गलातियन 4 - Bagheli Bible

¹ हम तोंहईं पंचन काहीं इआ बताइत हएन, कि जब तक बारिसदार नाबालिक रहत हय, त चाह सगले सम्पत के मालिक उहय होय, तऊ ओमाहीं अउर सेबक माहीं कउनव अन्तर नहीं होय।

² पय बाप के ठहराबा समय तक उआ रच्छा करँइ बालेन, अउर भन्डार के देख-भाल करँइ बालेन के देख-रेख माहीं रहत हय।

³ उहयमेर हमहूँ पंचे जब तक खुसी के खबर के बारे माहीं अनजान रहेन हय, त संसार के सुरुआत के सिच्छन के काबू माहीं रहिके, उनखर दास बने रहेन हँय।

⁴ पय जब परमातिमा के द्वारा निस्चित कीन समय पूर होइगा, तब ऊँ अपने लड़िका काहीं पठइन, जउन मेहेरिआ से पइदा भें, अउर मूसा के बिधान के अधीन रहिके ओखर पालन करत रहे हँय।

⁵ जउने मूसा के बिधान काहीं मानँइ बालेन काहीं ओखे अधीनता से छोड़ाय लेंय, अउर हमहीं पंचन काहीं बारिसदार होंइ के पूर हक्क मिलय।

⁶ अउर तूँ पंचे परमातिमा के लड़िका बन गया हय, एसे परमातिमा अपने लड़िका के आत्मा काहीं हमरे पंचन के हिरदँय माहीं पठइन हीं, जउन हे अब्बा, हे पिता कहिके परमातिमा काहीं गोहराबत हय।

⁷ एसे तूँ पंचे अब नोकर नहीं रहि गया, बलकिन लड़िका बन गया हय। अउर तूँ पंचे जब अब लड़िका आह्या, त परमातिमा तोहईं अपने राज के बारिसदार घलाय बनाइन हीं।

बिसुआसी लोगन के बारे माहीं पवलुस के चिन्ता

⁸ पहिले तूँ पंचे जब परमातिमा काहीं नहीं जानत रहे आह्या, त देबी देउतन काहीं परमातिमा मानिके उनखर दास बने रहे हया, जउन वास्तव माहीं परमातिमा न होंहीं।

⁹ पय अब त तूँ पंचे परमातिमा काहीं पहिचान लिहा हय, इआ कि इआमेर कही, कि परमातिमा तोंहईं पंचन काहीं पहिचानिन हीं, त पुनि तूँ पंचे उन निबल अउर निकम्मी मूसा के बिधान के सिच्छा के बातन काहीं काहे मनते हया, अउर पुनि उनखर दास काहे होंइ चहते हया?

¹⁰ तूँ पंचे त कउनव खास दिनन, महीनन, रितुअन अउर सालन काहीं मनते हया।

¹¹ तोंहरे पंचन के बारे माहीं हमहीं डेर लागत ही, कि कहँव अइसा न होय, कि जउन मेहनत हम तोंहरे खातिर किहेन हय, उआ बेकार होइ जाय।

¹² हे भाई-बहिनिव, हम तोंहसे बिनती करित हएन, कि तूँ पंचे हमरे कि नाईं होइजा, काहेकि हमहूँ तोंहरे पंचन कि नाईं होइ गएन हय; तूँ पंचे हमार कुछू बिगाड़े नहिं आह्या।

¹³ पय तूँ पंचे त इआ जनतेन हया, कि हम देंह से निबल रहेन हय, तऊ पहिलय पहिल तोंहइन पंचन काहीं खुसी के खबर सुनायन तय।

¹⁴ अउर चाह हम तोंहरे खातिर बोझय रहे होई, तऊ तूँ पंचे हमरे देंह के निबल दसा के कारन हमार तिरस्कार नहीं किहा, बलकिन तूँ पंचे हमार अइसन स्वागत किहा, जइसन कि हम परमातिमा के दूत इआ, कि खुद मसीह यीसु रहे होई।

¹⁵ अउर हम एखर गबाह हएन, कि अगर होइ सकत, त तूँ पंचे आपन आँखी घलाय निकारिके हमहीं दइ देत्या, पय अब उआ तोंहार पंचन के आनन्द मनाउब कहाँ चला ग?

¹⁶ त तूँ पंचे इआ बताबा, कि तोंहसे सही बोलँय के कारन, का हम तोंहार पंचन के बइरी बन गएन हय?

¹⁷ ऊँ गलत सिच्छा देंइ बाले तोंहईं पंचन काहीं अपने पच्छ माही करँइ के कोसिस करत हें, पय उनखर उद्देस निकहा नहिं आय। ऊँ पंचे इआ चाहत हें, कि तूँ पंचे हमसे अलग होइजा, जउने तुहूँ पंचे उनखे पीछे चलँइ बाले बनि जा।

¹⁸ निकहे उद्देस्य से अपने पच्छ माहीं करब उचित हय, अउर इआ हरेक समय होंइ क चाही, पय इआ नहीं, कि जब तक हम तोंहरे पंचन के साथ माहीं हएन।

¹⁹ हे पियार लड़िकव, जब तक तूँ पंचे पूरी तरह से मसीह कि नाईं नहीं बन जाते आह्या, तब तक हम तोंहरे पंचन के खातिर उहयमेर दुखन काहीं सहित हएन, जइसन लड़िका होंइ के समय मेहेरिअन के पीरा होत ही।

²⁰ अउर हमार त एतनी बड़ी इच्छा ही, कि हम अबहिनय तोंहरे पंचन के लघे आइके सान्ती से बात करी, काहेकि तोंहरे बारे माहीं हमहीं खुब चिन्ता होइ रही हय।

सारा अउर हाजिरा के उदाहरन

²¹ तूँ पंचे जउन मूसा के बिधान के अधीन होंइ चहते हया, त हमसे बताबा, का तूँ पंचे पबित्र सास्त्र माहीं लिखी बातन काहीं नहीं सुने आह्या?

²² कि अब्राहम के दुइठे लड़िका भें, एकठे उनखे मेहेरिआ से, अउर एकठे दासी से।

²³ पय जउन लड़िका दासी से पइदा भ, उआ साधारन रीत से मनई के इच्छा से पइदा भ, अउर जउन लड़िका उनखे मेहेरिआ से पइदा भ, उआ परमातिमा के दीन वादा के मुताबिक पइदा भ।

²⁴ ईं बातन के एकठे अउर मतलब इआ हय, कि ईं दुइठे मेहेरिआ मानो दुइठे करार के प्रतीक आहीं, एकठे त सीनै पहार माहीं कीन गे करार आय, जउने से केबल दासय पइदा होत हें; अउर हाजिरा उआ करार के प्रतीक आय।

²⁵ यहूदी लोगन के व्दारा मूसा के बिधान काहीं पालन करँइ के कारन, इआ समय के यरूसलेम गुलामी माहीं हय, अउर हाजिरा अरब के सीनै पहार माहीं कीन गे करार के प्रतीक आय।

²⁶ पय उआ दूसर मेहेरिआ सारा, जउन हमार पंचन के महतारी आय, स्वरग माहीं स्थित यरूसलेम सहर के प्रतीक आय, अउर उआ अजाद हय।

²⁷ काहेकि पबित्र सास्त्र माहीं लिखा हय, कि “हे बाँझ मेहेरिआ तोंहरे कबहूँ लड़िका नहीं भ, त अब उराव मनाबा, तूँ लड़िका होंय के पीरा के अनुभव कबहूँ नहीं किहा, त खुसी के गाना गाबा, काहेकि छोंड़ी गे मेहेरिआ के सन्तान, बिआही मेहेरिआ के सन्तान से जादा होइहँय।”

²⁸ हे भाई-बहिनिव, तूँ पंचे इसहाक कि नाईं हया, जउन परमातिमा के दीन वादा के मुताबिक पइदा भ।

²⁹ अउर जइसन उआ समय माहीं होत रहा हय, कि देंह के इच्छा के मुताबिक पइदा भ लड़िका, पबित्र आत्मा के सक्ती से पइदा भए लड़िका काहीं सताबत रहा हय, उहयमेर अबहिनव घलाय होत हय।

³⁰ पय पबित्र सास्त्र माहीं लिखा हय, “दासी अउर ओखे लड़िका काहीं निकारि द्या, काहेकि दासी के लड़िका बिआही मेहेरिआ के लड़िका के साथ बारिसदार होंइ के हक्क कबहूँ न पाई।”

³¹ एसे हे भाई-बहिनिव, हम पंचे दासी के सन्तान न होंहेन, बलकिन बिआही मेहेरिआ के सन्तान आहेन।