गलातियन 6 - Bagheli Bible

एक दुसरे के मदत करा

¹ हे भाई-बहिनिव, अगर तोंहरे पंचन म से कोऊ कउनव अपराध माहीं पकड़ा जाय, त जउन तूँ पंचे आत्मा के मुताबिक चलते हया, नम्रता के साथ, सही गइल म आमँय माहीं ओखर मदत करा, अउर तुहूँ पंचे सतरक रहा, जउने कउनव परिच्छा माहीं न परा।

² अउर तूँ पंचे एक दुसरे के कमी-घटी काहीं पूर करा, अउर इआमेर से मसीह के बिधान काहीं पूर करा।

³ काहेकि अगर कउनव मनई काबिल नहिं आय, तऊ अपने-आप काहीं काबिल समझत हय, त उआ अपने-आप काहीं धोखा देत हय।

⁴ एसे तोंहरे पंचन म से हरेक जन, अपने-अपने कामन के जाँच-परताल कइ लेय, अउर जब अपने कामन के जाँच कइ लेई, तब ओही दुसरेन के बारे माहीं नहीं, बलकिन अपनेन निकहे कामन के बारे माहीं घमन्ड करँइ के मोका मिली।

⁵ काहेकि हरेक जन काहीं आपन-आपन जिम्मेबारी खुदय उठामँइ परी।

⁶ जेही परमातिमा के बचन सुनाबा ग हय, ओही चाही कि ओखे लघे जउन निकही चीजँय होंय, उनमा से अपने बचन सुनामँइ बाले काहीं कुछ दइके मदत करँय।

⁷ तूँ पंचे धोखा न खा, परमातिमा के मजाक नहीं उड़ाबा जाय, काहेकि मनई जउन बोबत हय, उहय काटत हय।

⁸ काहेकि जे कोऊ अपने बुरे बिचार के बीज बोबत हय, त उआ अपने बुरे बिचार के व्दारा बिनास रूपी फसल काटी, अउर जे कोऊ आत्मा के खातिर बीज बोबत हय, उआ आत्मा के व्दारा अनन्त जीबन रूपी फसल काटी।

⁹ एसे हम पंचे निकहे कामन काहीं करँइ माही साहस न छोंड़ी, काहेकि अगर हम पंचे भलाई के काम करतय रहब, त सही समय आमँय पर हमहीं पंचन काहीं ओखर प्रतिफल जरूर मिली।

¹⁰ एसे जहाँ तक होइ सकय, हमहीं पंचन काहीं सगले मनइन के साथ भलाई करँइ चाही; खास करके बिसुआसी भाई-बहिनिन के साथ।

पवलुस के अन्तिम चेतउनी अउर अभिबादन

¹¹ तूँ पंचे ध्यान से देखा, कि कइसन बड़े-बड़े अच्छरन माहीं, ईं बातन काहीं हम अपने हाँथ से तोंहरे पंचन के खातिर लिखेन हय।

¹² एसे जेतने मनई सारीरिक रूप से देखाबा करँय चाहत हें, ऊँ पंचे तोंहरे ऊपर खतना करामँइ के दबाव डारत हें, कि जउने मसीह के क्रूस माहीं बलिदान के द्वारा मुक्ती मिली, इआ बिसुआस किहे के कारन ऊँ पंचे सताए न जाँय।

¹³ काहेकि खतना करामँइ बाले खुदय मूसा के बिधान के मुताबिक नहीं चलँय, पय तोंहार पंचन के खतना एसे करामँइ चाहत हें, कि जउने तोंहरे पंचन के सारीरिक दसा काहीं देखिके घमन्ड करँय।

¹⁴ पय हम पंचे केबल प्रभू यीसु मसीह के क्रूस के बलिदान माहीं घमन्ड करी, कउनव दुसरे बात माहीं नहीं, जउने के व्दारा हम संसार के खातिर मर गएन हय, अउर संसार हमरे खातिर।

¹⁵ एसे कोहू के खतना भ होय, चाह न भ होय एखर कउनव महत्व नहिं आय, महत्व केबल इआ बात के हय, कि हम पंचे पूरी तरह से नई स्रस्टी बन जई।

¹⁶ अउर जेतने मनई इआ नेम के मुताबिक चलिहँय उनखे ऊपर, अउर परमातिमा के इजराइल के ऊपर सान्ति अउर दया होत रहय।

¹⁷ चिट्ठी के आखिर माहीं, हम तोंहसे बिनती करित हएन, कि अब कउनव मनई ईं बातन के बारे माहीं हमहीं अउर दुख न देय, काहेकि हम यीसु मसीह के दास आहेन, एसे उनखे घावन काहीं अपने देंह माहीं लए चलि रहेन हँय।

¹⁸ हे भाई-बहिनिव, हम प्राथना करित हएन, कि हमरे पंचन के प्रभू यीसु मसीह के दया तोंहरे पंचन के आत्मा के साथ बनी रहय। आमीन!