यूहन्ना 1 - Bagheli Bible

बचन के मनई के रूप धारन करब

¹ सुरुआत माहीं बचन रहा हय, अउर बचन परमातिमा के साथ रहा हय, अउर बचनय परमातिमा रहा हय।

² इहय बचन सुरुआत माहीं परमातिमा के साथ रहा हय।

³ बचनय के व्दारा सगली चीजँय बनाई गई हँय, अउर जेतनी चीजँय बनाई गई हँय, उनमा से अइसा कउनव चीज नहिं आय जउन ओखे बिना बनाई गे होय।

⁴ ओहिन माहीं जीबन रहा हय; अउर उहय जीबन संसार के मनइन के खातिर जोति रहा हय।

⁵ अउर जोति अँधिआर माहीं चमकत ही; पय अँधिआर ओही सोइकार नहीं किहिस।

⁶ परमातिमा के पठए एक जने मनई आएँ जिनखर नाम यूहन्ना बपतिस्मा देंइ बाला रहा हय।

⁷ ऊँ इआ गबाही देंइ के खातिर आएँ, कि जोति के बारे माहीं गबाही देंय, जउने संसार के सगले मनई उनखे गबाही काहीं सुनिके जोति के ऊपर बिसुआस करँय।

⁸ ऊँ खुद उआ जोति नहीं रहें आहीं, पय उआ जोति के बारे माहीं गबाही देंइ के खातिर आए रहे हँय।

⁹ उआ सच्ची जोति जउन संसार के हरेक मनइन काहीं ग्यान रूपी उँजिआर देत ही, संसार माहीं आमँइ बाली रही हय।

¹⁰ उआ बचन संसारय माहीं रहा हय, अउर सगला संसार ओहिन के व्दारा बनाबा ग हय, पय संसार के मनई ओही नहीं पहिचानिन।

¹¹ ऊँ अपने लोगन के लघे आएँ, अउर उनखर अपनय लोग उनहीं सोइकार नहीं किहिन।

¹² पय जेतने जने उनहीं सोइकार किहिन, ऊँ उनहीं पंचन काहीं परमातिमा के सन्तान होंइ के अधिकार दिहिन, अरथात उनहीं जेतने जन उनखे नाम के ऊपर बिसुआस करत हें।

¹³ परमातिमा के सन्तान के रूप माहीं, ऊँ पंचे संसारिक रूप से, न त खून से पइदा भें, अउर न त मनइन के इच्छा से, अउर न महतारी-बाप के योजना से, बलकिन ऊँ पंचे परमातिमा से पइदा भे हँय।

¹⁴ अउर बचन मनई के रूप लइके संसार माहीं आएँ, अउर ऊँ किरपा अउर सच्चाई से भरपूर होइके, हमरे पंचन के बीच माहीं निबास किहिन, अउर हम पंचे उनखे महिमा काहीं, पिता परमातिमा के एकलउते लड़िका कि नाईं देखे हएन।

¹⁵ अउर यूहन्ना उनखे बारे माहीं गबाही दिहिन हीं, अउर खुब चन्डे कहिन हीं, कि “ईं उँइन आहीं, जिनखे बारे माहीं हम बतायन हय, कि ऊँ जउन हमरे बाद आमँइ बाले हें, हमसे खुब महान हें, काहेकि ऊँ हमरे पइदा होंय से पहिले रहे हँय।”

¹⁶ काहेकि उनखर किरपा हमरे ऊपर भरपूर ही, एहिन से हमहीं पंचन काहीं भरपूर आसिरबाद मिलत हय।

¹⁷ परमातिमा के बिधान मूसा नबी के व्दारा दीन ग हय; पय किरपा अउर सच्चाई यीसु मसीह के व्दारा पहुँची हय।

¹⁸ परमातिमा काहीं कबहूँ कोऊ नहीं देखिस, पय केबल परमातिमा के एकलउते लड़िका, जउन हमेसा उनहिन के साथ रहत हें, उँइन उनखे बारे माहीं हमहीं पंचन काहीं बताइन हीं।

यूहन्ना बपतिस्मा देंइ बाले के गबाही

¹⁹ जब यरूसलेम सहर के कुछ यहूदी समाज के धारमिक अँगुआ लोग इआ जानँइ के खातिर कि यूहन्ना बपतिस्मा देंइ बाले को आहीं, याजकन अउर मन्दिर माहीं सेबा करँइ बाले लेबी लोगन काहीं पठइन, तब ऊँ पंचे यूहन्ना बपतिस्मा देंइ बाले के लघे जाइके पूँछिन, कि तूँ को आह्या।

²⁰ तब यूहन्ना बपतिस्मा देंइ बाले उनहीं सही जबाब दिहिन, अउर मान लिहिन, कि हम परमातिमा के पठए मसीह न होंहेन।

²¹ तब ऊँ पंचे पुनि उनसे पूँछिन, “त तूँ को आह्या? का तूँ एलिय्याह आह्या?” त ऊँ कहिन, कि “हम न होंहेन”, त ऊँ पंचे पुनि पूँछिन कि, “परमातिमा जउन अपने सँदेस बतामँइ बाले काहीं पठमँइ के वादा किहिन तय, का तूँ उहय आह्या?” तब ऊँ कहिन, कि “हम उहव न होंहेन।”

²² तब ऊँ पंचे पुनि उनसे पूँछिन, “आखिर तूँ को आह्या?” अपने बारे माहीं हमहीं बताबा, जउने हम पंचे अपने पठमँइ बालेन काहीं जबाब दइ सकी।

²³ यूहन्ना बपतिस्मा देंइ बाले कहिन, “जइसन परमातिमा के सँदेस बतामँइ बाले यसायाह नबी कहिन हीं, कि ‘हम सुनसान जघा माहीं गोहरामँइ बाले के अबाज आहेन’ काहेकि प्रभू आमँइ बाले हें, तूँ पंचे अपने मन काहीं सऊँ गइल कि नाईं तइआर करा।”

²⁴ जिनहीं फरीसी पठइन रहा हय।

²⁵ ऊँ पंचे यूहन्ना बपतिस्मा देंइ बाले से पूँछिन, “तूँ न त मसीह आह्या, अउर न एलिय्याह आह्या, अउर न त उआ परमातिमा के सँदेसय बतामँइ बाले आह्या, त पुनि बपतिस्मा काहे देते हया?”

²⁶ यूहन्ना बपतिस्मा देंइ बाले उनहीं जबाब दिहिन, कि “हम त पानी से बपतिस्मा देइत हएन; पय तोंहरे बीच माहीं एक जने ठाढ़ हें, जिनहीं तूँ पंचे नहीं जनते आह्या, कि ईं को आहीं।

²⁷ ईं उँइन आहीं, जउन हमरे बाद आमँइ बाले हें, जिनखे पनहीं के डोरव तक छोरँइ के काबिल हम नहिं आहेन।”

²⁸ ईं बातँय यरदन नदी के दुसरे पार बैतनिय्याह गाँव माहीं भईं, जहाँ यूहन्ना बपतिस्मा देंइ बाले, बपतिस्मा देत रहे हँय।

परमातिमा के मेम्ना

²⁹ दुसरे दिन यूहन्ना बपतिस्मा देंइ बाले, यीसु काहीं अपनी कइती आबत देखिके कहिन, “देखा, ईं परमातिमा के मेम्ना आहीं, जउन संसार के मनइन के पाप उठाय लइ जइहँय।

³⁰ ईं उँइन आहीं, जिनखे बारे माहीं हम कहेन रहा हय, कि एकठे मनई जउन हमरे बाद आमँइ बाले हें, ऊँ हमसे खुब महान हें, काहेकि ऊँ हमरे पइदा होंइ से पहिले रहे हँय।

³¹ अउर हम खुदय उनहीं नहीं पहिचानत रहेन आय, पय हम पानी से बपतिस्मा एसे देत आए हएन, कि जउने इजराइल देस के सगले मनई इआ जान लेंय, कि ऊँ को आहीं।

³² अउर यूहन्ना इआ गबाही दिहिन, कि हम पबित्र आत्मा काहीं परेबा के रूप माहीं स्वरग से नीचे उतरत देखेन हय, अउर पबित्र आत्मा उनखे ऊपर आइके ठहरिगा।

³³ अउर हम त उनहीं पहिचानत नहीं रहेन, पय जउन हमहीं पानी से बपतिस्मा देंइ काहीं पठइन हीं, उँइन हमसे कहिन, कि जेखे ऊपर तूँ पबित्र आत्मा काहीं उतरत अउर ठहरत देख्या; उँइन मनइन काहीं पबित्र आत्मा से बपतिस्मा देंइ बाले आहीं।

³⁴ अउर हम देखेन हँय, अउर इआ गबाही देइत हएन, कि ईंन परमातिमा के लड़िका आहीं।”

यीसु के पहिल चेला लोग

³⁵ दुसरे दिन पुनि यूहन्ना अउर उनखे चेलन म से दुइ जने ठाढ़ रहे हँय।

³⁶ अउर यूहन्ना बपतिस्मा देंइ बाले यीसु काहीं लघे से जात देखिके कहिन, “देखा, ईं परमातिमा के मेम्ना आहीं।”

³⁷ जब ऊँ दोनव चेला उनहीं इआ कहत सुनिन, त ऊँ पंचे यीसु के पीछे चलेगें।

³⁸ यीसु पीछे कइती मुड़िके, उनहीं अपने पीछे आबत देखिके उनसे कहिन, “तूँ पंचे केही ढुँढ़ते हया?” ऊँ पंचे उनसे कहिन, “हे गुरू अपना कहाँ रहित हएन?” यीसु उनसे कहिन, “चलिके खुदय देख ल्या।”

³⁹ तब ऊँ पंचे आइके उनखे रहँइ के जघा देखिन, अउर उआ दिना ऊँ पंचे उनहिन के साथ रहिगें; काहेकि साँझिके करीब चार बजिगा रहा हय।

⁴⁰ यूहन्ना बपतिस्मा देंइ बाले के बात काहीं सुनिके, जउन यीसु के पीछे चलेगे रहे हँय, ऊँ दोनव म से एकठे त समौन पतरस के भाई अन्द्रियास रहे हँय।

⁴¹ ऊँ पहिले अपने सग भाई समौन से मिलिके उनसे कहिन, कि हमहीं ख्रिस्त अरथात मसीह मिलगे हँय।

⁴² ऊँ समौन काहीं यीसु के लघे लइ आएँ: त यीसु उनहीं देखिके कहिन, “तूँ यूहन्ना के लड़िका समौन आह्या, तूँ कैफा अरथात पतरस कहइहा।”

फिलिप्पुस अउर नतनएल काहीं बोलाबा जाब

⁴³ दुसरे दिन यीसु गलील प्रदेस काहीं जाँइ के निस्चय किहिन; अउर फिलिप्पुस से मिलिके कहिन, “हमरे पीछे चले आबा।”

⁴⁴ फिलिप्पुस त अन्द्रियास अउर पतरस के गाँव बैतसैदा के रहँइ बाला रहा हय।

⁴⁵ ओखे बाद फिलिप्पुस जाइके नतनएल से मिलें, अउर उनसे कहिन, कि जेखर बखान मूसा नबी बिधान माहीं लिखिन हीं, अउर परमातिमा के सँदेस बतामँइ बाले घलाय अपने किताबन माहीं लिखिन हीं, ऊँ हमहीं मिलिगे हँय; ऊँ नासरत गाँव माहीं रहँइ बाले यूसुफ के लड़िका यीसु आहीं।

⁴⁶ तब नतनएल फिलिप्पुस से कहिन, “का नासरत गाँव से घलाय कउनव निकही चीज पइदा होइ सकत ही?” फिलिप्पुस उनसे कहिन, “चलिके खुदय देख ल्या।”

⁴⁷ अउर यीसु नतनएल काहीं अपने कइती आबत देखिके, उनखे बारे माहीं कहिन, “देखा, ईं आहीं, सच्चे इजराइली, इनखे जीबन माहीं कउनव कपट नहिं आय।”

⁴⁸ नतनएल यीसु से पूँछिन, “अपना हमहीं कइसा जानित हएन?” तब यीसु उनहीं जबाब दिहिन, “फिलिप्पुस के तोहईं बोलामँइ से पहिले, जब तूँ अंजीर के बिरबा के नीचे बइठ रहे हया, तब हम तोंहईं देखेन तय।”

⁴⁹ तब नतनएल जबाब दिहिन, “हे गुरू, अपना त परमातिमा के लड़िका अउर इजराइल के महाराजा आहेन।”

⁵⁰ तब यीसु उनहीं जबाब दिहिन, कि हम तोंहसे जउन कहेन, कि हम तोंहईं अंजीर के बिरबा के नीचे देखेन हय, त का तूँ एहिन से बिसुआस करते हया, तूँ एहू से बड़े-बड़े काम करत हमहीं देखिहा।

⁵¹ पुनि यीसु उनसे कहिन, कि “हम तोंहसे सही-सही कहित हएन, कि तूँ स्वरग काहीं खुला, अउर परमातिमा के स्वरगदूतन काहीं मनई के लड़िका के लघे उतरत अउर ऊपर जात देखिहा।”