इब्रानियन 13 - Bagheli Bible

मसीही जीबन जिअँइ के निरदेस

¹ एसे आबा हम पंचे आपस माहीं एक दुसरे से, अपने भाई-बहिनिन कि नाईं प्रेम करत रही।

² अउर तूँ पंचे महिमानन के स्वागत-सत्कार करब कबहूँ न बिसराया, काहेकि एहिन के द्वारा कुछ मनई अनजाने माहीं स्वरगदूतन के स्वागत-सतकार किहिन हीं।

³ अउर तोंहरे बीच माहीं प्रभू काहीं मानँइ के कारन जउन मनई जेल माहीं हें, उनखर इआ समझिके मदत करा, कि जइसन हमहिन जेल माहीं हएन, अउर जउने मनइन के साथ प्रभू काहीं मानँइ के कारन, बुरा बरताव कीन जात हय, उनहूँ के इआ समझिके मदत करा, कि कबहूँ उआ बुरा बरताव हमरेव साथ कीन जाय सकत हय।

⁴ अउर काज-बिआह सबके बीच माहीं मान-सम्मान के बात समझी जाय, अउर उनखर बिछउना निस्कलंक होंइ चाही, अरथात जिनखर बिआह होत हय, उनहीं पबित्र होंइ चाही, काहेकि परमातिमा ब्यभिचारिन, अउर दुसरे के मेहेरिआ के साथ नजायज सम्बन्ध बनामँइ बालेन के न्याय करिहँय।

⁵ अउर तोंहार पंचन के सुभाव लालची न होंइ चाही, बलकिन जउन तोंहरे पंचन के लघे होय, ओहिन माहीं सन्तोस करा; काहेकि परमातिमा इआ खुदय कहिन हीं, कि “हम तोंहईं पंचन काहीं कबहूँ न छोंड़ब, हमेसा तोंहरे साथय माहीं रहब।”

⁶ एसे हम पंचे निडर होइके कहित हएन, कि “प्रभू हमार सहायता करँइ बाले आहीं; एसे हम पंचे कोहू से न डेराब; मनई हमार पंचन के कुछू नहीं बिगाड़ सकँय।”

⁷ जउन तोंहार पंचन के अँगुआ हें, अउर तोंहईं परमातिमा के बचन सुनाइन हीं, उनहीं हमेसा सुध रक्खा; अउर बड़े ध्यान से उनखे चाल-चलन के नतीजा काहीं देखिके, उनखर जइसन बिसुआस रहा हय, ओहिन के मुताबिक तुहूँ पंचे बिसुआस करा।

⁸ काहेकि यीसु मसीह जइसन पहिले रहे हँय, उहयमेर आजव हें, अउर ऊँ हमेसा उहयमेर रइहँय।

⁹ एसे तूँ पंचे हरेकमेर के बाहिरी उपदेसन के बातन माहीं न परा, जउन बिसुआस से भटकाय देती हईं। बलकिन अपने मन काहीं परमातिमा के किरपा से बिसुआस माहीं मजबूत करा, इआ नहीं कि तूँ पंचे खाँय-पिअँइ के नेमन माहीं परि जा, काहेकि जे कोऊ ईं खाँय-पिअँइ के नेमन काहीं मानत हें, उनहीं आत्मिक जीबन के खातिर कउनव फायदा नहीं भ आय।

¹⁰ अउर हमरे पंचन के लघे एकठे अइसन बेदी ही, जउने माहीं चढ़ाए बलिदान काहीं खाँय के अधिकार ऊँ मनइन काहीं नहिं आय, जउन तम्बू माहीं सेबा करत हें।

¹¹ काहेकि महायाजक जउने पसुअन के खून, पापबली के रूप माहीं महापबित्र जघा माहीं लइ जात हें, उन पसुअन के देंह, जहाँ ऊँ पंचे डेरा डारिके रहत रहे हँय, ओसे दूरी जराई जात ही।

¹² इहय कारन यीसु घलाय, अपनेन खून के द्वारा मनइन काहीं पबित्र करँइ के खातिर, यरूसलेम सहर के फाटक के बहिरे क्रूस के दुख सहिन हीं।

¹³ एसे आबा हमहूँ पंचे घलाय, उहय अपमान काहीं सहत, जउने काहीं यीसु सहिन तय, अपने डेरन से बहिरे निकरिके यीसु के लघे चली।

¹⁴ काहेकि इहाँ हमार पंचन के कउनव स्थाई सहर नहिं आय, बलकिन हम पंचे उआ सहर के तलास माहीं हएन, जउन आमँइ बाला हय।

¹⁵ एसे आबा हम पंचे जउने ओंठन से इआ सोइकार करित हएन, कि यीसु प्रभू आहीं, उँइन ओंठन से यीसु के द्वारा परमातिमा काहीं स्तुति रूपी बलिदान हमेसा चढ़ाबत रही।

¹⁶ अउर तूँ पंचे भलाई करब, अउर दान देब न बिसराया; काहेकि परमातिमा इहइमेर के बलिदानन से खुसी होत हें।

¹⁷ अउर तूँ पंचे अपने आत्मिक अँगुअन के हुकुमन काहीं माना, अउर उनखे अधीनता माहीं रहा, काहेकि ऊँ पंचे तोंहरे आत्मिक बढ़ोत्तरी के खातिर, हमेसा खुसी से काम करत रहत हें, अउर उनहीं अपने ईं कामन के हिंसाब परमातिमा काहीं देंइ परी। पय तूँ पंचे उनहीं इआ मोका न दिहा, कि ऊँ इआ काम काहीं खुसी से नहीं, बलकिन बड़े दुख के साथ करँय, त इआ दसा माहीं तोंहईं पंचन काहीं कउनव फायदा न होई।

¹⁸ अउर हमहीं पंचन काहीं इआ पूर भरोसा हय, कि हमार पंचन के बिबेक सुद्ध हय; अउर हम पंचे हर हाल माहीं नीक काम करँइ चाहित हएन, एसे तूँ पंचे हमरे पंचन के खातिर प्राथना करत रहा।

¹⁹ अउर हम बिसेस रूप से इआ बिनती करित हएन, कि तूँ पंचे हमरे खातिर प्राथना करा, जउने हम हरबिन तोंहरे पंचन के लघे आय सकी।

²⁰ अउर सान्ती देंइ बाले परमातिमा, हमरे पंचन के प्रभू यीसु मसीह काहीं मरेन म से जिन्दा कइ दिहिन हीं, जउन गड़रन के महान चरबाहा आहीं, अउर उनहिन के खून से हमरे पंचन के साथ सनातन के खातिर करार बाँधिन हीं।

²¹ अउर उँइन परमातिमा तोंहईं पंचन काहीं, हरेक निकही बातन माहीं परिपूर्न करँय, जउने तूँ पंचे उनखे मरजी काहीं पूर करा, अउर उनहीं जउन कुछू नीक लागत हय, ओही ऊँ यीसु मसीह के द्वारा हमरे पंचन के भीतर पइदा करँय, अउर उनहिन के बड़ाई जुग-जुग होत रहय। आमीन।

²² हे भाई-बहिनिव, हम तोंहसे इआ बिनती करित हएन, कि इआ उपदेस के बातन काहीं सोइकार कइल्या; काहेकि हम तोंहरे खातिर ईं बातन काहीं संछेप माहीं लिखेन हँय।

²³ अउर तूँ पंचे इआ जानिल्या, कि हमार पंचन के बिसुआसी भाई तीमुथियुस जेल से छूटिगे हँय, अउर अगर ऊँ हरबिन हमरे लघे आय जइहँय, त हम उनखे साथय तोंहसे मिलँय के खातिर अउब।

²⁴ अउर तूँ पंचे अपने सगले अँगुअन काहीं, अउर सगले बिसुआसी भाई-बहिनिन काहीं, हमार पंचन के नबस्कार कहि दिहा। अउर इटली देस के रहँइ बाले घलाय, तोंहईं पंचन काहीं नबस्कार कहत हें।

²⁵ अउर तोंहरे ऊपर परमातिमा के किरपा हमेसा बनी रहय। आमीन।