सही-सही कहित हएन; अब्राहम के पइदा होंइ से पहिलेव हम रहेन हँय।”

⁵⁹ तब ऊँ पंचे यीसु काहीं मारँइ के खातिर पथरा उठाइन, पय यीसु लुकिके मन्दिर से निकरिके चलेगें।