यूहन्ना 7 - Bagheli Bible

यीसु अउर उनखर भाई

¹ एखे बाद यीसु गलील प्रदेस माहीं घूमत रहिगें, काहेकि यहूदी लोग यीसु काहीं मार डारँइ के कोसिस करत रहे हँय, एसे ऊँ यहूदिया प्रदेस माहीं नहीं घूमँइ चाहत रहें।

² अउर यहूदी लोगन के झोपड़िअन नाम के तेउहार लघेन रहा हय।

³ एसे यीसु के सगले भाई उनसे कहिन, अपना काहीं इआ जघा छोंड़िके यहूदिया प्रदेस माहीं चले जाँइ चाही, जउने अपना जउन काम करित हएन, उनहीं अपना के चेलव देखँइ।

⁴ काहेकि अइसा कोऊ मनई न होई, जउन मसहूर होंइ चाहय, अउर लुकिके काम करय: अगर अपना अचरज के काम करित हएन, त संसार के मनइन के आँगे खुद काहीं प्रगट करी।

⁵ काहेकि उनखर भाइव उनखे ऊपर बिसुआस नहीं करत रहे आहीं।

⁶ तब यीसु अपने भाइन से कहिन, “हमरे खातिर अबे ठीक समय नहीं आबा आय, पय तोंहरे पंचन के खातिर हर समय ठीक हय।

⁷ संसार के मनई तोंहसे दुसमनी नहीं कइ सकँय, पय हमसे दुसमनी करत हें, काहेकि हम उनखे बिरोध माहीं, इआ गबाही देइत हएन, कि उनखर काम बुरे हें।

⁸ तूँ पंचे तेउहार मनामँइ जा: हम अबे इआ तेउहार माहीं न जाब; काहेकि अबे तक हमरे खातिर उचित समय नहीं आबा आय।”

⁹ यीसु उनसे ईं बातन काहीं कहिके गलील प्रदेस माहीं रहिगें।

झोपड़िअन नाम के तेउहार माहीं यीसु

¹⁰ पय जब उनखर भाई तेउहार मनामँइ चलेगें, तब ऊँ घलाय तेउहार मनामँइ गें, पय लुके-लुके गें, कोऊ जाने नहीं पाइस।

¹¹ तब उआ तेउहार माहीं यहूदी धारमिक अँगुआ लोग, यीसु काहीं इआ कहिके ढूँढ़ँइ लागें, कि ऊँ कहाँ हें?

¹² अउर उहाँ आए सगले मनई आपस माहीं यीसु के बारे माहीं चुप्पय-चुप्पय बतात रहे हँय, कुछ जने कहँय, कि ऊँ निकहा मनई हें: अउर कुछ जने कहँय, कि नहीं, ऊँ मनइन काहीं गुमराह करत हें।

¹³ तऊ यहूदी धारमिक अँगुआ लोगन के डेरन के मारे, कोऊ उनखे बारे माहीं खुले आम नहीं बोलत रहे आहीं।

तेउहार माहीं यीसु के उपदेस

¹⁴ अउर जब उआ तेउहार आधा बीतिगा तय, तब यीसु मन्दिर माहीं जाइके उपदेस देंइ लागें।

¹⁵ तब यहूदी धारमिक अँगुआ लोग अचरज मानिके कहँइ लागें, “इआ मनई हमरे पंचन के कउनव पाठसाला माहीं कबहूँ नहीं ग, फेरव एही एतना ग्यान कहाँ से मिलिगा?”

¹⁶ तब यीसु उनहीं जबाब दिहिन, कि “जउन उपदेस हम देइत हएन, उआ हमार न होय, इआ पिता परमातिमा के आय, जे हमहीं पठइन हीं।

¹⁷ अगर कोऊ परमातिमा के मरजी के मुताबिक चलँइ चाहय, त उआ इआ उपदेस के बारे माहीं जान जई, कि उआ परमातिमा के तरफ से आय, कि हम अपने कइती से देइत हएन।

¹⁸ जे कोऊ अपने तरफ से कुछू कहत हय, उआ अपनय बड़ाई चाहत हय; पय जे अपने पठमँइ बाले के बड़ाई चाहत हय, उआ सच्चा हय, अउर ओखे जीबन माहीं अधरम नहिं आय।

¹⁹ काहेकि मूसा नबी तोंहईं परमातिमा के बिधान दिहिन हीं? तऊ तोंहरे पंचन म से कोऊ मूसा के बिधान के मुताबिक नहीं चलय, तूँ पंचे काहे हमहीं मारि डारँय चहते हया?”

²⁰ तब ऊँ पंचे जबाब दिहिन; कि “तोंहरे भीतर बुरी आत्मा हय; कोऊ तोंहईं नहीं मारि डारँय चाहय?”

²¹ यीसु उनहीं जबाब दिहिन, कि “हम पबित्र दिन काहीं एकयठे चमत्कार किहेन, अउर तूँ पंचे सगले जन अचरज मनते हया।”

²² इहय कारन से मूसा तोंहईं खतना करँइ के हुकुम दिहिन हीं, (इआ नेम मूसा के न होय, बलकिन इआ तोंहरे बाप-दादन से चला आय रहा हय) अउर तूँ पंचे पबित्र दिन काहीं मनइन के खतना करते हया।

²³ पबित्र दिन काहीं एसे खतना कीन जात हय, कि कहँव मूसा के बिधान के नेम टूट न जाय। त तूँ पंचे हमरे ऊपर क्रोध काहे करते हया, एसे कि जउन हम पबित्र दिन काहीं एकठे मनई काहीं, पूरी तरह से नीक कइ दिहेन हय।

²⁴ कोहू के न्याय करँइ माहीं मुँह देखी न करा, बलकिन ठीक-ठीक न्याय करा।

का यीसुअय मसीह आहीं

²⁵ तब यरूसलेम सहर के रहँइ बाले खुब जने कहँइ लागें; का ईं उँइन मनई न होंहीं, जिनहीं मारि डारँय के कोसिस कीन जाय रही हय।

²⁶ पय देखा, ऊँ त सगले मनइन के बीच माहीं बोलि रहे हँय, अउर ऊँ पंचे उनहीं कुछू नहीं कहँय। का अइसन त न होय, कि यहूदी धारमिक अँगुआ लोग जानिगें हँय, कि वास्तव माहीं ईंन मसीह आहीं।

²⁷ पय ईं मसीह नहीं होइ सकँय, काहेकि इनहीं त हम पंचे जानित हएन, कि ईं कहाँ से आए हँय, पय जब मसीह अइहँय, त कोऊ न जाने पाई, कि ऊँ कहाँ से आए हँय।

²⁸ जब यीसु मन्दिर माहीं उपदेस देत रहे हँय, तब चन्डे से कहिन, “तूँ पंचे हमहीं जनते हया, अउर इहव जनते हया, कि हम कहाँ से आएन हय। पय हम अपने-आप नहीं आएन, जे हमहीं पठइन हीं, ऊँ सच्चे हँय, उनहीं तूँ पंचे नहीं जनते आह्या।

²⁹ हम उनहीं जानित हएन; काहेकि हम उनहिन के तरफ से आएन हँय, उँइन हमहीं पठइन हीं।”

³⁰ एसे ऊँ पंचे यीसु काहीं पकड़ँइ चाहत रहे हँय, तऊ कोऊ उनहीं नहीं पकड़ सकें, काहेकि अबे उनखे पकड़े जाँइ, अउर मारे जाँइ के समय नहीं आबा रहा आय।

³¹ पय भीड़ के मनइन म से खुब जने यीसु के ऊपर बिसुआस किहिन, अउर कहँइ लागें, कि “जब मसीह अइहँय त का इनहूँ से जादा अचरज के काम देखइहँय, जउन ईं देखाइन हीं?”

यीसु काहीं पकड़ँइ के कोसिस

³² फरीसी लोग उहाँ मनइन काहीं यीसु के बारे माहीं चुप्पय-चुप्पय बात करत सुनिन; तब प्रधान याजक लोग, अउर फरीसी लोग, मन्दिर के सिपाहिन काहीं यीसु काहीं पकड़ँइ के खातिर पठइन।

³³ एखे बाद यीसु कहिन, “हम थोरी देर तक अउर तोंहरे साथ हएन; फेर हम अपने पठमँइ बाले के लघे चले जाब।

³⁴ तूँ पंचे हमहीं ढ़ुँढ़िहा, पय न पइहा, अउर जहाँ हम रहब, उहाँ तूँ पंचे नहीं आय सकते आह्या।”

³⁵ इआ सुनिके यहूदी धारमिक अँगुआ लोग आपस माहीं कहँइ लागें, “ईं कहाँ जइहँय, कि हम पंचे इनहीं न पाउब: का ईं उनखे लघे जइहँय, जउन हमरे समाज के मनई यूनानी भाँसा बोलँइ बालेन के लघे तितर-बितर होइके रहत हें, अउर ईं यूनानी भाँसा बोलँइ बालेन काहीं घलाय उपदेस देइहँय?

³⁶ इआ का बात आय जउन यीसु कहिन हीं, कि तूँ पंचे हमहीं ढ़ुँढ़िहा, पय न पइहा, अउर जहाँ हम रहब, उहाँ तूँ पंचे नहीं आय सकते आह्या?”

जीबन देंइ बाले पानी के नदी

³⁷ पुनि तेउहार के अन्तिम दिना, जउन मुख्य दिन आय, यीसु ठाढ़ भें अउर चन्डे से कहिन, “अगर कोऊ पियासा होय, त हमरे लघे आइके पिअय।

³⁸ जे हमरे ऊपर बिसुआस करी, जइसन पबित्र सास्त्र माहीं लिखा हय ‘ओखे हिरदँय म से जीबन देंइ बाली पानी के नदिया बहँइ लगिहँय’।”

³⁹ यीसु इआ बात पबित्र आत्मा के बारे माहीं कहिन रहा हय, जउने काहीं उनखे ऊपर बिसुआस करँइ बाले पामँइ बाले रहे हँय; काहेकि पबित्र आत्मा अबे तक नहीं उतरा रहा आय; काहेकि यीसु अबय तक अपने महिमा माहीं नहीं पहुँचे तय।

⁴⁰ तब भीड़ के मनइन म से कुछ जने ईं बातन काहीं सुनिके कहिन, “वास्तव माहीं जउन परमातिमा के सँदेस बतामँइ बाले आमँइ बाले रहे हँय, ईंन आहीं।”

⁴¹ अउर कुछ जने इहव कहिन, कि “ईं मसीह आहीं”, पय कुछ जने कहिन “ईं न होंहीं, का मसीह गलील प्रदेस अइहँय?”

⁴² काहेकि पबित्र सास्त्र माहीं इआ लिखा हय, कि “मसीह राजा दाऊद के बंस से, अउर बैतलहम गाँव माहीं पइदा होइके अइहँय, जहाँ राजा दाऊद रहत रहे हँय।”

⁴³ इआ कारन से भीड़ के मनइन माहीं फूट परिगे।

⁴⁴ उनमा से कइएक जने यीसु काहीं पकड़ँइ चाहत रहे हँय, पय कोऊ नहीं पकड़ सकें।

यहूदी समाज के अँगुअन के अबिसुआस

⁴⁵ तब मन्दिर के सिपाही प्रधान याजकन अउर फरीसी लोगन के लघे आएँ, अउर ऊँ पंचे, उनसे पूँछिन, “तूँ पंचे यीसु काहीं काहे नहीं पकड़ लाया?”

⁴⁶ तब सिपाही जबाब दिहिन, कि “आज तक कउनव मनई अइसन बातँय नहीं बोलिस, जइसन ऊँ बोलत रहे हँय।”

⁴⁷ तब फरीसी लोग कहिन, “हमहीं त लागत हय, ऊँ तोंहऊँ पंचन काहीं भरमाय दिहिन हीं।

⁴⁸ का यहूदी धारमिक अँगुआ लोग, अउर फरीसी लोगन म से कोऊ यीसु के ऊपर बिसुआस किहिन हीं?”

⁴⁹ पय ईं पंचे जिनहीं मूसा के बिधान के नेमन के ग्यान नहिं आय, एसे इनहीं परमातिमा सराप देइहँय।

⁵⁰ नीकुदेमुस (जउन पहिले यीसु के लघे आए रहे हँय, जउन उन फरीसी लोगन म से रहे हँय) उनसे कहिन,

⁵¹ “हमहीं पंचन काहीं मूसा के द्वारा दीन बिधान, कउनव मनई काहीं जब तक ओखर पहिले सुनिके जान न लेय, कि उआ का किहिस ही; ओही दोसी नहीं ठहराबय।”

⁵² ऊँ पंचे उनहीं जबाब दिहिन, “का तुहूँ गलील प्रदेस के आह्या, पबित्र सास्त्र काहीं पढ़िके देखा, कि गलील प्रदेस से कउनव परमातिमा के सँदेस बतामँइ बाला, कबहूँ पइदा न होई।”

⁵³ एखे बाद ऊँ पंचे सगले जन उहाँ से अपने-अपने घर चलेगें।