इब्रानियन 1 - Bagheli Bible

परमातिमा के बचन उनखे लड़िका के व्दारा

¹ पहिले के समय माहीं परमातिमा, बाप-दादन से थोरी-थोरी कइके, अउर कइयकमेर से अपने सँदेस बतामँइ बालेन के द्वारा बातँय किहिन,

² पय ईं आखिरी दिनन माहीं अपने लड़िका के द्वारा हमसे पंचन से बातँय किहिन हीं, अउर उनहिन काहीं ऊँ सगले चीजन के बारिसदार ठहराइन हीं, अउर उनहिन के द्वारा ऊँ सगले संसार काहीं बनाइन हीं।

³ अउर ऊँ परमातिमा के महिमा के उँजिआर, अउर उनखे हरेक सुभाव के साछात तसबीर आहीं, अउर उँइन सगली चीजन काहीं अपने सामरथी बचन से सम्हारत हें। अउर उँइन मनइन के पापन काहीं धोइके, सगलेन से ऊँच जघा अरथात स्वरग माहीं, सबसे महान परमातिमा के दहिने कइती जाइके बइठिगें हँय।

⁴ अउर उनखर पद स्वरगदूतन से बढ़िके हय, काहेकि जउन नाम उनहीं बारिसदार के रूप माहीं मिला हय, उआ नाम उनखे नामन से खुब महान हय।

परमातिमा के लड़िका के महानता

⁵ काहेकि स्वरगदूतन म से परमातिमा कबहूँ कोहू से इआ नहीं कहिन, कि “तूँ हमार लड़िका आह्या, अउर तूँ आजय हमसे पइदा भया हय।” अउर इहव नहीं कहिन, कि “हम उनखर बाप होब, अउर ऊँ हमार लड़िका होइहँय।”

⁶ अउर जब ऊँ अपने पहिलउठा लड़िका काहीं संसार माहीं पठबत हें, त कहत हें, कि “परमातिमा के सगले स्वरगदूत उनखे गोड़न गिरँय।”

⁷ अउर ऊँ स्वरगदूतन के बारे माहीं इआ कहत हें, कि “ऊँ अपने दूतन काहीं हबा कि नाईं, अउर अपने सेबकन काहीं धँधकत आगी कि नाईं बनाबत हें।”

⁸ पय अपने लड़िका के बारे माहीं परमातिमा इआ कहत हें, कि “हे परमातिमा तोंहार सिंहासन हमेसा बना रही, अउर तूँ अपने राज माहीं न्याय के साथ सासन करिहा।

⁹ अउर तूँ धरम से प्रेम अउर अधरम से इरखा किहा हय; इहय कारन से परमातिमा अरथात तोंहार परमातिमा तोंहरे साथिन से बढ़िके तोंहार आनन्द रूपी तेल से अभिसेक किहिन हीं।”

¹⁰ अउर परमातिमा इहव कहत हें, कि “हे प्रभू, सुरुआत माहीं अपना धरती के नेव डारेन हय, अउर स्वरग अपना के हाँथे के कारीगरी आय।

¹¹ पय ऊँ सगले ओन्हा कि नाईं पुरान होइ जइहँय, अउर ऊँ नास होइ जइहँय; पय अपना हमेसा बने रहब।

¹² अउर अपना उनहीं पिछउरी कि नाईं लपेटब, अउर ऊँ पुरान ओन्हा कि नाईं बदल जइहँय, पय अपना उहयमेर सही-सलामत रहब, अउर अपना के जीबन के अन्त कबहूँ न होई।”

¹³ अउर परमातिमा कबहूँ कउनव स्वरगदूतन से इआमेर नहीं कहिन, कि “तूँ हमरे दहिने कइती बइठा, जब तक हम तोंहरे बइरिन काहीं तोंहरे गोड़े के नीचे धरँय बाली चउकी न बनाय देई।”

¹⁴ काहेकि ऊँ सगले स्वरगदूत सेबा करँइ बाली आत्मा आहीं, जउन मुक्ती पामँइ बाले मनइन के सेबा के खातिर पठई जाती हँय।