यूहन्ना 12 - Bagheli Bible

यीसु के गोड़ेन माहीं अँतर डारब

¹ पुनि यीसु फसह नाम के तेउहार से छय दिना पहिले, बैतनिय्याह गाँव माहीं आएँ, जहाँ लाजर रहत रहे हँय: जिनहीं यीसु मरे म से जिआइन तय।

² उहाँ ऊँ पंचे यीसु के खातिर खाना तइआर किहिन, अउर मारथा उनहीं खाना परसत रही हँय, अउर यीसु के साथ जेतने खाँइ बइठ रहे हँय उन माहीं लाजर घलाय रहे हँय।

³ तब मरियम, जटामाँसी से तइआर कीन आधा लीटर के करीब खुब महग सुध्द अँतर, यीसु के गोड़ेन माहीं डारिन, अउर अपने मूँड़े के बार से उनखर गोड़ पोंछिन, अउर अँतर के महक से सगला घर महकँइ लाग।

⁴ पय उनखे चेलन म से यहूदा इस्करियोती नाम के एकठे चेला, जउन यीसु काहीं पकड़ामँइ बाला रहा हय, उआ कहँइ लाग।

⁵ इआ अँतर तीन सव चाँदी के सिक्कन माहीं बेंचिके, कंगालन काहीं काहे नहीं दइ दीनगा?

⁶ उआ, इआ बात एसे नहीं कहिस रहा, कि ओही कंगालन के फिकर रही हय, बलकिन उआ एसे कहिस तय, काहेकि उआ चोर रहा हय, अउर ओखे लघे उनखे पइसा बाली थइली रहत रही हय, अउर ओमाहीं जउन पइसा डारा जात रहा हय, उआ निकार लेत रहा हय।

⁷ तब यीसु कहिन, “रहँय द्या, उनहीं परेसान न करा, ऊँ हमरे गाड़े जाँइ के तइआरी माहीं इआ सब किहिन हीं।

⁸ काहेकि कंगाल त तोंहरे लघे हमेसा रइहँय, पय हम हमेसा तोंहरे लघे न रहब।”

लाजर काहीं मारि डारँय के योजना

⁹ यहूदी जाति के साधारन मनई जानिगें, कि यीसु बैतनिय्याह गाँव माहीं हें, एसे ऊँ पंचे केबल यीसु भर के कारन नहीं, बलकिन एसे आएँ कि लाजर काहीं घलाय देखँइ, जिनहीं यीसु मरे म से जिआइन रहा हय।

¹⁰ एसे प्रधान याजक लोग लाजर काहीं घलाय मार डारँइ के योजना बनाइन।

¹¹ काहेकि लाजर के कारन खुब यहूदी लोग, अपने धारमिक अँगुअन काहीं छोंड़िके यीसु के लघे चलेगें, अउर उनखे ऊपर बिसुआस करँइ लागें।

यीसु राजा कि नाईं यरूसलेम माहीं प्रबेस किहिन

¹² दुसरे दिन खुब मनई जउन तेउहार माहीं आए रहे हँय, इआ सुनिके कि, यीसु यरूसलेम सहर माहीं आय रहे हँय।

¹³ एसे ऊँ पंचे खजूर के डेरइआ लइके यीसु से मिलँइ के खातिर चल दिहिन, अउर खुब चन्डे चिल्लाइके कहँइ लागें, “होसन्ना, धन्य हय इजराइल के राजा, जउन प्रभू के नाम से आबत हय।”

¹⁴ जब गइल माहीं यीसु काहीं एकठे गदहा के बच्चा मिला, तब यीसु ओखे ऊपर बइठिके चल दिहिन।

¹⁵ जइसन पबित्र सास्त्र माहीं लिखा हय, “हे सिय्योन के बिटिअव, डेरा न, देखा, तोंहार राजा गदहा के बच्चा के ऊपर बइठिके चले आय रहे हँय।”

¹⁶ यीसु के चेला लोग पहिले ईं बातन काहीं नहीं समझे पाइन तय; पय जब यीसु के महिमा काहीं देखिन, तब उनहीं सुधि आई, कि “ईं बातँय यीसु के बारे माहीं पबित्र सास्त्र माहीं लिखी रही हँय”; अउर खुब मनई उनसे इआमेर के बरताव किहिन रहा हय।

¹⁷ तब सगले भीड़ के मनई जउन उआ समय माहीं, उनखे साथ माहीं रहे हँय, इआ गबाही दिहिन, कि “यीसु लाजर काहीं कब्र से गोहराइके, मरे म से जिन्दा किहिन तय।”

¹⁸ इहय कारन से खुब मनई यीसु से मिलँइ के खातिर आएँ रहे हँय, काहेकि ऊँ पंचे सुनिन तय, कि “यीसु इआ अचरज के काम देखाइन हीं।”

¹⁹ तब फरीसी लोग आपस माहीं कहिन, “सोचा तूँ पंचे कुछू नहीं कए पउते आह्या, देखा, खुब मनई उनखर चेला बन रहे हँय।”

यूनानी जाति के मनइन के यीसु काहीं ढूँढ़ब

²⁰ जउन मनई उआ तेउहार माहीं भजन करँइ आए रहे हँय, उनमा से कुछ यूनानी जाति के मनई रहे हँय।

²¹ ऊँ पंचे गलील प्रदेस के बैतसैदा गाँव के रहँइ बाले फिलिप्पुस के लघे आइके, उनसे बिनती किहिन, कि “साहब, हम पंचे यीसु से मिलँइ चाहित हएन।”

²² अउर फिलिप्पुस आइके अन्द्रियास से कहिन; तब अन्द्रियास अउर फिलिप्पुस दोनव जने यीसु से कहिन।

²³ इआ सुनिके यीसु उनसे कहिन, “मनई के लड़िका के महिमा होंइ के समय आइगा हय।

²⁴ हम तोंहसे सही-सही कहित हएन, कि जब तक गोहूँ के दाना भुँइ माहीं गिरिके, मर नहीं जाय, तब तक उआ अकेले रहत हय, पय जब मर जात हय, तब अनगिनत दानन काहीं पइदा करत हय।

²⁵ जे कोऊ अपने प्रान काहीं पियार जानत हय, उआ ओही गमाय देई; अउर जे कोऊ इआ संसार माहीं अपने प्रान काहीं पियार नहीं जानय; उआ अनन्त जीबन के खातिर ओखर रच्छा करत रही।

²⁶ अगर कोऊ हमार सेबा करय, त हमरे पीछे-पीछे चलय; अउर जहाँ हम रहब, उहँय हमार सेबा करँइ बाला घलाय रही; अगर कोऊ हमार सेबा करी, त पिता ओखर आदर करिहँय।

क्रूस के मउत के इसारा

²⁷ अब हमार जिव ब्याकुल होइ रहा हय। एसे अब हम का कही? हे पिता, हमहीं इआ दुख के घरी से बचाई? पय इहय दुख के घरी के खातिर त हम आएन हँय।

²⁸ हे पिता, अपने महिमा काहीं देखाई, कि अपना केतना महान हएन: तबहिनय अकास से इआ बोल सुनान, कि ‘हम उनखर महिमा किहेन हय, अउर फेरव करब’।”

²⁹ तब जउन मनई उहाँ ठाढ़ सुनत रहे हँय, ऊँ पंचे कहिन, “बदरी गरजी हय”, अउर कुछ जने कहिन, “कउनव स्वरगदूत उनसे बात किहिन हीं।”

³⁰ इआ सुनिके यीसु कहिन, “इआ अबाज हमरे खातिर नहीं, बलकिन तोंहरे पंचन के खातिर आई हय।

³¹ अब इआ संसार के मनइन के न्याय के समय आइगा हय, अब इआ संसार माहीं सासन करँइ बाले सइतान काहीं, परमातिमा हराय देइहँय।

³² अउर हम अगर धरती से ऊपर क्रूस माहीं चढ़ाए जाब, त सगले मनइन काहीं अपने लघे खींच लेब।”

³³ यीसु इआ बतामँइ के खातिर अइसा कहिन तय, कि ऊँ कइसन मउत मरिहँय।

³⁴ इआ सुनिके खुब मनई उनसे कहिन, कि “हम पंचे पबित्र सास्त्र के इआ बात सुनेन हय, कि मसीह हमेसा रइहँय, त पुनि अपना काहे कहित हएन, कि मनई के लड़िका काहीं ऊपर क्रूस माहीं चढ़ाबा जाब जरूरी हय? इआ मनई के लड़िका को आय?”

³⁵ तब यीसु उनसे कहिन, “जोति अब थोरी देर तक तोंहरे बीच माहीं रही, जब तक जोति तोंहरे साथ ही, तब तक चले चला; अइसा न होय कि अँधिआर आइके तोंहईं पंचन काहीं आय घेरय; जे कोऊ अँधिआर माहीं चलत हय, उआ नहीं जानय कि कउने कइती जात हय।

³⁶ जब तक जोति तोंहरे साथ ही, जोति के ऊपर बिसुआस करा, कि जउने तूँ पंचे जोति के सन्तान बना।” ईं बातन काहीं कहिके यीसु उहाँ से चलेगें, अउर ऊँ पंचे उनहीं नहीं देखे पाइन।

यहूदी लोगन के अबिसुआस माहीं बने रहब

³⁷ अउर यीसु उनखे आँगे एतने चमत्कार देखाइन, तऊ ऊँ पंचे उनखे ऊपर बिसुआस नहीं किहिन।

³⁸ जउने परमातिमा के सँदेस बतामँइ बाले यसायाह के बचन पूर होय, जउन ऊँ कहिन रहा हय, कि “हे प्रभू, हमरे सँदेस के को बिसुआस मानिस ही? अउर प्रभू के सक्ती काहीं को देखिस ही?”

³⁹ इआ कारन से ऊँ पंचे बिसुआस नहीं कइ सकें, काहेकि यसायाह इहव कहिन हीं।

⁴⁰ कि “परमातिमा उनखे आँखिन काहीं आँधर कइ दिहिन हीं, अउर उनखे मन काहीं कठोर कइ दिहिन हीं; कहँव अइसा न होय, कि ऊँ पंचे आँखिन से देखँय अउर मन से समझँय, अउर हमरे कइती फिरँय, अउर हम उनहीं चंगा करी।”

⁴¹ यसायाह ईं बातन काहीं एसे कहिन हीं, कि ऊँ यीसु के महिमा काहीं देखिन तय; अउर ऊँ उनखे बारे माहीं बातँय घलाय किहिन तय।

⁴² तऊ यहूदी धारमिक अँगुअन म से घलाय खुब जने यीसु के ऊपर बिसुआस किहिन, पय फरीसी लोगन के कारन खुले आम नहीं मानत रहे आँय, कहँव अइसा न होय, कि ऊँ पंचे सभाघर से निकारे जाँय।

⁴³ काहेकि उनहीं मनइन के व्दारा दीन जाँय बाला सम्मान, परमातिमा के व्दारा दीन जाँय बाले सम्मान से जादा पियार लागत रहा हय।

यीसु के बचन न्याय के खातिर अधार

⁴⁴ एखे बाद यीसु खुब चन्डे कहिन, “जे कोऊ हमरे ऊपर बिसुआस करत हय, उआ हमरे ऊपर नहीं, बलकिन हमहीं पठमँइ बाले के ऊपर बिसुआस करत हय।

⁴⁵ अउर जे कोऊ हमहीं देखत हय, उआ हमहीं पठमँइ बाले काहीं देखत हय।

⁴⁶ इआ संसार माहीं हम जोति बनिके आएन हँय, जउने जे कोऊ हमरे ऊपर बिसुआस करय, त उआ अँधिआर माहीं न रहय।

⁴⁷ अगर कोऊ हमरे बातन काहीं सुनिके न मानी, त हम ओही दोसी नहीं ठहराई, काहेकि हम संसार के मनइन काहीं दोसी ठहरामँइ के खातिर नहीं, बलकिन संसार के मनइन काहीं मुक्ती देंइ के खातिर आएन हँय।

⁴⁸ जे कोऊ हमहीं तुच्छ जानत हय, अउर हमरे बातन काहीं सोइकार नहीं करय, त ओही दोसी ठहरामँइ बाला एकयठे हय: अरथात जउन बचन हम कहेन हय, उहय ओही अन्तिम दिन माहीं दोसी ठहराई।

⁴⁹ काहेकि हम जउन बातँय कहेन हँय, ऊँ अपने तरफ से नहीं, बलकिन पिता जे हमहीं पठइन हीं, उँइन इआ हुकुम दिहिन हीं, कि हम का-का कही? अउर का-का बोली?

⁵⁰ अउर हम जानित हएन, कि उनखर हुकुमय अनन्त जीबन आय, एसे हम उहय बोलित हएन, जइसा पिता हमसे कहिन हीं।”